《草地囝仔做牧师》

 | | | 转寄

快乐尊严ê岁月

作者 林宗要 2010.09.26

利未记十九章32节；提多书二章1～3节
旧年重阳节主日，bat用「成熟ê人生」做题目来思考老人阶段，to̍h是成熟ê阶段，其中分享三要点：（一）完全无缺点ê人生（二）健康koh体面ê人生（三）家己有自知kap自我不断进步ê人生。的确，一位长者，若是有顶面所讲ê生活要项，ē-sái讲是成熟ê人生。虽然，这kah-ná是无简单达成ê理想，但是只要立定目标，就可能hō͘伊ê人生koh-khah完美、成熟。可惜ê是，长者tiāⁿ-tiāⁿ因为一kóa不明ê原因chiah无法度达成chiah-ê理想境地，譬如：健康是老年人siōng切身需要ê身心条件，但是事实上，因7为人ê有限，老年人绝对无可能有少年时ê勇壮体能，chit种老化ê现象to̍h是人无佮意老ê主因。因为变老会带hō͘人真chē约束kap限制，同时mā会产生一kóa人无欢喜ê现象，比如因为生理机能ê退化造成各方面ê问题：耳孔听无、目睭无金、嘴齿bái、腰酸背痛、记智退化kap行动不便等状况，只要chit种种现象并bē因为人无kah意chiah来离开人生，进入老年是人生必定ài经过ê路途，现代ê医药hiah-ni̍h 进步，老年ê生活可能是另外一段人生真久长ê阶段neh！ Chit-ê阶段有可能比其他人生阶段koh-khah长，若是以活到九十岁甚至一百岁ê人来讲，伊ê老人阶段就有三十年chiah久。台湾社会自1994年就进入高龄化社会（有百分之七以上ê老人人口是六十五岁），但是日本kap其他koân度发展ê国家，in-ê老人竟然占全人口总数ê五分之一，这是一ê值得重视ê现象，为tio̍h beh应付chit-ê现象，见若政治ê政策、社会ê福利kap家庭ê环境long2ai3有相当ê准备。但是siōng重要ê是当事人一定会有万全ê准备，绝对bē-tàng有时到时担当，无米chiah煮番薯汤ê侥幸心理，以免老--来chiah造成悲哀不幸ê景况，只要是有准备tio̍h会赴，m̄事先准备tio̍h真有可能会án-ne，有真chē老人会无幸福，to̍h因为in无作好各方面ê准备，尤其是chit种准备，绝对无可能是tī短时间内造成-ê，he是ài有相当长ê时间chiah ē-tàng达成，若照生涯规划来讲，理想ê状况，应该是ùi高中ê时就ài有人生规划，这to̍h是我一直teh强调「四十岁想六十岁」Chit-ê课题ê原因，用我ê家庭做例，阮早tī四十岁ê时就预想tio̍h年老ê状况，而且koh替六十岁了后ê阶段提早作心理准备，ná亲像kiáⁿ儿大汉结婚了后角色ê调整，媳妇嫁入门了后心态ê适应，互相认bat、了解、退休了后ê生活kap家庭主权ê转移等等问题，lóng tī事前作过充分ê思考，因为chiah-ê若无处理hō͘妥当，（比如有一kóa阿公阿妈m̄肯放弃对孙仔ê管教权）Tiāⁿ-tiāⁿ会产生困扰家庭ê问题。除非有其他特殊状况，若是无，tī一般家庭中，角色ê分配kap运作若有合理ê规则，thang避免真chē无聊问题ê产生。

社会上，少年时替伊ê kiáⁿ儿尽心尽力，年老ê时soah得bē-tio̍h kiáⁿ儿ê报答，这款情形四界lóng看有。我bat看过一个实例：有一ê姊妹，少年ê时尪tio̍h过身去，家己嘴齿根咬—咧chhiâⁿ养两男两女，生活勤俭刻苦，真无简单chiah将kiáⁿ儿chhiâⁿ养大汉，其中第二ê kiáⁿ考tiâu台大医科，毕业了后tī北部开妇产科，后来趁伊ê老母无tī ê时，偷偷仔kap某囝移民到美国，一直到老母hō͘护士通知，chiah知影真相：病院已经全部卖hō͘别人，kiáⁿ儿mā tī三工前飞去美国。老母teh伤心ê时，转到大汉kiáⁿ tòa ê所在chhōe安慰、温暖，谁知影，大kiáⁿ 竟然kap伊回答讲：「你kap媳妇bōe合，你来chhòng啥？」Chit位老母ê心亲像刀teh割hiah-ni̍h疼，终其尾伊投木自尽，结束伊ê后半世人，这是gōa不幸ê悲剧ah！

咱ē-sái明白实例中老姊妹所困扰ê千万心结，因为伊家己tháu bōe开，kui气死死eh。若是伊e5kiann2儿新妇ē-tàng用khah正面ê态度来对待老母ê时，一定ē-tàng宽慰老人ê心，kā一世人ê辛劳放袂记。的确，年老ê时，只有kiáⁿ孙爱ê滋润、包容thang化解过去所tú-tio̍h ê不幸kap辛苦，只有爱ê力量thang化解老人所行过--ê坎坷路途kap ê辛酸痛苦。感慨ê是事实kap愿望相违背，这是现代老人ê悲哀。根据专家调查指出：老人希望kap kiáⁿ孙tòa作伙ê人占百分之七十～百分之八十；Kiáⁿ儿希望kap老人tòa作伙ê人占百分之二十～百分之三十，tùi chaih thang看着老年人tī kiáⁿ儿心目中ê份量。Koh用现在ê建筑隔间来看，通常是三房一厅或者是二厅，kah-ná是特意故翁仔bó͘一间，后生、cha-bó͘-kán 一人一间，老人neh？困涂跤枋？真明显根本无考虑tio̍h老父母ê空间。

关于顶面所讲ê种种，面对老年ê生活，应该作好万全ê准备：
一、 成熟ê人生
一位食老ê人若ē-tàng有成熟ê内涵kap表现，chiah ē-tàng达tio̍h快乐尊严ê理想。

古早人对长者ê看法，有所谓「敬老尊贤」Chit-ê讲法，因为年老ê时tiāⁿ-tiāⁿ包含tio̍h人生丰富ê经验，mā是知识kap权威ê象徵。的确，老年人因为有khah长ê人生经验，对人事ê丰富观察，有相当ê见识kap学问，俗语有讲：老人食过ê盐比少年人食过ê米koh-khah chē，意指老人ê 一个大特色to̍h是伊一定有丰富ê人生阅历。老年人若ē-tàng善用chit种人生资源，koh用活到老、学到老ê精神，虽然年过七、八十岁，iáu ē-tàng kap少年人开讲、沟通，因为伊bōe靠势，伊是不时teh吸收新知。爱尔兰诗人有讲：「原来老并m̄是衰败，是性命ê圆熟，koh-khah光koh-khah水」，chit种认bat tī老年人建立快乐尊严ê时光真有帮助。所以老人千万mài认为家己是「老废á」（台语：指无路用，拖累kiáⁿ孙、是包袱--仔ê意思。），因为老人tiāⁿ-tiāⁿ the tú-tio̍h病痛ê时就认为家己无前途、无ǹg望；或者是认为家己无人缘、老顽固，产生种种负面消极ê心态，chiah-ê lóng是无健康、无正确ê想法，对老人lóng无好处。基督徒koh-khah应该ài了解，上帝所赐ê人生是ùi出世到人生ê终点ê全程，包含红婴仔时、gín-á时、青少年时、壮年时期，tùi án-ne讲到老年期ê全部，咱必须用相仝ê心去面对每一个阶段，bē-tàng有差别之分，每一个阶段lóng有伊ê特色kap可贵ê所在，所以应该好好仔掌握伊ê特色好好á来应付，koh发挥伊ê价值kap光辉。老人ê生活方式kap少年人必然会有无仝，比如麦克杰克逊来台演唱ê时，风靡全台，soah m̄-bat看过六、七十岁ê老年人有去斗闹热，师母mā讲to̍h算是贴钱请伊去，伊mā m̄去。老人家己mā应该ài有自我ê认bat，对一kóa bōe-sái胜任ê体会活动应该谨慎避免或者尽力来做。总讲一句，bē-tàng因为种种现实ê限制来产生无妥当ê自我暗示kap 错误偏差ê观念，应该ài建立积极正面ê心态，因为快乐一定建立teh自我肯定kap积极ê心态。有了积极ê思想chiah ē-tàng产生快乐ê果实。若是lóng是将家己ê不幸或者不如意ê原因sak tī别人或者环境，chit种消极ê思想kap自我无肯定tio̍h会造成郁闷ê人生。狄更斯tī《双城记》ê头一句话：「这是siōng好ê时代，mā是siōng bái ê时代」有一kóa处境看起来kah-ná siōng恶劣，m̄-koh危机抑是转机，所以mā是siōng好ê处境，关键全tī个人用toh一种心态去面对，因此，个人ê心态是好或者是bái是决定因素。同理用chit-ê观点来思考老人问题，快乐ê关键是tī人本身。只要老人认bat家己（家己有自知）kap认bat家己所处ê环境（了解时务ê人是俊杰），老啊ê后半世人，就ē-tàng体验「夕阳无限好」ê感受，chiah khah无「只是近黄昏」ê遗憾。老人若beh无落伍、boài hō͘人淘汰、boài hō͘人看轻，就ài建立尊严，chiah有快乐thang讲。若beh达成chia-ê目标，并m̄是一帆风顺，一下á to̍h ē-sái 完成--ê，是ài有相当ê觉醒，下定决心，koh ài phah拼、实际实践ê过程，（当然方式kap青壮年无仝）。Ē-tàng用chit-ê心态去经营人生，thang讲成熟ê人生。

二、 快乐、尊严何在？
依现实状况来讲，老人ài有快乐尊严实在真困难，kan-ta ê生理器官ê退化，视力、听力、体力衰退，头毛白苍苍，目chiu茫雾，满面皱痕真chē慢性病缠身，同时心理状况mā受tio̍h影响，记智无好、厚疑猜、顽固、拒绝新观念、思考温吞、反应khah慢、信心受打击，án-ne恶性循环，甚至对死亡惊惶。Koh-khah有一kóa人因为权力kap财力ê丧失，来引起ê心理惊惶，chit-kóa事例to̍h是人因为退休了后生活狠狠失去重心kap所托chiah会来破病死亡ê原因。根据统计，有bē少koân级职位ê人士因为退休chiah发生急速死亡ê事例，是因为无法度面对chit种失落感所造成ê心理冲击ê结果，mā因为未事先防范chiah准备bē赴ê原因。所以，事先tio̍h-ài确立当事人ê观念kap亲人ê协助，hō͘老人ē-tàng有独立自主ê人生观，ē-tàng尽量处理家己ê生活，庄博士淑旗绍介高龄者过身心快乐ê生活，伊ê结论是尽量hō͘伊去活动，家己ē-tàng做ê tāi-chì，kiáⁿ孙mài去处理，这kap以前「大家lóng惊老人活动，万项tāi-chì iû kiáⁿ孙代劳」ê观念大大无仝。续落来是应该ài鼓励当事人多多学习kap参与活动，老人mài惊新ê 试验，「活到老，学到老」是真理，我tī 1993年9月参加了环亚知性生活讲座，当时我是参与者中年岁siōng koân--ê。各种书、杂志kap大众媒体lóng是得着资讯真好ê来源，tùi老人吸收新知真有帮助，另外mā应该尽量主动去参与教会或者社区ê活动。最后，有健康、老伴、朋友、老本，就koh-khah ē-tàng体会快乐koh有尊严ê后半世人，但是事实上，chiah-ê条件会ta̍uh-ta̍uh-á离开有岁ê人，比如厚病、无健康，老伴、朋友一个一个来离开世间0，比如台神同学录内、过身ê人lóng用+做记号，已经一直óa ùi我chit-ê年代；koh来tio̍h就老本来讲，伊并m̄是绝对--ê，但是有了经济做后盾，真明显ē-tàng减少老人某一kóa限制，满足某一kóa需要，chiah bōe造成欠缺，koh-khah简单得tio̍h快乐。

Koh-khah特别ê--是，基督徒应该有由信所得tio̍h ê快乐kap尊严，咱thang ùi圣经中得tio̍h真chē宝贵ê教示，诗篇十六章8～11节，类似「因信心欢喜，体验救恩」ê经文，四界thang看，保罗tī罗马书五章中所讲--ê，teh患难中mā tio̍h欢欢喜喜，是因为体验tio̍h上帝丰富ê救恩；伊tī腓立比书三章中告白讲因为得tio̍h基督ê喜乐chiah甘愿放弃世间上一切功名富贵，因为chiah-e5kam2-ē-tàng kap基督ê喜乐相比neh？Koh tùi撒该ê例来看，伊本是一个好额但是不仁ê人，人看人怨戚ê 无快乐ê人，但是自耶稣救赎伊了后，亲像圣经中所描写，伊得tio̍h平安kap喜乐，koh比如神迹中病得tio̍h医治ê人，伊ê喜乐ê程度是无法度形容--ê，chit种因为信仰所建立ê心灵层次ê喜乐，是时时刻刻用心灵kap上帝交通chiah ē-tàng得tio̍h--ê，所以老人koh-khah应该骨力kap主交通，建立美好信仰管道，chiah ē-tàng应付种种人生状况，随时有管道通到上帝处，比如我ê母亲在世ê时骨力读圣经，听收音机中ê福音节目。

三、 好好á行完家己ê路
除了头前所讲ê当事人应该有相当ê体认kap行动ê实践外，做人kiáⁿ儿应该ài协助长辈对财务、人际关系、生活空间、社会参与作一ê整体ê规划，因为siōng好ê安养院mā kap 可贵ê亲情bōe比ê。人生kah-ná旅行，teh观光旅游中若beh满意欢喜，要件之一to̍h是对当地其中一个风土民情ài有事先了解，án-ne chiahe7-tàng事先做准备，koh ē-tàng充分体验享受chiah会得满足快乐。同理tī现在流行ê生涯规划，对人生有伊积极正面ê功能，可惜ê--是差不多lóng kan-ta看眼前ê利益，对人生siōng严肃ê时刻－－老年ê生活kap对死亡ê面对，罕得有人提起，基督徒生涯规划当然无限tī功利思想上，应该是人生ê全部，特别是人生最后ê阶段，对基督徒来讲，这是人生siōng严肃ê时刻，伊是证明你ê信仰ê siōng好时机。

所以一个信仰者应该ē-tàng用（一）满心期待ê心情khiā-tī主ê面前，来向主讲明他所托付hō͘咱ê一切。（二）用完成受托付ê使命见主ê时，就ē-tàng体会参见主ê无比ê喜乐，马太福音二十五章21节「你chit-ê 又koh良善又koh忠心ê仆人……ē-tàng入来享受主人ê快乐」，tī积极ê人生意义上，相信无一个thang kap此喜乐相比评--ê。

信仰ê人生绝tùi m̄是偷食步或者充满意外好运ê人生，比如学生考试用tàn钱来决定是非；M̄是善尽本分，完成所托ê人生，chiah有喜乐thang讲。

人生在世是孤单--ê，ùi咱出世了后就ài家己行家己ê路，m̄是行父母ê路，tī环境中用咱ê自由意志去选择家己ê路，路上有可能会跋倒，这是一定有ê，但是siōng要紧--ê，当接近终点ê时，千万bē-tàng跋倒，因为tī chit-ê时阵已经无机会koh爬起来，光宝公司创立ê时，我kā长子元生讲，二十gōa岁ê少年人值得试看觅，若是我是五十kúi-nā，就无适合，因为koh 越头已经是百年身阿。Tùi chiah thang好看着，jú上年岁ê人，行事做人tio̍h-ài特别谨慎小心，因为伊jú óa严肃ê时刻，jú óa上帝面前交成绩ê时刻。无论tī生理上或者心理上tio̍h-ài特别细腻谨慎，保罗tī提摩太前书四章6～8节有真好ê教导。

孔子「我十五岁to̍h下决心beh phah拚学习，三十岁时家己tī社会中已经有成就啊，四十岁ê时tùi ta̍k项āi-chì lóng ē-sái了解、明白，五十岁ê时知影进退、认份，六十岁ê时听先王ê德行，心意伴耳相随、顺从，七十岁心身自由自在，守规矩、m̄犯法。」，这是人生siōng koân ê境界。凯撒大帝ê豪爽飘phiat，伊讲：「死亡，是一个必然ê终结，teh beh来ê时，就会来。」这lóng值得咱深思。

结论：只要你用信仰来建立你ê人生，无论任何境况，你lóng会超越。