《《一位台湾女信徒ê自述》》

 | | | 转寄

第二章_1）去东京留学，进入齿科医专

作者 吴月娥, 台译：Lîm Chùn-io̍k 2020.07.26

第二章 日本ê回忆
1）去东京留学，进入齿科医专

1940年三月，我tùi淡水高等女学校出业。
四年级ê第二学期，学校公告栏顶面开始贴东京女子专科学校ê招生海报。我chìn前从来m̄-bat梦想过东京，m̄-koh看tio̍h chit张海报，我想：「我想beh去东京读医学，将来thang做一名女医生。」当我kah老母参详ê时，她kā阮老父讲：「若是cha-bó͘ kiáⁿ ē-tàng做医生，是咱tau ê荣幸。」Chit时是阮tau所谓ê黄金时代，阮老父讲：「Ta̍k个月寄100日元无问题。」去kah组主任ê田村老师参详了后，伊mā赞成，就叫东京帝国女子医学专科学校寄申请表格kah规则hō͘ 我。 刘德音（德子）kah我仝款志愿医专，郑云（晴美）志愿药专。

郑云真紧to̍h收tio̍h昭和药学专科学校ê许可，德音收tio̍h帝国女子医专ê拒绝录取，m̄-koh，我lóng无消息。田村老师鼓励我，讲：「南海子一定无问题lah。」半个月后，收tio̍h答覆，讲：「关于吴月娥ê申请，阮siōng起初录取是因为成绩有适合学校读册ê条件，m̄-koh，贵校kan-taⁿ有27名出业生。大多数其它学校ê出业生差不多lóng有100名以上，tī职员会议上遭遇反对，真可惜无法度录取。」当时ê女子专科学校是免考试ê推荐制度；田村老师感觉真遗憾，伊kā我鼓励，讲：「无问题，东京有真chē学校，去hia chiah决定。」

郑云是台湾中部大地主ê cha-bó͘ kiáⁿ，她ê阿兄夫妇kah两个小弟tī东京teh留学，而且tī青山有ka-kī ê厝，所以，我kah德音to̍h kā她求助，就án-ne头一pái去东京。

出业典礼结束ê时，大家lóng离开学校tńg去家乡，m̄-koh，阮三人隔tńg工早起坐火车前往基隆。Tī月台顶teh等火车ê时，火车tùi桃园慢慢á驶来，看tio̍h阮老父透过窗á teh kā我ia̍t手？我ê目头烧起来；老父chhōa阮三人去基隆港ê候船室。无gōa久，阮老母kha脊phiaⁿ āiⁿ一岁ê小弟走过来。我teh流目屎，m̄-koh无出声。铜锣ê声teh催阮chiūⁿ船；阮坐ê富士丸是一台非常豪华ê轮船，一万吨ê新船。阮当然是坐三等舱，tī船底ê大tha-tha-mih房间里，乘客排做一列，kā行李khǹg tī ka-kī ê脚下，阮选择siōng内角ê角落。除了阮三人，其他lóng是日本人。隔壁是嘉义市ê seng-lí人， kah厝里ê人tńg来九州，对阮真亲切。

离开基隆港了后无gōa久，船开始大摇hàiⁿ。茶au kah盘á liàn落来，人tùi左到右，tùi右到左teh滚动；四界lóng是teh吐ê声，chit种状况继续一点钟。基隆海面波涛大涌，经过chia lóng是án-ne。

第三工早起，船来到下关（しもせき），边á ê日本家族落船。船koh一pái开始行，进入濑户内海（せとないかい），是tī本州、九州kah四国之间ê内海，有真chē海中ê小岛，风景实在有够súi。Chit-má亲目看tio̍h地理课读tio̍h ê日本出名ê风景名胜区濑户内海，我真感动，一直bē ài离开甲板。隔tńg工早起，船入神户港。

Tī甲板顶等beh落船ê时，郑云忽然大声hoah：「阿兄！」一个少年人khiā tī码头顶面，hit-ê人to̍h是郑鸿裕，伊tùi东京坐夜行火车12点钟久，来beh kā阮迎接；伊是昭和医专ê高年级学生，in bó͘ 静子（しずこ)mā是淡水女学院ê出业生，in有一个三岁ê cha-bó͘ gín-á叫做京子（きょうこ）。今暗时阮beh坐夜行火车去东京，就chhōa阮去看宝冢（たからずか）少女歌剧；ē-tàng看少女歌剧是从来m̄-bat想像过ê梦。这ná亲像一个梦，因为少女歌剧是日本cha-bó͘ gín-á ê梦想。这是豪华建筑中，一幕一幕ê华丽舞台背景，娇丽ê衫á裤，以及所有物件，lóng是我一生头一pái看tio̍h，ná亲像kah浦岛太郎（うらしま たろう）行往龙宫城ê气氛。

Tī夜行火车内一直兴奋ê气氛，阮隔tńg工早起来到东京站，终其尾来到青山郑先生ê厝。郑家ê人为阮准备二间ê六块tha-tha-mih房间。我kah德音几nā pái感谢晴美女士。若无chit位百万富翁ê cha-bó͘ kiáⁿ，阮to̍h bē ē-tàng来东京。Tī一个有八百万人口ê大都市，lóng是生份人，学校mā iáu未决定，tùi心底大大感谢郑家ê人。

三月20早起我醒起来ê时，一切lóng是白色； 「落雪！落雪！」阮三人跳起来，gia̍h头看tio̍h窗á外ê雪。三月底iáu ē-tàng看tio̍h雪，真正是好字运。静子姊hoah声叫阮「食饭」，阮就行落来；ta̍k人lóng tī灶kha ê tha-tha-mih顶铺chū-á，正坐落来食饭。这对我来讲是头一pái，m̄-koh真oh避免双脚起麻。

食饭ê时，鸿裕先生问我beh选择啥款ê学校。来日本chìn前，我认为齿科医专iáu bē bái，因为我tī公学校四年级ê时tòe老父ê seng-lí搬去基隆ê时，我ê嘴齿疼，老父chhōa我去基隆市ê一间齿科诊所。Tī hia是一位女医生，她ê全家lóng是基隆教会ê会友；一楼是翁婿ê内科诊所，二楼是齿科诊所。有两台齿科治疗椅，治疗台顶ê电火球á大发光，感觉清气koh高尚，hō͘ 细汉gín-á ê我留落来深刻ê印象，就án-ne ǹg望做齿科医生。

鸿裕kah静子lóng赞成。饭后，鸿裕兄chhōa阮三人去到水道桥；步lián约10分钟，崎á顶有一栋压倒周围建筑ê三层koân ê庄严白色西洋建筑，to̍h是东洋女子齿科专科学校。看tio̍h建筑物to̍h欢喜ê学校，阮随时入去办公室，提交tùi台湾带来ê文件，kā in讲阮想beh入学。过一时á to̍h许可我kah德音注册。学校ê开学典礼是tī四月初举行，m̄-koh阮拜托开学chìn前hō͘ 阮方便tòa入去宿舍，校方答应，三工后阮to̍h搬入去宿舍。宿舍是tī附属病院kah教室后面ê日本式建筑。Chit间学校ê学生m̄-nā来自日本各地，而且有来自泰国、菲律宾、马来西亚、新加坡、中国kah满洲等等。我kah德音被分配一个6块tha-tha-mih ê房间，三个人tòa ê房间。室长ê名叫境田八重子（さかいだ やえこ) ê三年级学生，阮入来ê时她tńg去故乡北海道。

Tòa入去宿舍ê三工前，静子姊chhōa阮去东京游览。银座、新宿、涩谷、浅草，她hō͘ 阮看东京siōng闹热ê所在。Chit时东京已经有地下铁à，起点是浅草，终点是涩谷ê单线，m̄-koh有贯穿东京ê重要地区。百货公司下底有一个车站，所以落车了后坐电梯to̍h入去百货公司。对阮来讲，穿淡水高女制服ê田庄gín-á并无tiāⁿ-tiāⁿ看tio̍h，感叹无停。我真欢喜ka-kī头一pái tī涩谷站ê东横百货公司ê一间餐厅食西餐。

三工后，德子mā tòa入来宿舍；读药专ê晴美（郑云）ê学校tī青山，ē-tàng tùi阿兄ê厝通学。