《《一位台湾女信徒ê自述》》

 | | | 转寄

第二章_12）Κah未来ê翁婿许嘉代相tú

作者 吴月娥, 台译：Lîm Chùn-io̍k 2020.10.11

一个礼拜日，郭马西牧师娘讲：「明á载kah我做伙来去饭田桥（いいだばし）ê一间警察病院探访一个人。」Hit时我mā无头神，bē记得问讲是男是女。隔tńg工，阮tī新宿站见面，去访问hit间病院。当牧师娘行到一个青年ê床头，问讲：「嘉代先生，你好无？」Hit-ê青年回答讲：「牧师娘，多谢，hō͘ 你专工来探访。检查结果是正常，chit礼拜中ē-tàng出院。」她kā我绍介：「Chit位是吴月娥小姐，教会ê会友，做伙来探访。」阮做伙祈祷soah to̍h离开病院；tī途中，牧师娘讲起chit-ê青年ê tāi-chì。 伊ê名叫做许嘉代，是台南人，早年失去父母，以特别优秀ê成绩tùi东京医学专科学校出业，chit-má是警察病院ê内科医生，kah-ná bat kā患者ê肠á病医好。 几工后，我想beh做一kóa物件送去hō͘ 嘉代先生。Tú-tú to̍h是因为物资缺欠，伊tòa tī病院一定真可怜。我用台湾式ê料理煮乌龙面（うドン），带到病院hō͘ 伊食。 「你身体感觉án怎？我带乌龙面来，kám有要紧？」 「多谢。无要紧。」 「Án-ne，请慢慢á用。」 Hit工án-ne to̍h tńg来。一礼拜后，伊kah牧师娘来拜访我，kah-ná是想beh来说多谢。 礼拜日，伊mā来教会。弹风琴ê人hit工歇困，我就担任司琴。礼拜后，牧师邀请我，讲：「明á载来我tī大久保ê厝，咱来做伙食中餐。」她koh慎重讲：「一定tio̍h来。」 隔tńg工，我去访问大久保ê厝。牧师夫妇有五个cha-po͘ kiáⁿ kah两个cha-bó͘ kiáⁿ，一家九口。1944年，tī激烈ê战争中，beh维持一家九口ê家庭，一定是非常困难。 后来，嘉代kā我讲伊ka-kī一个人tī中野（なかの）生活，三顿tī病院用餐，所以大部分ê配给lóng是tùi牧师ê厝带来hō͘ 伊。牧师娘真疼伊，甚至关照伊ê婚姻。当然，hit时我iáu未有结婚ê念头。嘉代mā有受邀请，伊来接我去。阮做伙食饭，讲真chē话。牧师娘kā我讲： 「阿娥，beh tńg去台湾kah-ná真困难，真危险。林宗义ê丈姆mā tī半年前tńg去台湾ê款，她最近tùi台湾tńg来东京，m̄-koh途中沉船，连尸体都chhōe无。」 林宗义kah嘉代两人同年，老母hit pêng有亲chiâⁿ关系。伊tùi东京帝国大学医科出业，战后tńg去台湾，tī hia担任台大病院ê精神科主任。伊ê老父林茂生是留学美国哥伦比亚大学ê台湾大人物。终战（日本战败）了后，台湾陷入蒋介石ê统治，tī 1947年2月28日发生悲惨ê二二八事件，无缘无故杀害台湾siōng优秀ê智识分子。Hit工暗时，林茂生hō͘ 阿兵哥押去，就án-ne失踪。 牧师娘讲：「林宗义ê丈姆因为cha-bó͘ kiáⁿ ê婚礼tńg去台湾，不幸往生。你chit-má mā m̄是回台ê时机，ka-kī一个无依无óa khah孤单，我认为chhōe一个适当ê对象结婚，而且ē-tàng互相帮赞。嘉代mā仝款，我认为结婚来建立家庭khah好。」 阮两人恬恬á听牧师娘讲。 郭牧师ê厝m̄是真大间，伊读真chē册koh tiāⁿ-tiāⁿ探访会友，是众人所知，人人尊重。有kóa人o-ló郭牧师是圣人，mā有kóa人kā伊当做怪物来侮辱。除了传基督教以外，伊对穿插无teh注意，对任何tāi-chì lóng无teh信táu。所以tī厝里，牧师娘不得不tio̍h照顾一切。 我kah嘉代做伙离开牧师ê厝。我决定接受伊ê提议，kā我送到下北泽站；伊tī火车顶讲起伊ka-kī ê tāi-chì。 伊五岁ê时失去老母，隔tńg年后母入门。Siōng难忘ê是，伊ê后母想beh用剃头刀kā伊剃光头ê时，伊惊kah bih入去眠床kha，伊ê后母用一支长杆á，beh kā伊逼出来。In老父tī伊八岁ê时，感冒引起肺炎来过往。伊到taⁿ iáu ē记得老父tńg来厝里，一定ē问伊：「Lín阿母今á日kám有phah你？」嘉代ê老父许啓分是澎湖岛ê赤崁白沙庄人，伊tī 十七 八岁左右来台湾经商，tī台南市开一间汉药店。她ê老母tùi外国人创办ê女学校出业，真gâu弹钢琴，出业后留tī学校教钢琴，而且tī台南市太平境基督教教会弹管风琴。伊ê阿公是一位秀才（经过中国政府ê文官考试合格），真gâu写文章，毛笔字真súi，是澎湖岛上ê头一位基督徒。伊ê老父mā是太平境教会ê执事，经由林茂生夫妇ê绍介，伊kah太平境教会风琴ê琴手结婚，in ê大kiáⁿ to̍h是许嘉代先生。 三年后，伊ê老父往生，由阿妈chhōa来kah tòa澎湖岛ê老父ê阿兄夫妇做伙tòa，tī白沙庄ê公学校读册。澎湖岛人并无富裕，kan-taⁿ靠渔业teh过简单ê生活。因为是无田地ê小岛，tùi海吹来ê潮风kā chit片土地变kah bē种得农作物。米是贵重品，一般人食bē起；三顿lóng用蕃薯代替米。Tī 一个细细ê白沙庄，mā有一间基督教教会。传道者是tùi台湾台南派来ê黄武东牧师，伊tī大学生时代to̍h kah嘉代ê老父许啓分熟sāi。嘉代mā有去读主日学。黄武东牧师夫妇特别疼chit-ê gín-á，请伊食中餐；伊讲he是伊永远bē bē记得ê好食ê白米饭。 我听嘉代ê故事，目屎chho̍p-chho̍p滴。伊自细汉to̍h失去父母，to̍h 算讲经历种种困难，iáu-koh无因为逆境来挫败，m̄-koh tī突破中学kah医专ê难关了后，伊努力成做一个医生。伊chit-má tī东京一流ê病院—东京警察病院teh服务。Beh进入chit间病院并无容易，tú亲像郭牧师所讲ê，优等生chiah ē-tàng tùi东京医学专科出业，我tìm头表示同意。 俗语讲：「可遇不可求」，若是我ka-kī ê解说方式，意思to̍h是讲：「Τio̍h算我提出要求，我mā无法度得tio̍h，tio̍h ài有缘份。」嘉代中等身材，苗条，而且看起来bē bái。伊比我大一岁，来自一个sàn-chhiah ê家庭。我ê厝m̄是一个富裕ê家庭，却是一个非常普通ê家庭。若是我嫁去一个富裕ê家庭，我ê父母ē自卑kah肩胛头狭chiⁿ-chiⁿ，kám m̄是？我kah意伊，因为伊真gâu克服逆境，而且得tio̍h医生ê技能。Hit当时，医生是受人尊敬，而且有真koân ê社会地位。 当我tī东京参加台湾基督青年会ê时，一个来自东京医专名叫谢纬ê学生，几nā pái送我tńg来厝。Chit-ê人是周鹊美小姐ê亲chiâⁿ，谢先生有表示伊对我有意思，后来mā有通过in阿兄周庆渕先生来讲亲chiâⁿ，m̄-koh鹊美小姐无同意。原因是in老母真khiàng-kha，若是成做她ê新pū，绝对bē快乐。谢纬先生是南投ê医生kiáⁿ，一直lóng是真优秀；皮肤色彩有一点á乌，属tī iân-tâu-á-sàng hit形。伊iáu是一个宗教人士，后来成做出名ê医生，伊tī台湾南部从事一种名叫「乌腿病」ê困难病症ê治疗，m̄-koh未到五十to̍h死tī车祸。教会内众人所知谢纬对我ê意思，有人kā我ê阿叔吴天赐讲；阮阿叔写phoe kā我讲伊有同意，m̄-koh我感觉bē爽快，bē-tàng án-ne讲。周庆渕先生o-ló我讲是「thang成做模范ê cha-bó͘ gín-á」，m̄-koh，我是一个非常普通ê cha-bó͘ gín-á。我无勇气回应好额人ê提议。 另外一个原因是，对养育我ê双亲来讲，我从来m̄-bat想过kan-taⁿ我ka-kī ê繁荣，mā无想beh一世人离开父母。嘉代先生是台南人，m̄-koh伊讲伊ê父母已经往生ā，伊有可能来tòa tī我ê家乡。我暗暗á决定；tùi hit时起，阮ê来往有teh增加。 有一工伊the̍h一个phoe囊hō͘我，内文写：献chiūⁿ永恒ê热爱、诚爱、圣爱、纯爱。」看tio̍h chit封短短ê phoe，有趣味koh可爱，mā有感动。Tùi hit时起，tio̍h算tī朋友面前，我mā ē-tàng一屑á都无困难互相绍介。 1944年ê年尾，美国ê B29 轰炸机差不多ta̍k工都飞来，暗时有灯光控制，乌天暗地。