《台语荒漠甘泉（全罗版）》

 | | | 转寄

"Siōng-tè ê an-ùi"

作者 陈清俊 翻译 2009.08.09

listen



Poeh ge̍h chhoe-káu (Poeh ge̍h káu ji̍t)

"I ê la̍t chāi-tī Lí, … hit-hō lâng ū hok-khì. In keng-kè Lâu-ba̍k-sái ê soaⁿ-kok, hō͘ I pìⁿ-chòe chúi-chôaⁿ ê só͘-chāi." (Si-phian 84:5-6)

Sim-chêng khin-sang hoaⁿ-hí ê sî, bōe hō͘ lâng an-ùi. An-ùi sī Siōng-tè siōng pó-kùi ê lé-mi̍h, beh hióng-siū á-sī tit-tio̍h che an-ùi ê un-sù, pit-su keng-le̍k jîn-seng kám-chêng chhim ê soaⁿ-kok, thé-giām tio̍h an-ùi, jiân-āu pit-su chún-pī kap Siōng-tè tâng-kang.

Àm-mî, jîn-seng só͘ su-iàu ê mî, tng i ê im-iáⁿ tà tī lán lêng-hûn hn̂g ê téng-bīn, hn̂g tiong ê hio̍h kńg-khí-lâi, hoe ha̍p khí-lâi, bô koh hoán-siā ji̍t-kng. Tng lán tú-tio̍h siōng o͘-àm ê sî, ōe-kì-tit, lán koat-toàn bōe kám-kak khoat-hoa̍t, thiⁿ-téng lūn-te̍k ê kam-lō͘ chí ū tī ji̍t-thâu lo̍h soaⁿ liáu-āu chiah ōe kàng lo̍h-lâi.

Keng-kè lâu-ba̍k-sái ê kok-té,
Siong-pi thàng-thiàⁿ ê tē,
An-ùi ê Siōng-tè kap góa tī-teh,
Sûi-sî hû-chhî, pó-pì hó-sè.

Thó͘-tē su-iàu hûn kap thài-iông,
Lán ê lêng iā su-iàu hí-lo̍k kap pi-siong,
I khǹg lán tī hé-lô͘ tiong,
Thoàn-liān chòe cheng-kim sûn-liông.

I ín-chhōa lán kiâⁿ tī iu-būn ê lō͘,
Lán kun-sûi I ê kha-pō͘,
I hō͘ lán chhì-giām kap thòng-khó͘,
Lóng sī un-tián ê chi̍t pō͘-sò͘.

Lán siông-siông siám-pī siu-chéng kap chián,
Bōe kì-tit chòe-sit-lâng ê Siōng-tè chai it-chhè,
Ài chai, siu-chéng ná chhim,
Siⁿ chhut ê hoe-pha ná bō͘-sēng bí-lē.

Chhim chai pit-su khó͘-lān hong-sek,
I sim-tiong chûn bo̍k-tek,
Tī iu-kok tiong I khin siaⁿ kóng khí,
Bô-kú lí beh chai góa ê iōng-ì.

Lán keng-kè jîn-seng iu-kok,
Ū I thiàⁿ ê chheng-chôaⁿ lâi ùi-lo̍k,
Hō͘ lán chhíⁿ-gō͘ thòng-khó͘ lô-lo̍k,
Si̍t-chāi sī I ê sù-hok.

Só͘-í lán kun-tè I ín-chhōa,
Sui-jiân tō-lō͘ o͘-àm koh ko͘-toaⁿ,
In-ūi lán khak-si̍t chai I chòe phōaⁿ,
Hō͘ lán tī o͘-àm mî iā beh chhiùⁿ koa.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com