《草地囝仔做牧师》

 | | | 转寄

义重如山

作者 林宗要 2010.10.10

箴言十四章4～7节，二十七章6～10节；约翰福音十五12～15节

中国、埃及、巴比伦、印度是古代ê文化大国，有辉煌灿烂ê历史，尤其是古代中国，有真chē值得夸耀ê史迹，但soah因此造成中国人ê骄傲性格，鄙视外族，视伊ê为蛮夷之帮，用天朝自居，闭关自守，排斥一切ê近代科技，比如义和团对抗八国联军，竟然相信家己ê刀仔会赢过外国人ê铳kap炮，结果造成二百年来中国ê悲惨运命。用当年日本明治维新来讲，中国条件比日本优势，可惜冥顽不灵，m̄知影改革，造成近代中国ê不幸。

确实，中国有真chē了不起ê文化，伊ê五伦、五常、四维八德ê论调非常有气势，可惜伊m̄-nā是中国人ê嘴口话，真gâu讲，论述mā真清楚，soah欠缺实行ê生活，因此虽然有气势、理想ê美丽ê蓝图，soah无法度达tio̍h目标，人生ê理想目标若bōe-tàng达成，一切lóng是空嘴哺舌。

用守法来讲，自认为是天朝之民，应该比附近番邦khah文明chiah合理，但是tī社会生活中，soah时常看着颠倒ê事实，hiah-ê hông看做番邦ê欧美人，tī守法顶面反倒tńg koh-khah完美。为何会án-ne？主因tī中国文化kap基督教文化ê差别，确实欧美人ê文化比中国文化khah差、khah慢，为什么in会发展做现代文明国家？但是chiah-ê古文化ê中国、埃及、巴比伦、印度ê现状无法度kap欧美文明相对抗？主因tī伊背后ê文化基础，chiah-ê欧美文化经过基督教ê洗礼chiah完全革新了in ê社会、风俗、人心，mā to̍h是耶稣基督救赎ê福音tī人心kap社会中所发挥ê影响力，比如保罗所讲：「人若tī基督内底，就成做新造ê人，旧事已经过，lóng变做新ê啊。」这是基督教文化kap其他文化无仝ê点。一般人感觉，只要靠自身ê修为kap行善ê功德就ē-tàng变化家己，但是对hō͘罪性所入侵ê人心，实在m̄是靠人ê修为ē-tàng kā伊改变--ê，这to̍h是为何tī中国，有án-ne完美ê伦理道德标准，但是中国人soah bōe-sái完全实行ê原因。

Tī中国伦理中，真少hō͘人悔改、认罪、重生ê生活，通常是hō͘人控制家己chiah达tio̍h人性ê完美，但是hō͘罪性所占ê人性实在无可能用任何人为ê方法来修正，chit种对人性ê罪恶ê态度是形成人是m̄是ē-tàng重生悔改ê主因。

Tī教会中时常有人用「破去ê铜锣」来说明，任何ê修补lóng iáu有破去ê声，必须重新造一个新--ê，chiah ē-tàng恢复原来ê状况，人ê原理mā相仝！

人若无tī基督耶稣救赎ê宝血内底重新彻底来悔改，是无可能恢复原有上帝形象ê人性！咱thang tùi耶稣kap尼哥底母ê对话来思考chit-ê问题，因为活tī上帝国ê生活方式to̍h是上帝创造人ê目的，伊soah因为人ê 罪chiah hông破坏，修复ê方法无teh óa靠人为ê任何修为或者积德，伊是teh接受耶稣基督ê福音，彻底悔改来成做重生ê人生，因为主基督已经用他ê宝血来成做信他ê人ê siōng好ê朋友，tú亲像约翰福音十五章12～15节所讲ê内容，耶稣基督叫学生做朋友，m̄是奴仆；（奴仆虽然会服从主人ê命令，但是伊khah机械性，khah m̄是人性ê服从，teh信仰上khah无价值），ē-tàng彼此相疼、互相信任，是成做朋友ê基本条件，耶稣基督以万主之主、万王之王ê身分，临到世上，称呼相信他ê人——是罪恶满满ê重罪人做朋友，甚至替chiah-ê朋友失—去性命，chit种关系，咱用义重如山来形容，iáu感觉不足，这是基督徒信仰生活ê特质。约翰福音十五章16节：「M̄是lín拣我，是我拣lín，并且分派lín去结果子，叫lín ê果子常存」，tī-chia，咱看tio̍h主ê恩典tī信ê人身上。

基督徒ài体会「Hông拣ê信仰」是确立tī对上主ê主权kap恩典绝对ê信仰告白，使徒保罗tī加拉太书四章9节：「Chit-má lín既然认bat神，koh-khah ē-sái讲是hō͘神所认bat ê……」腓立比书三章12节：「这m̄是讲我已经得tio̍h啊，已经完全啊，我是尽力追求，或者ē-tàng得tio̍h基督耶稣所得tio̍h我ê」（日译做hō͘基督耶稣掠tio̍h），chit种信仰告白to̍h是基督徒kap耶稣之间实实在在ê信仰体验。

一、 一般ê朋友观
咱thang tùi人生社会实况来看一般人所交ê朋友，有一位学者提出，四种朋友bē-tàng交往。
1） 忘恩背义ê人，bē-tàng kap伊做朋友。朋友来往是互相之间有理想，有健康ê来往关系，忘恩背义ê人无chit种条件。
2） 爱功劳贪利ê人，bē-tàng kap伊做朋友。Chit种人心态、价值观已经无正，bōe-sái成做可取ê朋友。
3） 口是心非之人。假影伪善，对人扶扶tháⁿ-tháⁿ，但是时常有真惊人ê举动，可能带来真大伤害。
4） 卑鄙奸诈之人。当然若m̄是经过长时间ê交往，人ê心性真pháiⁿ完全了解。

Tī社会中，咱通常thang看tio̍h下列类型ê朋友：

(1) 利害关系ê朋友：
建立teh互相利用ê利害关系之上。当互相利用价值存在ê时，友情表现真理想、完美。譬如下港某地检察处ê首席检察官，平日朋友有够 chē，而且是重量级人物，有一日因为案件牵连hông收押，chiah-ê朋友竟无一人去探访关心，hō͘伊深深感慨人情ê现实，一年了后案件解决，chit位检察官对朋友ê看法完全改变，无koh交任何利害关系ê朋友。

(2) 酒肉朋友：
Tī现实社会中，chit种关系ê朋友为数bē少，有享受、有利益ê时，不时高朋满座，无享受无好处ê时，就lóng看无人影，德国俗话讲：「酒肉朋友，伊ê性质to̍h亲像酒仝款，一暝就过去啊。」因为人是现实ê存在，现实ê景况对人生ê态度影响真大，现实状况好ê时，tio̍h有真chē朋友，实例：有一位sing-lí人seng-lí做得真好，全盛ê时有十gōa间店，厝内ta̍k顿lóng开二、三桌，因为食客真chē，但是无外久seng-lí失败，树倒猢狲散，全部走了啊，伊感叹讲：人实在太现实啊！因为chit种酒肉朋友只有teh有酒肉ê时chiah有友情，若无tio̍h完全无，当然chit种朋友mā 无可能有什么值得收成ê果实！

(3) 势利朋友：
有人形容人kap人ê友情ná亲像狗ê世界，狗ê特性是「扶起不扶倒」，tī某一kóa情形之下确实是án-ne，尤其tī政治kho͘-á koh-khah明显，这teh是说明人心中ê势利心态，当一个人有绝对ê权势ê时，伊ê朋友真chē，但是一位失势ê政客，必定无人敢去亲近伊。叶公超先生是中国近代史上一位杰出ê外交官，非常受肯定，可惜tī台湾chit-ê矛盾、偏差ê政治体制中，无法度发挥动力，伊ê见解无法度hō͘当局接纳，台湾hông逼退出国际舞台ê时，当时盟友lóng认同台湾kap中国大陆是二个无仝ê政治实体，有意帮助台湾确保tī联合国ê地位，可惜当时国民党政府主张甘愿玉碎无愿意瓦全，带hō͘现在台湾siōng大ê悲哀，叶先生tī伊ê传记中讲：伊hông软禁ê时，无一位朋友，这是势利眼ê现实社会。
有一个故事讲：两个朋友tī林中tú-tio̍h熊，甲无顾另一位，随爬起lih树顶，乙bōe赴爬树仔，只好诈死，因为听讲熊bōe攻击死人，熊行 óa乙用鼻闻伊，然后离开，一直到脱险，甲chiah tùi树顶爬落来问乙，熊kap你讲什么？讲：Tī危难ê时kan-ta顾家己安全ê人bē-tàng kap伊做朋友。孔子亦言益者三友，损者三友，巧言令色ê人，疼做假ê人，gâu扶tháⁿ ê人，lóng m̄值值去交往，tī社会中，咱lóng会有chit种体验。

二、 朋友ê建立
人生在世，朋友确实非常重要，德国俗语讲「无朋友ê人，只体验一半ê人生」，tī人生社会中，朋友ê存在是关键性ê问题，伊mā成做人生成败ê要素之一，真chē人因为交tio̍h损友chiah身败名裂，反之，有kóa人因为益友之帮助而成大业。法国画圣米勒少年ê时，家境恶劣，寒天酷寒pháiⁿ过，有一日好朋友罗素来访知影情形了后，暗中用高价买伊ê图，帮助伊渡过siōng困难ê日子，十gōa年了后，米勒拜访罗素chiah发现，当时用三百箍买伊ê图ê人竟然是好朋友罗素。

（A） 认bat kap了解是形成友谊siōng基本ê因素
若欠缺chit-ê要件，无法度形成知己ê朋友。箴言十八章24节：「有一个朋友，比兄弟koh-khah亲密」，tú好说明了朋友之间ê情谊是建立tī深刻ê认bat kap了解ê基础上，kap顶面所讲ê米勒kap罗素ê情谊to̍h是确立tī chit种认bat kap了解。

今á日，基督徒ài了解kap chit位「Siōng好ê朋友」交往，咱到底有认bat基督莫？对他了解jōa-chē？Tùi chia来形成基督徒kap基督之间往来ê情形，chit种关系是决定基督徒ê信仰品质kap内容ê基本问题。

（B） 性质ê仝款
这mā是形成友情要项之一，因为若二人观念、思想差别siuⁿ大，就无法度有深入ê交往，所谓龙交龙，凤交凤，瘾痀ê交tòng戆，to̍h是teh说明有共同特质ê人khah ê斗阵，tī各方面亦khah ē-tàng完美发挥伊ê共同特质。以家庭来讲，翁仔bó͘生活若bōe-tàng建立思想、价值观ê一致性，往往会成做冤家ê原因，人生ê友谊mā仝款，若性质bē合，mā 无可能有深厚ê友谊，一位鲈鳗型ê学生无可能kap有品性、功课好ê学生做好朋友，因为一个beh chhōe娱乐，另外一个soah tio̍h用功读册。哥林多后书六章15节，保罗论基督徒kap无信主ê人tī本质上有真chē无仝，「基督kap彼列（撒但ê别名）有什么相呼应neh？信主ê kap m̄信主ê有什么相干neh？」当咱kap基督建立关系ê时，咱必须明白主基督ê特性kap伊所爱--ê，咱ài有kap主仝款ê性质，chiah ē-tàng kap主建立良好ê实质关系。

（C）信任kap真诚ê疼
建立互相信任ê态度是朋友之间siōng重要ê内容，因为teh互相信任ê基础上，chiah ē-tàng推动朋友之间真chē有意义ê伟大作为，互相信任mā是推动人生真chē事工ê动力，有一篇故事讲：有二位好朋友，A hông判死刑，但是伊ê小妹婚期到，内心有淡薄á着急，好朋友B自愿代替做人质，向长官要求三工ê时限，hō͘ A thang好tńg去厝内处理小妹ê婚事，官准。A因为中途tú-tio̍h风雨，行程受阻碍，三工ê时限the-beh到，hiah-ê人向B讲：A已经逃亡，但是B坚信伊ê朋友，到最后ê时，A赶tńg去完成交代，官长深受chit 二人互信ê友谊感动，最后赦免伊ê罪。「真诚ê疼」Mā是朋友之间所bē-tàng欠缺--ê，有人讲友情是「灵魂ê结婚」，tī-chia所需要ê是用真诚ê疼来互相对待。

用这来省思基督徒ê信仰生活kap耶稣基督ê关系，咱对主ê信任到什么程度？咱用jōa-chē真诚ê疼来对待chit位siōng好ê朋友？
三、 义重如山
咱已经将形成友情ê大概内容说明。耶稣基督已经叫咱（基督徒）做伊ê朋友，虽然咱深知家己无配，咱lóng是重罪ê人，但是主soah tī咱chit种现实中，谦卑家己成做咱siōng好ê朋友，咱用「义重如山」来思考chit位siōng好ê朋友主基督，当咱用人性ê事实来省思主tī咱身上所做ê工，以及伊对待咱ê种种，照理咱无配叫做基督ê朋友，因为人性ê罪是形成人无法度khiā-tī主面前ê事实，tī chit-ê状 况之下，基督用朋友ê立场kap咱来往，这是因为他绝对疼ê牺牲所带来ê结果，因为他ê疼，他放sak性命，赎咱ê罪债，罗马书五章6、8节「因为咱iáu koh软弱ê时chūn，基督就按所定ê日期替罪人死……惟有基督tī咱iáu koh teh做罪人ê时chūn，替咱死，神ê疼就tī-chia向咱显明啊。」为tio̍h罪人（kap上主对敌ê状态），放弃性命，chit种绝对ê疼，hō͘咱众罪人成做基督ê朋友。Chit种恩义，只有tī耶稣基督救赎ê事实内底ē-tàng完全体会。 所以主要求咱chiah-ê成做伊siōng好ê朋友ê软弱ê众人，应该tio̍h有互相相疼ê生活来完成伊所交待ê命令，「Lín若遵守实行我所吩咐--ê，to̍h是我ê朋友啊。」（约翰福音十五章14节），chit种经由耶稣基督所赐ê友情，是基督徒tī教会中好亲像兄弟仝款ê信仰生活，信仰者lóng会体会tio̍h主内可贵ê情谊，是任何关系lóng无法度取代--ê。 面对chit位义重如山ê siōng好朋友——主基督，基督徒ê心态如何？是m̄是视主耶稣为知己ê心腹，主耶稣看咱是知己ê朋友，「我称lín为朋友，因为我tùi阮老父所听见--ê，已经lóng kā lín讲了。」（约翰福音十五章15节）咱是m̄是向主坦白？我是m̄是有留后路？M̄敢公开？这to̍h是造成隔阂kap异心ê原因，主基督mā要求咱「Lín ài时常tī我内面，我mā时常tī lín内面。」Chit种一体性ê存在，mā to̍h是友情siōng可贵ê部份。 各位，面对咱ê主，咱ê信仰生活是m̄是kap主有完全ê连结？ 这是必须深思ê问题。用咱ê现实生活来反省，平时用什么态度对待义重如山ê救主耶稣？咱认bat伊jōa-chē？是m̄是kap他有共同ê性质？咱用jōa-chē时间去疼chit位替咱牺牲性命ê好朋友耶稣基督？ 有一工，咱mā会听tio̍h主当日对西门彼得所讲ê：「西门，你疼我比chiah-ê koh-khah深么？」（约翰福音二十一章15节），咱tio̍h用什么话来回答伊？这是咱信仰生活ê课题。 结论：「M̄是lín拣我，是我选lín，并且分派lín去结果子，叫lín ê果子常存，hō͘ lín奉我ê名，无论向老父求什么，伊就赐hō͘ lín。」（约翰福音十五章16节），主基督选咱，去结果子，长久留存，che应该是基督徒phah拼ê方向！