《台语荒漠甘泉（全罗版）》

 | | | 转寄

"Kiàn-chèng tō-lí kàu sí"

作者 陈清俊 翻译 2008.11.16

listen


Cha̍p-it ge̍h cha̍p-la̍k (Cha̍p-it ge̍h cha̍p-la̍k ji̍t)

"In in-ūi Iûⁿ-ko ê huih, kap in só͘ kan-chèng ê tō-lí, lâi khah-iâⁿ i; sui-jiân kàu sí, ia̍h bô thiàⁿ-sioh in ê sìⁿ-miā." (Khé-sī-lio̍k 12:11)

Tng Ngá-kok kap Iok-hān tè in ê lāu-bú lâi kìⁿ Iâ-so͘, kiû thian-kok siōng hó ê ūi hō͘ in. Iâ-so͘ bô kū-choa̍t. I tùi in kóng, ká-sú lín ōe chòe I só͘ chòe ê kang, lim I só͘ lim ê poe, siū I só͘ siū ê sóe, chiū Thiⁿ-pē ōe koat-tēng hō͘ in. (chham-khó Má-khó 10:38).

Siōng hó ê mi̍h pit-su thong-kè siōng khùn-lân ê lō͘-kèng chiah ōe tit-tio̍h. Lán goān-ì khì cheng-chhú Siōng-tè siōng hó ê mi̍h mah? Lán ài jím-siū kiā-kiā ê koâiⁿ-soaⁿ, ba̍t-ba̍t ê chhiū-nâ, te̍k-jîn ê thih chiàn-chhia, in-ūi khó͘-lān sī sèng-lī-chiá beh tit-tio̍h bián-liû só͘ su-iàu hù-chhut ê tāi-kè. Khái-soân-mn̂g m̄-sī ēng mûi-kùi hoe kap si-tiû chō ê, sī ēng tîm-tāng ê táⁿ-kek, kap huih, kap ba̍k-sái ê siong-jiah lâi khí-chō ê. Lí kim-ji̍t seng-oa̍h tiong jím-siū khùn-lân, sī Chú sù ê, iā sī ūi tio̍h lí ōe iâⁿ-tio̍h bián-liû, êng-koan.

M̄-thang siūⁿ bêng-ji̍t ōe ū lí-sióng ê chhù-kéng, á-sī chin lân ê khùn-kéng, á-sī kín-kip ê sū. Khí-lâi, bīn-tùi kin-á-ji̍t, che sī Siōng-tè an-pâi lí ê chêng-hêng. Lí ê êng-koan chiū chhàng tī chiah ê sū ê tiong-sim, chiū-sī chit sî, chit ji̍t, chit lé-pài, chit kò-ge̍h só͘ tú-tio̍h ê khùn-lân kap khó-giām. Chóng-sī siōng khùn-lân ê sū-bu̍t, m̄-sī lâng só͘ khòaⁿ ōe-tio̍h, só͘ chai ê, sī chhàng tī lí lāi-bīn sim-lêng tiong, tû-liáu Iâ-so͘ kap lí pún-sin í-gōa bô lâng chai ê sū. Tī chit ê pì-bi̍t ê só͘-chāi, lí keng-giām tio̍h khó-giām, m̄-káⁿ ǹg lâng thê-khí, tùi lí chit ê khó-giām pí sûn-tō lâi sí khah oh jím-siū.

Chhin-ài ê pêng-iú, lí ê êng-koan chiū tī hit só͘-chāi, goān Siōng-tè pang-chān lí khì the̍h, thang tì tī thâu-khak téng.

Put-koán chiàn-cheng chìn-hêng án-chóaⁿ,
Chiàn jōa-kú kàu jōa-òaⁿ,
Bô hoe-sim! Kè-sio̍k chiàn bô soah!
Bêng-ji̍t chiū ōe chhiùⁿ khái-soân koa.

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com