《当上帝开嘴讲台语》

 | | | 转寄

5.3.1.3 「语音」方面ê语感测验

作者 梁淑慧 2009.03.08

表5.3.1.3a 无仝背景ê读者对《巴克礼译本》ê「语音」接受度以及χ2 检定【省略，敬请有兴趣ê人参考原册】

Tùi表5.3.1.3a咱知 「年龄」、「听台语讲道时间ê长短」以及「kám有捷看《巴克礼译本》抑是《台语汉字本》」chit三项变数对于《巴克礼译本》ê「语音」接受度有显着ê影响。Tùi各分项调整后ê残差显示：「年龄」tī 15岁到25岁ê人，对《巴克礼译本》ê「语音」接受度显着有khah kē；26岁到40岁以及60岁以上ê人，对《巴克礼译本》ê「语音」接受度显着有khah koân。「听台语讲道ê时间」tī半年以下者，对《巴克礼译本》ê「语音」接受度显着有khah kē；超过10年以上者，对《巴克礼译本》ê「语音」接受度显着有khah koân。「无捷看《巴克礼译本》抑是《台语汉字本》」者，对《巴克礼译本》ê「语音」接受度显着有khah kē；「捷看《巴克礼译本》抑是《台语汉字本》」者，对《巴克礼译本》ê「语音」接受度显着有khah koân。

Tī「语音」语感测验中ê答题情形如下：

表5.3.1.3b 「语音」语感测验ê题目kap答案统计

＃ 题目选择人次占总人数
1.耳仔
（1）hī-á ※ 23 9.83
（2）hīⁿ-á 213 91.03
2.迎接
（1）ngiâ-chih ※ 6126.07
（2）gêng-chiap 17976.50
3.礼物
（1）lé-mi̍h ※ 88 37.61
（2）lé-bu̍t 153 65.38
4.神迹
（1）sîn-chek 106 45.30
（2）sîn-jiah※131 55.98
5.查甫
（1）ta-po͘ ※ 19 8.12
（2）cha-po͘216 92.31
6.天使
（1）thiⁿ-sài ※ 15264.96
（2）thian-sài 79 33.76
7.食物
（1）chia̍h-mi̍h ※ 117 50.00
（2）si̍t-bu̍t 12854.70
8. [勿会]熄的火
（1）bē hoa ê hóe 198 84.62
（2）bōe hoa ê hé ※38 16.24
9.咬牙切齿
（1）kā-gê chhiat-chhí ※64 27.35
（2）kā-gê chhiat-khí169 72.22


以上9题语音方面ê选择m̄-nā有漳、泉腔口ê无仝，mā有文白音读ê差异。一般来讲，「＝PKL」代表《巴克礼译本》kap《现代台语译本》ê读音，to̍h是语音上属于「厦门腔」抑是「台北腔」，而且语词大部分用「白话音」来发音。（＃9 ê「齿」读做文音「chhí」是例外。）

Tùi结果咱看tio̍h除了使用频率khah koân ê神学专有名词，譬如＃4「神迹」、＃6「天使」是「＝PKL」khah hō͘人接受以外，其他各题lóng是「≠PKL」khah hō͘人接受。

根据洪惟仁（1992b）《台湾方言之旅》册内所整理出来ê田野调查资料，台语目前ê分布状况是：中央山脉东北麓kap西麓属于「偏漳区」，台北盆地、西海岸狭长地带属于「偏泉区」，tī以上二者中间kap嘉南平原，花莲寿丰以南ê一大片地区属于「漳泉混合区」。「漳泉混合区」已经发展出一种「台湾优势腔」，使得「偏漳区」以及「偏泉区」ê地盘渐渐缩小。

「台湾优势腔ê语音系统，如果详细分析，会tàng发现，漳州音所占ê比例比泉州音khah优势。M̄-koh泉州籍人口实际上比漳州籍人口khah多，按照1930年台湾总督府ê统计，泉州籍ê人有1,701,900人，漳州籍ê人有1,319,500人。泉州人大约ke将近四十万，hit当时客家人口只有494,000人。为什么泉州腔颠倒khiā弱势？这是因为漳州人大部分khiā tī平原，khah容易早日融合做统一ê漳州腔，m̄-koh泉州人大部分khiā tī山边海角，内部方言无容易融合，所以势力分散，漳州腔自án-ne占了优势。」（洪惟仁，1992b：103）

咱ê问卷结果印证了「漳州腔」比「泉州腔」khah优势ê事实，过去《巴克礼译本》ê「厦门腔（泉chē漳少）」已经影响教徒ê语言习惯，致使部分教徒tī「口语」kap念读《圣经》时出现语音无一致ê状况（注99），to̍h是原本「漳州腔」ê口音会为着念读《圣经》来改做「泉州腔」。新译ê《现代台语译本》无的确会tàng考虑出版无kāng腔口ê版本，hō͘教徒有选择ê机会。

文白音读ê选用方面，咱mā建议ke参考社会上普遍ê讲法，才会tàng真正反映社会上ê语音实况。

注99：阮bat请几位教会中ê长者分别读三段无kāng文字ê《圣经》经文，将念读ê过程录音落来，发现án-ne ê情形。咱tī 5.3.2.4节会详细讨论chit个实验kap结果。