《《一位台湾女信徒ê自述》》

 | | | 转寄

第二章_7）头一pái收tio̍h情书

作者 吴月娥, 台译：Lîm Chùn-io̍k 2020.09.06

有一工，再万ê朋友吴植鉴先生chhōa一个叫康成炎ê人来拜访再万。Hit时我mā tī再万ê房间，in kā康先生绍介我。康先生是头围人，一个小庄头，所以大家知影伊是东京医科大学ê学生。M̄-koh，因为伊加我五 六岁，所以m̄-bat见过面。此后，康先生ka-kī一个来访问再万，ta̍k pái来lóng带一kóa物件。1943年hit时，因为án-ne kui个日本lóng出现物资缺欠ê状况，米mā tio̍h配给，肉kah鱼mā无简单得tio̍h，m̄-koh，这kiám-chhái是beh引起阮ê注意。

有一工，我收tio̍h一个白色ê phoe囊，笔迹真súi，内容是：「Tiāⁿ-tiāⁿ来chak-chō，深深感谢。」最后写德语 “Ich liebe dich ”做结束。因为齿科医学校tī第一年to̍h有教德语，因为án-ne chit-ê词ê含义随时了解。对22岁ê我来讲，求爱ê phoe是有生头一pái。我无法度控制心烦意乱，mā m̄知beh án怎chiah好。几工后，我勇敢写一张回phoe：「我是封建思想ê cha-bó͘ gín-á，你ê来phoe hō͘ 我真烦。请以后mài koh写án-ne ê phoe。」伊kah-ná对chit张拒绝ê phoe koh khah加强热情。

Tī he了后，伊每隔几工to̍h来公寓，假做是beh来看再万。伊是汉草中型ê人，鼻á tok-tok，外表四正，是日本医科大学ê学生，半年后to̍h beh出业成做医生。我开始讨厌伊来拜访，伊mā bat招我kah仁爱去新宿看电影。

有一工伊来学校见我。事务员来教室，大声hoah讲：「吴小姐，你有面会。」Siōng chhiú-chhèng ê张春梅飞来事务室，向所有ê人报告讲伊是医科大学ê学生。我tńg来到教室了后，四界lóng是冷笑ê声音。 伊来ê原因是：「水道桥后壁ê乐园球场后面有一个美丽ê花园，下课后你会来chhōe我 kám好？」Chit-ê花园是江户时代由德川光圀创建出名ê花园。我从来m̄-bat去过hia。下课后，我通常kah ta̍k人做伙去水道桥站，m̄-koh，我chit-má仓仓pōng-pōng到后乐园，无kā任何人讲。伊已经tī大门口 teh等à。这是一个优雅ê日本式风格，安静sù-sī koh爽快ê花园。阮坐tī红鲤鱼泅水ê埤á边ê长椅条，互相交谈一kóa有ê无ê，度过快乐ê时光。Teh beh黄昏ê时，游客jú来jú少，伊kā我送到水道桥站。 我kám应该选择伊来做我kui世人ê同伴？伊无信基督教，想beh知影该án怎chiah好，真操心，我to̍h kā父母写phoe来kah in参详。阮老父坦白kā我讲头围庄ê康火旺ê大kiáⁿ康承炎对我有爱情，hō͘ 我ê答覆是：「你iáu teh读册，m̄-thang hông骗去，tio̍h认真读册。」关系宗教ê差别，我写phoe hō͘ 加我一岁ê阿叔吴天赐。我ê阿叔是台湾神学院ê高年级学生，出业后ē受差派去教会做传道师；伊不同意讲：「因为宗教无仝结婚ê人，将来ē tú-tio̍h真chē问题，而且ē致使无幸福。」无论án怎，伊是反对ê。Taⁿ两人lóng反对，án怎chiah好？我kā伊讲：「你知我是基督徒，我ê父母kah亲戚反对信仰无仝ê婚姻。你kah我做伙去礼拜堂，若是将来你相信基督教，kám有问题？....」我mā kā我讲beh努力看māi。阮就án-ne去khah无台湾人去ê教会，tī饭田（いいだ）桥站ê警察病院附近有一间富士见教会，阮去过几nā pái。

康先生tùi医大beh出业chìn前，tio̍h决定出业后ê工作；伊决定beh去秋田县能代市ê病院。伊讲：「我beh去能代一年，直到你出业。薪水koân，生活费用全部由病院承担，所以，我kā钱俭起来，thang做未来ê结婚ê费用。」伊beh离开东京hit工，阮享受大餐了后，我送伊到上野站。

伊tī开往野代ê火车顶to̍h写phoe hō͘ 我，去到位了后mā ta̍k工写phoe。当伊the̍h-tio̍h第一笔薪水ê时，伊寄hō͘ 我40元来kah我分享伊ê欢喜。Kē我一年级ê罗东ê朋友张炳欣去能代kah伊见面ê时，托伊hō͘ 我50元。 半年来一直不断写phoe hō͘ 我，m̄-koh到我齿科四年级ê时，伊ê phoe to̍h jú来jú少，内容mā kah chìn前有无仝。我写phoe kā伊讲：「你ê感情kah-ná水流消失kah无影无踪。请放心，我m̄是一个哀伤ê cha-bó͘ gín-á。请来the̍h你寄我ê医大出业证书，我无理由留tī我chia。你写hō͘ 我ê 200 gōa张phoe，今á日我kā它全部烧掉。」就án-ne终止kah伊ê关系。

我诚实kā我过去无光荣ê tāi-chì写落来有一个原因，我ê cha-bó͘ 孙mā有一个男朋友。Cha-bó͘ gín-á一定tio̍h坚强，因为cha-bó͘ gín-á是khiā tī不利ê地位。若是你失去理智，to̍h ē致使无法度弥补ê遗憾。不管是男是女，失恋了使khioh-ka̍k来自杀ê例真chē，这是真hàm古ê tāi-chì。爱人kah hō͘ 人爱当然是幸福，m̄-koh，男女ê感情并bē永久不变；若是ē-tàng永远保持爱情，人人称赞ê好故事，而且成做代代流传ê典范；莎士比亚ê《 Romeo and Juliet》kah七夕ê牛郎织女mā是仝款。中国有句格言讲：「男女授受不亲」，意思是讲cha-po͘ 人kah cha-bó͘ 人绝对bē-sái亲密。M̄-koh，chit-má ê cha-po͘ 人kah cha-bó͘ 人真紧to̍h做伙，真chē未婚老母成做真大ê社会问题。是án怎ē发生失恋自杀？恋爱ê同伴比一个普通ê朋友koh khah亲近，kah hit-ê人结婚并m̄是讲一定ē kui世人幸福。若是你被另外一方弃sak，请你tio̍h欢喜；kah爱情无坚定ê人切断，是thang欢喜ê好事。」

经过几nā年恋爱了后结婚ê人，kiám-chhái无够一 二年to̍h来离婚，á是结婚十 十五年后to̍h hō͘ 另外一个cha-bó͘人包围。尽管她比情妇khah聪明，一个聪明ê bó͘，一个完美ê bó͘，koh ē-tàng kā厝保持整洁，而且尽siōng大ê努力教育ka-kī ê gín-á，m̄-koh，社会上iáu有真chē人tī外口饲cha-bó͘。

中国到taⁿ iáu有「男儿吃四方，三妻四妾又何妨」ê思想，这是中国五千年来大男人主义ê错误想法。Cha-po͘ 人ē-sái有真chē细姨，伊ê bó͘ kiám-chhái tio̍h目屎吞leh来忍耐。中国妇女ê目屎chho̍p-chho̍p滴，tio̍h算无翁婿ê疼，mā tio̍h 忍耐受苦，抚养ka-kī ê gín-á koh守家。Tī当今社会，妇女变kah khah坚强，翁á-bó͘ 之间纠纷，尤其是翁婿tī外口饲cha-bó͘，无koh再kah-ná是她ê目chiu内有沙niā-niā。十个中间有八 九个离婚；若是án-ne，gín-á无法度kah老父做伙，因为有另外一个cha-bó͘ 人tī厝里；若是kah老母做伙，老母无再婚to̍h无仝，若是她koh再婚，bē成做gín-á ka-kī ê厝，会真麻烦。问题儿童kiám-chhái是致使社会问题ê一kóa原因。

Siōng尾chiah koh讲一pái，恋爱是一件好事，m̄-koh，tio̍h坚持ka-kī ê肉身，m̄-thang做出ē后悔ê tāi-chì。这ē增加你ka-kī ê价值，而且ē得tio̍h你ê同伴ê尊重。若是你hō͘ 对方拒绝，mā tio̍h欢喜，讲：「好佳哉，真欢喜无kah chit种薄情ê人结婚。」

我m̄知影是án怎康承炎ê爱情消退，m̄-koh，我真感激，真欢喜ē-tàng早日发见。伊ná ē beh kā重要ê日本医科大学ê出业证书留tī我chia？后来我结婚了后，去hō͘ 阮翁发见，伊显然bē爽快，因为án-ne受tio̍h追究。1945年5月27日，tī东京ê siōng尾一暝ê空袭中，阮ê厝宅被烧毁ê时，阮翁大声hoah讲：「Mài the̍h出来，ka放hē-.leh。」Hit张出业证书就án-ne烧掉。

感情问题解放了后，ta̍k工lóng无闲专攻ê课业。Ta̍k工lóng tī附属病院，穿长白衫服koh挂嘴om，进行实习治疗。我来ê患者真chē，学生mā有200个。若是好字运ē-tàng照顺序分配tio̍h亲像全口义齿ê大病例患者，m̄-koh有时kan-taⁿ是洗齿石，这无算点数，一定tio̍h ka-kī托熟sāi人招会病人。淡水中学ê后辈张仁果先生，有绍介伊ê一kóa大学朋友来hō͘ 我。仁果先生是淡水中学koân我二届ê温玉女士ê弟妇á。In老父是花莲港凤林镇ê一名医生，tī 1947年二二八事件中，一家三人（老父、大兄kah伊）hō͘ tùi中国来ê国军枪杀。仁果先生ê阿嫂温玉女士tī淡水mā算是有名ê才德兼备ê名人，她无koh嫁，一生做小学ê教师，养育三个kiáⁿ。 阮chiah-ê专科学生终其尾tī紧张kah无闲中出业à。下一个挑战to̍h是就业。