《草地囝仔做牧师》

 | | | 转寄

工显资值

作者 林宗要 2010.12.19

哥林多前书三章10～15节

「我照神所hō͘我ê恩，kah-ná一个聪明ê工头， kā根基立好，有别人tī顶面建造；只是各人ài谨慎án怎tī顶面建造。音乐那已经立好ê根基to̍h是耶稣基督，此外无人ē-tàng立别ê根基。若有人用金、银、宝石、草木、稻仔tī-chia根基上建造，各人ê工程必然显露，音乐hit日子beh将伊表明出来，有火发现，这火药试验各人ê工程án怎。人tī he根基上所建造ê工程若俭会tiâu，伊就ài得赏赐。人ê工程若hông烧去，伊就ài受亏损，家己soah ài得救；虽然得救，soah像tùi火内底经过仝款。」（哥林多前书三章10～15节）

顶面所讲chit段经文是保罗用建筑比喻说明人生生存ê原理。所谓「人生是tùi机会所积聚而成」，的确án-ne，咱ē-tàng了解人生ê每一个机会或者每一举动lóng teh建立家己人生ê价值。保罗用无仝性质ê建材来阐述人应该如何去营建家己ê人生，建立个人性命ê价值，这比喻真传神，将人ê一生比喻做建造房屋，自挖地基到整栋厝落成，就ná准人自出生到终局。

就厝来讲，有各式各样ê厝；人生何尝m̄是án-ne？有人透世人轰轰烈烈。所做ê khang-khè，流芳万世，造福人类社会，伊ê功劳无tè比，比如主耶稣传福音ê khang-khè对人类ê贡献，或者ùi古早到chit-má hiah-ê伟大ê艺术家、音乐家、哲学家、科学家所留落来ê，实在是价值连城！Chiah-ê人若用保罗ê比喻来讲，就ná准是用宝石、金、银所建造ê人生；Hiah-ê tī社会上恶名昭彰，遗臭万年ê败类，比如历代恶毒ê统治者，残暴专制ê君主。比如二次大战ê希特勒to̍h是。波斯湾战争时ê哈珊，美国布希总统将伊比喻做今á日ê希特勒，这号人物只hō͘真少数ê恶人所崇拜，比如台湾有一个chiok恶ê人因为崇拜哈珊将伊ê子号名做林哈珊，可见伊ê心态ê一斑。

上帝创造人类ê目的是ài他ê kiáⁿ儿ē-tàng荣神益人，为tio̍h达tio̍h chia-ê目标，基督徒必须真gâu发挥上帝所赐ê才能来建立伊ê人生，hō͘伊ê人生thang突破重重考验，hō͘伊ê性命hō͘人正面评价，若beh达到chia-ê目的，就ài用khah坚固有价值ê材料建造人生。Mā to̍h是，基督徒ê言行举止lóng是点点滴滴teh建造人生。挡会牢考验伊价值存在；若m̄是，to̍h是hông烧掉。Chit-ê所在所指ê伊有伟大价值ê性命，并m̄是指显赫富贵ê人生，因为世上真chē掌握权势财富ê人，做出腐败恶毒ê勾当者，chit种人满满是。因此成功ê人生关键无tī成就ê大小，是tī正确ê动机kap心态，ē-tàng建立纯全ê价值体系者，即使伊所完成ê是世人眼中chiok细ê tāi-chì，但是因为伊ê动机纯正，mā有真有价值ê伟大事业；颠倒是有一kóa人虽然亲像成就了大事业，但是因为动机操守无正，致使毒害社会人类ê灾祸。譬如，修女德瑞莎tī印度ê khang-khè，依世俗ê观点，伊所做ê，lóng是真细ê tāi-chì，kah-ná微不足道；m̄-koh伊心中充满了对上帝kap人类ê疼，因此khang-khè虽然细soah无比ê伟大，mā得tio̍h世人ê肯定kap敬仰。Tùi大众媒体所报导ê德瑞莎，咱bōe-pháiⁿ领悟tio̍h伊ê性命m̄是飞黄腾达，mā m̄是大富大贵，但是伊出自完全ê疼去分担受苦人类ê重担，伊伟大tī伊所关怀ê对象lóng是社会上tiām-tiām无声e5san3-chhiah人，但是伊尊重每一个性命，tī伊ê心目中，chiah-ê无名小卒ê性命kap达官显贵ê性命有仝款ê价值，这是何等伟大高超ê情怀！Chit种伟大ê胸坎爱心所成就ê尊贵事业，散发tio̍h无比ê光芒！比如伟大ê宣教师史怀哲献身tī蛮荒ê非洲，to̍h是源自伊对性命ê尊重，tī伊ê代表作——《文化kap伦理》chit本册ê最后二章，特别强调「对性命敬畏ê伦理」，to̍h是推动伊放弃荣华富贵ê享受选择投入非洲蛮荒ê丛林传福音救世人khang-khè ê动力。伊ê精神实在值得全人类景仰，因为怀抱tio̍h对性命ê敬畏，成为伟大善行ê动力，史怀哲所谓ê善者，是维持性命、振奋性命ê人；恶者，to̍h是消灭性命，阻碍性命ê人。史怀哲毕生to̍h是奉献teh尊重性命ê善行中。

耶稣ê教示mā是仝款ê道理。主耶稣ê khang-khè to̍h是teh重视上帝所赐ê性命。他教导世人，ài看清楚性命ê真正价值，因为只有了解性命价值ê人chiah ē-tàng实践性命ê内容。

当一个人ē-tàng了解性命ê价值，koh ē-tàng实践有价值ê性命内容ê时，chit种性命是ē-tàng荣耀上帝ê性命，tú亲像保罗tī哥林多前书三章所讲ê比喻，chit种人生to̍h是金、银、宝石所建立ê人生，是挡会tiâu考验ê美丽kap灿烂ê人生，mā是辉煌高贵有价值ê人生。性命ê价值无tī长度，是在tī深度，siōng重要ê是ài建立对性命ê尊重kap热爱，kap正确ê价值观kap光明磊落ê心态，本tio̍h纯正ê动机chiah ē-tàng发挥上帝所托付hō͘人ê人生使命。

一、 Siáng teh经营？
保罗用建筑做比喻来说明人生情况。讲出了每一个人lóng参与这大规模ê建筑khang-khè，讲出了人生tī宇宙ê大舞台中，每一个人应该尽力去演好伊担任ê角色，比如哥林多前书三章十节「只是各人ài谨慎án怎tī顶面建造」，现代译本译做「每一个人lóng tio̍h谨慎，看应该án怎tī根基上建造」，现代译增加「应该」这是一句对咱人生真有警戒ê话，mā是基督徒人生观ê决定性事实，基督徒ài确实了解伊人生ê价值kap内容，然后chiah ē-tàng照这建造伊有内容ê人生。因此咱必须建立一重要ê信仰原则，to̍h是对基督徒ê性格koh再认bat，到底你为啥物加入上帝国？你神观ê建立为何？有孔子m̄是就有够啊，为何iáu需要耶和华？四书五经kap圣经有啥分别？有了道德修养m̄是就有够mah？为何iáu需要十字架ê救赎？为何beh过教会生活？Chiah-ê lóng是基督徒信仰生活不断ê挑战。

当一个基督徒用严肃ê心情去思考chiah-ê问题ê时，必定会建立一种以上帝为主体ê顺服ê信仰生活。因为深知浩瀚ê宇宙是上帝所主宰掌权，他托付人类去经营照顾，tùi创世记二章ê创造论，真清楚看出上帝将人安置tī伊所创造ê世界，目的是「耕作kap顾守」，tùi chia咱thang了解上帝创造世界ê目的，这mā是基督徒ê人生观，咱是上帝所托付tī他所创造ê宇宙中，代上帝耕作顾守ê人，所以无论如何人是受托者，代为管理者，che to̍h是台语所谓ê「管家」，管家ē-tàng照伊ê意思来执行一切，无须要万项tāi-chì请教主人，但是必须向主人交待，mā to̍h是照主人ê旨意去执行受托ê tāi-chì。Tī管家ê心目中，永远用主人ê旨意做执行ê根据！基督徒ê人生观必须确认咱是上帝ê khang-khè者，他是永远ê掌权者，基督徒必须了解咱ê掌权者是上帝！

二、 了解目的kap方针
当咱了解上帝是咱ê经营者，他永远是咱人类ê主宰，续落来咱必须了解他ê心意，他ài咱做啥物？上帝创造咱ê目的何在？咱若了解这一切，咱ê人生iáu无法有理想ê表现，因为理想ê人是建立tī对人生ê目的kap方向有完全了解，一个人对人生ê目的kap方向无明确ê把握ê时，一定bē有良好ê人生表现。可见基督徒ài建立完整ê人生内容，必须ài了解人生ê目的kap方向。Mā to̍h是上帝对咱人类ê期待kap创造咱ê目的为何？相信咱若ē-tàng了解上帝对人类ê期望，并ē-tàng付诸实现，咱ê人生必定是有价值ê，那上帝创造人类目的何在neh？

（A） 人士为荣耀上帝才存在
以赛亚书四十三章7节「To̍h是只要称做我名下ê人，是我替家己ê荣耀创造ê」Tī-chia所讲人是为上帝ê荣耀chiah hông造--ê，所以保罗向哥林教会ê基督徒讲「所以lín或者是食，或者是lim，无论做啥物，lóng tio̍h为荣耀上帝chiah ē-tàng」（哥林多前书十章31节），tùi此咱ē-tàng体认hông造ê人类必须过tio̍h荣耀上帝ê生活！因为chit-ê事实是主创造人类ê原旨，基督徒ài tiāⁿ-tiāⁿ用che来省思人生ê一切状况！

（B） 上帝喜爱人kap他同行
为tio̍h beh完成人tī上帝面前真正ê价值，bē致使kah有偏失ê人生，人一定ài tī生活中kap上帝保持通顺ê关系，mā to̍h是kap上帝同行，这是过去完成上帝ê旨意ê人ê信仰生活ê方式、挪亚、亚伯拉罕、以诺、约瑟、摩西、大卫王或者其他众先知lóng是kap上帝同行chiah完成使命ê，弥迦书六章8节「世人nah！耶和华已经指示你啥物是善；伊向你所ài ê是啥物neh？只要你行公义好怜悯存谦卑ê心，kap你ê神同行。」此经节表现了基督徒kap上帝之间siōng好ê关系。

（C） 尽力去完成上帝所托付ê使命
圣经ê主题，一面hō͘人认bat上帝，koh hō͘人了解上帝向人类所要求ê，了解神ê旨意了后，必须ē-tàng尽力去完成所托付ê责任，比如圣经所强调ê，ài尽心、尽性、尽力、尽意去疼主你ê上帝，koh ài疼厝边ná亲像家己，这是旧约kap新约ê siōng大诫命，基督徒m̄是只有建立teh认bat上帝而已，是teh认bat了后表现出有信仰ê生活行为。

三、 尽忠ê工人
既然咱已经了解上帝ê期待kap希求，所以咱必须按照各人无仝ê环境完成伊（亦to̍h是各人ài谨慎来建造伊！），一个人ē-tàng终其尾受托ê khang-khè是完成使命之第一步，而且看施工中ê情形，工头手里the̍h-tio̍h设计师设计ê蓝图，指挥工人按图施工，一座建物ê完成，必须终其尾原始ê设计图，tī台湾ê公共工程常有偷工减料ê情形，这to̍h是不忠ê表现，明知建筑师所设计ê蓝图，lóng有结构ê必要考量，soah iáu偷食步、偷工减料，lóng可能造成真大ê危机kap惊人ê后果，因为人性贪婪ê弱点，bōe-sái满足tī正常施工ê百分之十左右ê利润，企图用偷工减料ê手路来达tio̍h两倍以上ê利润，tī台湾ê营造业持chit种心态ê人，满满是，chit种人是无可能尽忠--ê，若beh尽忠必须具备健忘ê心态，投机取巧ê人mā可能只ē-tàng tī主人面前一时有好ê表现；若主人无tī ê时就lán-si、无尽职，chit种情形tī今á日社会真普遍，对社会造成极负面ê影响，基督徒应该是忠心ê仆人，必是照主人（经营者）ê方针按图施工，千万m̄-thang自作主张或者偷工减料，清彩随便，这lóng m̄是基督徒应该有ê作为，m̄-nā án-ne，koh-khah应该认真、负责、精益求精，不断研究改进，磨练家己ê技术，án-ne chiah ē-tàng建造高品质ê工程。

基督徒一定ài建立正确ê观念。进取心，开发潜能，善用上帝所赐ê时间kap空间，成做一个积极进取ê生活者，用充实人生ê内容，建立性命ê价值。

仝款是数十寒冬ê性命，掠准被动消极，清清彩彩，郁闷无活力，一点阿趣味lóng无，不如充满感恩kap喜乐，有丰富ê意义kap价值，chiah符合上帝ê旨意，chit种作为chiah是基督徒信仰ê果实，因为一个真实ê信仰追求者，tī伊ê生活中必须有圣灵所充满ê美好果实，chit种圣灵充满thang引chhōa基督徒成做善尽职责ê忠心工人，进一步koh完成上帝所托付ê使命，同时chit种人生绝对m̄是清彩，伊是精益求精ê人生。

总有一工，ta̍k位基督徒lóng tio̍h khiā-tī上帝ê施恩宝座前，展示伊ê一生ê工程，面对那严肃ê一刻，人beh听上帝审判ê声音，是挡会tiâu千锤百链ê金银宝石ê工程，抑是不堪一击ê工程？Lóng tio̍h显露tī审判主chìn前，he就是工显资值ê时刻！