《台语荒漠甘泉（全罗版）》

 | | | 转寄

"Siōng-tè ê soaⁿ"

作者 陈清俊 翻译 2009.08.02

listen


Poeh ge̍h chhoe-jī (Poeh ge̍h jī ji̍t)

"Góa beh hō͘ góa ê chèng soaⁿ chiâⁿ-chòe lō͘." (Í-sài-a 49:11)

Siōng-tè ēng lán ê chó͘-gāi sêng-chiū I ê chí-ì. Lán seng-oa̍h-siōng ū chi̍t-chō chi̍t-chō ê soaⁿ, chó͘-gāi lán lêng-sèng ê chìn-chêng. Chiah ê chó͘-gāi khó-lêng sī lán ê êng-á-ōe, lán khùn-lân ê kang-chok, á-sī "jio̍k-thé chi̍t ki chhì" (Ṳ Ko-lîm-to 12:7), á-sī lán múi-ji̍t ê si̍p-jī-kè. Lán siông-siông ài kiû Chú chiong che tû-khì, siūⁿ kóng it-tān tû-khì, seng-oa̍h chiū ōe kè liáu khah un-jiû, sûn-kiat kap sèng-kiat.

"Bû-ti ê lâng ah, ... lín ê sim cháiⁿ-iūⁿ hiah oh sìn ah!" (Lō͘-ka 24:25) Chiah ê chó͘-gāi kî-si̍t sī chō-chiū lán ê tiâu-kiāⁿ. In khǹg tī lán ê seng-oa̍h tiong, sī sán-seng lán só͘ ji̍t-ji̍t kî-tó tui-kiû ê un-sù kap phín-chit. Chōe-chōe nî lán kî-tó ài jím-nāi, tng lán it-tān tú-tio̍h chhiau-kè lán lêng-le̍k ê khó-giām, lán soah cháu-khui khì. Chiong che tòng-chòe bōe thang khek-ho̍k ê chó͘-gāi, chó͘-gāi lán ta̍t kàu bo̍k-piau. Lán siong-sìn chiong che tû-khì, beh má-siōng tit-tio̍h kiù kap sèng-lī.

M̄-tio̍h! Lán án-ni chòe, só͘ tû-khì ê, sī hit-ê hùn-liān lán kiâⁿ ǹg jím-nāi ê le̍k-liōng, che m̄-sī jím-nāi. Chí-ū jím-siū kim-ji̍t khòaⁿ sī bōe-thang khek-ho̍k ê bôa-liān, chiah ōe tit tio̍h chin-chiàⁿ ê jím-nāi.

Oa̍t-tò-tńg, bô koh siám-pī, sūn-ho̍k tī Chú ê chí-ì, pêng sìn-sim kiû ū-hūn tī Iâ-so͘ ê jím-nāi, khò I ê le̍k-liōng èng-hù lí só͘ siū ê khó-giām. Seng-oa̍h ê khùn-khó͘, chióng-chióng hoân-ló ê sū-bū, bô chi̍t-hāng m̄-sī ēng lâi ta̍t-sêng chòe-ko ê bo̍k-tek. Ài kì-tit, in sī Siōng-tè ê soaⁿ, sī I ūi-tio̍h bó͘ chi̍t ê goân-in chiah chiong soaⁿ khǹg tī hia. Koh lán chai I chiông-lâi m̄-bat bô si̍t-hêng I ê èng-ún.

"Siōng-tè bêng-pe̍k tì-hūi ê lō͘, iā chai i ê só͘-chāi. In-ūi I kàm-chhat kàu tōe ê ke̍k-thâu, piàn-khòaⁿ phó͘-thiⁿ-ē." (Iok-pek-kì 28:23-24) Só͘-í lán lâi kàu soaⁿ-kha, ōe chhē tio̍h lán ê lō͘. --- tùi F.B. Meyer só͘ tù ê "Í-sài-a su ê Ki-tok"

Chhì-giām ê bo̍k-tek m̄-nā sī niû lán ê kè-ta̍t, koh sī cheng-ka lán ê kè-ta̍t; chhin-chhiūⁿ po̍k-hong-ú m̄-nā khó-giām siōng-chhiū ê kiông-tō͘, koh sī cheng-ka i ê kiat-si̍t.

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com