《台语荒漠甘泉（全罗版）》

 | | | 转寄

"Kî-tó"

作者 陈清俊 翻译 2008.11.02

listen


Cha̍p-it ge̍h chhoe-jī (Cha̍p-it ge̍h jī ji̍t)

"Tùi án-ni Pí-tek lâu tī kaⁿ-nih; to̍k-to̍k kàu-hōe thòe i chhiat-chhiat kiû Siōng-tè." (Sù-tô͘ Hêng-toān 12:5)

Kî-tó sī chiap-liân lán kap Siōng-tè ê kau-thong. Sī chi̍t tiâu tōa-kiô, pêng-an tòa lán thong-kè gûi-hiám ê chhim-ian, tōa-chúi.

Siūⁿ tē it sè-kí chho͘-tāi kàu-hōe ê keng-le̍k, sū-sū siū chó͘-tòng, Pí-tek siū koaiⁿ-kaⁿ, pek-hāi kàu-hōe ê Iû-thài lâng khòaⁿ ná sī sèng-lī, Hi-lu̍t ông ê koân-sè, teh tán kè-ji̍t beh kā Pí-tek chhú-sí. Kàu-hōe ūi i chhiat-chhiat kî-tó Siōng-tè. Kiat-kó án-chóaⁿ? Kaⁿ-ga̍k ê mn̂g kî-chek-sèng phah-khui, sù-tô͘ Pí-tek chū-iû lī-khui, Iû-thài lâng bōe thang liáu-kái. Hi-lu̍t ông siū Siōng-tè ê chek-hoa̍t, "hō͘ thâng kā, khùi tn̄g," kàu-hōe ū sèng-lī, "nā-sī Siōng-tè ê tō-lí ná khui-khoah heng-ōng." (Sù-tô͘ Hêng-toān 12:23-24)

Lán kiám chin-si̍t chai kî-tó ū chhiau chū-jiân ê le̍k-liōng mah? Lán kiám káⁿ ēng sìn-sim ê koân-pèng lâi hoat bēng-lēng mah? Siōng-tè un-sù lán sèng ê tōa-táⁿ kap sîn-sèng ê sìn-sim, I só͘ chhe-iōng ê m̄-sī úi-tāi ê jîn-bu̍t, sī chhe hiah-ê káⁿ chèng-bêng só͘ sìn ê Siōng-tè ê úi-tāi ê pêng-siông phó͘-thong lâng! "Kàu-hōe chhiat-chhiat kî-tó Siōng-tè." --- A.B. Simpson

Lí kî-tó ê sî, siōng tiōng-iàu ê sī m̄-thang hān-chè Siōng-tè, m̄-nā sī tī bô sìn ê sū, iā tī lí khak-sìn I ōe chòe ê sū. Ha̍k-si̍p kî-thāi hit ê ì-gōa ê kî-biāu, hit ê bô khó-lêng ê sū, chhiau chhut lán ê só͘ siūⁿ só͘ kiû.

Só͘-í múi-pái lí ūi lâng kî-tó, tāi-seng ài an-chēng, chông-pài êng-iāu Siōng-tè. Su-siúⁿ I ê tōa chok-ûi, I hoaⁿ-hí I ê kiáⁿ Iâ-so͘, kap lí tī I sim tiong ê tiōng-iàu tē-ūi, chiū thang ǹg-bāng kî-biāu úi-tāi ê sū hoat-seng. ---Andrew Murray

Lán ê kî-tó sī Siōng-tè êng-hián ê ki-hōe.

Lí iu-siong mah? Kî-tó ōe chiong thòng-khó͘ piàn chòe tiⁿ-bi̍t ê le̍k-liōng. Lí siū lāi-gōa kong-kek ê gûi-hiám mah? Kî-tó ōe hō͘ thiⁿ-sài khiā tī lí sin-piⁿ, i chi̍t ē mo͘ tōa chio̍h, chio̍h chiū chhùi-chhùi piàn chòe hu, pí mī-hún khah iù, chi̍t ē khòaⁿ, chiū tōa kun siau-bia̍t bô-khì.

Kî-tó ōe ūi lí chòe sím-mi̍h? Góa ê tap-àn sī Siōng-tè ōe ūi lí chòe it-chhè ê sū. "Lí ài Góa siúⁿ-sù lí sím-mi̍h, lí thang kiû lah." (Ṳ Le̍k-tāi-chì-lio̍k 1:7) --- Frederick William Farrar
Chhiat-chhiat kî-tó, kî-chek ōe tián-khui,
Tī gûi-hiám khùn-kéng tòa lâi an-ùi.
Kî-tó ōe chō-chhut thong-tō, tháu-khui,
Chhng-kè thih-mn̂g tâng-chhiûⁿ ê pau-ûi.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com