《草地囝仔做牧师》

 | | | 转寄

群体动力

作者 林宗要 2010.10.31

马可福音二章1～12节

咱tiāⁿ-tiāⁿ听人讲：「人生kah-ná teh poaⁿ戏」确实是án-ne，tī一出戏中有各种无仝ê角色，各人演各人ê角色，有人演主角，有人演配角，有ê只是chiok细ê角色，虽然演ê角色无仝，soah lóng ài尽siōng大ê phah拼，án-ne人生chiah会有价值、有内容。M̄-koh人tī现实生活中，tiāⁿ-tiāⁿ怨叹家己为啥bōe-sái演主角？是toh位输--人？仝款是父母生ê，仝款受教育，仝款ê 工作机会，别人hiah-ni̍h有成就，为何家己是hiah-ni̍h仔卑微？当人有chit种无健全ê心态出现ê时，hit-ê人一定无法度扮好伊ê角色。因为伊ê人生一直teh kap别人比较，俗语讲：「人比人，气死人」，人生是bē-tàng用kap人比较来衡量伊ê价值--ê，若无就会活teh怨天怨地怨自己ê日子中，造成人生ê消极kap 不利，án-ne m̄-nā生活不如意，甚至无可能完成人生应该ài负ê责任，发挥伊ê特质，soah造成损失kap thó- chè ê人生现象。Chit种人生观m̄是基督徒应该有--ê，基督徒必须ài了解，上帝照人ê才能hō͘ in无仝ê角色，只要有尽力完成应该有ê责任，tī上帝ê面前，你ê人生就会受tio̍h肯定。基督徒ê人生必须先建立tī chit-ê正确ê观念上，chiah ē-tàng用喜乐，负责ê心态去面对上帝所交托ê人生。当一个人有正确ê人生观ê时，伊就bōe kap用人比较来评价家己，án-ne mā chiah ē-tàng用伊所有ê能力去营造人生，成就一个有作为koh丰收ê性命，虽然无一定会成做总统或者其他重要职务，但是至少会有好ê表现，只要尽忠职守，就会有好ê人生结果。主耶稣tī马太福音二十五章14～30节中ê比喻，有五千ê仆人koh thàn五千，有二千ê mā koh thàn二千，主人hō͘ in ê评语lóng是仝款——良善koh忠心ê仆人，但是人虽然有高尚ê职位，却对职位不忠，iáu会hông弃绝，咱thang tùi历史发现chit-ê真理，历史是人生成败siōng好ê注解，当咱思考tio̍h chit种情形ê时，就必须用严谨ê心态去面对家己ê人生。

Tī人生中，有时扮ê角色并m̄是家己所愿意ê，是社会替咱决定--ê，譬如：男女结婚，虽然是当事人ê意愿，但是婚了后ài完成夫、妻、老父、老母ê角色，人必须ài用完全负责ê态度去完成。一个完美ê人生应该是扮好所有ài扮ê角色，án-ne就会受tio̍h社会肯定，hō͘人看做成功ê人，因此咱ē-tàng了解正常ê人生to̍h是扮好家己ê人生角色，但是咱必须了解一件tāi-chì to̍h是正常ê定义是指tī社会规范以内来讲。

人teh社会行踏，时空tiāⁿ-tiāⁿ会有变化，一千年、二百年、五十年前ê社会kap现代ê社会一定会有所差别，仝一个时空之间ê差别tī社会性顶koân mā有变迁，譬如：外国人当街相唚，tī台湾可能是妨害风化；细汉时庄脚妇女人m̄穿衫，但是若tī都市可能to̍h bōe通；美国家庭父母kap少年hit辈tòa作伙须要分担tòa kap食ê开销，tī台湾必定会hông看做忤逆不孝。因此，社会规范mā m̄是绝对--ê，tī台湾ē-tàng ê，tī外国有时可能bōe-tàng。咱见面ê时欢喜大声吵闹认为chē是热情，tī美国soah会hō͘厝边隔壁通知警察来警告、开单。聚会中若有临时到ê人客，咱会讲「什么风kā你吹--来！」外国人soah kā伊看做真无礼貌ê行为。

因此咱必须了解咱ê正常性是用咱ê社会做标准，m̄是外国ê标准。只要你ê人生完成你tī现实境况中ê一切，你to̍h是一位正常ê人生。

一、 无正常ê人生
今á日咱tùi chit段圣经来思考伊ê教导，咱已经tī顶面大约说明人生ê正常性kap社会现实面ê关系。基督徒是活tī chit种正常ê人生中比别人koh-khah正常ê人，因为基督徒ê双重身分，一方面ài tī社会ê规范中运作生活，演好家己ê人生角色；当做一个学生、一个工人、一个老师、或者公务员、生意人、事业家、主妇，事先ài好好--á扮好家己所负担ê角色，然后tī属灵ê工夫上，chiah有可能承担一切属于你范围内ê属灵事工！属灵ê正常性是tī正常ê现实人生培养出来--ê。Mā to̍h是讲，人若是bōe-sái尽家己ê本分，自然无法度完成属灵应该有ê本分。这to̍h是约翰所讲：「无爱伊看ê tio̍h兄弟，就bōe爱看袂着ê上帝！」Chit种信仰ê理解是基督徒人生siōng重要ê khang-khè——To̍h是实实知知了解正常性tī基督徒人生所占ê位置。今á日咱看tio̍h chit位主角是一位ài四ê人来扛ê半遂病人，是半身不遂、四肢麻痹ê人，伊一切ê生活，lóng必须óa靠别人ê帮助，tùi人生ê立场来讲，伊是一位无正常ê人，chit种生理上有欠点ê人生社会上tiāⁿ-tiāⁿ无法度kap正常人竞争，虽然社会上mā有一kóa 人虽然有缺陷，soah有了不起ê表现，但是大部分ê人lóng无法度kap正常ê人竞争，这是事实。

Chit种无正常ê人生会成做别人ê负担，tī人生现象中是无理想--ê。人大汉了后就beh过ē-tàng独立自主ê生活，若是iáu须别人辅助chiah ē-tàng过日子，m̄-nā会成做别人ê负担，有时koh会卸世众。理想ê人生是表现tī充实良好ê生活品质上，因此正常ê人生须时常小心避免表现出伊ê歹看hit一面，尽力达tio̍h人生ê完美。但是一个无法度自主ê人，有时难免会有缺失、漏气、见笑ê状况，chiah-ê是人所无愿意见tio̍h ê现象，理想ê人生就是beh去除chiah-ê现象，无正常ê人生就无可能有chit种能力啊。丧失希望mā是chit种无正常人生ê心态之一，tī社会中就发生bē少chit种悲哀事件。确实，人若像chit位瘫痪者，伊ê人生是绝望残败--ê，无法度完成伊应该有ê人生角色是gōa ni̍h á使人同情，一般人lóng会尽量想办法改变chit种绝望无奈ê困境。

二、 藉羣体动力来恢复人生ê正常性
Chit位可怜ê半遂者长年因为病疼倒tī眠床顶，无法度化解伊ê绝望kap悲哀。虽然伊人生ê境况是hiah-ni̍h-á不利，但是伊ê求生意志是人类共有--ê，伊可能听tio̍h主耶稣所行ê神迹kap救恩，但是因为无法度行动，mā只有听人讲ê份，佳哉伊有四位朋友向伊伸出援手，决定用in ê力量，帮助chit位不幸ê人，chit种力量to̍h是群体动力。群体动力必须由合一ê精神完成一致ê行动，bōe-sái有异心kap自私ê表现，虽然是四个人，但是必须成做一体，有完全ê行动配合，chiah ē-tàng完成使命。Chiah-ê人有心beh帮助朋友克服困难，m̄-koh in ê心意soah hông群众阻挡，无法度扛病人来亲近耶稣。Chit种现象有时mā会发生tī咱ê人生中，有时咱有一kóa理想kap美好ê异象，会hō͘现实状况所阻隔，尤其teh属灵ê事工上特别是án-ne。「因为人chōe bē-tàng近前」，若无法度到主耶稣面前，in ê目的就无法度达成。目的虽然hō͘群众阻挡，难能可贵--ê是这四位朋友无因为阻碍放弃，chit种决定ê心志是完成人生目的ê主要动力。

Tī信仰ê世界，基督徒ài有chit种信心，tī属灵ê tāi-chì 顶koân chiah有所利益。最后in ê办法to̍h是「K ā厝顶拆掉」，chit-ê动作有可能有一kóa暴力，无合常理，但是soah ē-tàng看出in ê勇气、决心kap绝对ê信心，che是完成人生目的bē-tàng欠ê要素。

基督徒ê人生必须自觉，因为tī人生境况中会不断有阻碍存在tī上帝kap咱之间。若当时hit四人灰心，失去勇气kap决心，就无法度突破困境完成使命，一定ài克服困境，chiah ē-tàng听tio̍h主ê声音，进一步完成目的。Tī人生ê旅程中，咱时常经历chit种经验，尤其是tī属灵ê领域kap主耶稣ê关系上，当一个基督徒看khah远ê眼光，有理想ê属灵心态ê时，tiāⁿ-tiāⁿ因为生活中有siuⁿ-chē ê阻碍chiah无法度完成。Tú亲像当时chit位半遂ê人hō͘四位好友扛来beh亲近耶稣，但是人chē kā in挡tio̍h阿，因此用拆厝顶ê举动解决。看起来好亲像是粗鲁无礼、无规矩ê行为，但是事实上咱soah tī chit件tāi-chì顶面看tio̍h in无比ê热情kap信心，是真切实在ê信仰行动。Chit种心态kap行动，to̍h是咱教会siōng急siōng需要--ê，因为教会ê存在，是不断带领人亲近上帝，接受上帝ê应允，ē-sái讲是tī现实ê教会生活中一直存在真chē ê阻碍阻隔咱kap主耶稣之间ê正常关系，这是基督徒信仰生活需要深思ê问题。

三、 拯救ê完成
Chiah-ê人因为kā厝顶拆掉chiah完成心愿，to̍h是为tio̍h ē-tàng hō͘所扛来ê不幸ê病人ē-sái khǹg tī主耶稣ê脚前，另gōa一方面，主耶稣mā深知in ê用心，主耶稣因为in ê信心医治了chit位不幸ê人。Chit种群体动力，to̍h是hō͘ chit位不幸ê病人终其尾ē-tàng到主耶稣面前ê siōng大原因，不幸kap悲哀只要到主耶稣面前，就lóng会得tio̍h解决。今á日咱tùi chit件tāi-chì ē-tàng看出，in所付出ê心血得tio̍h回报，群体动力ê结果是得tio̍h主耶稣ê医治，chit-ê过程mā to̍h是教会存在siōng真切ê内容，tī-chia咱ē-tàng看tio̍h拯救ê完成所必须付出ê过程是刻苦、牺牲、合作、甚至冒险，咱看chiah-ê人，in beh扛chit位行动不便ê病人到主耶稣面前，确实经过真chē困难，过分舒适ê教会生活是无好ê效果ê，因为教会生活是背十字架ê生活，所以基督徒有时生活tī/真chē患难中mā是ē-tàng理解--ê。日本ê贺川丰彦用上帝ê疼tī当时ê散赤人tòa ê所在内做工，经历真chē人间ê苦难，hō͘流氓欺负、攻击是tiāⁿ-tiāⁿ有ê tāi-chì，但是伊甘愿承受，因为伊感受tio̍h无经过背十字架ê过程是无法度完成上帝所托付ê事工。当然一个人ài有chit种心态，必须有koân度ê刻苦、牺牲ê自觉，同时咱mā知影chit款事工m̄是凭家己ê力量ē-tàng完成--ê，是ài靠群体ê动力，teh ê群体生活中，所要求ê to̍h是坐仝一只船ê精神，比如保罗tī哥林多前书十二章中强调教会ê功能，咱ê教会存在tī世上，siōng大ê目的to̍h是teh发挥教会ê功能，因此建立爱ê共同体ê教会生活是教会siōng迫切需要ê，可惜ê是教会tiāⁿ-tiāⁿ有无仝心、无合作ê情况，hō͘主伤心。

Teh教会生活中，因为信仰本身to̍h是冒险，为tio̍h beh解决chit位半身不遂ê朋友，che四个人必须ài冒险去拆厝ê厝顶，（佳哉古早时ê建筑无钢筋混凝土），chit种举动本身to̍h是冒险ê行为。Tī-chia咱mā ē-tàng发觉tio̍h今á日教会ê存在，有时mā 需要去冒险chiah ē-tàng完成主交托ê使命，譬如公元二千年福音运动ê宣教计画，to̍h是一种冒险ê事实。为tio̍h救chit位绝望ê朋友，无顾一切，虽然是冒险也tio̍h完成。

结论：做一位符合上帝旨意ê基督徒，关心教会。今á日教会ê任务，beh领chhōa人到主ê面前，发挥群体动力去完成主所托付ê使命。