《当上帝开嘴讲台语》

 | | | 转寄

2.2 关于「台湾话」kap「厦门话」ê比较

作者 梁淑慧 2006.04.30

2.2 关于「台湾话」kap「厦门话」ê比较

郑良伟（1987b）tùi语言形成ê角度来比较台湾话kap厦门话，指出两者有以下几个无仝ê所在：
一、台湾各大城市ê居民并m̄是直接tùi漳、泉搬来；厦门ê居民则大多数直接tùi漳、泉各地迁来。
二、大批移民来台湾差不多是tī 17世纪明末清初，所以台南建府ê时间相当早；厦门市ê快速兴起是19世纪五口通商以后ê代志。
三、台湾地区因为交通、学校制度、电视、广播事业发达，工商业、徵兵、就业、就学所带来ê人口流动量kap交流量远远超过福建地区，致使「台湾话」内部ê差异微小，互相通话lóng无阻碍。「厦门话」虽然一向有「闽南语标准话」ê威信，范围却kan-taⁿ限tī厦门市kap伊ê近郊，无论是tùi人口抑是流通ê地区来看，lóng不如内部差异微小ê「台湾话」。
四、厦门ê居民kap泉州、漳州来往从来无断绝过。台湾kap中国大陆居民ê往来，bat有清代ê海禁、日本ê统治、国共ê对立等，彼此影响ê机会khah小。

针对「台湾话」kap「厦门话」语言本身ê比较，众学者一致ê结论是：虽然台湾话kap厦门话lóng是tùi漳州话kap泉州话混合造成，m̄-koh两者混杂ê方式无啥kāng款。其中tī语音kap语法方面ê差异真小，尤其是台北话kap厦门话ê语音上接近。台湾话kap厦门话最主要ê差异是tī词汇方面，约有10％ê无仝（王育德，1957；郑良伟，1987a、1987b；周长楫，1996；张振兴，1997；周长楫、欧阳忆耘，1998）。Chiah-ê词汇差异主要表现tī几个方面：
一、受本身自然环境抑是文化ê影响来产生ê特有语词。譬如：台湾话ê大甲席、在来米、九孔、花枝、唐山……等。
二、Kāng一个事物抑是概念ê用词无仝。譬如：『黑板』tī台湾话是「乌枋（o͘-pang）」，厦门话是「乌牌（o͘-pâi）」。『钞票』tī台湾话是「银票（gîn/gûn-piò）」，厦门话是「纸字（chóa-jī）」……等。
三、有一寡语词，词义范围ê大小无仝。譬如：「乌白（ o͘ pe̍h）」tī台湾话会当指（a）乌kap白。（b）胡乱。譬如：「乌白讲」、「乌白做」。厦门话to̍h无（b）ê意义。Koh譬如「古意（kó͘-ì）」tī台湾话ê意思是「忠厚老实」；厦门话除了chit-ê意思以外koh会当表示「古道热肠」。
四、因为两地ê华语词（普通话）无仝所引起ê差异，表现tī现代ê、科技ê语词顶面。譬如：台湾话ê「电脑」厦门话称做「计算机」。台湾话ê「计程车」厦门话称做「出租汽车」……等。
五、台湾因为历史背景ê关系，有真chē ê外来语，尤其是日语ê外来语借词上chē，che是其他闽南各地所无ê特色。譬如：甲（土地面积单位，荷兰语）、放送（广播，日语）、tha-tha-mih（榻榻米，日语）、水道水（自来水，日语）……等。

厦门自19世纪中叶开放通商以后，渐渐发展成做中国大陆闽南地区ê政治、经济、文化中心，厦门话mā渐渐成做闽南地区ê优势方言，取代早期泉州话、漳州话ê地位，hō͘人看做是闽南话ê代表(注18)（周长楫，1996；张振兴，1997；周长楫、欧阳忆耘，1998）。台湾tī日本时代到四、五十年代中间，mā确实有kā厦门话看做是台湾话ê标准语，而且去模仿ê倾向（王育德，1957；郑良伟，1987a、1987b）。M̄-koh chit种观念现在已经消失ah，tùi台湾民间语言kap媒体语言ê使用、字典、词典kap教科书ê编辑……等看起来，所使用ê lóng是台湾话，m̄是厦门话（郑良伟，1987b）。

李勤岸（2000）bat就台语ê时代背景探讨台语词汇ê变迁。主要ê研究范围是1920年代kap 1990年代两个台语小说词库中ê借词成分，论文中真清楚指出台语借词ê主要来源是厦门话、日语kap华语三类，厦门话借词归因tī基督教ê传入，尤其是《巴克礼译本》ê翻译。将厦门话看做外来语chit种观点是一个创见，为台语研究开拓另外一个值得探讨ê角度；但伊将语料中凡若kap现代台语语感无仝koh bat出现tī《巴克礼译本》中ê 语词lóng kā归类做厦门话借词，chit点阮有无仝ê看法。透过查阅《台日大辞典》（上卷：1931，下卷：1932），阮知影chiah-ê词汇tī日本时代ê台湾社会是曾经存在过--ê，只是历经时代ê变迁soah来消失抑是hō͘后来ê语词取代去，所以应该kā chiah-ê语词看做是「早期台厦共同语」，并m̄是纯粹ê厦门话语词。语言一向tī「口语」ê变化会khah紧，m̄-koh因为有「书面语」《巴克礼译本》ê记载，hō͘后来ê人会得thang看tio̍h语言变迁ê动向，chit种推论应该khah合理才tio̍h。

注18： 《普通话闽南方言辞典》（1981）kap「现代汉语方言大词典」的分卷《厦门方言辞典》（1993）lóng是以厦门话做闽南方言ê代表。