《草地囝仔做牧师》

 | | | 转寄

现实kap信仰

作者 林宗要 2010.10.24

马太福音六章25～34节

Tī现实生活中，每一个人lóng会体验tio̍h真chē无愿意tú-tio̍h ê人生问题，chiah-ê问题对咱lóng有负面ê影响，譬如患难、痛苦、不幸、悲哀等等，比如圣诗三二二首「khiā世界各项大欠，koh-khah好ê好事mā有乌点」，实在是针对咱现实状况siōng真实ê描写。若看咱生存ê现象，就ē-tàng明白无论任何人，加减lóng有伊ê人生问题kap困扰，用台湾ê现实来讲，hiah-ê有权ê大官或者家道丰富ê好额人，伊ê人生状况mā有hō͘ in困扰ê tāi-chì，「Koh-khah好ê好事mā有乌点」，是值得咱去思考--ê。所谓ê「好事」是指hō͘人看做理想、完美、幸福kap有价值ê状况，但是tī人生中，chiah-ê大好事，确实mā有「乌点」。乌点是什么？是kap大好事倒反ê，伊是人生中ê缺憾、问题、患难、不幸等等负面ê现象，chit种有乌点ê人生状况m̄是人所希望ê，每一个人lóng无佮意伊，soah无法度完全避免chit种缺陷，这形成社会上真chē ê问题。因为每一个人lóng期望伊ê人生会koh-khah完美、koh-khah理想，这to̍h是人ê现实课题。Tī án-ne状况中，人tiāⁿ-tiāⁿ需要面对chiah-ê问题所带来ê焦躁、挂虑ê生活，chit种焦烦kap忧虑，ē-sái讲是现代人ê特质，无论你ê条件如何，lóng避免不了chit-ê事实。

耶稣基督tī马太福音六章25～34节讨论chit-ê问题，to̍h是针对人生现实ê情形。因为tī现实ê每一ê角落，咱lóng会看tio̍h人生ê焦烦kap忧虑，伊同时mā是人生ê整体性，虽然人了解，伊对咱不利，但是soah无法度超越，有人讲「焦烦是人生ê慢性自杀」圣经kā信徒讲，克服忧虑ê人生，beh建立tī真实ê信仰上。马太福音十章29节「两个粟鸟仔m̄是卖一分银mah？若是lín父不准，一个mā bōe-sái落tī土脚」。这kā咱讲，咱所奉侍ê主，连hia 细项ê事物，lóng teh他眷顾ê行列，何况是有他形象ê人类？主耶稣kā咱讲，ài有完全信靠仰望ê生活，án-ne人生chiah ē-tàng体验tio̍h喜乐kap平安。保罗tī伊ê书信中mā讲，「应该做一ê无挂虑，只要藉tio̍h祈祷、祈求kap感谢，将lín所beh kā神讲，神所赐hō͘咱出人意外ê平安，必定tī基督耶稣，保守lín ê心怀意念」（腓立比书四章6～7节），无挂虑ê生活是信徒交托上帝ê信仰生活，因为忧虑会吞蚀上帝所赐hō͘人ê平安kap喜乐，mā to̍h是人心受俗世状况影响，引起生活上不安kap烦恼，tùi人ê立场来看，这是难免ê事实，tú-tio̍h问题就会bōe食bōe困，若tùi信仰ê角度去观察，是kap信仰有关，因为这是bōe-tàng学习「将万事交托主」ê生活ê结果，心中充满tio̍h焦烦kap不安。

主耶稣将十字架ê道路kā学生讲了后，学生ê心情非常恶劣，主讲：「Lín心内mài忧愁，lín信神，mā当信我」（约翰福音十四章1节），对信徒来讲，teh tú-tio̍h人生真chē困扰，心情恶劣ê时，主ê话确实是siōng大ê安慰kap力量，咱ē-tàng tùi人生生活ê实况kap上帝ê话koh-khah了解圣经tī人经历患难ê时重要ê功能，这mā是教会一直teh强调信徒必须亲近上帝ê话ê主因。

因为生活中，任何人lóng无法度避免受tio̍h人生患难hông困扰，mā难免心情忧愁不安，只有上帝ê话chiah ē-tàng赶走chiah-ê忧虑，赐hō͘人平安ê生活，因为只有hō͘忧虑离开，人chiah ē-tàng体验喜乐kap满足，这to̍h是人所追求ê人生理想kap幸福。

一、 现实ê人生（患难中ê人生）
有人讲人生是tùi患难形成ê，因为无论人ê境况如何，lóng会体验tio̍h真切实ê人生ê患难kap问题，有一个故事：古早时一位少年国王，chiah三十五岁，命令有智慧kap学识ê官员，限定tī一段时间内整理出人类重要ê人生内容，过了十年，写成一大本册呈现tī国王面前，但是国王无时间去读chiah-ê作品，叫in koh再研究浓缩，koh过了十年，完成剩三大本，其中半数官员已经老啊无着是过身去，但是国王iáu命令koh再精简，koh过十年，只chhun一位八、九十岁ê老臣，the̍h-tio̍h一本小册tī国王面前，chit时国王已经倒tī眠床顶，伊讲，chit-má我已经无时间，mā无气力thang欣赏你ê作品，kám-ē-tàng真简要ê kā我讲人生实况？Chit-ê衰弱ê老臣向国王讲：人生是生来受苦，受完苦to̍h是死。

Chit-ê故事kā咱讲人生ê现实teh患难，若单纯用人ê立场去看，人生确实是真讽刺、真矛盾、真空虚ê存在。Chiah tī chit种现状中，人到底有什么价值？这有可能是历代圣贤所研究ê问题。Chiah tī基督教信仰中，基督徒ē-tàng用信仰配合，对人生问题khah有突出ê见解，因此基督徒虽然mā是生活tī真chē患难中，但是soah ē-tàng tī chit种现实状况中表现出性命ê价值。耶稣ê主要khang-khè，是四处传扬上帝国ê恩典，但是mā时常有医治kap赶鬼ê神迹，神迹虽然m̄是耶稣ê主题，但是伊soah怜悯处tī患难中ê人。约翰福音五章记载耶稣医治一个致病三十八年ê人，hit-ê情景to̍h是人生ê写照，tī毕士大池边kheh满有各种病ê人，今á日咱若去大病院，就ē-tàng了解病痛ê人是hiah-ni̍h-á chē，这mā是现代人生ê现实，包括kui-ê人生ê全部——肉体、心灵、精神上ê病痛，咱ē-tàng説，人生ê现实是hō͘所有痛苦包围。当咱看报纸社会版，又koh是另外一个人生ê现实，hō͘咱想起摩西ê祈祷：「咱一生ê年日是七十岁，若是勇壮thang到八十岁，但是其中所矜夸ê，不过是劳苦愁烦」（诗篇九十篇10节），摩西一生有丰富ê人生体验，伊ê诗tú好说明伊体验ê结果，是人生实在ê情形。Tī七、八十年性命中间，人ē-tàng争取tio̍h什么？ē-tàng夸口ê是什么？是权力或者财富？伊ê结果通常lóng像摩西所讲：不过是劳苦愁烦而已。咱若用摩西ê祷词来看现实ê人生状况，确实是各阶层ê人lóng生活tī chit种劳苦愁烦ê景况中。旧约圣经约伯记针对人生痛苦ê问题提出相当深刻ê事实，「人生在世一定tú-tio̍h患难」，（约伯记五章7节），「人是妇人所生，日子短少，患难khah chē」（十四章1节），tī-chia完全说明人生ê情形，实在是背重担ê人生。

二、 看顾雀鸟ê上帝（马太福音十章29～31节）
若beh了解人生现象，必须tùi人类起初ê历史开始，起初始祖犯罪是认为食了善恶果会带hō͘人类智慧，破坏了上帝kap人ê立约，人无遵守上帝ê命令，虽然in ê目chiu开啊，soah发现家己褪腹澈无体面ê现实，当in面对上帝ê时，in听见上帝ê咒忏，「你必定终身劳苦，chiah ē-tàng tùi土脚得tio̍h食--ê……你必定汗流满面chiah ē-tàng食饱，一直到你归土」（创世记三章17～19节），然后始祖hông赶出本来上帝赐hō͘人ê乐园，这to̍h是圣经提出人类ê生活情形kap真实ê问题。虽然人用家己ê方法，用叶仔做衫裤来遮盖家己ê身躯，结果是上帝用皮衣hō͘人穿，chit-ê问题説明，解决犯罪ê方法m̄是靠人ê方法，是tī上帝ê救赎，所以tī基督教信仰中beh化解人生患难kap痛苦ê问题，是tī上帝ê拯救，这是基督教。

信仰ê真理，tī基督教信仰中khah m̄是óa靠自身ê修为或者道德生活去克服人性ê患难，是tī信徒kap上帝建立关系，mā to̍h是tī现实人生ê状况中去体验kap上帝同在ê人生，只要咱ê人生，体验tio̍h「神若帮助咱，siáng 挡咱会tiâu neh？」（罗马人书八章31节），tī信仰者ê世界内底，真chē人体会tio̍h上帝同在ê事实。

旧约时代，约瑟ê人生，先知以利亚tī强权哈亚王下ê生活，但是以理ê狮穴，或者是新约时代保罗ê传道生活中所经历ê患难，初代教会所受ê迫害，lóng teh说明保罗所讲ê chit句话，这to̍h是主tī马太福音十章29～31节所讲ê，咱ê主上帝是看顾雀鸟ê上帝，连chit种siōng小，无什么价值ê粟鸟仔，lóng tī上帝ê看顾中，koh-khah免讲咱chiah-ê有他形象ê人类，kiám m̄是上帝koh-khah ài看顾ê对象mah？主耶稣teh说明，上帝对kui-ê宇宙ê关心是非常完全--ê，犹太人ê拉比有一句俗话説「上帝坐teh养饲世界，tùi水牛ê角到虱母ê卵」。信徒应该有ê心态，to̍h是建立kap上帝ê关系tī美好ê基础上，因为确信「伊是咱teh患难中随时ê帮助」（诗篇一四六篇1节，一三八篇7节），主耶稣mā向学生宣示，应允学生「Tī世上lín有苦难，但是lín thang好放心，我已经赢世界」（约翰福音十六章33节），先知尼西米向以色列人讲：「Lín mài忧愁，因为靠耶和华得tio̍h ê喜乐是lín ê力量」（尼希米记八章10节），问题ê重心是tī kap chit位看顾粟鸟仔ê上帝建立坚固ê信仰关系，因为「伊ài救伊ê人民脱离一切ê患难」（诗篇三十四篇6，17节）。焦烦kap忧愁是现实人生ê病态，虽然人时常beh用家己ê方法来解决，其中siōng具代表性ê tio̍h是酒，中国俗语讲：Án怎会解忧？只有杜康（Hō͘中国人看做造酒始祖ê人），但是chit种刺激kap麻醉忘忧，只是暂时性，而且恶性循环，人类历史kā咱讲一个事实：爱食酒ê人永远无法度化解伊ê忧愁，颠倒是增加人生ê苦楚，koh-khah堕落，若亲像箴言二十三章29～30节，「Siáng有祸患，siáng有斗争，siáng有哀叹，siáng无故受伤，siáng目空充满赤红色，to̍h是he流连lim酒，tiāⁿ-tiāⁿ去chhōe调酒ê人」，相信chit种人生状况，咱mā thang tùi人生实际生活去了解。

基督徒tī人生中mā有可能像一般人ê经历，有真chē焦烦kap忧愁，信仰kā咱讲，咱ē-tàng完全交托主上帝，因为伊关心咱，连he siōng细，无什么价值ê粟鸟仔，伊lóng看顾。何况是咱chiah-ê hō͘伊救赎ê人？

三、 现实kap信仰（基督徒ê人生道路）
俗语讲：「人生bōe满百，常怀千岁忧」，伊teh说明现实ê人生状况，chit种焦烦kap忧虑ê人生，往往是成做真chē人生问题ê主因。

这to̍h是咱teh强调无论任何人，lóng免不了chit种人生ê忧患，基督徒只有tī上帝ê恩典中，chiah ē-tàng完成上帝旨意ê生活，tī现实生活中，必须用真诚ê信仰去体会信仰ê siōng koân境界——上帝国ê真理，因为伊是上帝hō͘信他ê人siōng大ê祝福，当一个人现实生活中tú-tio̍h真chē忧虑ê时，上帝国ê信仰的确会带hō͘ in真chē喜乐kap ǹg望。假使hiah-ê忧虑无霸占伊ê人生，生存会hō͘希望kap喜乐ê心情取代，就算有真chē困境，mā ē-tàng突破，tú亲像保罗tī罗马书五章1～5节，「咱既然因信称义，就藉tio̍h咱ê主耶稣基督，ē-tàng kap神相随。咱koh藉tio̍h伊，因为信chiah ē-tàng进入现在所khiā ê恩典中，而且欢欢喜喜ǹg望神ê荣耀。M̄-nā án-ne，to̍h是teh患难中mā是欢欢喜喜--ê，因为知影患难生忍耐，忍耐生熟手，老练生ǹg望，ǹg望koh bē致使见笑」，bē致使见笑ê人生to̍h是人生ê理想kap期待ê目标。

基督徒面对现实生活中ê状况ê时，tio̍h-ài靠信心来生活，建立「Bē致使见笑」ê人生，这是siōng koân信仰，mā是咱信仰生活应该phah拼ê方向。上帝人民ê现实生活，kap普通人仝款，有真chē困境，好亲像出埃及记二章24节，三章7、9节，hiah-ê以色列人生活tī水深火热中，上帝有看见，mā知影in ê苦情，但是有时选民mā是koh生活tī痛苦中，chit时需要有信仰ê功课：学习忍耐，thèng等候上帝ê救赎，这是信仰生活中一项重要ê过程。

既然基督徒已经了解咱ê主知影一切情形，mā确信伊会救咱脱离一切ê患难，因此虽然tī现实人生有真chē困扰kap问题，但是mā m̄ mài hō͘伊成做生活上ê忧虑，因为对一个基督徒来讲，chiah-ê困扰有bái无好，主耶稣kā咱讲ài向自然界学习，hiah-ê粟鸟仔无烦无恼，安然自在ê生活，山中ê野花，in ê境况无法度kap人类相比，但是in soah lóng无忧虑、无烦恼ê生活。

所以一个真诚确信上帝大能ê人，tī伊ê生活中应该是bōe为tio̍h生活忧虑，一方面信徒ài学习认bat，另外一方面ài交托hō͘主，彼得前书五章7节「 Lín beh将一切ê忧虑囥hō͘神，因为伊顾念lín」，因为忧虑是m̄信ê表现，确信上帝ê人永远bōe忧虑，生活中难免有问题，但是藉tio̍h信仰ê引chhōa，咱将万事交托hō͘主。基督徒已经体会「一天ê难处一天当就有够」（马太福音六章34节），所以主教咱二个生活方式：
（A） 先求上帝ê国kap伊ê义
（B） Mài替明á载忧虑

因为挂虑明á载是m̄信ê行为，明á载m̄是属于咱ê，咱只有今á日，主耶稣m̄是ài咱pîn-tōaⁿ或者无负责任，是ài咱完全尽今á日ê责任，chit种生活方式to̍h是信仰生活，基督徒ê信仰生活to̍h是尽伊chit-má ê状况来荣耀主，这是现实生活中siōng根本ê问题，这mā是基督徒ê人生道路，尽siōng大ê phah拼去完成做人应该做ê事工，通常tī人生中真chē悲剧是人无想beh去做人应该ài做ê tāi-chì，tī-chia就有真chē人生ê问题。

结论：基督徒ê现实生活kap一般人仝款，mā会tú-tio̍h真chē困扰kap问题，必须teh信仰上建立家己，将一切交托hō͘主，因为主关心属于伊ê人民，「Siáng ē-tàng hō͘咱kap基督ê疼隔开neh…….」（罗马人书八章35节）