《草地囝仔做牧师》

 | | | 转寄

疼ê原则

作者 林宗要 2010.10.03

箴言2十七章5节；哥林多前书十三章4～7节

一般ê人tī人生舞台顶，虽然无一定ē-tàng扮演主角，但是lóng有一个共同ê特点，to̍h是beh án怎建立属于家己ê家庭ê完美kap理想，因此一般ê人lóng会尽siōng大ê 力量追求家庭生活ê充实chiah享受幸福ê家庭生活，相信这是一般ê人想beh确立ê人生条件。

成做chit-ê事实ê to̍h是人间ê疼，因此厝内ê人互相ê爱ê表现ē-tàng看出人生phah拼ê结果，这to̍h是保罗tī哥林多前书十三章所强调--ê：「比如taⁿ时常有ê有信、有望、有爱，这三项其中siōng大ê是爱」，确实tī咱ê人生中，四界lóng ē-tàng体会tio̍h chit种仁爱对人生ê关系kap影响是guā喏仔深刻，若是tī人间hiah-ê不幸悲哀kap败亡ê tāi-chì，通常lóng是欠缺爱，mā to̍h是讲欠缺爱tiāⁿ-tiāⁿ会造成负面ê人生状况。

人ê一生中，家是siōng ē-tàng显明爱ê实质内容。爱是tùi人心肝内所产生ê自然行为，m̄是外在条件所成立--ê，若将爱ê关系限定tī用外在条件为主ê时，tiāⁿ-tiāⁿ会有不良ê后果，「美国式ê离婚」Chit部电影，说明一对青年tī文明社会中结婚了后，恩爱幸福，因为in用爱做婚姻ê基础，共同奋斗，经过十七年in有一个健康ê家庭，生活美满koh舒适，翁婿mā做一间公司ê总经理，但是chit时太太soah感觉闷闷不乐，不明原因，请教婚姻专家mā无结果，最后用离婚收soah，翁婿为tio̍h赡养费，生活真艰苦，太太mā无因此感觉快活，反倒tńg增加心里ê压力kap负担，双方了后虽然有异性朋友，但是暗中lóng一直怀念对方，tī一个偶然ê机会相tú，旧情复燃chiah koh再结合，虽然iáu-kú有冤家kap问题，但是终其尾是因为爱对方chiah愿意共同生活。伊teh kā世人讲，爱情固然是家庭ê基础，但是久长ê翁仔某生活，除了爱情之外应该iáu有其他ê装饰品……比如了解、体贴对方、温柔ê性格kap互相尊重等等。若用建筑做例，只有外壳ê基石坚固，无一定hō͘人有好看ê感觉，tī稳固ê地基kap外壳以外，ài hō͘人感觉tio̍h美观ê家庭，tī厝内必须ài有相当ê室内布置，mā to̍h是装潢ê工夫，但是有ê时咱mā会看tio̍h店面非常美丽，但是若将装潢拆开，是非常害ê建筑。

由chit-ê比喻，咱ē-tàng体会翁仔bó͘生活ê根本条件是用爱做根基，但是若欠缺翁仔bó͘生活中所必须具备ê装饰品ê时，tiāⁿ-tiāⁿ会发生问题，为何tī真chē恩爱ê翁仔bó͘中iáu有真chē人离婚？

Chiah-ê离婚ê人，in结合ê时是m̄是无意爱？为何会án-ne neh？是因为爱情以外koh需要一kóa重要ê装饰品来kā伊美化，hō͘婚姻ē-tàng koh-khah完美kap理想，án-ne chiah ē-tàng平衡，hō͘伊ē-tàng永远保持。

美国有一位心理学者讲：婚姻好亲像汽车ê四ê轮仔。必须ài有真正 常平衡ê运转chiah安全，比如失去平衡就会发生真惊人ê问题，比如车祸、伤害等等。相信chit种关系m̄是tī翁仔某关系上，甚至tī人生ê一切状况lóng是chit种--ê。

今á日咱用疼ê原则来思考chit-ê对人人lóng有深切关系ê人生问题。

一、 关怀是疼ê真谛
人若用幸福为题ê时，往往会想着爱ê问题。但是咱知影爱是抽象--ê，若无加共伊具体化，爱就bōe-sái显明tī人间，因此有人认为爱ê具体to̍h是先建立tī人关怀ê性格上。

确实，咱爱某某人，咱会表现出关怀ê情谊，chit种感情，咱ē-tàng tùi实际ê生活中体会tio̍h。因为关怀是表示对对方感情ê流露。Ná亲像父母对kiáⁿ儿ê态度，咱ē-tàng完全体会。或者年老ê父母kap kiáⁿ儿ê问题，m̄是只有生活条件ê满足，mā是tī关怀父母ê存在，chit种真实ê关怀，chiah ē-tàng叫做有孝。通常tī爱ê境况中，人性ê态度往往是用占有为主。咱bōe-sái否认，爱有占有ê成分，（过分ê占有是自私，颠倒是伤害tio̍h爱ê本质），但是完美ê爱，m̄是只有占有而已，伊同时mā是奉献。Tī人生现象中，确实有chit种为所爱ê人愿意付出一切ê爱ê行为。因为tī真实ê爱内面，所想着ê只是对方ê一切ê生活。关怀所爱ê人，to̍h是爱ê真实内容。

关爱本身是表示咱对爱ê对象发出爱心ê行动，藉着che，会hō͘咱所爱ê人有安全幸福ê感受，这to̍h是人生有价值ê生存内容。Hō͘人有安全kap幸福，chit种是上帝所希求ê人生，伊是tī爱ê世界内chiah ē-tàng成立--ê。

二、 人性ê基本需求－－欣赏
爱ê伟大是ùi内心本能ê意愿，无负担或者勉强，是ùi心内所发出ê真诚心态。Chit种爱ê形式时常tī人生生活中表现出一种欣赏ê性格。确实tī人性中，hō͘人欣赏是有相当正面ê启发作用。咱若用人ùi细汉e5gin2-á时期到老人ê世界来看，hiah-ê人lóng爱hông欣赏，父母若ē-tàng用欣赏ê态度去处理孩童ê tāi-chì，对塑造孩童ê人格形成一定有正面ê作用，因此tī现代心理学中，尽量hō͘人去欣赏--人，适当ê欣赏确实是一件有意义ê tāi-chì，因为tī-chia，人基本需要ê爱会带来适中ê满足感，心中有满足是人格形成中一件重要ê事。欣赏是表现爱ê方法之一。咱lóng知影爱是人生生活ê根本基础，但是伊必须经过真chē人生ê生活形式来kā伊表现出--来，若无伊只是一种抽象ê事实，对人生无什么作用。

欣赏ê人生，就是beh将chit种抽象ê爱，kā伊生活化kap具体化ê 一种积极ê作为，有学者用花草kap水份来比喻疼爱kap欣赏ê情形，美丽ê花草，若无水ê润泽ê时，to̍h会lian去。

而且，爱若无用适当ê方法kā伊表现出--来ê时，往往无法度发挥伊无比伟大ê力量，但是必须ài tī适当ê状况上表现，bē-tàng过分。

欣赏虽然是非常平常ê tāi-chì，但是确实ē-tàng有非常大ê效果。有ê时对gín-á 一句关键性ê话kā伊表示你ê欣赏，有可能决定gín-á未来成功ê动力，tī人kap人ê间ê 一句欣赏ê话，有ê时会表现出真chē人生ê快乐、温暖kap幸福。Bat有一位青年讲--着父母bē晓欣赏伊，考试成绩好ê时，就讲：无实力，死读册是无路用--ê，无读册ê时就讲伊pîn-tōaⁿ，the读册ê时就讲伊是teh读hō͘父母看--ê。伊讲：我无论án怎做lóng得bē-tio̍h欣赏，这是一位跤步踏差ê青年ê心声。
Tī-chia，咱ē-tàng明白tī人生现象中，人所追求kap phah拼ê美好ê人生，是teh爱ê表现kap会晓欣赏ê世界。若ē-tàng用欣赏ê人生做爱ê原则而且多多发挥ê时，咱ê人生必定有完美ê成果。

三、 时常被疏忽ê礼貌kap尊重
人生ê爱，大部分是发生teh出世互相认bat ê人之间，但是teh熟识ê状况中，人真简单会疏忽chit种tī人生生活中互相关系上另外一种非常重要ê礼貌kap尊重ê态度。阮tiāⁿ-tiāⁿ会想讲是熟识ê人，to̍h m̄免行chiah-ê礼数，这是咱tī生活上ê时常犯ê毛病kap缺点。

俗语讲：厚礼人bōe怪，着是讲多多表示礼貌，chiah bōe疏忽soah hō͘人责怪，因为咱知影，tī人生社会中，礼貌是重要ê因素，伊ē-tàng hō͘社会和谐、安详，咱看tio̍h台湾社会ê混乱，探讨了伊ê原因着是人kap人之间欠缺chit种维持社会ê安祥kap礼貌ê态度所造成。以交通ê情形来看，ta̍k位驾驶人若ē-tàng用礼互相对待，台湾ê交通一定bōe chiah-ni̍h乱，因为欠缺礼貌互相让步chiah造成塞车。无礼貌是无敬重对方，有自私ê心理，充满主观kap骄傲，人若有chit种心态ê时，人生社会自然就会混乱，这to̍h是目前台湾社会ê乱源。

因为各人lóng用抢第一为主，惊hō͘人先得tio̍h，chit种心态充分表露出人性ê自私kap骄傲ê特质，有chit种人格ê人，tī社会中，无可能有完美kap理想ê人生状况。关于礼，孔子公讲：「M̄知礼无thang徛起。」伊mā提出人生中所有ê美德，若无礼ê配合会变做弊病「恭而无礼则劳，慎而无礼则葸，勇而无礼则乱，直而无礼则绞」，恭、慎、勇、直lóng是人生ê美德，若无礼ê配合to̍h变做劳（徒然劳苦）、葸（惊惶）、乱、绞ê弊病。

人生生活所追求--ê是完美kap理想ê美德，这是形成tī礼貌ê世界，因为伊mā包含tio̍h尊重人ê事实，所以礼貌kap尊重ná亲像共同体，主耶稣讲：「所以lín愿意人án怎对待lín，lín mā ài怎样对待人，因为这to̍h是律法kap先知ê道理」（马太福音七章12节）。伊完全讲出人生ê主题，主耶稣讲chit种心态是人生ê全部内容，每一个人若ē-tàng照chit-ê原则经营人生，chit种人间社会，就比如天国，这是人所希求，伊是建立tī人间充满tio̍h礼貌以及互相尊重ê基础上，mā to̍h是孔子公所讲--ê克己复礼。

Tī咱ê社会中，时常用相敬如宾来祝贺新婚ê夫妻，to̍h是要求chit种真熟识亲密关系比如翁仔bó͘，生活mā必须用礼貌kap尊重来互相对待，tī-chiah一定ē-tàng体会tio̍h人生ê喜乐kap幸福！

四、 爱ê siōng koân表现－－真诚kap容忍
一对翁仔bó͘时常因为日常tāi-chì来冤家，自觉若是án-ne落去伤害家庭siuⁿ-tōa，有一工二人同齐去请教专家，最后专家kā in讲：翁仔bó͘若无真诚对待，任何人lóng无法度帮忙解决问题。

相信咱ē-tàng体会tī人生生活中，真诚ê重要性，伊ê另外一面是欺瞒，瞒骗tī人间社会中，是真普遍--ê，尤其kap家己有利害关系ê时，人lóng会用che来维护家己ê权益，像1994年台湾省议会议长ê选举，差不多大多数人相信有贿选，一票ùi五十万到一千万，但是当检察官kā in叫去询问ê时无一个人承认，lóng用瞒骗ê心态去应付伊。

咱知影瞒骗是真恶质ê品行，但是现代人lóng真普遍运用tī伊ê人生中，chiah形成了社会乱象，失去真诚，处处表现出chit种互相欺瞒ê状况，ùi政治环境讲到seng-lí上ê来往，或者是社会中人kap人ê关系lóng用欺瞒互相对待，这to̍h是造成咱ê社会失去真诚ê原因，台湾支票ê退票率是世界冠军表示台湾人ê 无老实。

基督徒ài明白，真诚是kap上帝建立关系ê唯一事实，因为咱ê主本身to̍h是慈爱kap诚实ê主，tī圣经中tiāⁿ-tiāⁿ用耶和华是诚心、老实来对人（撒母耳记下二章6节，十五章20节；诗篇二十五章10节）上帝所喜乐ê to̍h是内心老实人（诗篇五十一章6节），主耶稣本身mā教咱「上帝是一个灵，所以敬拜伊--ê，必须用心灵kap诚实去拜伊」（约翰福音四章）。

初代教会ê复兴，原因之一to̍h是基督徒将in ê信仰kap生活建立tī诚实ê基础上：「In ta̍k工同心合意，恒切ê tī殿内底，koh tī厝内擘饼，存tio̍h欢喜诚实ê心用饭。」（使徒行传二章46节），使徒约翰mā kā咱讲：「咱相爱，mài kan-nā tī言语kap喙舌顶，mā ài tī行为kap诚实上」（约翰一书三章18节）。

无论kap上帝ê关系或者人本身ê生活，lóng必须用真诚替主，chiah ē-tàng真正属于上帝，上帝是爱、是信实ê，属于他ê人，mā to̍h是疼kap信实ê存在，chit种存在ê表现就是beh生活tī诚实ê世界，无欺瞒ê行为，che是箴言所强调--ê：「当面ê责备强kan-nā背后ê爱情」，这是teh说明爱siōng需要ê是真诚，无论是对或者m̄-tio̍h lóng ē-tàng用真诚对待伊，（诗篇一四一篇5节）「我甘愿接受义人爱心ê责phah，soah无愿意恶质ê人尊敬我」（现代译本）。当teh说明爱ê真诚，伊kap欺瞒ê心态是绝对无仝ê。

真诚是上帝ê属性，属于上帝ê基督徒mā应该有chit-ê属性，用真诚ê心态去经营人生，但是án-ne iáu无够，因为tī人生确实有真chē复杂ê状况，必须ài有容忍ê心去面对，因为若bōe-sái养成容忍ê个性ê时，生活必定tiāⁿ-tiāⁿ出现问题。Tī保罗所强调ê爱，容忍mā是重要因素，「爱是恒久忍耐，koh有恩慈，无怨妒……bōe求家己ê好处，bōe计算人家ê恶，爱是凡事ǹg望，凡事忍耐……」（哥林多前书十三章4～7节），因为tī人生中，容忍ê事实kap人生生活ê成败有关键性ê关系，tī-chia，咱看保罗teh讲疼ê性质ê时，特别加强爱是恒久忍耐，凡事包容，凡事忍耐。

结论：咱ài会记，爱必须ùi信心去完成伊，共同ê成长会hō͘爱koh-khah完美。改善你ê个性、价值观kap思想，用khah积极ê心态去适应你ê人生环境，一定ē-tàng收成人生理想ê目标kap结果。切记！停顿不进会将爱teh死！人生就会乌暗无希望。