《赖永祥讲书》

 | | | 转寄

《教会史话》(1_091)杜嘉德驻厦门

作者 赖永祥 2009.04.05

杜嘉德牧师（Rev. Carstairs Douglas），tī 1830年12月27日出世，老爸是牧师，有6 ê子，嘉德排第六。1851年ùi格拉斯尔大学毕业，1855年tī爱丁堡自由教会神学院（Free Church College, Edinburgh）完成神学课程。

1855年2月21日，杜嘉德tī格拉斯哥圣马太自由教会，受按立为英国长老教会ê宣教师。3月kap开拓宣道家宾威廉牧师（W.C. Burns）kâng坐「挑战者号」（Chalenger），去香港，chiah koh转上海，tī旅途中得着前辈ê指导得着真chē ê物件。6月去厦门，原本驻厦门ê牧师James Johnson，tī几周前因为破病来离开，所以伊必须爱孤军奋战。

当时tī厦门，除了英国长老会以外，犹koh有伦敦宣道会kap美国归正教会ê宣道站。三会ê教势，根据杜嘉德hit年ê年终报告，生存成人会员人数，伦敦会136，归正100，长老会47，总共283；其中妇女tī伦敦会有39，归正会mā差不多kâng数。 Tī厦门，出外布道，牧养教会，教导学生，研究语言是真无闲ê，因为in看起来比实际年岁khah老。伊bat编过「漳泉神诗」（伊所编ê诗词真多首犹koh会冻tī台湾基督长老教会「圣诗」内面看着），伊tī 1873年刊行ê「厦英大辞典」，是斯界古典权威着作（为此格拉斯哥大学颁赠伊博士学位）。

厦门是闽南ㄧê重要ê都市，泉漳汀龙永ê中枢，南洋ê门户。福音自厦门渐传入去内地。台湾ê传教，mā是ùi厦门来ê，杜嘉德就是第一ê倡导ê人。

Tī chia我应该讲着tī厦门ê教会合一运动。教会ê分门别户，有神学基础异同kap历史沿革，m̄-koh外人总是khah歹相信是in是属于kâng一ê主e。归正会，本属长老会系统，采长老执事制，制度上差别不chē，所以tī厦门ê归正会kap英国长老教会ê会堂，tī 1862年4月1日开会组合「泉漳长老大会」。实际上是今中会，就是长老会所称Presbytery，归正会所称Class。为了chit-ê合同杜嘉德、打马字（J.V.N. Talmage）等ê功劳是bōe冻无讲着ê。1881年大会分成二ê中会，tī 1894年称闽南长老总会。伦敦会，本属公理会，教会制度无kâng，m̄-koh宣道本部准各宣道区选用合适制度，所以闽南长老总会kap伦敦会闽省议会总算达成协议，tī 1920年1月6日齐集tī鼓浪屿成立了「中华基督教闽南合一会」，是中国教会合一运动êㄧ大步。

杜嘉德牧师tī 1877年夏主持了tī上海举行ê第一届在华宣教师协议会（伊是二位主席之一），转来厦门ê时得着霍乱，7月26日过身。

《台湾教会公报》 1975期 主后1990年1月7日