《当上帝开嘴讲台语》

 | | | 转寄

4.2.1 《巴克礼译本》的词汇特色-2

作者 梁淑慧 2006.12.17

4.2.1.1 保留「早期台厦共同语」

（续接上期）

笔者也就《巴克礼译本》当中kap现代台语语感无仝ê词汇（指表4.2.1.1所列出ê词汇）一一查考《台日大辞典》（上卷：1931，下卷：1932）以及《厦门方言词典》（1993）、《普通话闽南方言词典》（1981）（注63）。结果发现有真chē tī现代台语已经无teh用ê词汇，大多数lóng thang tī《台日大辞典》里查考会tio̍h。《台日大辞典》是日本时代台湾总督府运用政府ê财力、人力，经过二十gōa年ê调查研究编撰成--ê，共收入9万gōa个台语词汇，thang 讲是有史以来siōng完整ê口语辞典。既然tī《台日大辞典》里会tàng chhōe-tio̍h chiah-ê词汇，表示chiah-ê词汇tī当初时确实有一定ê使用人口。另一方面，有大多数词汇tī现代ê两部厦门话词典里已经chhōe无。表示chiah-ê词汇已经消失抑是hō͘新所取代，就亲像in tī台湾话里变化ê情形kāng款。

到chia咱thang下一个结论：chiah-ê早期ê闽南词汇bat存在tī百年前左右ê台湾话kap厦门话中，m̄-koh几十年来台湾话kap厦门话各自经历变化，致使造成今仔日二者ê差异。若beh将chiah-ê早期词汇当中ê「纯粹厦门话」chhōe--出来，是有相当大ê困难--ê，所以咱thang kā chiah-ê词汇看做是早期ê「台厦共同语」。虽然chiah-ê「早期台厦共同语」有真chē lóng hō͘后起ê同义语所取代，m̄-koh现在犹koh会tàng tī长老教会ê牧师讲道抑是khah年长hit辈信徒ê口语里听tio̍h。

表4.2.1.1 《巴克礼译本》「马太福音」中ê「早期台厦共同语」（按：本表格共列出164个语词tī三种版本中ê比较，因为数量真大，无法度tī网页chia呈现，请有兴趣ê读者，自行阅读原书，多谢！）

＃64「hū-jîn-lâng」tī台语里有两个意思：thang指「妇女」kap「某」，tī《圣经》里kan-taⁿ有出现「妇女」chit个意思。＃91「kiâⁿ...（行…）」是动词，意思是：「做…」如：「行奸淫」、「行权能」、「行洗礼」……等，tī《巴克礼译本》中真常用，m̄-koh现代台语里khah少用。＃95「... kòa ... （…挂…）」kap＃130「sòa ...（续…）」lóng是连词，意思是：「koh…koh…」。m̄-koh前者用来连接词kap词，如：「睛暝挂哑口」；后者用来连接句kap句，如：「恁bē会服事上帝，续服事钱财。」现代台语khah chē是用「...iū-koh...」代替。＃153「tī-teh」除了表示「存在」ê意思以外，tī台语里mā thang表示「当teh进行…」。＃158「tōa pêng」台语是指「正爿」【右边】，原文希腊文「正爿」【右边】mā是代表「荣耀、权柄ê位置」，二个tú-tú相仝。

台语表示否定会tàng用「m̄（呣）、bô（无）、bē、put（不）」，其中「put（不）」kan-taⁿ用tī文言成语抑是华语借词。而且台语否定词ê用法ài看伊后面所接ê助动词来决定用toh一个否定词，＃105「m̄ ha̍p-gî(呣合宜）」、「m̄ eng-kai（呣应该）」ê肯定式是「ū ha̍p-gî(有合宜）」、「ū eng-kai（有应该）」，所以否定词应该ài用「bô(无）」chiah合理。

《巴克礼译本》中表达「互相、彼此」chit个语意有两个词，＃123「saⁿ （相）」以及＃124「saⁿ-kap（相及）」ê第二义，但＃124「saⁿ-kap（相及）」表示「互相」kan-taⁿ用tī「相及讲」、「相及议论」chit两例。所以表达「互相、彼此」ê时，大多数是用「saⁿ」做副词，后面续接所修饰ê动词来形成，例如：「相叫」、「相争」、「相看」、「相欺负」、「相激」、「相告」……等等，chiah-ê词tī现代台语里有ê犹原保留原来ê读音，有些改「saⁿ」ê读音做「sio」，有ê是用「互相」取代，这是属于无kāng语言层次ê同义语，各有无kāng ê结构特点kap语法功能。【saⁿ/ sio＋V】thang看做是词法ê特列结构（注66），tī现代台语使用ê范围缩小；新起来ê词「互相」会tàng kap复杂ê动词组抑是子句结合，具备khah灵活ê句法功能（郑良伟，1992）。

＃129「siū（受）」tī《巴克礼译本》中大部分直接用tī动词前，是表示被动ê助词，但并无点明施动者，如：「受批评」、「受解送」、「受热」、「受召」、「受卖」……等等，是一个相当多产ê结构，chiah-ê词tī现代台语里已经hō͘同义语「被」、「hō͘人」所取代。

Tùi表4.2.1.1咱mā看出《巴克礼译本》ê词汇深深受tio̍h文言文ê影响，如：＃6「bia̍t（灭）」、＃20「chhì-siūⁿ（试想）」、＃22「chhia2N-bān(且慢）」、＃30「chiâⁿ（成）」、＃38「chiū-kūn(就近）」、＃42「chúi-cho̍k（水族）」、＃43「chùi-hàn(醉汉）」、＃50「hêng-i (行医）」、＃51「hêng-hiong（行凶）」、＃89「kî-û(其余）」、＃91「kiâⁿ...（行…）」、＃101「kūn lah（近啦）」、＃120「pō͘-kiâⁿ（步行）」、＃121「pù lâng(富人）」、＃122「put-lūn(不论）」……等等。这是因为tī 1810年起老早就已经有文言文ê《圣经》译本（注67），根据蔡锦图（2000）ê研究，前后至少有26种文言文译本tī中国流传。Chit寡词汇tī「红皮圣经」kap《现代台语译本》中拢已经被修改做现代人常用ê词汇。会tàng 跟tòe时代ê变迁tī无影响内容理解ê情况下做调整，使用符合现代台湾人ê语感，这是「圣经翻译」重视台湾社会实况化ê具体表现。


注63：Tī查阅三本词典ê时，发现圣经《台语汉字本》kap chit三本词典tī汉字ê使用上分别lóng有家己ê选择，这也证明全部用「汉字」来表达台湾话想beh达到一致性有相当大ê困难。
（注64、注65为表4.2.1.1中ê注解，tī chia省略）
注66：有关「特列结构」ê语法特点kap探讨，详见郑良伟（1992）。
注67：文言文《圣经》ê主要对象是受过教育ê中国人，按照内容又分做「文理（文言文）」以及「浅文理（浅近ê文言文）」两种。