《《一位台湾女信徒ê自述》》

 | | | 转寄

第二章_2）东洋女子齿科专科学校

作者 吴月娥, 台译：Lîm Chùn-io̍k 2020.08.02

Hit当时，东京有两间女子医学专科学校，两间齿科医学专科学校kah药学专科学校。医学专科学校有真chē人申请，齿科医学专科学校to̍h khah容易录取。

新生有203个；tī新生开学典礼，叫吴、刘、周、阮、邱、张、石、游、金kah李ê名，所以，我想有真chē台湾学生；m̄-nā台湾，mā有中国人kah韩国人。203个学生tī仝一个教室做伙读册。Ta̍k个教室lóng是大房间，kah中学校完全无仝。Tī地下室有一个解剖学ê坎á教室，koh有一个技工室（制作义齿ê房间），二楼有口腔外科教室、保存齿科学教室kah补嘴齿科学教室。保存齿科治疗室有100个治疗台，排kah真整齐。女医生穿白色长袍，穿白色koân-teⁿ皮鞋，挂嘴am，头毛pa̍k一束tī真好ê身材ê kha脊phiaⁿ，这是人人lóng欣羡ê打扮。

冬季ê制服是乌色ê外套kah白色ê衫，lak袋绣茶色ê「东洋齿科」标记，翘尾ê乌色角帽，乌色ê koân-teⁿ皮鞋。学校khà电话叫裁缝司傅来，量ta̍k人ê身材寸尺，所以真ha̍h躯，ta̍k人lóng真kah意，liâm-piⁿ beh做女医生ê款，赶紧hip相来向父母展示，hi-hi-hōa-hōa闹热滚滚。 东洋齿科医专ê校长叫做宇田先生，伊m̄是齿科医专，kah-ná是财产家，是学校ê创办人。当我入学ê时大约60岁，体态温暖，留受人尊敬ê白色嘴须。节日lóng有宇田先生ê训话： 「Lín社会to̍h一名koân地位ê齿科医，请心存为国家kah社会做贡献。」Ta̍k pái lóng是án-ne ê训话。东洋齿科医专1920年左右开校以来to̍h有tùi台湾来ê留学生，我tī基隆市受嘴齿治疗ê一位姓曾ê女医生mā是chit间学校ê出业生。这以外，活跳tī战后政治界ê郭国基议员ê夫人（日本人）kah伊ê小妹郭秀玉mā是学校ê前辈。

附属病院ê田岛院长kah大多数ê医生，lóng是tùi chit间学校出身，in 去美国留学了后to̍h tńg来日本，tī母校任教。Ta̍k点钟有来自无仝大学ê病理、化学、细菌、德语、解剖、生理学等等课程ê老师来教。Hō͘人印象siōng深刻ê是，生理学ê林髞( たかし)老师，伊是庆应义大学ê老师，mā是侦探小说ê大师木木高太郎。林老师ê幽默讲课，无一个学生缺席。Iáu有另外一个有趣味ê老师，伊是日本医科大学来ê老师，m̄-koh伊有收集纹身皮肤ê趣味；伊通常kah纹身ê人有来往，而且要求in tī死后hō͘ 伊尸体。老师kā纹身ê皮肤tùi尸体割落来，干燥了后而且保存。有一工，伊带来约30张ê纹身ê皮肤来展示hō͘ 阮看。Cha-po͘ 人纹身ê虎kah蛇，色彩非常鲜明，beh完成修整ê过程需要几nā年ê时间。一个cha-bó͘ 人kah-ná是全身菊花，á是一个súi ê gín-á teh suh她ê奶。

总共有203位同学，其中11位tùi台湾来；kah-ná是开校以来，siōng chē台湾学生ê一年，chìn前大约kan-taⁿ有两三人。Tùi淡水高女来ê有我kah德子、石睦子、高山君子等四人；彰化高女来ê有邱四梅kah游秀英等两人；koh有台南二女来ê张春梅、台南长老高女来ê周鹊美、高雄高女来ê阮素、嘉义高女来ê大陈，以及东京堀越高女来ê小陈，总共有11人，阮互相帮赞kah学习。Koân我一年ê是陈连年小姐（后来ê罗东陈五福夫人），三年级有廖彩琼小姐（现今移民到加拿大），四年级有基隆高女来ê两人。开学后无gōa久，tùi台湾来ê高年级生tī新宿ê味仙台湾餐厅举行迎新会聚餐。Chit-ê食堂是东京市内唯一ê台湾食堂，头家是蔡培火先生，tī战后tńg去台湾，成做政治界ê名人。

Tī我班里有三名韩国人、菲律宾人一名；日本人ê同学tùi日本各地来，大多数ê老父lóng是齿科医。老师点名ê时无叫姓名，是叫入学顺序ê号码。我当时是167号，德子是168号，tī我chìn前ê 166号是日本人引场政子。她少年ê时to̍h失去父母，由阿伯kah阿姆抚养长大，m̄-koh她是一个善良koh聪明ê cha-bó͘ gín-á。我siōng难忘ê同学之一是小野京子，她是位端庄美丽ê cha-bó͘ gín-á，真gâu弹钢琴，tī歇困时间，她弹奏ka-kī kah意ê歌曲，hō͘ ta̍k人欢喜来欣赏。她弹世界各地ê名曲，亲像舒伯特、莫扎特、贝多芬、舒曼kah日语歌曲等等，hō͘ 大家来合唱。第三年ê寒假期间，她因为感冒引起肺炎，无法度tńg去厝里度假，hông送入去学校附近ê病院，无到一礼拜to̍h往生。寒假结束阮tńg来到学校，阮惊一tiô，因为无法度去探访她，阮所有ê人lóng感觉真艰苦心。

齿科医学是困难ê学问，上课时间是tùi早起8点到下晡12点。无教科书，讲义做笔记来成做教科书。好字运ê是，因为我有出色ê听力kah速记能力，我ē-tàng kā老师ê老师ê讲义全部无làu-kau记落来，m̄-koh有记bē赴ê人，tī歇困期间我有看tio̍h借人ê笔记来抄写ê光景。中昼顿了后，一定tio̍h去地下室ê技术教室练习技工。齿科医学kah其它医学无仝，治疗学以外，iáu有修补学。挽嘴齿了后，koh tio̍h补义齿。对我来讲，制作义齿ê技术比讲义课目koh khah困难。Tùi一年á开始，学生练习用石膏做嘴齿ê模型，练习制作金齿套kah义齿。Kah金匠仝款，齿科医一定tio̍h熔金á kah银，来制作适合患者ê金齿套kah义齿。若是技术人员ê工作无法度及时完成，tio̍h带tńg来厝里，mā tio̍h做到半暝来完成。

宿舍ê正门面向本乡街，离日本cha-po͘ gín-á ê切望ê东京帝国大学ê赤门无远。我kah德子tùi赤门行入去，tī帝国大学附近行透透；chia是日本ê最高学府，日本ê政治界、商业界kah文学界ê大人物lóng是tùi chia出身。

学校开学ê前一工，寄宿生tùi家乡tńg来学校，宿舍忽然变kah闹热滚滚。阮室长境田八重子已经tńg来à，阮两人tī tha-tha-mih顶àⁿ头深深鞠躬；我kā她请安，讲：「我姓吴，请多多指教。」八重子对台湾ê siōng kôan感谢表示不可思议，用一种神秘ê表情微微á笑。续落来ê一年中间，得tio̍h八重子ê照顾，阮三人成做好朋友，真欢喜做伙过宿舍ê生活。

Tī境田小姐tńg来chìn前，阮tùi宿舍ê正门出去，经过本乡街到学校ê正门；m̄-koh境田小姐教阮一条近路：Tùi宿舍ê后门出去，穿过地下通道to̍h到学校。地下通道ê ta̍k pêng lóng排列真chē有人头ê玻璃瓶。看tio̍h hiah-ê目chiu闪闪发光，我忽然惊叫起来，境田小姐解说讲：「失礼！失礼！我解剖用ê，惯势了后to̍h好。」Chit条路真近，阮lóng想beh去chia，因为落雨mā bē chhòng tâm衫á裤，大家lóng行chit条路。一开始，我行路ê时大惊小怪，目chiu m̄敢看一直行，m̄-koh渐渐惯势了后，to̍h有勇气去看每一个面。

宿舍ê伙食iáu算bē bái，ta̍k顿lóng有kah味噌（みそ=mí-soh）汤。Tú开始我bē惯势，mā无gōa kah意，m̄-koh惯势了后to̍h真好味。Chit-má，我煮ê味噌汤是全家人siōng ài食ê。