《台语荒漠甘泉（全罗版）》

 | | | 转寄

"Hoān-lān sī ki-hōe"

作者 陈清俊 翻译 2008.09.07

listen


Káu ge̍h chhoe-chhit (Káu ge̍h chhit ji̍t)

"Siōng-tè sī goán tô-siám ê só͘-chāi kap khùi-la̍t. Ia̍h sī hoān-lān-tiong ki̍p-sî ê pang-chān." (Si-phian 46:1)

"Siōng-tè ūi-sím-mi̍h m̄ khah chá lâi pang-chān góa ah?" Che sī siông-siông thiaⁿ-tio̍h ê būn-tê. Ài-chai, Siōng-tè m̄-sī chiàu lí ê sî-kan-pió lâi chòe-kang. I ê hó-ì sī ēng hoān-lān lâi kái-chō lí, hō͘ lí ha̍k-si̍p tio̍h kà-sī. I èng-ún, "I tī gûi-kip ê sî, Góa chiū beh kap i tī-teh; Góa beh kiù i, hō͘ i chun-kùi." (Si-phian 91:15) Tng lí tú-tio̍h hoān-lān ê sî, I mî-ji̍t kap lí tông-chāi, liáu-āu kā lí kiù chhut hiah ê hoān-lān. Tng lí bô koh kip-sèng, hoân-ló, lí piàn an-chēng, I chiū kiù lí chhut-lâi, hit-sî I kóng, "Í-keng kàu-gia̍h lah."

Siōng-tè ēng hoān-lān kàu-io̍k I ê kiáⁿ-jî chin pó-kùi ê kong-khò. Thong-kè khùn-lân lâi kàu-io̍k lán, tng tāi-chì kè liáu-āu, lán beh tit-tio̍h êng-iāu ê pò-siúⁿ. Só͘-í hoān-lān tiong chûn-chāi tiⁿ-bi̍t ê hí-lo̍k kap chin-si̍t ê kè-ta̍t. I jīm-ûi hoān-lān m̄-sī chó͘-tòng, sī chi̍t ê ki-hōe.

Bô tû-khì hoān-lān, Kap kiông-lia̍t cheng-chiàn ê khùn-lân, Chin-chiàⁿ an-hioh sù hō͘ lán, Tī I lāi-bīn, tit pêng-an. --- Annie Johnson Flint

Góa bat thiaⁿ-kè chi̍t ê phok-si̍t ê lāu-tōa-lâng kóng, "Siōng-tè chhì-giām lí ê sî, iā sī lí chhì-giām Siōng-tè ê sî. Khòaⁿ sī-m̄-sī I ê èng-ún, lí ōe tit-tio̍h, tng lí thong-kè I só͘ chhì-giām ê."

Thoat-lī chhì-giām ū nn̄g chióng. Thâu chi̍t chióng chiū-sī kán-tan tô-thoat chhì-giām, liáu-āu kám-siā Siōng-tè. Lēng-gōa chi̍t-chióng sī chiong chhì-giām khòaⁿ-chòe Siōng-tè lâi ê thiau-chiàn, iau-kiû pí kè-khì koh-khah tōa ê chiok-hok, lo̍k-ì chiong chhì-giām tòng-chòe chi̍t pái ki-hōe, khì cheng-chhú Siōng-tè khah chōe ê un-tián.

Án-ni chi̍t ē lâi, liân kap lán chok-tùi ê mô͘-kúi iā beh piàn-chòe pang-chān lán ê. Khòaⁿ, sī tùi lán put-lī ê it-chhè, lóng teh chi-chhî lán. Che chiū-sī "Hoán-tńg tī chiah ê lóng-chóng ê sū, lán tùi thiàⁿ lán ê, tek-sèng kàu ū chhun." (Lô-má 8:37) chit kù ōe ê ì-sù. ---A.B. Simpson


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com