《赖永祥讲书》

 | | | 转寄

《教会史话》(2_125) 樟脑纠纷ê解决

作者 赖永祥 2009.11.29

1868年（同治7年），台湾排外反教ê思潮kàu siōng-koân，樟脑hō͘人扣押，教堂hō͘人损毁，教民hō͘人thâi，华洋相拍等等ê案件，前后lóng来发生：洋人认为地方官允准损害，无尊重「条约」规定ê权益，逐便lông会抗议。Kàu 7月英署领事古必勋（John Gibson）chiūⁿ任，认为事情严重，通知香港请调兵船，前后有兵船3台分别停tī打狗安平，名义siōng是保护外人，实际siōng是威胁。总理各国事务衙门tek-tio̍h闽省督抚派员会同英领事迅速办结各案。所以福建兴泉永海防兵备道曾宪德受委派专责舰办理。曾宪德tī 11月初8（旧日9月24）kàu台湾。11月25（旧日10月12）英兵官茄当（Lieut Gurdon））tī安平开炮，隔转工hiông-hiông攻打安平协署，副将江国珍tī受伤后食毒死亡；后来mā向商民讨兵费。

2月初1（旧日10月18），曾宪德吉必勋成立协议：（一）废止樟官营，外国人kap请ê人自由买卖（订立英商tī台湾采办樟脑条款—Camphor Regulations 1869），（二）生理人因为商业、游览ia̍h是其他必要beh旅行台湾各地，道台应该发护照，（三）赔偿怡记洋行（（Ellis & Co.）樟脑损失6000 kho͘，（四）赔偿新教教会财产1167 kho͘，（五）赔偿天主教堂财产2000 kho͘，（六）撤换道台（梁元桂）、凤山知县（凌树荃）、鹿港海防同知（洪熙恬），处罚各地扰乱ê凶手（thâi死教民庄清风主犯周忠tī审理后斩头赔命），（七）告示民众禁止诽谤基督教，（八）承认传教师tī台湾各地有传教居住ê权益，nā是华洋ê纠纷应该hō͘中英2国作伙裁判。提议ê案件lóng面议，后来chia̍h开清摺，送总理各国事务审查。

对吉必勋处理chit-ê案件，总理衙门非常不满，照会英政府讲：「英人tī内地各所在传教通商，有定条约，领事官tú tio̍h tāi-chì应遵守照会，无tio̍h是地方官tāi-chi，应该申请顶司，chiah ē-tàng动用兵船，lī-chhiaⁿ台湾属洋案，阮经派人来台湾查办，koh经过委员当面议定，分册单，hō͘ in看，hō͘领事吉必勋无话通讲，koh khah免讲何得复违反约定乌白来。虽然命令ài兵费洋银，续..落来吉必勋ài全数交hâiⁿ，另外逼死副将大员，损伤兵勇，烧局库等等ê事件，罪状lóng khah重大…」。吉必勋总算hō͘英国政府开除。

1868年间，教会受tio̍h chiaⁿ大ê灾难，有hō͘人消灭ê可能，协议ê成立，成做关键—官方重新承认tī台湾传教ê权益，台湾教会行向新ê阶段！

《台湾教会公报》 2078期 主后1990年11月初4