《台语荒漠甘泉（全罗版）》

 | | | 转寄

"Thun-lún thèng-hāu"

作者 陈清俊 翻译 2010.02.21

listen

Jī ge̍h jī-it (Jī ge̍h jī-cha̍p-it ji̍t)


"Tio̍h chēng-chēng tī Iâ-hô-hoa ê bīn-chêng, khoan-sim thèng-hāu I." (Si-phian 37:7)

Lí bat kî-tó, koh kî-tó, thèng-hāu koh thèng-hāu, lóng bô tit-tio̍h hôe-èng mah? Bô hoán-èng, tì-kàu sim-sîn lóng nńg lo̍h-khì. tì-kàu teh-beh hòng-khì ah? Chin khó-lêng, sī tī lí só͘ tán ê hong-sek ū chhò-gō͘, só͘ tán ê só͘-chāi bô tio̍h, eng-kai sī tī ōe tú-tio̍h Thiⁿ-pē ê só͘-chāi lâi tán, lâi thèng-hāu.

Sèng-keng kóng, “thun-lún thèng-hāu.” (Lô-má 8:25) Goân-lâi thun-lún, á-sī jím-nāi, ōe thang khek-ho̍k iu-lū. Chú Ki-tok tap-èng I ōe koh lâi, I kóng, chiū it-tēng si̍t-hêng. Jím-nāi, thun-lún ōe khek-ho̍k iu-siong. Ūi-sím-mi̍h iu-chhiû kan-khó͘, soah hoe-sim sit-chì ah? I pí lí khah chai lí ê su-iàu, I thèng-hāu ê bo̍k-tek sī beh tit khah tōa ê êng-iāu. Jím-nāi, thun-lún thang khek-ho̍k jio̍k-thé ê oa̍h-tāng. Sèng-keng kóng, “Sìn, chiū-sī Siōng-tè ê kang.” (Iok-hān hok-im 6:29) Chí-iàu sìn, it-chhè chiū beh sêng-chiū, bô khò ka-kī ê kong-lô. Jím-nāi, thun-lún thang khek-ho̍k it-chhè ê su-iàu, lí khó-lêng hi-bāng ūi ka-kī só͘ ài ê kiû chin chōe, khah chió kiû Siōng-tè ê chí-ì.

Jím-nāi, thun-lún thang pó͘-chiok it-chhè ê loán-jio̍k. Bô chiong thèng-hāu khòaⁿ chòe lōng-hùi sî-kan, jīn chheng-chhó tī thèng-hāu tiong Thiⁿ-pē ū sî-kan ū-pī chu-goân, ka-kiông lí ê le̍k-liōng. Jím-nāi, thun-lún thang khek-ho̍k it-chhè ê pông-hông put-an. Sèng-keng kóng, “I chiū bong góa, hû góa khí-lâi khiā.” (Tān-í-lí 8:18) Thiⁿ-pē sī kian-kò͘ ê ki-chio̍h, chí-iàu sim chûn I ê jím-nāi, lán thang kian-tēng khiā-chāi thèng-hāu I. Jím-nāi, thun-lún ōe thang hoat-chhut kèng-pài ê sim. Siōng hó ê pō͘-hūn sī tòa o-ló ê thèng-hāu, hoaⁿ-hoaⁿ hí-hí teh jím-nāi, “hoaⁿ-hí thun-lún khoan-iông.” (Ko-lô-se 1:11) Tng lí jím-nāi thun-lún ê sî, “To̍k-to̍k thun-lún tio̍h hō͘ i kàu sêng-kong, hō͘ lín oân-choân chiâu-pī, bô só͘ khiàm-kheh.” (Ngá-kok 1:4) Lí chiū ū tōa-tōa hong-hong hù-hù ê pò-tap. --- C.H.P.

Hé to̍h ê sî tio̍h khiā-tiāⁿ,
Chē sī lāi-sim ha̍k-si̍p ê sim-siaⁿ,
Chit tiâu lō͘ khòaⁿ sī bô hôe-kiâⁿ,
Nāi-sim lâi oân-sêng oân-bí ê kang-tiâⁿ. --- L.S.P.

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com