《《一位台湾女信徒ê自述》》

 | | | 转寄

第二章_11）我一心想beh离开岩槻回台

作者 吴月娥, 台译：Lîm Chùn-io̍k 2020.10.04

1944年，我tùi心底一直teh思念台湾；无论tú-tio̍h啥物危险，我lóng无法度控制ka-kī beh kah父母见面ê心愿，我终于去kah头家娘讲明；她惊一tiô，kā我阻止。金子齿科诊所有真chē病人，院长kah阮ê三名医生，tùi早起时八点到下晡五点，无停teh诊疗病人；若是阮离开，in ē真伤脑筋。M̄-koh，我beh tńg去厝里；德子讲她beh tòe我离开。阮就提出辞职书。金子齿科诊所ê人知影阮ê决心真坚定，金子齿科诊所to̍h放弃，讲：「Lín先去东京，若是无船班，随时欢迎lín tńg来。」Chit-má想起来，我kan-taⁿ teh想ka-kī ê tāi-chì；不管kā我ê tāi-chì当做ka-kī本身ê tāi-chì chit种hiah-ni̍h亲密ê人，我反省m̄知温情ê自我。

阮三人to̍h去东京。我ê同学陈彩云无上班，tòa tī下北泽ê寄宿房间内，我就tī hia借tòa一站á。厝主是一对大约五十岁ê夫妇，阮tòa tī二楼，in mā照顾阮ê三顿。我随时去丸の内（まるのうち） ê一间船公司，问开往台湾ê船班，m̄-koh出发日期是秘密，若是我登录我ê姓名kah地址，若有船班to̍h ē尽紧通知。

前一年，to̍h是1943年ê热天，发生こ千穗丸沉船事案，真chē台湾留学生死亡。Tī死者中间，有周鹊美ê叔伯小妹玛丽小姐；我去tòa周家ê时，我有tòa做伙生活。玛丽ê老母是齿科医专ê大前辈，mā是台湾政界出名人物郭国基ê小妹。Tī日本统治期间to̍h kah政府激烈对立，伊tī东亚大战期间mā提倡反对政府ê论述，玛丽ê老父kah郭国基（郭大炮)被判入狱。玛丽是一直想beh见ta̍k工teh流目屎过日子ê老母，因为án-ne chiūⁿ船，soah不幸沉船。她是东京ê桐朋音乐学校声乐出身，beh tńg来台湾chìn前两工，她tī日比谷（ひぴや）公会堂馆举行一场音乐会，就án-ne kah翁婿tī沉船事件中来牺牲。Hit时真chē tī东京ê台湾留学生参加chit场音乐会，我mā有去

Koh khah hō͘人tio̍h惊ê是，以后成做我ê翁婿ê许嘉代mā是预定坐chit台船，m̄-koh，东京医学专科学校忽然通知tio̍h去长野县进行野外演习，因为án-ne chiah取消chit班船ê预订。M̄-koh，因为伊无通知台湾取消ê消息，台湾ê家族去基隆，对沉船ê消息感觉悲痛。啥物是人类ê运命？ 我tī东京无工作，tī寄宿ê所在戆戆á过日子。一个礼拜日，我chhōa大家去新宿ê角筈(つのはず)教会。早起时是日本人聚会，下晡由台湾ê郭马西牧师（伊是少年ê牧师，去纽约哥伦比亚神学院留学）聚集台湾人做台语礼拜。Tī礼拜soah ê开讲中，阮讲阮来东京是beh等船tńg去台湾，一位女士讲：「神田êガ—ド下有一个算命先，lín tio̍h去看伊。Hit-ê算命先讲tńg去无要紧ê人chiah ē-tàng平安tńg到厝，若是讲bē-sái tńg去koh强强beh tńg去ê人，通常ē成做海藻个碎片。」实际上，我经常tú-tio̍h chit种情况，m̄-koh，我若是tī教会内án-ne讲，我意识tio̍h我to̍h是真正无teh重视上帝。

人类是好奇心真强ê动物。阮知算命m̄是基督徒做ê tāi-chì，m̄-koh，几工后阮to̍h去拜访hit位算命先。我先hō͘ 伊算，伊kah-ná是讲：「你困tī水里mā bē死。你tī四个月内ē结婚。」Chit-má我kan-taⁿ考虑beh tńg去台湾，结姻ē-sái讲是hàm古ê笑话。续落来是德子，伊讲：「你chit-má有一个学士学位，m̄-koh将来你ē koh得tio̍h另外一个学士学位。」咱都是齿科医学士，ná ē得tio̍h另外一个学位？这mā是一个笑话。换到郑云，伊讲：「因为lín老父ê致荫，你chit-má真幸福，m̄-koh以后若是无谨慎，ē tú-tio̍h真chē灾难。」轮到周鹊美， 伊讲：「你ē khah慢结婚，m̄-koh你ē tú-tio̍h一个免烦恼衣食住ê好翁婿。」伊对陈彩鸾讲：「你将来结婚了后，ē去一个遥远ê所在。」 Ta̍k人lóng认为这是teh讲笑，并无khòa意。