《草地囝仔做牧师》

 | | | 转寄

生活ê原则

作者 林宗要 2010.11.07

路加福音六章36～43节

原则kap秩序是人生生活ê要素。咱若看人类史就会发现到近代ê人类社会kap以前往完全无仝：复杂kap 多样性是伊ê特色。咱用台湾ê状况来观察ê时就koh-khah了解，这三、四十年来台湾ê社会thang用急变ê社会来形容伊，会成做án-ne或者是台湾社会ê必然性。因为每一个国家、社会lóng会有chit种经历，自某种型态beh踏入另gōa一种社会型态ê时确实会有chit种现象。过去咱ê社会是以农业为主，伊比较khah单纯，但是自三、四十年前，咱ê社会就进入工商社会，因为工商ê发展，自然造成农业ê衰退。今á日若到农村去看，咱就会了解chit种事实，台湾农村kan-ta剩一kóa五十岁以上ê老翁仔某，青年人lóng离开阿，因为都市社会khah有吸引力。

我teh读册ê时chūn，台北ê人口只有二十六万人，chit-má已经超过了十倍以上！Tī人口不断增加，生活空间颠倒减少ê状况中，人ê生活问题就会有复杂ê变化，chit种复杂ê情形是ē-tàng tùi人生社会ê实况来体验tio̍h。Tòa-tī台北市ê人siōng深刻ê体验，to̍h是交通ê混乱，确实，台北市ê交通bōe-sái koh再恶化啊，因为主要道路若发生事故，án-ne就会真惨。

无秩序mā是现今台湾社会ê特色，咱每一个人对chit种现象lóng真清楚，chit种情况mā可能kap咱ê民族性有关；因为咱是自私无公德心ê民族，一个自私ê人当然bē有守法ê精神kap行为，tiāⁿ-tiāⁿ表现出siáu贪ê心态。阮tau附近巷仔内tòa一楼ê人 lóng kā路边ê停车位占leh，有一位见义勇为ê人士就tī in ê壁顶或者铁板顶koân用油漆写二个大字「自私」，有人即时处理，有人iáu是m̄ chhap。这是小tāi-chì，mā ē-tàng看出人心ê 无守法，无守法ê人自然是无胆识ê心胸，tùi che会演变出真chē人性ê问题出来，咱社会状况ê惊人，亦是kap人心有关。哲人巴斯卡讲：「上帝创造人，m̄是天使mā m̄是禽兽，但是当人想beh做天使ê时，就会发生悲惨ê现象」人m̄-nā做无成天使颠倒变成禽兽。Tī咱ê社会中有真chē比禽兽koh-khah不如ê行为，chiah-ê人ê心态to̍h是án-ne，因为in想超出人ê界限，人想beh取代上帝ê位置。

巴斯卡koh讲：「Jú ē-tàng守法jú有幸福thang讲」，为什么tī欧美一kóa国家in ê社会状况会hit种完美理想？一位出国九年ê台湾人描写瑞士ê社会，讲锁匙lóng khǹg tī固定ê所在，主人无tī朋友mā thang自由出入，原因何在？人人守法ah！守法表现出国民ê气质，有气质ê国民当然伊ê社会国家就会有进步kap幸福，这是事实。确实咱tī he kóa进步ê国家内，会发现tio̍h in ê生活是有秩序、有原则ê。咱看社会生活中hiah-ê破坏秩序kap原则ê人，生活必定是惊人--ê。Hiah-ê惊人ê行为当事人，lóng是生活tī无秩序、无原则ê结果。真chē脚步踏差ê有为青年lóng kap che有关。譬如：有一个中年人有温暖ê厝，bó͘贤慧、kiáⁿ儿可爱kó͘-chui，伊本身有理想ê khang-khè，生活tī富裕中，但是因为一次ê舞会，kap舞女结识同居，因为舞女ê要求ê jú来jú chē，伊侵占公款，事发hông判刑，伊ê bó͘ mā因为绝望请求离婚离开，致使失去一切。Koh有一位三十九岁ê博士因为poa̍h-kiáu去刣一位好额ê妇人，事发hông判刑终身监禁！相信tī咱ê社会中chit款事例真chē，主要原因tī bōe-sái安份守己，坚持人生ê原则所造成！ To̍h是头前引用巴斯卡ê名言：人想beh做天使，结果颠倒是悲惨ê结局。基督徒mā是án-ne，真chē hō͘人无认为是基督徒，因为伊ê信仰生活无秩序kap无原则，chiah发生惊人ê悲剧者数目bē少，这是基督徒值得警惕ê tāi-chì。人tī复杂多变ê社会中ài用人生必守ê原则作伊生存ê根据，chit种人生ē-tàng通顺完美。用信仰生活ê准则作信仰生活ê根据ê时，信仰chiah ē-tàng tī án-ne复杂多变ê状况中有突破kap成长ê表现。

今á日咱tùi chit段圣经来学习主耶稣教咱基督徒应该有ê生活原则是什么？咱tio̍h用什么原则来作生活取舍ê根据neh？当然基督徒生活ê原则必须确立tī上帝ê话，伊是记tī圣经中，但是若用che来做原则ê时，咱会知影伊ê范围siuⁿ阔。Tī-chia主耶稣bat教示咱几件生活中重要ê原则：

一、 仁慈心怀
仁慈ê心怀像天父ê仁慈，tī马太福音五章48节主耶稣讲：「所以lín ài完全，像lín天父ê完全仝款。」相信咱ē-tàng了解主耶稣tī-chia所讲ê意思，人当然无可能有像上帝ê纯全，但是soah ē-tàng生活teh符合上帝ê要求中，相信主耶稣tī-chia向咱要求ê，to̍h是基督徒ē-tàng完成受创造ê目的。

上帝创造人是在teh荣耀他家己，只要人ē-tàng完成伊，to̍h是达成天父上帝ê纯全。耶稣ài基督徒ê生活原则达到像天父上帝ê仁慈，当然人无可能像上帝ê仁慈，像上帝ê爱，主耶稣tī-chia所说明ê是khah属于功用性。人teh生存中若不断phah拼完成上帝所交托ê任务，就ē-tàng达成上帝要求人hông造ê目的，也thang理解像上帝ê仁慈kap像上帝ê完全。所以基督徒生活ê原则ê主要条件必须ài确立teh服从上帝ê旨意为主。保罗tī罗马人书十二章1～2节所讲--ê：「所以兄弟啊、我以上帝ê慈悲劝lín将身躯献上，当作活祭，是圣洁ê，是上帝所喜乐ê，lín án-ne事奉，是理所当然--ê。Mài效法chit-ê世界只要心意更新chah有变化，叫lín察验啥物是上帝ê善良纯全thang喜乐ê旨意。」用che来解释基督徒ê生活原则siōng适当。

二、 用祝福代替咒诅
近代教育强调多鼓励、o-ló chiah m̄免处罚kap责难。九月中tī高雄有一位国校老师因为体罚一位蛮皮ê查某囝仔成为社会争论ê议题，到底老师kám ē-tàng体罚学生？这是一个自古到taⁿ ê老问题，mā是见仁见智ê问题，当然学生ê问题kap父母教养kiáⁿ儿有关。咱ē-tàng tùi社会生活中看tio̍h父母对kiáⁿ儿教养ê问题，实在是每一人无仝，有人严格、有人m̄管、有人用心全力teh教，自然会有无仝ê人格出现。主耶稣tī chia ài咱基督徒对生活ê原则是确立teh对人ê关系，尽量用祝福o-ló取代咒忏kap责备，因为基督徒必须ài有良好ê社会生活来见证信仰。Tī基督徒ê社会生活中，有真chē无仝ê接触，尤其是人kap人之间ê关系，tī基督徒信仰中，tiāⁿ-tiāⁿ会要求基督徒bē-tàng企图去评断别人ê责任，应该向所有ê人显出基督徒应该有ê疼心。咱ē-tàng tùi社会生活中体会tio̍h，有一kóa人一开嘴to̍h是用khau洗kap批评ê言词，试想tī-chia人kám ē-tàng和平相处？主耶稣tī马太福音七章12节「所以无论何事，lín愿意人án怎对待lín，lín mā ài怎样对待--人」，相信chit种生活方式是咱各人lóng了解--ê，因为人ê本性to̍h是企盼人ē-tàng对家己好，无想beh别人对待家己bái，ē-sái讲是自私ê人性往往无法度达到chit种生活方式，soah致使造成人生ê真chē不幸kap问题。有一篇故事：gín-á tī山内，伊为tio̍h一件无顺chiông ê事来懊恼受气、大声讲pháiⁿ听ê话，tùi山内传转来ê声音mā是kap伊所喝ê内容仝款，伊jú大声骂pháiⁿ听ê话，回音mā是大声pháiⁿ听，gín-á向伊ê老母tâu，母亲教伊mài用恶言相向，应该试看觅讲一kóa好听o-ló ê言语，gín-á听从去做，回音就变好听啊！虽然这是自然现象中ê事实，soah ē-tàng做咱生活上ê原则。

主耶稣tī chia要求基督徒ê是建立和平ê社会，是达到人ē-tàng用祝福o-ló代替咒忏kap批评。Tī án-ne境况中必然有完美理想ê表现，mā是造就帮助人ê利器，基督徒ài m̄-thang 对chit种生活方式放弃。巴斯卡克里亚（南加大教育系教授）有一本《疼、生活kap学习》ê册，真受欢迎，受学生ê肯定，siōng主要ê原因to̍h是伊用上帝kā咱讲ê精神，用鼓励、祝福、o-ló ê教育方法，因此效果真好，咱知影现代美国ê大学生真无简单，但是对伊soah是非常肯定。

三、 危险ê领导（路加福音六章39～40节）
耶稣koh再用比喻来提醒咱一件生活上ê问题，tī人ê社会生活中，必须有领袖，这是真自然ê tāi-chì，所以生存tī社会中ê人加加减减lóng有chit种「领袖欲」，beh做领袖ài做大。若机构中有一个khah出色ê位置，人人就会不择手段去争取，这情景咱ē-tàng tùi实际社会看出，chiah ē-tàng完全了解。有时tī教会中ê选举mā会有chit种情形发生，长老会ê总会议长kap中会ê议长kap khah重要ê职位，加减lóng会有chit种表现，这mā是自然ê现象，基督徒kap牧师mā是有欲望ê凡人，差别ê点是tī个人ê节制而已。因此领袖欲是难免--ê，但是问题是tī一个人若无实力只空有hit-ê屈势，soah想beh做领导者，he会有危险ê下场，上帝用chheⁿ-mê领导chheⁿ-mê，来说明chit种危险ê领导，因为chheⁿ-mê是有先天ê缺陷。这并m̄是轻视，实在是因为in ê目chiu无法度看tio̍h光明ê世界，欠缺光明ê条件是in ê siōng大问题，咱用灵魂之窗来形容目chiu看bē-tio̍h ê人to̍h是失去了灵魂之窗ê人，是真痛苦ê人生。像海伦．凯勒，世上mā只有伊一位，其他chheⁿ-mê ê人大概lóng khah困难kap目chiu明ê人竞争。Chheⁿ-mê ê人khah需要依赖别人或者物件chiah ē-tàng行动，khah pháiⁿ去担任导游ê责任，因为这是超出伊ê能力范围，「无力硬beh抢大担」，结果一定会发生问题，人生生活bē-tàng疏忽chit种事实，人生有一件重要ê事实to̍h是衡量咱本身ê能力，照各人所领受ê才能去完成人生ê一切状况，这是人生ê大原则。

台语俗语：「无毛鸡假大格」，m̄知家己ê能力，iáu-beh假气派，咱一定ài了解，bē-tàng做出能力所无法度负担ê部分。同时chit种危险ê领导mā会出现tī教会ê体制问题上，牧师kap教会ê关系，因为伊是领导者，一ê无注意就会陷入chit种危险ê领导中！

四、 认bat家己（路加福音六章41～42节）——等于表现疼ê人生
主耶稣用梁木kap刺来说明基督徒ê生活原则，是必须ài建立teh认bat家己ê世界，chit-ê比喻是针对人性通病，to̍h是tiāⁿ-tiāⁿ看tio̍h别人ê问题、缺失，但是soah m̄知家己ê têng-tâⁿ，别人身上ê一kóa问题咱真简单发觉tio̍h，但是家己本身ê一kóa问题家己soah无知影。耶稣用梁木kap刺来比喻实在是siōng适合啊。主耶稣深知人性ê状况，tiāⁿ-tiāⁿ是看会tio̍h别人看家己soah真困难。Chit种情形to̍h是tī咱生活中真chē对人严格，对家己真chhìn-chhái ê表现，尤其是汉人，对家己ê问题lóng kā伊掩崁、否定！你看hiah-ê犯大案ê凶犯，teh法官审问ê时（尤其是初审ê时），tiāⁿ-tiāⁿ是极力否认，甚至咒chōa！但是对人soah真刻薄，真gâu批评、指责别人ê过失kap têng-tâⁿ，这to̍h是m̄-bat家己！虽然tī咱ê教示中，tiāⁿ-tiāⁿ会听tio̍h一句真有意思--ê「律己严，待人宽」ê话，ē-sái讲是tī事实生活上，真少做tio̍h chit点。咱khah chē ê心态，to̍h是ná亲像耶稣ê比喻。有一篇故事：两兄弟困中昼ê时，hông画乌面，醒来ê时各人心内有数，lóng teh笑对方ê乌面但是家己m̄知影，in ê老母叫in去照镜，koh教示in，人生ài tiāⁿ-tiāⁿ看家己，反省检讨家己ê生活，bē-tàng只看别人！咱人生经验中，时常听tio̍h ê to̍h是人teh批评、议论别人，真少听tio̍h人teh反省、思考家己、检讨家己。

信仰需要建立tī不断反省中，咱ài ê不时反省忏悔认罪。为什么人会有án-ne ê通性？主要原因the欠缺疼心，一个充满爱心ê人，bōe chhìn-chhái去批评、议论人ê缺失、是非，因为爱会遮盖一切m̄-tio̍h，有爱心ê人，伊所看tio̍h ê只有完全ê美好，无爱心ê人所看tio̍h、所注意--ê to̍h是别人身上所有ê缺失。咱知影人ê无完全kap缺失，日本俗语讲：「无论何人，你kā伊拍，lóng会有土粉」，每一个人lóng有缺点，但是恶人身上mā有可能有优点！譬如：有一ê gín-á尾指残缺，人一直看伊，伊不欢喜讲，为什么大人一直看这ki残缺ê尾指，soah m̄看其他好ê九ki指头仔neh？上帝教示咱ài不断认bat家己，时常儆醒省思，用完全ê爱心表现出咱ê关爱tī别人ê身上！

基督徒tī社会上beh建立良好ê生活原则，发挥做光做盐ê特质，来荣耀主。