《赖永祥讲书》

 | | | 转寄

巴克礼 增补《厦英大辞典》

作者 赖永祥 2006.04.23

赖永祥讲书(019)

巴克礼牧师(Thomas Barclay,1849-1935)是1873年春天毕业格拉斯哥大学神学院ê。晚年伊回忆讲：Tī我ê大学生涯，起初我无teh想beh去海外宣教，直到最后一年……有一日，院长杜乔治博士(Dr. George Douglas)ê小弟，就是厦门tńg来ê杜嘉德牧师(Carstairs Douglas, 1830~1877)，来到学校招募前往中国ê宣教师。……hit晚院长邀请一kóa学生kap杜嘉德牧师见面，当时杜牧师tú-teh从事厦门腔汉英辞典出版ê工作。伊hō͘阮看辞典ê校对稿样，我向伊讲：看起来印得iáu beh bái。伊讲：「是！当你来到中国，相信你一定会发现chit-ê字典相当有路用」。以后伊写phoe劝我，ài我立刻kap伊动身，无需要koh再读完神学课程，伊讲tī中国真迫切需要宣教师……不过我当时无随时答应伊ê建议（Band: Barclay of Formosa, 1936, P17~18）。杜嘉德牧师编着ê《厦英大辞典》就tī 1873年出版。二年后，巴克礼tī 1875年受派来台，一直到过身，tī台湾传教有60.年。

《厦英大辞典》出版以后，一直是宣教师学习厦门腔siōng好ê参考书。但经过将近半世纪之间，中国大变，就发现社会用语、新科学用词、真chē新字lóng无tī chit-ê辞典里面。为tio̍h beh适应时代ê需要，1913年tī台湾kap厦门ê宣教师，就请巴克礼牧师作辞典补遗ê工作。In知影巴牧师几十年来不断teh学习当地语言，而且将所听tio̍h ê用语，不管好bái lóng有作记录。巴牧师受托，tī续落去ê十年中间，就利用闲ê时间整理伊收集杜牧师大辞典所无ê字汇片语。同工也提供真chē资料，其中梅监雾牧师（Rev. Campbell N. Moody, 1865-1940）无条件提供四百gōa张字汇kap备忘录siōng-kài可贵。
资料搜集齐全以后，巴博士tī厦门用了三、四个月编纂整理，tī 1922年自英国休假tńg来以后，马上前往上海交商务印书馆印刷。当时受选协助巴克礼牧师作最后ê校订kap监印者是杨士养牧师（1898-1975）。杨牧师1919年tī台南神学校毕业，受选时tú tùi日本东京明治学院深造tńg来，任传道师；随巴牧师赴上海监印ê时，只好「暂别含情脉脉ê新娘（黄千金）kap初生五个月ê kiáⁿ（长男凤生）」云。

1923年，《增补厦英大辞典》（书名:Supplement to Dictionary of the Vernacular of Spoken Language of Amoy），顺利出版。头序kap说明5页，辞典276页，篇幅约有杜原着ê二分之一。 Koh伊所增补ê字lóng无一字tī原着ê顶面。原着无汉字对照，但增补就有汉字；所用拼音方法也尽可能kap原着一致。因为其资料搜集完备、说明清晰详尽，增补出版后马上受tio̍h普遍ê欢迎。[1980年台北古亭书屋刊印ê《厦英大辞典》，就是杜嘉德原着kap巴克礼增补两书合订重版]。