《台语荒漠甘泉（全罗版）》

 | | | 转寄

"Hiàn o-ló ê koa-siaⁿ "

作者 陈清俊 翻译 2010.02.28

listen


Jī ge̍h jī-poeh (Jī ge̍h jī-cha̍p-poeh ji̍t)

"Só͘-í tio̍h tùi Iâ-so͘ siông-siông ēng o-ló chòe chè, hiàn hō͘ Siōng-tè;" (Hi-pek-lâi 13:15)

Tī pîn-bîn khut kang-chok ê thoân-tō-su, kiâⁿ ji̍p khì chi̍t tòng kong-gū o͘-o͘ àm-àm ê hāng-lō͘, thiaⁿ-tio̍h ū siaⁿ mn̄g kóng, "Sī sím-mi̍h lâng ah?" I ēng hoan-á-hé tiám-to̍h, ba̍k-chiu chêng, khòaⁿ sī sio̍k-sè ê khoat-hoa̍t kap khó͘-lān, ū tòa-tio̍h sèng-jîn-tek ê sìn-khò kap an-lêng ê khì-chit, khòaⁿ-kìⁿ chi̍t ê móa-bīn jiâu-phè-phè ê bīn-iông, ū chi̍t tùi kian-tēng, khip-ín lâng ê ba̍k-chiu, chhin-chhiūⁿ o͘ ê bo̍k-liāu só͘ khek ê hiah ni̍h kim ku̍t koh hoat kong-chhái. Che sī tī jī ge̍h hân-léng ê àm-sî, i tó tī chi̍t téng phòa-phòa ê bîn-chhn̂g, bô hé-lô͘, bô sio-khì, iā bô tiān-hé. I bô chia̍h chá-chhan, tiong-tàu, kap àm-tǹg. Ná chhin-chhiūⁿ sáⁿ-mi̍h mā bô, chí-ū hong-sip-pīⁿ kap i tùi Siōng-tè ê sìn-sim. Su-sek ê khoân-kéng lī i chin hn̄g. Chóng-sī ē-bīn sī i só͘ chhiùⁿ-chhut ê koa-siaⁿ:

Bô lâng chai góa ê thòng-khó͘,
Bô lâng chai, tû-liáu Chú Iâ-so͘;
Bô lâng chai góa ê khó͘-chhó͘,
Gîm êng-iāu Ha-lé-lú!

Ū-sî khí, ū-sî lo̍h,
Ū-sî tī thô͘-kha tó,
Ū-sî chhut-siaⁿ o-ló,
Gîm êng-iāu Ha-lé-lú!

Kè-siok 8chhiùⁿ lo̍h-khì, "Bô lâng chai góa só͘ chòe ê kang, Bô lâng chai góa só͘ tú-tio̍h ê kan-lân," lóng soah siōng-bé kù, "Gîm êng-iāu Ha-lé-lú!" ti̍t kàu chòe-āu chi̍t chat sī án-ni:

Bô lâng chai góa chin hí-lo̍k,
Bô lâng chai, tû-liáu Chú Iâ-so͘!

"Goán hoân sū siū hoān-lān, nā-sī bô khùn-pek; ûi-lân, iā bô sit-bāng; tú-tio̍h khún-tio̍k, iā bô siū pàng-sak; siū phah tó, iā bô sí-bô;" (Ṳ Ko-lîm-to 4:8,9) Chit ê keng-bûn chiah ōe thang soat-bêng chit ūi lāu o͘ hū-jîn ê hí-lo̍k.

Lí kiám chai Lō͘-tek Má-teng (Martin Luther) beh sí ê sî só͘ thoân ê sìn-sit. "Kim seng ê thòng-khó͘ kap lân-chhù ná chhin-chhiūⁿ oa̍h-jī-pán, lâng khòaⁿ sī tó-páiⁿ pâi ê, khòaⁿ bōe chhut i ê ì-sù, lóng bô ì-gī. Chóng-sī Siōng-tè chiong lán ê lâi-sè tùi oa̍h-jī-pán ìn chhut-lâi ê sî, khiok piàn chòe chin súi ê bûn-chiuⁿ. Lán iā m̄-bián tán kàu hit sî chiah ōe chai, chhin-chhiūⁿ sù-tô͘

Pó-lô tī hái-siōng tú-tio̍h gûi-hiám, i kiâⁿ kàu kah-pán téng tùi chúi-siú kóng, "góa khǹg lín an-sim;" (Sù-tô͘ hēng-toān 27:22) Pó-lô, Lō͘-tek Má-teng, iā ū chit ê lāu hū-jîn, lóng chhin-chhiūⁿ jîn-kan ê thài-iông hoe, tī chhiong-móa o͘-àm ê sè-kài tiong, ōe chhē-kiû pēng khòaⁿ-kìⁿ hit ê tōa-kng, chiū-sī Ki-tok. --- William C. Garnett

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com