《《一位台湾女信徒ê自述》》

 | | | 转寄

第二章_4）柏木教会，参加台湾青年会

作者 吴月娥, 台译：Lîm Chùn-io̍k 2020.08.16

1940年，日本kah中国（当时日本称中国为「支那」）战争，称做日支事变。因为中国本土是战场，对日本差不多是无影响，无任何物资缺欠，宿舍中ê三顿包括好食ê白米饭kah丰富ê配菜。我ta̍k工lóng欢喜上课，m̄-koh有时我ē数（siàu)念台湾ê厝，流目屎。

迎接昭和16年， tī四月升级二年á。我来东京已经一年à。我khah惯势东京ê地理kah交通了后，我kah德音小姐to̍h chhōa我ê同学周鹊美去大久保（おうくぼ）ê柏木（かしわぎ）教会。教会ê牧师是一位名叫植村环（うえむら たまき）女士，她是留学美国ê神学家。她是明治时代提倡无教会主义出名ê内村鉴三（うちむら かんぞう) ê cha-bó͘ kiáⁿ。环女士真照顾台湾ê青年，真chē台湾人lóng来chia礼拜。周鹊美ê阿兄周庆渕是上野音乐学院ê学生，tī chit间教会司琴管风琴。

周鹊美是我ê好朋友；她tùi台南长老女学校（kah淡水女学校仝款由外国宣教师建立ê学校），tī东京ê文化洋裁学院读两年，了后进入齿科医专。庆渕兄已经结婚，in bó͘ 洪雪梅是帝国女子医专ê学生，两人tī涩谷区原宿租一栋两层楼ê厝tòa。鹊美ta̍k工lóng tùi原宿坐省线去学校读册。

我kah德音小姐礼拜日早起9点to̍h去植村女士ê教会礼拜，下晡借hit-ê所在做台湾基督教青年会ê台湾人礼拜。Chit-ê青年会由台湾来ê学生kah家庭组成，圣歌队由庆渕兄担任指挥；合唱团男声有林和引、高约拿、谢纬、吴基福kah廖应隆，女声有林明爵、林伦、方素华、蔡瑞月kah周鹊美。青年会干部ê林和引、高约拿是台湾ê神学校出业，koh来读日本ê神学校，因为án-ne in负责礼拜ê讲道；台湾神学校出业koh来读东京医ê谢纬mā tiāⁿ-tiāⁿ讲道。Ta̍k礼拜日早起参加柏木教会，下晡参加台湾青年会，阮tńg来到宿舍to̍h已经beh暗á。