《当上帝开嘴讲台语》

 | | | 转寄

4.2.1 《巴克礼译本》ê词汇特色-4

作者 梁淑慧 2007.02.04

4.2.1.3有真chē「重叠」ê构词

「重叠」是指重复kāng一个语位ê构词方法，台语ê重叠词因为词类无仝所以有无kāng ê重叠方式kap形态（杨秀芳，1991；卢广诚，1999），在chia咱kan-taⁿ就《巴克礼译本》中siōng tiāⁿ出现ê AA形态来讨论。
台语ê单音节形容词通常用双叠形式AA来弱化词义，用三叠形式AAA来强化词义（杨秀芳，1991；卢广诚，1999）。若是用「烧」做例，程度tùi强到弱是：烧烫烫 > 烧烧烧 > 真烧 > 烧 > 烧烧。AA形容词tī词组抑是句中ê作用有四种：（1）做谓语。譬如：「衫白白」。（2）加上附加词‘ê’ 囥tī名词头前修饰名词，做定语。譬如：「白白ê衫」。（3）做动词ê补语。譬如：「衫漂kah白白」。（4）囥tī动词头前修饰动词，做状语。譬如：「白白食一顿」。（1）、（2）、（3）ê词性iáu是属于形容词。M̄-koh（4）ê词性已经变成副词，有一寡词ê词义mā改变ah。譬如：「白白食一顿」ê「白白」是免费ê意思。
咱将《巴克礼译本》中ê AA形容词对照原文kap其他译本（注68），发现伊ê用法虽然mā有以上四种，m̄-koh伊ê词义并m̄是弱化，反tńg khah接近华语（注69），有‘强化’ê作用。AA叠字词tī《巴克礼译本》中有相当chē ê数量，除了顶面所讲ê「单音节形容词重叠」以外，iáu有一寡是原本ê词型就是叠字形态ê「叠字副词」。Tī chia咱kan-taⁿ列出现代台语中khah罕见--ê。

表4.2.1.3 《巴克礼译本》中ê叠字词
（a）单音节形容词重叠

＃巴克礼译本台语汉字本华语解说做「谓语」做「定语」做「补语」做「状语」
1 bêng-bêng 明明清楚、明白 讲话~、看逐项物到~~看见、~讲、~指示in
2chōe-chōe多多很多财物~、囝孙~~人、~牛、~日
3giâm-giâm严严严格 ~ê责备、~ê管辖 ~责备、~吩咐、~咒誓
4hn̄g-hn̄g远远很远 ~ê所在、~ê海屿、~ê兄弟离开~、四散t„ ~、传到~~teh看、~teh khiä、~随伊
5jia̍t-jia̍t热热灼热心~、心志~~ê风、~ê火炭、~ê怨妒
6khang-khāng空空一无所有、空虚、徒然伊ê着磨~、心志~~ê事、~ê话、~ê礼物拂（pōaⁿ）到 ~~撒种、~安慰 我、~过日
7kín-kín紧紧赶紧 ~离开、~走、~帮助我
8kiong5kiong5强强用强迫ê手段 ~the̍h去、~留伊、~掠阮
9kng-kng光光明亮 ~ê云、~ê启明星、~ê石磐剃~、落~、褪~【华译：「V.光了」】
10kú-kú久久很久 哭~、住（tòa）~、谈论~~抛荒、~无食、~无穿衫
11 móa-móa满满满满的欢喜~、忧闷~、水~~ê向望、~ê受气贮（tóe）醋~、赏赐咱到~~受凌辱、~得着
12pe̍h-pe̍h白白洁白 洗衫到~、清气到~、肿~~得着、~赏赐、~hō͘人【华译：免费】
13piān-piān便便准备好灾祸~、我lóng~ 备办~、排设~~beh救我、~仆落、~teh 听候
14si̍t-si̍t实实实实在在 ~ê凭据干证到~~kā你讲
15 tāng-tāng重重严厉~ê刑罚 ~伤伊、~刑罚伊、~报应
16thiám-thiám 殄殄疲累 拍in~、拍我ê身躯到~
17tn̂g-tn̂g长长长长的 伸~、发~~活、~困、~t„ teh【华译：长时间地】
18tōa-tōa大大大大（地）~ê安稳、~ê好心~宽容、~欢喜、~敬畏

（b）叠字副词
＃巴克礼译本台语汉字本华语解说做「状语」
19chhiat-chhiat切切恳切、迫切~欣慕、~吩咐、~求、~相疼（saⁿ-thiàⁿ）
20éng-éng永永永远~[勿会]嘴干（bōe chhùi-ta）、~来苦楚我、~困、~tī-teh
21piàn-piàn遍遍到处~看、~走、~报扬、~发
22ta̍uh-ta̍uh沓沓一再地~重（têng）、~禁食、~跋落火、~跋落水
23toaⁿ-toaⁿ单单只~服事伊、~ kap 伊讲话、~为家己求
24toàn-toàn断断绝对~m̄通、~m̄是
25to̍k-to̍k独独只~服事伊、~hō͘伊、~行大路

Tùi表4.2.1.3(a)所举chiah-ê叠字词ê短句，咱会tàng看出in kap现代台语ê无仝主要有以下几点：
（1）Tī语义上：《巴克礼译本》中ê AA叠字词是表示语义ê强化；现代台语是用来表示普通级ê轻微形容（杨秀芳，1991：245），若翻成华语是「有点儿……」ê意思。咱比较＃4「远远」、＃6「空空」、＃9「光光」、＃12「白白」、＃15「重重」、＃17「长长」等词ê语义to̍h会tàng看出in kap现代台语ê差异。
（2）Tī用法上：《巴克礼译本》习惯tī及物动词加宾语以后直接koh加补语，如上表＃1「明明」、＃11「满满」、＃12「白白」、＃16「殄殄」ê词当「补语」ê例。但无论现代台语抑是华语，及物动词加宾语以后若iáu有补语，通常会tī补语头前koh重覆一摆动词，抑是将宾语the̍h到动词前（郑良伟，1987a）。譬如＃11「满满」，咱会tàng说：「贮（tóe）醋贮kah满满」抑是「醋贮kah满满」，m̄-koh若说：「贮醋到满满」to̍h不合现代语感ah。
（3）一般来讲，现代台语tī形容模糊ê色彩抑是性质ê时，tiāⁿ-tiāⁿ用双叠式；若是说明人ê感觉抑是品质ê时，往往tī单音节形容词头前借助程度副词来说明伊ê程度（杨秀芳，1991：247）。M̄-koh咱会tàng看tio̍h上表ê＃1「明明」、＃3「严严」、＃5「热热」、＃10「久久」、＃11「满满」、＃14「实实」、＃15「重重」、＃16「殄殄」、＃18「大大」却用双叠ê形式来形容感觉ê强烈。
（4）另外，有一寡词型tī现代台语里有无仝ê语义kap用法。＃1「明明」做状语的时，现代台语是【显而易见的】之意，kap华语ê语义、用法相仝。＃7「紧紧」tī现代台语通常做动词ê补语，指动作ê速迅、急迫。譬如：「欠伊50箍niâ伊to̍h讨紧紧」。＃8「强强」tī现代台语里无kāng款ê用法，lóng用单音节做状语，如：「强留伊」、「强the̍h去」。＃10「久久」tī现代台语里通常用「久久仔」做时间副词加tī动词词组前。＃11「满满」tī现代台语里通常用「满满是」来做谓语、补语。＃13「便便」tī现代台语里无做状语ê用法。＃14「实实」tī现代台语里无kāng款ê用法，lóng用同义词「实实在在」来代替。＃17「长长」做状语的时，tī现代台语里无chit款ê用法，必须改用其他讲法来代替。
表4.2.1.3(b)所举ê叠字副词lóng是现代台语无常用--ê，m̄-koh犹原保留tī长老教会ê牧师讲道抑是年长一辈信徒ê口语里。
其中＃22「沓沓」是【一再地、经常重覆发生】ê意思，例句「沓沓重」是指「一再重覆地讲」，chit个讲法现在已经真少听tio̍h。现代台语另外有一个常用词「沓沓仔」是【慢慢地】ê意思，如：「沓沓仔来」【慢慢来】、「沓沓仔讲」【慢慢讲】。
＃23「单单」tī《巴克礼译本》读成「toaⁿ-toaⁿ」，m̄-koh现代台语有另外一个读音「tan-tan」，直接囥tī名词前限制名词ê数量kap对象。譬如：「单单（tan-tan）伊一人」，chit两个用法lóng等于＃25 ê「独独」。「独独」tī《巴克礼译本》里除了做副词以外，khah常见ê用法是做连词使用，有两种意义：a)表示唯一ê条件，非此不可，相当于华语【惟有、惟独】。如马太7:21：「见若称呼我讲：『主啊，主啊』ê，无一尽入天国；独独行我伫(t„)天里ê父ê旨意ê才会。」b)表示转折语气，相当于华语【但是、然而】。如路加22:42 ：「父啊！你若肯，着将此个杯离开我；独独呣是我ê意思，是你ê意思着成。」
Tī《巴克礼译本》中出现ê重叠词形态iáu有ABB kap AAB两种。其中ABB是单音节形容词加上叠字补语，譬如：phòa-kô͘-k ô͘（破糊糊）；AAB是以叠字修饰语加单音节动词所构成，譬如：nga̍uh- nga̍uh-liām（耦耦念）。Chit两类重叠词ê主要功能lóng是beh增加生动感，tī台语里ê造词现象非常活泼。《巴克礼译本》tī这两类重叠词中保留一寡现在khah少听到ê说法，譬如：用kng-kō-kō或kng-khō-khō来形容【光秃秃的样子】；用iù-boa̍h- boa̍h（幼末末）来形容【细碎的样子】。又如：用ngia̍uh- ngia̍uh-chhoah（愕愕惙）、gī-gī-chhoah、khe̍h- khe̍h-tiō来形容【害怕得发抖的样子】，现在lóng用phi̍h-phi̍h-chhoah来形容。

注68：「信望爱信仰与圣经资源中心」网站http://bible.fhl.net/ 会tàng tī在线顶对照《中文和合本》、《英王钦定本》（K.J.V.）kap希伯来文（旧约）、希腊文（新约）。「台湾圣经公会」网站http://www.biblesociety-tw.org/会tàng tī线上对照《现代中文译本》、《新标点和合本》、《英王钦定本》（K.J.V.）。

注69：《实用现代汉语语法》页118：单音节形容词按AA式重叠做状语、补语的时，表示程度深。做定语ê时一般无表示程度深，m̄-koh伊ê描写作用koh-khah强。《汉语语法》页31：当形容词重复做名词修饰语ê时，语意效果会tàng hō͘形容词ê原来意义愈khah生动。