《台语荒漠甘泉（全罗版）》

 | | | 转寄

"Chûn ǹg-bāng lâi thèng-hāu"

作者 陈清俊 翻译 2009.07.26

listen


Chhit ge̍h jī-la̍k (Chhit ge̍h jī-cha̍p-la̍k ji̍t)

"In-ūi lán óa-khò Sîn, tùi sìn teh thèng-hāu só͘ ǹg-bāng ê gī." (Ka-lia̍p-thài 5:5)

Ū-sî ta̍k-hāng lóng khòaⁿ lo̍h chin àm, àm kàu góa su-iàu ǹg-bāng lâi thèng-hāu. Ǹg-bāng lâi thèng-hāu sī chin lân ê, tān-sī tng lán pit-su ǹg-bāng lâi tán, chiah chai chin-chiàⁿ ê jím-nāi. Tng lán khòaⁿ bōe chhut sêng-kong ê iáⁿ, khiok bô sit-bāng, tng lán tī àm-mî tùi thang-á khòaⁿ chhut bô sím-mi̍h mi̍h-kiāⁿ, khiok chiong thang-á-liân phah-khui, in-ūi chhiⁿ beh chhut-hiān tī thiⁿ-nih, tng lán ê sim khang-hu, khiok bô ài jīm-hô ê mi̍h lâi thiam-pó͘, chí-ū ài Siōng-tè siōng hó ê mi̍h, --- chiū-sī ú-tiū tiong, siōng tōa ê jím-nāi. Iok-pek tī po̍k-hong tiong, A-pek-la̍h-hán tī Mô͘-lī-a ê lō͘-tiong, Mô͘-se tī Bí-tiân ê soa-bô͘ tiong, Siōng-tè ê kiáⁿ tī Khek-se-má-lī hn̂g, lóng bô pa̍t-hāng pí che khah kiông ê jím-nāi, thang jím-siū. Chhî-siú, in-ūi lán khòaⁿ “só͘ bōe khòaⁿ-kìⁿ ê Chú.” (Hi-pek-lâi 11:27) Che chiū-sī khǹg ǹg-bāng lâi thèng-hāu.

Chhin-ài ê Chú, Lí hō͘ thèng-hāu chiâⁿ-chòe bí-hó, hō͘ jím-nāi chiâⁿ-chòe sîn-sèng. Lí kà-sī goán èng-tong chiap-siū Lí ê chí-ì, chí in-ūi che sī Lí ê chí-ì. Lí hō͘ goán chai, khòaⁿ chí-ū khó͘ ê poe, iā sī goān-ì lâi lim, in-ūi chhim-sìn Lí ê ba̍k-chiu khòaⁿ khah hn̄g.

Pē ah, chhiáⁿ sù góa Lí sèng ê le̍k-liōng, chiū-sī Khek-se-má-lī ê le̍k-liōng. Sù góa tòa-tio̍h ǹg-bāng thèng-hāu ê ì-chì lêng-le̍k, ōe tī bô thiⁿ-chhiⁿ ê mî, khòaⁿ ǹg thang-á gōa. Sīm-chì góa ê hí-lo̍k bô-khì ê sî, hō͘ góa ū khùi-la̍t tī o͘-àm mî sèng-lī khiā-chāi án-ni kóng, “Tùi góa ê Thiⁿ-pē khòaⁿ, ji̍t-thâu iáu sī teh chiò.”

It-tàn góa o̍h-tio̍h ǹg-bāng ê thèng-hāu, góa ê le̍k-liōng ta̍t-kàu siōng koâiⁿ tiám. --- George Matheson

Tī si̍t-chè seng-oa̍h tiong, ló͘-le̍k khì chòe hiah ê chió-sò͘ lâng, in ōe liáu-kái, ōe bêng-pe̍k bô-lūn sī chá-khí-sî, tiong-tàu-sî, á-sī àm-mî, só͘-ū khòaⁿ ōe tio̍h ê sè-kài ê pōe-āu ū chi̍t ūi khòaⁿ-bōe-tio̍h ê “Thiⁿ”, á-sī “Siōng-tè” ê chûn-chāi.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com