《赖永祥讲书》

 | | | 转寄

《教会史话》(1_090)纪念宾威廉

作者 赖永祥 2009.03.29

将本仁约翰（John Bunyan, 1628～1688）ê寓言文学 Pilgrim’s Progress介绍hō͘中国ê人，就是宾威廉牧师（William Charlmers Burns, 1815～1868）。 「天路历程」是伊号ê翻译名。原册是基督徒灵程经验之谈，hông翻译做百gōa种ê文字，不知感动了gōa chē世间ê人？宾威廉ê中文翻译，描写kah真生动，句法简洁，用字适当，读chit本册完全拢无感觉着che是外国人所翻译的。譬如讲tī「指示窄门」hia有「欲入生门得上天，先当认罪立门前，窄门切叩方能入，主宰恩慈赦我愆」。koh有「罪人奔离必亡城，来叩窄门望得生，求主 垂怜开活路，鸿恩永颂乐高声」。第一ê将Christian chit-ê词翻做「基督徒」就是伊。伊ê文章埋版初刊tī 1853年，官话版刊tī 1865年；白话字厦门音版（由打马字拼出者）见tī 1853年。Tī早期ê台湾教会，「天路历程」真受着重视；譬如讲tī 1917年台湾大会派刘忠坚等六名委员检讨编辑主日学教科书，翌年委员回覆主日学应教：「旧约选略、真道问答、主日神粮、基督传、马可、路加、使徒行传、天路历程」。

宾威廉是母会英国长老教会所派ê首任宣教师，1847年抵华，先后tī香港、广州、厦门、上海、汕头、北京kap东北ê牛庄（54岁tī hia过身），在华传教达20年之久。潮州长老会医院，就是以伊ê名来号名；tī 台湾，偕睿理牧师（George Leslie Mackay）mā将tī三貂岭西北海岸平埔族「新社」ê教堂，叫做宾教会（Burn’s Church）。据偕牧师所讲ê（From Far Formosa, p.223），hit-ê教会tī一条清流ê堤顶面，位置优美，建物适配，石造，用灰泥加以涂白，而且有玻璃窗，光线良好。由偕牧师所设计，陈火（荣辉）监工而成。偕牧师tī伊ê日记1889年12月11日条云：「从顶双溪到新社去。新建礼拜堂，花费500美元，是底得律ê马偕船长夫人所捐ê。伊是加拿大人。Chit-ê堂是要纪念宾威廉牧师」。可惜偕牧师过身了后，伊所开拓ê平埔社教会衰亡，chit-má以经看bōe着「宾教会」a。

偕睿理牧师为何beh建立「宾教会」leh？据偕牧师云：宾威廉牧师（在其1844年至1846年间之加拿大布道旅行之途上）bat来过若拉村（Zorra, 偕牧师幼年居之），对当地宗教生活灌输了新ê力量，伊ê名tī hit时chūn逐家拢知，我细汉时chūn（时只3、4岁）ê心灵mā领受着伊思想ê影响。

所以台海基督长老教会南北两支，拢会冻tī宾威廉身上chhōe着伊ê根！

《台湾教会公报》 1973期 /1974期 主后1989年12月24日/1989年12月31日