《台语荒漠甘泉（全罗版）》

 | | | 转寄

"Tē it hó ê sū"

作者 陈清俊 翻译 2008.09.21

listen


Káu ge̍h jī-it (Káu ge̍h jī-cha̍p-it ji̍t)

"Góa chin-chiàⁿ khòaⁿ bān sū chòe sún-hāi, in-ūi góa lia̍h bat góa ê Chú Ki-tok Iâ-so͘ chòe tē it hó." (Hui-li̍p-pí 3:8)

Hiān-chāi chìn-ji̍p chhiu-thiⁿ, chhân-hn̂g ê tiū-á í-keng se̍k, sī siu-koah ê cheh-kî, iā sī siu-koah ngó͘-kok ê lâng hoaⁿ-hí chhiùⁿ-koa, kap tiū-á ji̍p chhng-khò͘ ê sî. Só͘-í lán lâi thiaⁿ sèng-keng tiong ê chit ê "iá-gōa pó-hùn." Sìn-sit sī án-ni: "Ài tit-tio̍h oa̍h chiū ài seng ū sí. Bô ūi ka-kī ê seng-oa̍h hó-kè kap hēng-hok iu-lū. Tio̍h tèng-sí tī si̍p-jī-kè ê, m̄-nā sī lí ê pháiⁿ hêng-ûi kap si̍p-koàn, iā tio̍h tèng-sí chi̍t kóa hiah ê khòaⁿ-khí-lâi sī bô hāi koh chèng-tong ê mi̍h-kiāⁿ. Siūⁿ beh kiù lâng, ài seng hi-seng ka-kī. Ài kiat chin chōe ké-chí, tāi-seng chiong ka-kī khǹg tī o͘-àm kap ko͘-to̍k ê tiong-kan.”

Thiaⁿ tio̍h chiah ê kà-sī, góa ê sim lóng léng khì. Tān-sī chai chiah ê ōe sī chhut tī Iâ-so͘ ê chhùi, góa chiū thê-chhíⁿ ka-kī, "lâi tn̂g-tn̂g tiàm-tī I, ... í-ki̍p ū hūn I ê siū-khó͘," (Hui-li̍p-pí 3:10) sī góa ke̍k-tōa ê te̍k-koân kap êng-kng. It-seng ū I chòe phōaⁿ sī súi bô pí. Góa iā thê-chhíⁿ ka-kī góa ê siū-khó͘, sī beh chòe I ū lō͘-ēng ê khì-khū. Góa iā chai I ê Kok-kok-thaⁿ í-keng khui-hoe kiat-kó, chin hong-sēng, góa iā ǹg-bāng góa ê Kok-kok-thaⁿ ōe chhin-chhiūⁿ án-ni ū kiat-kó.

Seng ū thòng-khó͘ chiah tit hong-sēng, seng ū sí chiah tit tio̍h oa̍h, che sī thian-kok ê kui-lē! --- tùi "be̍k-sióng"

Tng hoe-m̂ khui chhut hoe ê sî, lán sī-m̄-sī kóng hoe-m̂ sí khì ah?

Chhē I, tè I, kiû I, khò I,
I ōe sù hok bōe?
Thiⁿ-sài, sèng-jîn, sìn-tô͘, sian-ti,
Ìn kóng, "Ōe".

Ē-bīn sī chit siú si ê koa-phó͘ (chhiâ ê sò͘-jī sī kē-im; kàng E tiāu)

3 3 3 2 | 3 5 5 3, | 3 3 2 1 | 2 - - - |

5 67 1 7 | 1 23 4 3, | 2 - 2 - | 1 - - - |


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com