《《一位台湾女信徒ê自述》》

 | | | 转寄

第三章_5）开办齿科诊所

作者 吴月娥, 台译：Lîm Chùn-io̍k 2021.01.03

Hit当时ê头城，除了阮两人，iáu有另外两个医生—钟啓芳医师kah杨干巽医师。钟医师是长期tī台北市马偕病院服务ê助理医生，战后chiah徙来庄kha开业。日本政府原本规定已经有正规学校毕业生teh开设诊所ê所在，bēsái koh开设新ê诊所，m̄koh chit’ê规定tī战后ê混乱中soah起乱。杨医师是日本兴亚医学馆ê毕业生，m̄koh该校并无得tio̍h日本政府ê认可，所以伊本来kantaⁿ ētàng成做一个医生助理，m̄koh，伊kah政府进行谈判来得tio̍h一张乙种执照。换一句话讲，嘉代是hit当时头城唯一ê正牌医生。

Hit时，头城有一间齿科诊所。何医师是南部人，日本大学ê齿科毕业了后，来chia开业。嘉代kah钟啓芳、何医师ê年纪真接近，互相真投机；tī业余ê时间kah暗时，in经常聚集做伙，无所不谈。有一工，嘉代去破病ê何医师in tau往诊；伊患tio̍h严重ê肺炎。Hit当时是iáu未发现青霉素（penicillin）ê时，嘉代ê老父to̍h是因为仝款ê病症来往生。嘉代每两点钟去kā伊注射一pái；康复ê何医师非常感谢嘉代ê亲身治疗。有一工，伊用lî’ákah载齿科诊疗椅kah各种设备，来到阮tau，讲：「我kā夫人开业ētàng用tio̍h ê器械kah药品lóng chhoân来tī chia，请你使用。」我接受何医师ê好意，就kā人客间装修，改做小型ê齿科治疗室，了后tī嘉代大看板ê另外一pêng，挂一块小看板，顶面写「齿科东洋女子医学士吴月娥」。