《当上帝开嘴讲台语》

 | | | 转寄

4.3.7 古汉语ê残留-2

作者 梁淑慧 2007.12.09

4.3.7.3 双重否定

《巴克礼译本》内底tiāⁿ-tiāⁿ出现「无m̄…」chit种双重否定ê讲法，相当于文言文ê「莫不…」、「无不…」，两个否定词连用，m̄-nā是表达「肯定」，而且koh有「lóng…」ê意思。现代台语tī两个否定词中间一定ài加上「一＋量词（＋名词）」，或者是直接改做肯定句，无to̍h无合语法。

52. 文言文：先知者除其本地本家之外莫不荣也。（太13：57）
巴克礼译本：先知人tī本乡本家以外，无m̄尊贵。
现代台语：（a）先知tī家己ê故乡家己ê家族以外，无一位所在无受人尊敬。
（b）代言人tī家己ê故乡本家以外，去到叨位to受人尊敬。[AP]
先知tī家己ê故乡家己ê家族以外一定lóng受尊敬。[HT]

53. 文言文：为伊等所拿之多鱼无不惊。（路5：9）
巴克礼译本：为着in一下抛落去所掠tio̍h ê鱼无m̄昂愕 (gông-ngia̍h) 。
现代台语：（a）因为in一下抛网就掠tio̍h hiah chē鱼，无一个（人）无着惊。
（因为in一下抛落所掠tio̍h ê鱼，无一个无昂愕。[LKHL]）
（b）因为in一下抛网就掠tio̍h hiah chē鱼，逐个人lóng真着惊。
（因为in一下抛网就掠tio̍h hiah-chē鱼，就大着惊。[AP]）

另外，tī《巴克礼译本》中ê「无m̄是…」是kap华语白话文ê『无非、无不是…』kāng意思，有「只有是」、「kan-taⁿ是」、「不过是」ê意思，kap咱头前所讲ê语义无仝。

54. 文言文：此人不逐鬼，乃以比勒西布鬼之君也。（太12：24）
巴克礼译本：Chit人赶鬼无m̄是靠鬼王别西卜。
现代台语：Chit个人不过是靠别西卜ê势力来teh赶鬼。 [AP]
（Chit个人是靠鬼王别西卜赶鬼。[HT]）

55. 文言文：除以色耳以勒失羊之外，我非遣于何也。 （太15：24）
巴克礼译本：我奉差无m̄是就近以色列家失落ê羊nā-tiāⁿ) 。
现代台语：我不过是为着以色列族失迷ê羊chiah受差派来ê。[AP]
我受差派只有是beh chhē以色列家失落ê羊。[HT]

4.3.7.4 数量语

汉语自从发展量词以后，「数词＋量词」成做「数量语」ê规律结构，tī现代汉语里beh表达人抑是事物ê数量时，bē-tàng直接kā数词khǹg tī名词头前，in中间一定ài有量词。

56. 文言文：一人无婚衣也。 （太22：11）
巴克礼译本：一人无穿礼服。
现代台语：有一个人无穿礼服。[AP]
有一个人无穿婚宴ê礼服。[HT]

57. 文言文：耶稣同伊等来到一处名厄得西马尼。（太26：36）
巴克礼译本：耶稣kap in到一所在，名客西马尼。
现代台语：耶稣kap门徒来到一个所在，名叫做客西马尼园。[AP]
耶稣kap门徒来到一个所在，名叫做客西马尼。[HT]

若是有「指定」ê意思，会tàng tī数量语头前加上指称词（chit、hit、别、逐、toh……），当数目是「一」ê时，有时会tàng省略，省略ê规律相当复杂，郑良伟（1997a:348）kā伊看做是人类运用「特列结构模组」ê心理现象。Tī现代台语里，指称词一般无直接kap名词结合，除了少数真有限ê语词（譬如：别人、别物、chit-tah、hit-tah…）以外，lóng必须ài kap量词组合成「定量复合词」，chit个「指称词＊＋名词＊」ê形式应该是古早语法所留落来ê，有地方差kap个人差（郑良伟，1997a:350）。

58. 文言文：此人妄称神也。 （太9：3）
巴克礼译本：Chit 人僭权滥糁讲 。
现代台语：Chit个人讲亵渎ê话！[AP]
Chit个人亵渎上帝！[HT]

59. 文言文：我以何可比此世代也。（太11：16）
巴克礼译本：Chit世代我beh用甚么来比并伊？
现代台语：Chit个世代ê人我到底着用甚么来比并？[AP]
我着用甚么来比并Chit世代ê人？[HT]

60. 文言文：必报各人依厥行为也。（太16：27）
巴克礼译本：Hit时，beh照逐人ê所行来报应。
现代台语：Hit个时伊会照每一个人ê行为来报答。[AP]
Hit时 ， 伊会照逐人ê所做来报答每一个人。[HT]