《《一位台湾女信徒ê自述》》

 | | | 转寄

第二章_13）1945年二月初一举行婚礼

作者 吴月娥, 台译：Lîm Chùn-io̍k 2020.10.18

To̍h准讲我并无屈服牧师娘催我赶紧结婚ê压力，阮iáu是决定tī隔tńg年ê二月初一举行婚礼，决定tī角筈教会。我无beh tńg去台湾，德子to̍h koh再tńg去岩槻ê 金子齿科诊所。

参加婚礼ê人有嘉代tī医专ê十几个朋友，我tī齿科医专ê十几个朋友，亲chiâⁿ有许嘉平、嘉宾两兄弟，koh有减我四岁ê阿姑仁爱kah妹婿再万。Tī郭牧师ê主持之下，阮tī上帝kah众会友ê面前成做夫妻；阮听牧师宣读誓约书，坚定beh起造一个基督教家庭，归荣光hō͘ 上帝。仪式结束了后，阮kah参加婚礼ê人举行一个小型宴会。

仁爱tńg来东京了后随时请她上班ê「御茶の水」寿司餐厅ê头家为阮做寿司；另外tī婚礼ê前一工，我kah嘉代以及郭牧师ê cha-bó͘ kiáⁿ做伙去神奈川（かながわ）县ê农家，用我旧ê长衫交换100粒柑á ńg来，做宴会ê路用。宴会ê时，窗á顶面开始有软软ê雪花，kah-ná是teh祝贺今á日ê纯白婚礼。晴美小姐tùi她药学专科学校ê朋友hia借来新娘衫，嘉代ê新郎衫mā是tùi hit工hip相ê人hia借来ê。

新郎kah新娘ê受付是拜托嘉代ê大姑（老父ê阿姊）ê三女高雅美夫妇；雅美小姐ê歌声真súi，她是国立音乐学校出业，kah台南市ê富豪黄天祥律师结婚。她ê cha-bó͘ kiáⁿ美幸hit当时kan-taⁿ一岁，chit-má是纽约法拉盛第一银行杨次雄董事长夫人。美幸mā是一个女强人，是台湾民进党ê外交部长。阮ê结婚受tio̍h真chē人ê祝福。

战争期间无计程车thang叫，新郎kā新娘ê手牵leh，坐电车tńg来高円市ê新厝。Tī he chìn前，嘉代ka-kī一个tòa tī中野ê公寓，m̄-koh，伊结婚ê时to̍h租一间新厝。Chit-ê新厝是一栋两层楼ê建筑，楼kha ê六块tha-tha-mih房间hō͘ 仁爱tòa，楼kha ê八块tha-tha-mih房间是阮ê房间。Hit时我虚岁25岁。