《当上帝开嘴讲台语》

 | | | 转寄

3.2 实况化ê神学理论

作者 梁淑慧 2006.07.23

3.2 实况化ê神学理论

十九世纪以来，跟tòe海外宣教ê开展，基督教tùi西方以希腊、罗马文化做主体ê世界被绍介来到亚、非、拉丁美洲kap南太平洋等第三世界国家。但chit种以西方文化做主导ê神学内容，却kap当地ê社会、历史、文化产生差距kap疏离，soah致使福音信息ê宣讲无法度切中社会情境ê需要，甚至被看做是外来--ê，是敌视固有文化ê宗教信仰。为tio̍h解决chit个问题，第三世界教会开始思考如何将福音kap本土人民相融合，tùi án-ne来对神学内容有进一步ê反省kap觉醒，展开了神学实况化ê里程。会tàng讲十九世纪以前ê神学偏重形上学ê思考，具有辩证哲学ê倾向，无注重历史，教义性格极强；相对--ê，十九世纪以后ê神学则重视历史经验，尽力chhōe求「意义」ê可能性，而且对无kāng处境中ê「文化」ê神学意涵有新ê体认（郑仰恩，2001a）。

「实况化（Contextualization）神学」会tàng讲是以第三世界国家为主ê一个神学潮流，tī实况化神学出现chìn前，第三世界国家ê教会就bat大力提倡「根植化（Indigenization）神学」。根植化神学ê理念是kā本土文化看做是表现福音ê工具，in认为福音或神学ê本质是既定--ê，m̄-koh tī表现方式kap表现素材上会tàng借用本土ê文化素材来做媒介。但根植化神学kan-taⁿ tī形式上接纳当地文化，tī神学ê本质上iáu-koh是以西方神学为主导，bē-tàng tī本质上对传统神学提出应有ê挑战。出身台湾ê普世神学家黄彰辉牧师有感tī chit个局限kap不足，所以 tī 1972年伊担任普世教会协会（WCC）ê神学教育基金会主任ê时，提出了「实况化神学」ê理念。伊认为「实况化」比「根植化」koh-khah 会tàng反映以信仰参与tī生活实况中ê动态概念，「实况化」代表一个会tàng不断更新变化而且以未来为取向（future-oriented）ê过程，tùi继续kap变动中ê实况互动（de-contextualization & re-contextualization）来建构神学，这也是基督教所强调ê「道成肉身」ê信仰。

「实况化神学」ê主要原则是kā基督教信仰khǹg入当代人民ê实况处境中来了解，hō͘ hiah-ê tī无kāng文化处境中从事基督教信仰活动ê人，会tàng chhōe-tio̍h家己ê身分认同，同时会tàng有效来运用in家己独有ê特殊经验来建构神学。黄彰辉牧师主张神学应该有故乡，文本（text）一定ài融入文脉（contex）中，这就是实况化（Contextualization）ê真谛。伊认为文本ê文脉kap文化有关，因此，亚洲ê教会或第三世界ê教会只有正视家己ê文化，hō͘福音kap家己ê文化关联起来，神学chiah算chhōe-tio̍h故乡，亚洲神学kap第三世界神学chiah对家己ê人民、国家有所贡献(注31)。

另外一位参与「实况化神学」ê领导人物是宋泉盛牧师，伊认为：
「上帝ê话若离开了实况，是抽象ê观念，对tī实况一点仔 mā起不了作用。生命ê实况若无tùi上帝ê信息来，就缺乏革新ê力量。上帝ê话kap生命ê实况是互动ê，两者lóng变动无停，无一个是静止--ê。因此，神学kap社会学ài互为表里。……社会ê影响hō͘咱对上帝ê话有无仝ê领受，chit个结果koh促成咱去认识上帝如何以新ê方式来对咱讲话。因此，上帝ê话m̄是一成不变--ê，这是所有ê神学家必须冒ê险。如果神学家想beh tī in所处ê社会实况中从事神学，bē-sái无冒chit个险。」（宋泉盛，1989：200）

伊主张亚洲宣教应该行出以西方为主ê传统结构，亚洲ê人民、历史、文化kap宗教应该是神学关怀ê课题（宋泉盛，1990）。伊提倡「故事神学」（storytelling method），将基督教西方神学以亚洲形象来表达，以民间故事、神话、传说、歌谣等亚洲人ê素材来建构神学，致力hō͘神学生活化、具体化。

「宗教信仰必须摆脱虚假ê阶级制度kap繁琐ê神学系统，并且触摸tio̍h芸芸众生ê生命kap心灵，chiah 会tàng成做一个真实koh活泼ê宗教。」（宋泉盛，1989：256）

「神学ê精华所在，是叙述『上帝ê故事』；『上帝ê故事』亦就是『人民ê故事』。『上帝ê故事』并m̄是kan-taⁿ属tī犹太人kap基督徒ê故事，伊mā是今仔日亚洲成千上万人民ê故事。」（宋泉盛，1994：33）

「实况化神学」m̄-nā tī第三世界造成极大ê影响，也普遍成做近代神学界ê一个共识。1994年「世界神学教育协会议会」（World Congress for Associations of Theological Institutes）ê会议，与会者决定：实况化（contextualization）必须列为评断神学学术水准ê重要依据之一。因为无法度切合实况处境ê神学，bē-tàng真正具有学术ê价值（黄伯和，1999：25）。

台湾本土神学ê建构，就是如何tī台湾文化处境中，将tī西方文化kap思潮中发展出来ê教义kap神学作「实况化ê诠释」（contextual interpretation），抑是如何以chiah-ê西方ê经验做参考结构，tī台湾文化处境中，重新建构基督教神学（郑仰恩，2001b）。根基chit-ê原则，tī《圣经》ê诠释顶面，体认tio̍h经文意义ê流动性kap多面性，经文之所以有意义，乃是在tī伊对读者所处ê历史情境、实况有意义（陈南州，2001）。人民生活ê经验kap文化情境，成做释经工作ê重要课题。因此，台湾基督长老教会推动「新眼光读经法」，利用双焦点（经文ê原来意义－－what it meant，经文ê现代意义－－what it means）来看经文，融合经文ê视野kap现代读者ê视野，发展出属tī家己ê文化、反映家己ê社会定位kap处境ê读经法，来诠释出真正会tàng打动人民心灵ê信息（骆维仁，2001）。

Tī chit一波「实况化神学」ê引领之下，圣经公会对《圣经》ê翻译原则kap方法，也tùi过去ê「形式对应（formal correspondence）」转做「功能对等（functional equivalence）」，将《圣经》翻译看做是一种跨文化ê传讯（transcultural communication），是文化诠释ê第一步，mā是hō͘福音定根本土ê一条进路(注32) （骆维仁，2001）。

注31： 以上内容参考黄伯和（1999）《本土神学讲话》kap郑仰恩（2001a）〈神学教育ê危机kap契机〉。
注32：《圣经》ê「翻译」kap「诠释」是无仝ê领域。圣经翻译是kā原文信息以另外一种语言再现出来，是teh做解释（exegesis），主要是圣经学者ê工作；圣经诠释则是将原信息ê现代意义诠释出来，是teh做诠释（hermeneutics），主要是传道者kap系统神学家ê工作领域（骆维仁，2001：19）。因此，咱thang简单区分：翻译是解释原文ê「本义」；诠释则是发展出原文ê「引申意义」来。