《草地囝仔做牧师》

 | | | 转寄

安心ê人生

作者 林宗要 2010.10.17

约翰福音十六章33节；使徒行传二十七章18～25节

Tī咱生活环境中，当人tú-tio̍h问题ê时，第三者tiāⁿ-tiāⁿ会用「安lah！安lah」来安慰chit-ê人。相信各位lóng bat有chit-ê经验，因为平安ê生活是人人所ǹg望--ê。有时，人若tú-tio̍h重大ê危机，虽然损失真大，只要无危害tio̍h性命，定定感觉he已经是不幸中ê大幸。无m̄-tio̍h，人若tú-tio̍h危机，to̍h会对人生有重大ê影响，若一个家庭发生状况，比如厝内ê一份子，特别是khah重要ê人出问题ê时，kui家伙á lóng tī不安ê状况内，由此可见平安对人ê重要性。因此，现实人生中，大部份ê人lóng以平安为siōng重要，但是人生真正ē-tàng平安mah？是m̄是真正ē-tàng安心过生活？保罗tī罗马人书三章17节讲「平安ê路，in m̄-bat知影」，chia所提tio̍h ê人，是罪犯，m̄-bat上帝ê世人，mā to̍h是保罗所讲亏欠上帝荣耀ê世人，mā to̍h是咱教会所讲ê「罪人」，罪人ê生活，实在无平安thang讲，因为无论tùi肉体或者是心灵方面去看，「罪」lóng是hō͘人不安ê主因。咱看社会上hiah-ê犯法ê人，虽然ē-tàng暂时逃避法律ê制裁，但是in ê良心必定不安。

有一ê小故事「钱kap良心」：十gōa年前有一位有理想ê青年beh创业，可惜伊只是公司ê小职员，身边koh无有jōa-chē钱，有一日kap一位年老ê同事，老人领有退休金三十万kho͘（是当时青年员工一百个月ê薪水），teh落车ê时bē记chah走，等伊发现ê时车已经m̄知驶去tó位啊（hit时hit-ê青年ē-tàng tùi车窗掷那包钱），退休老人因为行动不便soah来跋倒，无gōa久就过身啊，这钱是准备beh hō͘伊细汉cha-bó͘-kiáⁿ去西班牙学艺术ê部分费用。那青年得tio̍h hit笔钱，虽然生活得tio̍h改善，mā有创业，但是soah一直良心不安。后来青年用尽办法chhōe-tio̍h hit-ê老人ê cha-bó͘-kiáⁿ，共伊讲详情，而且付出相当ê数目补偿伊，hō͘家己有机会thang赎罪。M̄-nā hō͘ châ-bó͘ gín-á teh生活上无所欠缺，并且iáu去自首，关了三、五冬chiah出狱，因为án-ne，伊ê良心chiah得tio̍h真正ê平静。

Tī咱ê社会中，chit种情况bē少，这是teh说明tī人心内，犹原有上帝所hō͘咱ê属性，一般人叫做「良心」或者「天良」，过去台湾社会讲「有良心ê人，一人已经过身，一ê人iáu未出世」或者讲「鼻孔向下者无一ê有良心」，这tio̍h是基督教信仰中所强调ê「犯罪ê人，无一个好人」。Tú亲像保罗tī罗马书三章所强调ê，有罪ê人生是充满不义、乖谬、偏离正道，无行善--ê，连一个好人mā无。罗马人书三章13～16节，形容chiah-ê犯罪ê人，恶质ê罪行，to̍h是人间所讲充满了各种歹代，17节强调平安ê路in m̄-bat知影。用属灵ê观点来看，犯罪ê人m̄-bat平安是啥；但是咱知影平安是ùi上帝hia来ê，他chiah是赐平安ê主。咱看保罗书信，差不多每一张书信ê开始lóng有一句「赏赐平安ê上帝」（罗马人书十六章20节；腓立比书四章7～9节），另外一句「愿您tùi阮ê父神kap主耶稣基督得tio̍h恩典平安」Chit句请安语tī保罗ê批中时常thang看tio̍h，咱ê上帝是赏赐平安ê上帝！因此主耶稣时常向学生讲一句：Lín放心，是我，mài惊。（马太福音十四章27节）Teh行神迹ê时他mā定定向hiah-ê人讲：放心，起来，你ê罪已经赦免阿，你ê信共你救ê等等ê话语。咱siōng熟ê一句话to̍h是约翰福音十六章33节「我将chiah-ê tāi-chì kā lín讲，是beh叫lín tī我内面有平安。Tī世上lín有苦难，但是lín ē-tàng放心，我已经赢了世界。」此句话是主耶稣叫信他ê人安心生活，只有tī主耶稣内底ê人生chiah会体会tio̍h真实ê平安，因为人ê不安是因为罪，主耶稣已经替他所有ê人担当所有ê罪，所以一个愿将罪hō͘主耶稣承当ê人，一定ē-tàng体会tio̍h罪ê释放，chit种释放是生活安心ê基石。因为基督徒已经体会tio̍h赏赐平安ê上帝是in ê主，所以基督徒ê人生实在是thang好囥下重担而且有平安ê人生。咱tùi下脚几方面来思考：

一、 体会赦罪ê安心
（马可福音五章34节；路加福音七章50节，八章48节）

主耶稣行神迹ê时定定会用「Gín-á，你ê罪赦免啊」，然后行神迹，siōng ē-tàng引咱注意--ê，to̍h是hit位血漏十gōa年ê妇人，伊用尽办法，开干伊所有ê家产iáu无法度治好伊ê病，有一次看tio̍h主耶稣tī人群中，伊认为只要摸tio̍h主耶稣ê衫裤，就ē-tàng治好伊ê病症，果然伊信心ê行动，hō͘伊ê人生问题得tio̍h解决，虽然伊信心ê行动是暗中teh进行（只有伊家己知影），但是主耶稣soah ài伊行出来告白伊ê信仰，当伊完成信仰告白了后，主耶稣向伊讲：「你ê信kā你救啊，平平安安ê tńg去pah，你ê病好啊。」相信chit位得tio̍h主耶稣接纳ê妇jîn人，一定因为主ê应允chiah tī伊ê人生中有充分ê平安。因为伊过去hō͘病疼缠身，无法度有平安ê日子，m̄-koh因为伊信心ê行动解决了伊人生ê绝大痛苦，hō͘伊体会tio̍h平安ê人生。

Tī基督徒ê人生中，siōng ē-tàng感受ê生活to̍h是经过主耶稣所赐ê信仰，体验赦罪ê平安，这是人生siōng值得放心ê所在。只要基督徒愿将家己ê罪lóng囥tī十字架ê宝座头前，一定ē-tàng感受tio̍h人生真正ê平安。写《天路历程》ê本仁约翰tī/册--内提起hit位基督徒虽然决心beh离开the-beh灭亡ê城，m̄-koh iáu有真chē俗务the触缠，hō͘伊tī天路历程中ài背tio̍h各种重担，tī chit种背重担ê日子中，实在无法度体会tio̍h平安ê实质！当伊来到基督ê十字架面前ê时（当伊giâ头看主基督ê时）伊所背ê重担chiahthang完全囥下，了后伊ê天路历程体验就完全无仝啊。这是基督徒信仰生活上ê重要课题。每一个基督徒必须体验tio̍h平安ê生活，绝m̄是kan-ta嘴讲讲或者是守戒规而已，是tī基督徒家己ê信仰生活丰富ê体验，mā to̍h是基督徒ài愿意将家己所有ê一切交hō͘主基督，家己无koh背重担ê时，咱ê人生chiah有hông赦罪ê体验，án-ne，基督徒chiah ē-tàng ùi心肝内产生充分ê喜乐kap平安ê生活。咱mā thang tùi税吏撒该人生ê改变来思考，当伊iáu无tú-tio̍h主耶稣ê时，是一个有钱但是不仁ê人，但是当伊体验主耶稣kā伊赦罪ê喜乐了后，伊ê人生就充满tio̍h快乐kap平安，相信伊chit种平安ê人生m̄是金ē-tàng得tio̍h --ê。Tī诗篇三十二篇1～2节「得tio̍h赦免伊ê m̄-tio̍h，遮盖伊ê罪--ê，chit种人是有福ê。只要心内无诡诈，耶和华bōe算是有罪--ê，chit种人是有福--ê。」相信基督徒ē-tàng明白hō͘人喜乐ê信仰内容，基督徒siōng大ê幸福并无kan-ta限制tī现实ê物质生活，更加是tī基督徒ê罪得tio̍h赦免，chit种赦罪ê人生体验是促成hō͘基督徒有够额ê能力去面对kap经营伊ê人生ê主要动力。因此一个真实ê体验tio̍h赦罪ê基督徒，一定ē-tàng有平安ê人生。

二、 逆境中ê心安
使徒行传二十七章保罗坐船beh去罗马。Iau未出发chìn前，伊bat警告船长，bē-tàng出帆以免危险，但是soah无得tio̍h接纳，出帆了后，真正像伊所讲--ê船tī大海中tú-tio̍h chiok大ê风涌，保罗soah tī危险中成做安慰kap鼓励ê动力。咱ê一生，每一个人难保bōe tú-tio̍h危机、逆境，这并m̄是咱所愿意，每一个人lóng期待ē-tàng生活tī美好安定ê环境中，但是chit种美好ê现实往往是人ê理想，人khah会面对tio̍h真chē无愿意见tio̍h ê逆境，tī生活中不断面对一kóa生份ê环境，危机四伏以及未知ê前程，tī上或者经济上有真chē挑战kap问题ê时，咱会感觉孤单无助，chit种心理上ê压力增加咱情绪上ê困扰kap紧张。对一个确信耶和华是咱ê牧者ê基督徒，一定ē-tàng体会tio̍h他一定会指引咱人生ê道路，赐hō͘咱面对逆境困难ê能力，对一个确信上帝ê人，确信上帝会替他ê名引chhōa伊ê子民行义ê路。

确实人lóng会为tio̍h 未知ê前途烦恼、不安。使徒传二十三章11节，当暝，主khiā-tī保罗身边讲：「放心pah！」意思是to̍h算tī罗马皇帝面前mā m̄免惊，因为主一定会kap伊同在。对一个信徒来讲，有主同在，无论tī任何所在、任何景况lóng ē-tàng放心！但是以理书所讲ê狮穴kap火窟，是真惊人ê情形，但是因为有主ê同在，就变做荣耀灿烂了，基督徒ê人生ài有chit种体验，只要上帝kap咱同在，就m̄惊任何逆境，因为有主ê所在，逆境会成做圣路，苦境变成圣路ê人生体验，就ná圣诗二八七首所描述--ê：梦中看见天开，荣光出现，上帝施落恩情天地相连，试炼kah-ná主圣使，所过凄惨烦恼成伯特利。「苦境变做圣路」确实是基督徒ê信仰生活ê宝贵内容。咱ê人生定定会处tī苦境中，但是m̄免惊，只要你ê人生中有主ê同在，就会改观，当一个人tú-tio̍h主ê圣使将苦境变为圣路ê时，伊过去所有ê试炼、烦恼、悲惨ê状况，kám m̄是lóng消失去啊mah？所以人必须tī人生道路中储备ē-tàng化解逆境ê真理，to̍h是主kap你同在，会随时听tio̍h主ài咱放心ê声音。

三、 Tī苦难中ê安心（约翰福音十六章33节）
主耶稣讲「Tī世上lín有苦难，但是lín thang好放心」，只有主所应允ê是真实无虚假，kap人ê誓言无仝。Tī人ê社会中，mā有类似ê保证，tiāⁿ-tiāⁿ听人讲：「囥一万ê心」，ē-sái讲是事实证明he是无可靠--ê。有一位人士将台湾ê房地产卖掉，得tio̍h ê钱差不多有千gōa万kho͘，伊phah算beh到美国置产。伊ê好朋友，kā伊讲目前台湾ê利息好，保证安全妥当，经过朋友再三ê保证，果然将全部一千万kho͘借hō͘朋友，chit开始有提了几个月ê厚利，心中有淡薄á欢喜，但是无gōa久tio̍h变成血本无归ê下场，soah hō͘伊破产。民国七十八年台湾股市当teh热烈ê时，有人用厝借钱伍佰万投入股市，心中认为一定会thàn钱。头先iáu有一kóa甜头，但是无gōa久tio̍h崩盘，自一万二千点变成三、四千点，一千万chhun二、三百万，最后只有卖厝还债，bó͘ ma7ka7伊离婚来离开。

有一位姊妹ê老父鼻á bōe爽快去chhōe医生，医生讲是敏感而已，无什么关系，安心lah！但是当事人bōe放心koh再经过三位医生ê诊断竟然是第二期鼻咽癌。Chiah-ê事例说明了世人所讲ê放心、放心，但是结果soah无法度放心，这to̍h是人啊。到底siáng ē-tàng hō͘人实实在在放心neh？相信tī世间上，若ē-tàng chhōe-tio̍h一位绝对thang hō͘咱放心ê对象ê时，咱确实会完全无保留ê将一切交托hō͘伊，但是事实上世间上真oh chhōe-tio̍h chit种人，因为人ê一切lóng会改变。对基督徒来讲，咱了解，主耶稣是咱绝对ē-tàng交托ê对象，因为他是咱ē-tàng完全信赖ê救主，只要咱愿意将一切交托hō͘他，表现出绝对ê相信，好亲像圣诗二七五首「siōng好ê朋友to̍h是耶稣」所吟唱--ê，咱ê心失落不安，或者是挂虑艰苦代，to̍h是咱iáu未深信主，无放心交托主ê缘故，因此基督徒ê信仰生活若ē-tàng实实在在信赖主，交托主，就ē-tàng实现平安ê人生。因为对一位深信体验上帝同在ê信仰者来讲，任何世间上ê挂虑，身躯上、精神上ê负担，家庭ê问题、事业ê问题、社会ê问题、人生ê苦难，这款tāi-chì，chē kan-nā啥，但是lóng bē影响基督徒kap主耶稣之间ê感情。Tú亲像保罗tī罗马人书八章31节以下所提无论什么困难、困苦、迫害、腹肚gōa枵、gōa sàn-chhiah、危险，甚至死亡lóng无法度阻档一个真诚ê基督徒kap主耶稣ê感情kap信心。只要基督徒有chit种对主耶稣的确信，ná亲像保罗tī腓立比书三章ê告白用认bat主耶稣做上好ê宝，án-ne就ē-tàng放弃任何会影响tio̍h kap主耶稣ê实质关系ê事物。因为chit-ê人世间ê苦难对信徒来讲是ē-tàng放心--ê，伊ê关键tī对主耶稣ê确信，因为基督徒若ē-tàng确信主耶稣，真自然tio̍h就会明白上帝所讲ê约翰福音十六章33节ê内涵，问题teh把握你kap上帝之间ê关系。假使无建立良好ê关系，当然基督徒ê生活就无法度tī伊ê人生中得tio̍h肯定。

人生现实ê状况，有真chē问题kap困难，基督徒mā仝款，m̄-koh基督徒ài因信来坚立tī任何困境中，因为基督徒已经体验tio̍h人生ê上好ê宝。人生境遇kap困难定定kap咱生活斗阵，只有tī你人生中建立ē-tàng放心ê实体，he就是hō͘主耶稣基督tī你ê人生排第一位。