《当上帝开嘴讲台语》

 | | | 转寄

4.3.9 疑问词mah

作者 梁淑慧 2008.01.27

《巴克礼译本》teh表达疑问ê时，tī句尾用「mah?」来表示。《厦门音新字典》对「mah」ê解说是：表示怀疑倒反问ê话。王育德（1957）《台湾语常用语汇》中mā有收chit个疑问词。M̄-koh一般老一辈人ê台湾话内底往往bē出现「mah」，反倒转是近年来受华语影响khah chē ê少年辈teh讲台语ê时，会用华语「吗（ma）」问句ê型式套用tī台语句型中。In两个ê调值mā无仝：「mah」是khah kē、khah短ê轻声，倚近第三声；「吗」是khah koân、khah长ê平声，倚近第七声。若是台湾话原有ê词，应该犹会保留tī老一辈ê台湾话chiah tio̍h，所以阮认为这是厦门话ê特殊用法，有可能是受北京话白话文ê影响来--ê。

郑良伟（1996）按语用ê角度将疑问句ê类型分做三种类型，咱也以此来看《巴克礼译本》中ê「mah」疑问句。

（一） 中性问句：讲话人tī各种可能ê回答中无任何偏向，纯粹请听话人解答疑问。
65. 中文和合本：那将要来的是你吗？还是我们等候别人呢？（太11：3）
巴克礼译本：所beh来ê是你mah？抑是阮着向望别人ah？
现代台语：你就是约翰所讲teh-boeh来Hit位抑m̄是？抑是阮着koh等另外一位？[AP]
你是teh-beh来Hit位，抑是阮着期待别人？[HT]

（二） 假设性问句：讲话人tī心内已经先有假设，要求听话人确认抑是否定chit个假设。
66. 中文和合本：你们信我能做这事吗？（太9：28）
巴克礼译本：恁信我会做chit个事mah？
现代台语：恁相信讲我会tàng做chit项tāi-chì是无？[AP]
恁kám信我会tàng做chit个事？[HT]

67. 中文和合本：这不是木匠的儿子吗？（太13：55）
巴克礼译本：Chit个kiám m̄是木匠ê囝mah？
现代台语：Chit个人kám m̄是木匠ê囝？ [AP]
伊kiám m̄是木匠ê囝？[HT]

68. 中文和合本：你甚么都不回答吗？（太26：62）
巴克礼译本：你lóng无应mah？
现代台语：你无答辩是无？[HT]
（你ná无boeh答辩？[AP]）

（三） 反诘问句：讲话人有强烈ê主张，挑战听话人是m̄是敢有倒péng ê看法。Hō͘听话人无法度回答来达到深刻传达家己意见ê效果。
69. 中文和合本：我将要喝的杯，你们能喝吗？（太20：22）
巴克礼译本：我所beh lim ê杯，恁会lim mah？
现代台语：我teh-boeh lim ê苦杯，恁lim会落去bē？[AP]
我beh lim ê杯，恁会lim bōe？[HT]

70. 中文和合本：荆棘上岂能摘葡萄呢？蒺藜里岂能摘无花果呢？（太7：16）
巴克礼译本：Kiám tùi莿帕 (chhì-phè) 挽葡萄？Tùi蒺蔾 (chi̍t-lê ) 挽无花果mah？
现代台语：Tùi莿帕kám会tàng挽葡萄？抑是tùi蒺蔾kám会tàng挽无花果？[AP]
Kiám会tàng对莿帕挽葡萄？抑是tùi蒺蔾挽无花果？[HT]

71. 中文和合本：何况你们在天上的父，岂不更把好东西给求他的人吗？（太7：11）
巴克礼译本：何况恁tī天里ê父，kiám无beh用好物hō͘求伊ê人mah？
现代台语：何况恁ê天父，伊kám bōe用koh-khah好ê物来赏赐hō͘ hiah-ê对伊祈求ê人？[AP]
（何况恁ê天父，伊一定会the̍h好物hō͘对伊祈求ê人。[HT]）

一句话ê意涵如何，往往必须靠前后语境来判定，以上所列举ê经文分类也将讲话ê情境kap对话双方ê意图考虑在内。因为「马太福音」重点在tī主角耶稣ê生平kap教训，所以类型（一）khah少，类型（三）khah chē。若是用语法ê角度看，《巴克礼译本》中ê「mah」问句，伊ê结构差不多kap华语ê「吗」相仝，若用较端的ê台语来翻译，大约等于台语ê「正反逐指问句」或者是用「敢（kiám/kám/káⁿ）」做为统称问词ê「正反统称问句」。但是《巴克礼译本》ê「mah」问句tī kāng一个问句内底会tàng同时出现「敢（kiám）」kap「mah」（例67、70、71），是khah特殊ê用法。

无kāng款ê语言目的lóng会影响问句ê语法表达方式。台语ê正反问句有真chē意思kāng款抑是意思相倚ê讲法，动词后ê结构会tàng选择ê表现方法比华语加真chē款，所以tī例句中无法度全部kā列举出来，咱用下面chit个表简单描述伊ê语法模组：

表4.3.9 台语ê正反问句表述法模组（注80）

正反问句语用模组语法表述
亲切为听者着想用长句
提醒反项是选项之一否定项显着化
强调有正反选择是、m̄是
强调我不知如何选择到底、呢
强调我要求你为我选择解答拜托请问、ho͘ⁿ


正反问句语法模组语法表述例
语言行为ê疑问标志出现在动词前kám有beh去
语言行为ê疑问标志出现在动词后等距离位置有beh去无
统称抑是逐举？敢vs是不是
使用并列选择标志？是 抑是 不是
否定部分选长--ê？抑是选短--ê？犹未vs未


Tī台语ê「正反逐指问句」里，除了「是m̄是」会tàng出现tī谓语ê头一个所在以外，其他所有正反问句ê否定部份lóng ài khǹg tī句尾。「是m̄是」tī句尾ê时会tàng简化做「是m̄」、「是无」。出现tī句尾ê否定词（如：无、bē、未、m̄）除了表示强调以外lóng ài念做轻声。高名凯bat tī《汉语语法论》（1948）中提出华语ê「吗」真有可能是古汉语ê唇音否定词（未、否、不、没、无、非…）变化来--ê。Tī《巴克礼译本》内底咱kan-taⁿ会tàng chhōe tio̍h一寡证据。 语言接触往往会影响语句ê结构，tùi顶面《巴克礼译本》中ê「mah」问句会tàng清楚地看tio̍h受华语「吗」影响ê结果。Tī现在台湾少年人ê台语里，「吗」问句是in所接受甚至tiāⁿ-tiāⁿ使用ê结构，未来kám会变成台语里合语法ê结构真值得koh观察。

注79：原文：「mah(么Mô͘) kiám ū-iáⁿ-mah, chiū-sī giâu-gî tò-hoán mn̄g ê ōe.」
注80：引用自郑良伟〈正反问句语用、语意、语法模板（提要版）〉（未发表）。