《《一位台湾女信徒ê自述》》

 | | | 转寄

第二章_3） 暑假tńg来到台湾

作者 吴月娥, 台译：Lîm Chùn-io̍k 2020.08.09

学校kā一年分做三个学期；第一学期是tùi四月到六月底，第二学期是tùi九月到十二月中旬，第三学期是tùi一月初到三月中旬，暑假是tùi七月10日到八月底。阮tùi台湾来ê 人利用chit 50工ê假期tńg来台湾。阮做伙去船运公司定票，了后去银座kah新宿ê大百货公司买记念品。我去本乡街ê美容店，做一生头一pái ê电头毛。了后去伊势丹百货公司，买一领金色丝绸短ńg衫、一领蓝色ê喇叭裙kah一双koân-teⁿ ê白皮鞋。德音是牧师kiáⁿ，kah我ta̍k个月收tio̍h 100元无仝，她考虑tio̍h父母ê经济状况，真khiām。

我kah四五个仝班同学做伙去神户坐富士丸开向基隆港；到基隆港口ê时，我tī来迎接ê人中发现阮老父ê面；我ê目kho͘ 起烧，我向老父chiù-chōa beh一生有孝。老父chhōa阮去基隆ê一间餐馆食中昼，阮tī chia四散，kah所有ê人分手。Tī礁溪ê厝里，有阮老母kah小弟小妹teh thèng候。这是离别三个月来头一pái见面，充满无法度讲出来ê温暖ê气氛。

小妹月容今年10岁，月云6岁，光勇2岁，大汉小弟是淡水中学一年á。养女碧云tùi公学校出业，留tī厝里里帮赞老母，mā照顾小弟。我kā所有ê东京记念品pun hō͘ 大家，koh讲一kóa东京kah故乡ê tāi-chì。访问亲chiâⁿ kah朋友50工ê暑假真紧to̍h过去。

我前有写过，有阿妈ê致荫，我chiah ē-tàng读齿科。无去学校读册ê阿妈，到我出世为止，她是一个m̄-bat字（汉字）ê cha-bó͘人。信基督教了后，去教会学白话字，chiah ē-tàng读白话字ê圣经。M̄-koh，80岁左右to̍h开始有老年痴呆症，因为án-ne soah无法度读圣经。阮阿妈kah蒋介石总统仝一工往生，享年90岁。听讲阮阿妈ê葬式tāi先穿过对蒋介石总统表示哀悼降半旗ê街路。

我去拜访阮老母后头厝ê阿公阿妈。阮老母ê阿公是宜兰县出名ê厨子司，名叫林朋。阮老母八岁ê时，亲生ê老母过身，由后母养饲大汉，她mā真疼我。她嫁hō͘ 阿公了后，无生gín-á；阮老母kan-taⁿ有一个小弟，伊ê名叫林永坤，比我大10岁。伊真ài画图，画三国志人物ê图，而且tī旧历正月十五ê上元节kah中元节ê鼓灯节，用纸头做鸟kah龙ê形，而且tī其中点to̍h蜡烛hō͘ gín-á sńg，这是一个风俗，永坤做一个hō͘ 我sńg。唯一一个聪明koh温柔ê阿舅因为肺炎往生，享年19岁。