《当上帝开嘴讲台语》

 | | | 转寄

4.3 语法ê探讨

作者 梁淑慧 2007.07.22

咱阅读《巴克礼译本》除了会发觉伊ê语词真明显kap现代台语有差异以外，mā会tàng tùi语句ê结构看出语法ê无仝。造成语法kap现代台语无仝ê因素有三个：
一、英文ê影响。《巴克礼译本》是巴克礼牧师根据原文，参考以前ê厦门话译本所翻译--ê。Chiah-ê tùi英国、美国、加拿大来ê宣教士是用英语做母语--ê，in tī学会晓厦门话以后才进行宣教kap翻译，其中有大部分ê宣教士mā会晓文言文。另外一方面，《圣经》ê原文是希伯来文kap希腊文，所以《圣经》ê翻译对in来讲是「将外国话翻译做另外一种外国话」，虽然in ê语文能力lóng真好，mā有请一寡本地ê助手，m̄-koh iáu是免不了会受tio̍h家己母语ê语法来影响。
二、文言文ê影响。前文bat讲过tī中文ê白话文圣经《和合本》出版chìn前，至少有26种ê文言文译本tī中国流传（包括23种文理译本kap 3种浅文理译本）。文言文ê语法kap英文khah相近，反tńg kap现代ê台湾话、厦门话khah无仝（郑良伟，1987a）。
三、时空ê影响。因为时间所造成ê用法变迁，台湾、厦门两地用法ê差异等，需要分别tùi历时kap共时ê角度来衡量，这是咱khah pháiⁿ掌握ê一点。
以下咱to̍h分别来探讨《巴克礼译本》ê语法问题（注74）。「红皮圣经」kap《现代台语译本》因为翻译者是本地人，所以kap现代台语khah无啥物语法上ê差异。

注74：4.3节「语法ê探讨」所列举ê经文，英文采用ê是当时所通行ê英译本English Revised Version（1885），是the King James Version《英王钦定本》（1611）ê修订译本。文言文是参考《马礼逊深文理译本》（1823）kap《施约瑟浅文理译本》（1902）。现代台语ê部分，本研究除了参考「红皮圣经」（简写为「AP」）、《现代台语译本》（简写为「HT」）、《路加福音传汉罗试写》（简写为「LKHL」）以外，mā加上符合现代台语语法规则所衍生ê例句。另外，为着方便比较，台语ê经文lóng用汉罗合用ê文字来呈现。