《当上帝开嘴讲台语》

 | | | 转寄

4.4 信息传达风格ê比较-2

作者 梁淑慧 2008.03.02

以下咱举实例来探讨三种译本ê风格特点（注82）：

一、Tī信息传达方面，《巴克礼译本》以直译原文为主，「红皮圣经」kap《现代台语译本》是用读者会tàng理解ê话语来表达原文ê意义。

如原文「dikaiosune」chit字，《巴克礼译本》tī马太福音3：15，5：6、10、20，6：33，21：32全部译做「义」，其他两种译本是看顶下文来翻译做无仝ê用语。

表4.4.1a 「义」ê比较

马太巴克礼译本红皮圣经现代台语译本
3：15因为咱合宜着án-ni来尽lóng总ê义。咱若án-ne做是当然ê，因为这是符合上主所要求ê。因为án-ni是符合上帝一切ê要求。
5：6枵(iau)嘴干欣慕义ê人有福气。热切渴慕boeh实行上主ê旨意ê人，实在有福气。枵嘴干渴慕义ê人实在有福气。
5：10为着义bat受窘逐ê人有福气。为着实行上主ê旨意来受迫害ê人，实在有福气。为着义受迫害ê人实在有福气。
5：20设使恁ê义无赢过经学士kap法利赛人ê义，决断bōe得入天国 。恁若无比经学者kap法利赛派ê人khah忠实来遵行上主所要求ê，恁一定bē-tàng进入天国 。 恁若无比经学教师kap法利赛派ê人koh khah虔诚遵行上帝ê旨意，一定bōe-tàng入天国。
6：33独独tāi先求伊ê国kap伊ê义，就chiah ê物lóng beh续hō͘恁。恁着tāi先追求上主ê国以及伊ê旨意，伊自然也会将其他一切ê物lóng赏赐hō͘恁。着tāi先追求伊ê国kap伊ê义，按呢chiah ê 一切就续hō͘恁。
21：32约翰tī义ê路就近恁。约翰来指示恁行上主所要求ê路。施洗约翰来恁chia，指示恁行正路。


另外，tī《巴克礼译本》中有一寡文句读起来真oh了解，这mā是因为忠于原文ê原则来造成。M̄-koh若查考「红皮圣经」抑是《现代台语译本》，意思to̍h加真清楚。

表4.4.1b 三种译本tī信息传达方面ê比较（注83）
马太巴克礼译本红皮圣经现代台语译本
3：8所以恁着结hit号合tī反悔ê果子。 Taⁿ恁着用恁ê行为来证明恁真正有悔改。着用行为来证明恁有悔改。
4：19来tè我，我beh hō͘恁得着人亲像讨鱼ê。来tòe我！我boeh hō͘恁亲像渔夫teh掠鱼án-ne，去引 chhōa人来信上主。（kap《巴克礼译本》仝）
5：3心内丧乡ê人有福气，因为天国是in ê。知影着倚靠上主ê人，实在有福气，因为in会成做天国ê子民。 心内散赤ê人实在有福气，因为in是天国ê子民。
5：38目睭赔目睭，嘴齿赔嘴齿。以眼还眼，以牙还牙。（kap《巴克礼译本》仝）
5：39莫得kap pháiⁿ抵敌。m̄-thang「以恶报恶」。 m̄-thang报复得罪恁ê人。
5：41有人勉强你行一里， 就kap伊行两里。若有人强逼你giâ伊ê行李行一里路，着kap伊行两里路。若有占领军ê军人强逼你行一里路，着kap伊行两里。
6：34莫得为着明仔日挂虑；因为hit个明仔日，伊beh家己挂虑。m̄-thang烦恼明仔载ê tāi-chì。明仔载也有另外ê tāi-chì thang烦恼。m̄-thang为着明仔日挂虑；明仔日ê tāi-chì明仔日才挂虑。
6：34一日ê艰苦tī一日够额。一日ê困难，hit日来担当就有够额。一日ê艰苦一日当。
7：1莫得批评人，才免抵着批评。m̄-thang批评别人，恁才bē受批评。m̄-thang评判人，恁chiah免受上帝审判。
8：22出在死人去埋葬in ê死人。放hō͘ hiah-ê 精神上ê死人，去埋葬in肉体上ê死人。 hō͘死人去埋葬in ê死人。
11：19若是智慧tùi伊ê所行显明伊是tio̍h。但是上主ê智慧是用hit个智慧ê成果来证实ê。上帝ê智慧tùi作为证实。
12：33恁着掠hit个树做好，伊ê果子ia̍h做好；或是掠hit个树做pháiⁿ，伊ê果子ia̍h做pháiⁿ；因为tùi果子来bat树。好树结好果子。Pháiⁿ树结pháiⁿ果子。看果子就会tàng知影树ê好pháiⁿ。好树结好果子；pháiⁿ树结pháiⁿ果子；tùi所结ê果子thang知树ê好pháiⁿ。
19：12因为有阉(iam) ê，tùi母胎出世就án-ni；也有hō͘人阉ê；也有为着天国家己阉ê。有人因为天生ê缺点bē-tàng结婚；有人因为人为ê因素bē-tàng结婚；有人为着天国家己无爱结婚。有人tùi出世就无适合结婚；有人是人为ê原因bōe-tàng结婚；也有人是为着天国无beh结婚。
23：2经学士kap法利赛人坐摩西ê位。经学者kap法利赛派ê人继承摩西ê权柄来解释律法。经学教师kap法利赛派ê人坐摩西ê位解说律法。
24：2 tī chia beh无一块石留tī石顶，也无chhia落去。将来tī chia ê所在无一块石会相tha̍h，lóng会倒kah平平去。无kah 一块石会tha̍h tī别块顶面，lóng会倒kah平平平。
24：24因为beh有假基督，假先知起来行大ê神迹kap兆头；beh是会，连拣ê百姓也迷惑伊。因为假弥赛亚kap假代言人会出现来做大ê神迹kap奇事，尽量boeh来迷惑上主ê选民。因为有一寡假基督kap假先知会出现，行大神迹kap奇事来迷惑人，甚至迷惑选民。
25：21好ah ，好koh尽忠ê奴仆，你tī少ê已经尽忠，我beh设立你来管chōe ê；thang入你ê主人ê快乐。真好，你是一个好koh尽忠ê奴仆！你既然对小小ê tāi-chì to顾得住，我boeh hō͘你管理真大ê tāi-chì；你入来分享我ê喜乐！ 真好，好koh尽忠ê奴仆，你既然tī少ê尽忠，我beh委托你管khah chōe ê；入来kap主人做伙欢喜！
25：24主ah，我知你是严辖ê人；未撒ê所在，就beh收割；未分散ê所在，就beh khioh做堆。头家，我知影你是一位真刻薄ê人，无撒种也boeh收成，无种作也boeh收割。主ah，我知你是严辖ê人， 无撒种ê所在ia̍h beh收割，无种作ê所在ia̍h beh收成。
26：40按怎样，恁bōe会kap我警醒半时久ah？ 恁三个 kám真正无法度mài困kap我做伙一点钟久？恁真正bōe-tang3kap我警醒一点钟久是无？
26：41着警醒，着祈祷，免得入tī迷惑；心神甘愿，若是肉体软茈（nńg-chiáⁿ）。恁m̄-thang困去，着祈祷，才bē陷落诱惑。恁心有余但是力不足。着警醒，着祈祷，才bōe陷落诱惑；恁心神愿意，但是肉体软弱（loán-jio̍k）。
徒26：14扫罗！扫罗！你啥事窘逐我？你用脚踢莿是艰苦！扫罗！扫罗！你án怎kā我迫害？你án-ne做tú亲像牛去踢主人有刺ê棍仔，是家己teh伤害家己。扫罗！扫罗！你是án怎kā我迫害？你实在真戆，你tú亲像牛牨beh滚开牛担，用脚踢刺，家己讨皮痛。


Tùi以上ê例咱真明显会tàng看tio̍h「红皮圣经」kap《现代台语译本》行文khah自然、流畅，符合现代人ê语感。一寡oh理解ê经文用浅白好了解ê文句抑是大家熟sāi ê成语、俗语呈现，而且将字面背后隐藏ê涵义也说明ah。M̄-koh chit点mā招致一寡反对ê声音，有人认为：

「翻译者ê任务kap传教者、牧师、神学家、注解者等有所无仝，m̄-thang用家己ê现代意识、思想、抑是解释等代入tī翻译，mā m̄-thang用家己ê Style遮蔽圣经着作者各自tùi圣神ê引chhōa来表现tī原文中ê个性。」（ø，1975）（注84）

m̄-koh遵照「功能对等（functional equivalence）」ê翻译却认为：

「为着hō͘现今ê读者tùi译文所得tio̍h ê信息kap原读者tùi原文所得tio̍h ê kāng款，翻译者必须tī翻译ê过程中做某一寡文法kap用词上ê调整，kā原文所隐含ê意思明示出来。」（骆维仁，2001）

以马太5：41做例，在当时犹太人受罗马政府统治，人民必须为政府做种种ê义务工作，包括强迫运送包裹抑是货物。M̄-koh当时法律规定兵丁kan-taⁿ会-tàng要求平民代替giâ货物行一里路。因为所生活ê时代不同，历史kap文化背景mā无仝，现代ê读者若无了解以上ê背景，读《巴克礼译本》to̍h无法度感受tio̍h当时ê读者所感受tio̍h ê冲击kap反感，「红皮圣经」kap《现代台语译本》虽然加添原文所无ê成分，却hō͘信息ê传达更加清楚、完整。

使徒行传26：14叙述扫罗信主ê经历，耶稣藉当时ê人使用ê物件kap用途来警戒扫罗，叫伊停止迫害基督徒ê举动，chiah会tàng避免伤害家己（翁修恭，2002）。原文中并无「牛」一词，因为这是当时当地ê生活经验，无须要讲siuⁿ明白众人to̍h听有，m̄-koh tī异时异地ê读者听起来，若无小khóa补充说明一定是真oh理解ê。

Koh譬如马太7：1，若照《巴克礼译本》kap「红皮圣经」ê翻译tiāⁿ-tiāⁿ hō͘人理解做：「m̄-thang批评别人，免得受tio̍h别人ê批评。」m̄-koh事实上原文「krino」（判断、批评、审判、定罪）chit个动词被动式ê施事者是上帝。原来，犹太人遵守十诫，m̄敢随便直呼上帝ê名字，因此当必须称呼上帝ê名字时，通常是以被动语态来表达。对原来ê读者来讲，chit种表达法一点仔to bē生疏；m̄-koh对现代ê读者来讲，除非译文明白表示主词是上帝，若无大多数ê人恐惊会误解，无明白tī原文中耶稣ê教导是koh-khah严格ê。《现代台语译本》ê翻译照顾tio̍h信息传达ê正确性。


注82：「信望爱信仰与圣经资源中心」网站http://bible.fhl.net/ 会tàng tī线上对照原文。以下为着方便比较，三种译本ê经文lóng用汉罗合用文呈现，《巴克礼译本》ê标点符号以原有ê形式呈现，无采用《台语汉字本》修改过ê形式。所举ê经文以马太福音为主，其他经卷若有适当ê例亦做伙提出来。

注83：以下所引例句「太5：3」、「太8：22」由林俊育先生所提供，特别tī chia感谢。

注84：Chit篇文章〈新译台语圣经之我见〉刊登tī 1975年ê《教会公报》，分三期连载，分别是：1月12日、1月19日、1月26日。作者匿名，以「ø」发表。内容针对「红皮圣经」ê翻译做探讨kap批判。