《当上帝开嘴讲台语》

 | | | 转寄

2.3 关于台语文字

作者 梁淑慧 2006.05.07

2.3 关于台语文字

Tī讨论台语文字chìn前，咱必须先厘清「文字」kap「音标」ê差别。「文字」是指书面语系统，是书写创作ê符号，kap声音无一定有直接ê关系；「音标」是记录音读ê符号，是对语音解析ê工具。

根据杨允言、张学谦(1999)〈台湾福佬话非汉字拼音符号ê回顾kap分析〉中ê调查，台湾社会所出现过ê台语拼音符号系统有64种hiah chē，包括50种「罗马字」、9种「ㄅㄆㄇ注音式」、2种「日本假名式」、3种「朝鲜谚文式」。其中「ㄅㄆㄇ注音式」照伊ê名称所表示是音标，虽然目前社会上出现一kóa以汉字为主，透滥淡薄仔ㄅㄆㄇê台语文，m̄-koh一般来讲iáu kā当做是注音m̄是正式ê文字。「日本假名式」若是参考日文ê作法，kā当做是文字抑是音标lóng ē-sái，m̄-koh目前所留--落来ê文献kan-taⁿ当做音标使用niā-niā。「朝鲜谚文式」属tī文字系统，洪惟仁(1992a)《台语文学kap台语文字》tī册里真chē摆提起伊认为谚文kap汉字合用ê文字形式是siōng-kài理想ê台语文字，m̄-koh tī现实ê考量上真oh得付诸实行。「罗马字」方面情况khah chē样，「教会罗马字」kap根据教会罗马字改造ê「现代文书法」、「普实台文」等，是以「全罗马字」形式做台语ê文字系统，in ê罗马字符号兼有音标ê功用。其他各式大多数是以罗马字来做汉字ê标音工具，或者是以罗马字取代一部分写bē出来ê汉字，用「汉罗合用字」做文字系统。

综合以上ê讨论咱thang知：表记台语ê「音标系统」，除了上文所讲ê拼音符号以外，koh加上传统汉语声韵学ê汉字反切，lóng总有六十gōa种hiah chē。但归纳目前社会上使用ê台语「文字形式」来看，有「全汉字」、「全罗马字」、「汉罗合用字」三种。本节kan-taⁿ针对「台语文字形式」做文献ê回顾，无beh讨论「台语音标系统」。用「全汉字」、「全罗马字」、「汉罗合用字」三种文字形式表记台语ê优缺点，咱beh tī 4.5节详细讨论。另外，历年来关于「汉字本字」ê考证、「罗马字ê改良」等，众学者mā有真chē无仝ê看法，因为m̄是本研究ê重点，tī下文中kan-taⁿ简单提起。以下第一节，咱用时代做顺序简单描述bat出现过ê主张，第二节beh回顾三种文字形式tī心理语言学kap社会语言学顶面ê比较。