《台语荒漠甘泉（全罗版）》

 | | | 转寄

"Si̍p-jī-kè"

作者 陈清俊 翻译 2008.09.14

listen


Káu ge̍h cha̍p-sì (Káu ge̍h cha̍p-sì ji̍t)

"Nā ū lâng ài tè góa, chiū tio̍h khòaⁿ-bô ka-kī, giâ i ê si̍p-jī-kè lâi tè góa." (Má-khó 8:34)

Chú hō͘ góa pē ê si̍p-jī-kè ū chin-chōe khoán chin-chōe hêng. Bô-tiāⁿ-tio̍h sī kiò góa tī iú-hān ê ho̍k-bū hoān-ûi lāi chòe pêng-hoân, tan-tiāu ê khang-khè, sui-jiân góa siūⁿ góa ū lêng-le̍k chòe khah tōa ê sū-kang. Iā khó-lêng sī iau-kiû góa múi nî keng-chok siâng chi̍t tè thó͘-tē, sīm-chì lóng bô tit-tio̍h siu-sêng. Mā ū-sî Siōng-tè ài góa tùi siong góa ê lâng ū hó-kám, tùi i khin-siaⁿ sòe-seh, hó-hó-á tùi i kóng ōe, koh tng pa̍t-lâng hoán-tùi i ê sî, ōe khiā tī i chit pêng, tông-chêng i, an-ùi i. Á-sī tī hoán-tùi Siōng-tè ê lâng bīn-chêng kong-khai ūi Chú chòe kiàn-chèng. Iā khó-lêng sī ài góa tī siong-sim ê sî, bīn iáu ōe tòa chhiò-iông lâi seng-oa̍h.

Sī, Chin chōe si̍p-jī-kè lóng chin tāng, koh ū khó͘-thàng, kiò góa chi̍t lâng ka-kī soán-te̍k khì giâ sī bô khó-lêng ê. Chóng-sī góa nā kam-goān giâ si̍p-jī-kè, hē tī keng-kah, koh ōe ēng jím-nāi, bô chhut oàn-giân ê thāi-tō͘ ê sî, Iâ-so͘ chiū tī góa sin-piⁿ, góa ōe tit-tio̍h só͘ m̄-bat kám-siū-tio̍h kap I chiah-nih chhin-kūn.

I kūn-óa góa sī ài góa tì-hūi tióng-tōa sêng-se̍k, hō͘ góa kèng-ka pêng-an, koh cheng-ka góa ê ióng-khì, ke-thiⁿ góa ê le̍k-liōng. Án-ni hō͘ góa ōe thong-kè siū khó͘-thàng ê keng-giām, chiâⁿ-chòe tùi pa̍t-lâng koh-khah ū lō͘-ēng ê lâng. Góa tùi chi̍t ê in-ūi sìn lâi siū koaiⁿ-kaⁿ ê cha̍p-chhit sè-kí So͘-kek-lân sèng-tô͘ kóng ê chi̍t kù ōe ū tông-kám, "Góa tùi pē tāng-tàⁿ lâi sêng-tióng." --- Alexander Smellie

Ēng si̍p-jī-kè tòng-chòe koáiⁿ-á iân-tô͘ pang-chō͘,
M̄-sī khòaⁿ chòe poàn-kha-chio̍h teh tòng-lō͘.

Nā-sī ēng chhiò-iông lâi giâ si̍p-jī-kè,
Ōe hō͘ pa̍t-lâng iu-chhiû piàn hoaⁿ-hí hó-kè.

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com