《赖永祥讲书》

 | | | 转寄

《教会史话》(1_052)李科罗kap郑经

作者 赖永祥 2008.07.13

郑成功优遇道明会士李科罗(Victorio Ricci)头尾拢无变，m̄-koh in kiáⁿ郑经leh？根据G. Philips「国姓爷传」谓:郑成功北征金陵(南京)ê时，郑经bat百方阻碍李科驻ê传教。郑经bat讲神父有意beh霸占郑成功ê厝，ma7bat密纵部属tī eng暗ê时来破坏教堂kap神父寓宅ê厝顶。当神父beh请郑经m̄-thang按呢ê时，郑经一面答应beh赔偿伊ê损失，另一方面iáu是命令部属继续破坏。后来有一只英国ê船仔遇风漂来到厦门，伊ê货物拢去hō͘暴徒抢了了a，船员hō͘郑方监禁。因为郑方怀疑渠等是满人派来ê间谍。船员偷走出去求清军kā in tàu相工。郑经就按呢将chit-ê责任mā算tī李科罗ê身上，称神父kap敌方有秘密ê来往、煽动教徒叛乱并有将厦门交hō͘清人ê企图。就按呢李科罗无法度无离开chit-ê所在，bih去tī成功所保护ê一ê葡人ê船顶。郑经知影chit-ê消息了后马上征收教堂租hō͘典铺。到北征失败，戊功回师了后，郑经因为惮父之意，chiah下令来恢复旧状。


1662年7月2日(永历16年5月8日)成功死，经嗣立。李科罗tī郑经据厦、台期间，bat有2次抵着鸡笼(基隆)事，hoān势需要注意。头一pái是tī 1662年8月，李科罗对菲律宾tńg来，船只迎风beh修理来驶入鸡笼港。hit时有真chē住民是对附近山内来ê，用土语iá是一半句仔西班牙语，kā神父告白信仰，并出示十字架、珠数、圣像版画、书籍等，李科罗bat为住民实施洗礼kap告解。停留10日了后着tńg去厦门。1663年4月科罗the̍h郑经函使非，提议恢复通商。


李科罗第二pái抵鸡笼是1664年。hit时清军攻打厦门，李神父hō͘人掠去，好加在商人老磨君子丹镇(Constantine Nobel)协助伊走出去，koh tńg来到鸡笼。李神父大约tī hia tòa一年，住民信教者增加真多。1664年8月27日荷军抵鸡笼，Herman de Bitter任驻鸡笼军队指挥官，mā有Cornelius Keyserskind从事传教，所传当然是改革宗，che kap李科罗之间ê关系无啥清楚。


有关荷人tī 1664年8月到1668年10月间koh再据鸡笼史事，我bat有「清荷征郑始末」(「台湾风物」4卷2期kap 3期；复收tī拙编「明郑研究丛辑」(一)一文，故不赘言。我bat tī基隆读小学kap中学、去社寮岛chhit-thô真多摆(洋名Palm Island，今称和平岛)俗称「千叠敷岩」附近ê「蕃字洞」，就是当年荷人koh再据鸡笼时ê遗迹。洞内刻字千余，大小参杂，其中可见1664、1666、1667等西历年号，mā有Jacob Schelck, Hans Hubener, Henrick, Botenpoly, Micoiaw Iros等洋字。后来日人将hit区编入要塞禁区。我真多年拢m̄-bat koh再去a，m̄知chit-ê史迹ê保存情形如何？


《台湾教会公报》 19303期 主后1989年2月26日