《《一位台湾女信徒ê自述》》

 | | | 转寄

第一章 14）淡水女学院kah淡水高等女学校ê回忆

作者 吴月娥, 台译：Lîm Chùn-io̍k 2020.06.21

我虚岁15岁入学淡水女学院ê生活，是我一生难忘，siōng súi ê少女时代。Tī宿舍ê食饭前，由舍监吴吟子老师带领祈祷；饭后七点开始，30分钟ê暗时礼拜了后，ta̍k人lóng tī礼堂预习kah复习功课大约二点钟，了后tńg去ka-kī ê房间，答嘴鼓kah做ka-kī ài做ê tāi-chì，直到十点半chiah熄灯。一年级ê时，三人tòa一间，室长是大我两岁ê陈秀菊；她真友善，gâu读册，koh有室长ê pān，真kā阮照顾。礼拜日，舍监ē chhōa阮去淡水街á，一间有红砖墙ê美丽教会礼拜。淡水女学院ê生活确实kah普通ê学校无仝，宗教气氛真厚，四界充满音乐ê旋律kah歌声，而且kah美丽ê淡水风景做伙，少女tī chia读册to̍h是幸福。

校长Argo小姐是一位美丽ê外国cha-bó͘ gín-á，她教阮英语；Tyler小姐是音乐老师，其他iáu有两位未婚ê外国女老师tī淡水女学院隔壁ê一间女子学校里教书（He是一间外国人创办ê小学校，是用罗马字teh教无受过学校教育ê妇女ê圣经学校）。一般人称呼chiah-ê老师「姑娘」。Chit四个姑娘tòa tī学校对面ê一间红砖á厝，是英国式风格ê两层楼á厝，in有chhiàⁿ两个厨师负责煮食kah piàⁿ厝内，而且ta̍k礼拜两pái，tī拜三kah拜六ê暗顿，为宿舍ê学生制作西洋ê糖á，一人一袋pun hō͘ 阮。我从来m̄-bat看过ê精美西洋糖á ê气味，到taⁿ我iáu ē记得。我mā bat去姑娘楼几nā pái；学钢琴ê人ta̍k个月一pái ê发表会to̍h是tī hit栋姑娘楼举行。发表会结束了后，姑娘ē请阮食西洋糖á。若是谈起姑娘楼ê好tāi-chì，to̍h ná亲像是童话中ê宫殿，gín-á lóng ē欣羡tòa tī hia ê外国人。

短短ê一学期钢琴课kan-taⁿ是初步ê阶段，了后虽然kah钢琴ê缘份切断，m̄-koh后来我有家庭了后，hit段经验对教育gín-á却真有帮赞。讲tio̍h我tī女学院时代所学tio̍h ê手艺，m̄-nā hō͘ 我真gâu做裁缝，而且养成我一生对裁缝ê兴趣。裁缝老师刘秀玉教阮用深蓝色ê羊毛编织膨纱衫。淡水差不多是tī台湾ê siōng北pêng，寒天真冷，若kā膨纱衫穿tī制服ê顶面，to̍h ē温暖。过去，女子学校ê重点是teh培养贤妻良母型ê家庭主妇，所以一礼拜两pái ê裁缝课以外，koh有家事、煮食kah育儿ê课程。

淡水女学院ê制服，tī热天是海军蓝ê 16个kéng ê百kéng裙，衫是白色ê水兵服，颔领kah手ńg头kah裙仝款，是海军蓝，koh有三chōa白条装饰颔领kah手ńg头，衫ê头前结一个浅黄色ê大蝴蝶结。Chit套制服穿起来，hō͘ 我chit-ê庄kha人欢喜kah kah-ná beh飞上天，感觉ka-kī忽然变成一个公主。冬季ê制服，衫kah裙lóng是深蓝色，装饰ê三chōa是红色，蝴蝶结mā是红色。除这以外，学生规定tio̍h穿皮鞋，袜á tio̍h白色。Tio̍h算成做淡水高等女学校以后，有坂校长mā是沿用chit套制服。

我kiám-chhái有继承tio̍h阮老母ê一kóa技巧，所以编织、裁缝等等ê制作lóng比其他同学khah súi koh khah紧，因为án-ne，我ê裁缝成绩lóng是头名。Tio̍h算结婚了后，我mā真欢喜ē-tàng制作ka-kī gín-á ê童装，结果hō͘ 我真满足。

当我二年级ê时，淡水女学院无koh再是教会学校，圣经ê科目kah赞美歌ê歌声lóng tùi校舍消失。M̄-koh，阮是基督徒ê学生，并无bē记得去淡水教会做礼拜。

为tio̍h阮chiah-ê有宗教信仰ê学生，台湾基督教会邀请tùi日本神学校毕业tńg来台湾ê陈泗治牧师来淡水，对中学生kah女学生传道kah指导。1945年，日本tī战争中战败而且tùi台湾撤退了后，泗治牧师to̍h成做淡水中学kah淡水女学校ê校长。

有坂一世校长是tùi台中一中转调来ê，当时大约五十岁。伊是一个汉草koân大ê人，有一种hông压bē倒ê hit种威严。伊ê任务是消除学校ê宗教环境，而且创建一间kah普通中学仝款ê好学校。伊优先考虑ê是升学问题，专心致意tī提高学生ê成绩，来成做政府认可ê学校。除这以外，尽管学校无钢琴课，伊却邀请东京一位出色ê音乐老师来，而且chhiàⁿ一个园丁栽种四季ê花草，来创建一间美丽ê学校。

学校tī秋季运动会了后，tī冬季to̍h ē举行文艺会，由教国文ê田中老师kah富永老师来担任戏剧指导。三年级kah四年级ê时，我bat扮演过主角ê角色；kiám-chhái是因为我ê声大，in chiah ē选我。三年级ê时，阮所演ê戏剧是菊池宽ê《老父倒转来》；chit出戏kan-taⁿ有五个表演者，我扮演ê角色是大kiáⁿ。它ê剧情是一个家庭ê老父放sak伊ê bó͘ kah三个gín-á，kah艺妓做伙离家出走。受放sak ê bó͘ 有两个cha-po͘ kiáⁿ kah一个cha-bó͘ kiáⁿ，她辛辛苦苦teh照顾chiah-ê gín-á。大kiáⁿ小学毕业了后无koh读中学校，to̍h去做学校ê工友，thàn淡薄á薪水来帮赞老母，而且负担小弟kah小妹ê学费。当in ê生活安定落来了后，老父却落难tńg来厝里；chit时，大兄拒绝老父进入厝内，beh hō͘ 老父无负责任ê态度得tio̍h教乖，而且大声hoah讲：阮老父tī 20年前to̍h已经死去à。演出chit幕ê时，hō͘ 观众看kah目屎chho̍p-chho̍p滴。

四年级ê时，阮演ê是《俊宽》；我ê角色是主角俊宽；这是源自战国时代源氏kah平家之间争斗ê一个故事。Tī文艺会ê时，校长邀请台北歌舞伎座（译注：歌舞伎 [かぶき；Kabuki] 是tùi日本江戸时代延续400年以上历史ê日本传统表演艺术，是结合戏剧、音乐kah舞蹈ê表演；歌舞伎座是表演歌舞伎ê所在。）ê化妆师来，而且伊mā带来一kóa戏服，所以看起来亲像真正ê歌舞伎。Hit工ê观众差不多lóng是日本人，专工tùi台北来看ê人mā bē少，因为淡水女学校ê文艺会tī当时ê日本社会风评真好。

除这以外，校长iáu ǹg望ē-tàng为毕业生提供日本女性化ê美感，所以ta̍k礼拜一pái，伊有tùi台北邀请插花kah茶道ê老师来教四年级ê学生。

日本人ê老师lóng真出色，从来无kā阮疏忽á是歧视，所以老师kah学生ê情感真bā，阮tī hia度过快乐ê日子。我到taⁿ犹原感谢hiah-ê超越日本人kah台湾人之间ê分歧，而且kan-taⁿ考虑tio̍h学校kah学生ê未来ê老师。

所有ê民族lóng是宇宙ê创造者—全能ê上帝创造ê，他无差别teh疼chit-ê世界；相信他koh遵守他ê律法kah旨意ê人，lóng ē得tio̍h他ê赐福，而且得tio̍h永远ê活命。咱出世tī chit-ê世界上，咱一定tio̍h无分种族，彼此共存，kah共同繁荣。

有坂校长tńg去日本十年后，而且台湾社会稳定ê时，淡中kah淡女ê同窗计划beh邀请有坂老师来台湾；有几nā个人去到日本，迎接老师夫妇。

分散tī台湾全岛ê校友聚集óa来，盛大欢迎有坂校长夫妇，in tī台湾大约tòa两个月了后beh tńg去日本ê时，送hō͘ in ê记念品ná亲像山hiah大堆。教阮国文ê田中心一老师，kah我tī公学校ê稻田老师mā有受邀请来参加。师生ê关系无分国界，阮之间ê亲密关系to̍h ná亲像父kiáⁿ之情。Siōng疼我ê冈村初子老师tùi hit时了后to̍h失联，m̄-koh我到taⁿ iáu真思念她。

1940年3月15日是阮ê毕业典礼；校长吩咐所有ê毕业生lóng tio̍h佩带特别记号来参加；hit-ê特别记号to̍h是校长设计ê梅花，它ê带á mā是专工去注文ê siōng好koh有派头ê物件。女老师透早to̍h来tàu脚手，帮赞学生配带梅花。Chit-ê梅花结带á显示出高尚ê日本cha-bó͘人ê优雅；阮大家lóng相争beh先hip相。二十七名毕业生坐tī会场ê前排，tī接受校长ê训辞了后，我代表毕业生致答词。

「阮深深感谢阮tī学校四年中间，校长kah老师对阮ê热心koh慈爱ê指导。Tùi chit-má开始，阮每一个人lóng teh beh进入一个风涌惊人ê社会；阮beh严守各位老师ê教导，持守坚强ê意志来奋斗，成做一个实践学校座右铭ê温良贞淑ê女性，为社会做出贡献。」

隔tńg工，27名毕业生四散去tī台湾各地。Tio̍h算chit-má iáu ē-tàng见面ê iáu有曹从乡、邱秀梅、李妙好、吕相宜、黄彩鸾等人，m̄-koh，刘德音、汤香概、郭红柿三位已经续接死亡。Chit-ê世界kah-ná是旅人ê旅馆，无人ē-tàng决定tang时ē hō͘ 上帝召tńg去。