《台语荒漠甘泉（全罗版）》

 | | | 转寄

"Cha-ji̍t ê iu-siong"

作者 陈清俊 翻译 2008.11.09

listen


Cha̍p-it ge̍h chhoe-káu (Cha̍p-it ge̍h káu ji̍t)

"Tiàm-tī i ê ìm-ńg ê beh tò-tńg-lâi; in beh chhin-chhiūⁿ gō͘-kak koh hoan-chhiⁿ, khui-hoe chhin-chhiūⁿ phû-tô-chhiū." (Hô-se-a 14:7)

Àm-thâu-á chi̍t chūn ê tōa-hō͘, chiong góa hoe-hn̂g ê hoe lóng phah pháiⁿ-khì lah. Góa khòaⁿ-tio̍h chi̍t châng só͘ sim-ài ê hoe, siū tio̍h bû-chêng ê hong-hō͘ sàu kah hoe-thâu tìm-tìm sôe-sôe, hoe-phìⁿ ha̍p khí-lâi, khòaⁿ khí-lâi i ê êng-hôa bí-lē lóng siau-sit khì lah. Góa siūⁿ góa ài tán kàu môa-nî chiah ōe koh khòaⁿ tio̍h chit ê hoe.

Bô phah-sǹg, àm-mî kè liáu, ji̍t-thâu chhut-lâi, chá-khí-sî kā góa só͘ sim-ài ê hoe tòa-lâi oa̍h-la̍t. Kng chiò tī hoe, hoe-lúi iā ǹg kng, in tiong-kan ū chiap-chhiok, ū khè-ha̍p kau-thong, ji̍t ê lêng-le̍k thoân-ji̍p tī hoe-lúi téng-bīn. Hoe khai-sí giâ thâu, hoe-phìⁿ tián-khui, sit-khì ê bí-lē koh tò-tńg-lâi, koh-khah chhàn-lē. Góa gông-ngia̍h tio̍h-chi̍t-kiaⁿ, chit ê sū kèng-jiân ōe hoat-seng. Nńg-nńg iù-iù ê hoe chiap-chhiok tio̍h khah kiông ê sū-bu̍t (kng) ōe tùi in tit-tio̍h le̍k-liōng koh khí-sek!

Góa bōe hiáu kái-sek lán án-chóaⁿ thong-kè kap Siōng-tè ê kau-óng lâi tit-tio̍h sū-hōng kap jím-nāi ê le̍k-liōng. Put-kò góa chai che sī chi̍t ê sū-si̍t. Hiān-chāi lí sī-m̄-sī hō͘ tāng-tàⁿ kap khùn-khó͘ chhì-liān teh kah bōe chhoán-khùi ah? Chhē-kiû kap Chú Ki-tok ê kau-thong, án-ni lí beh tit-tio̍h sèng-lī ê le̍k-liōng kap lêng-le̍k, in-ūi Siōng-tè èng-ún kóng, "Góa tek-khak kian-kò͘ lí." (Í-sài-a 41:10)

Cha-ji̍t ê iu-siong

Chang ê hō͘, sī mûi-kùi ê pó-chio̍h sim,
Sī iûⁿ-chhiū ê gûn, liú-chhiū ê kim;
Chang ê iu-siong sī chhim-chhim
Ū-kò Siōng-tè tōa un-hūi ê lâi-lîm.

Chang ê hō͘, hō͘ soaⁿ-phiâⁿ chhiⁿ-chhiⁿ phek-phek,
Sī jio̍k-kùi ê to-sek sian-ô͘, sī chhiⁿ-chháu ê phek-ge̍k;
Chang ê iu-siong kà-sī lêng-hûn lâi thiaⁿ
Chheng-hong só͘ chhe lâi éng-oán-oa̍h sòe-sòe ê siaⁿ.

Ah, hong-hō͘ ē, chhùi-jio̍k ê sim-lêng, hō͘ āu ōe kng-bêng,
Sī gō͘-phìⁿ-hoe ê iàn, chhì-phè ê chu,bô-iáⁿ-ba̍k chháu ê thian-têng,
Sui-jiân iáu-teh iu-siong ê lêng,
Tī bêng-ji̍t beh chiâⁿ bí-lē hong-sēng. --- Katherine Lee Bates


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com