《《一位台湾女信徒ê自述》》

 | | | 转寄

第一章 15）我ê朋友

作者 吴月娥, 台译：Lîm Chùn-io̍k 2020.06.28

好字运ê是，我ê真chē朋友lóng是热心ê基督徒。阮相信若是阮有仝款ê宗教信仰，阮被召ê hit工ē照上帝ê旨意见面；这是Argo kah Tyler老师教ê。

邱秀梅女士，我细汉ê时to̍h用日语称她做「梅/うめ」；她毕业后第三年，to̍h嫁去遥远ê厦门，听讲新郎是厦门siōng好额ê富豪，有真chē奴仆，她ê生活ná亲像女王。M̄-koh，tī共产党落南ê无gōa久chìn前，她带五万美金ê银票，kā kui个家庭徙tńg来台湾，tī台北市太平町买厝，koh开始投资金矿，m̄-koh，无几年to̍h kā所有ê财产了kah空空空，她ê翁婿koh患tio̍h忧郁症来往生。她ê翁婿本来to̍h是一个富裕ê放荡kiáⁿ，kah thàn钱lóng无缘，致使家庭ê债务tio̍h由梅来phāiⁿ，koh tio̍h养饲两个gín-á kah她ê ta-ke。Hit当时，美军进驻台北，梅想beh去做管家thàn钱，所以来拜托阮绍介一个想beh chhiàⁿ管家ê人。Hit当时，tī台北tú成立一间新ê国华保险公司，她to̍h成做一个招保险ê人员。她ê头一个客户是阮用两个cha-po͘ kiáⁿ ê名义，买一人一万元ê保险。梅ê后头厝mā是基督教徒，她自细汉to̍h读过主日学，所以她对ta-ke mā尽sim-pū ê本份，做一切该做ê khang-khòe。Ta-ke hō͘ 她ê有孝感动来信教；虽然无负责任ê翁婿病倒，而且死tī外口，m̄-koh，梅犹原献身，照顾她ê ta-ke到底。Chit-má，梅kah商业界出名ê功学社ê总裁谢敬忠先生再婚，而且建立一个老来ê幸福家庭。她耐心kā翁婿引chhōa来会堂，做伙行信仰ê道路，充满得胜ê喜乐。

曹从乡女士ê日本名叫顺子，她嫁hō͘ 林荣彰先生，是一个一生无风波ê幸福ê人。她ê翁婿疼她，她ē-sái讲是tī温室长大ê一蕊花。她有一男一女，cha-bó͘ kiáⁿ嫁医生，chit-má tī洛杉矶开业。伊ê kiáⁿ林神佑先生是妇产科医生，是一位出名ê医生，专门治疗女性ê不孕症。我ta̍k pái tńg去台湾，lóng ē得tio̍h从乡女士ê盛情款待。荣彰先生两年前往生；从乡ê全家mā是热心ê基督徒。

李妙好女士（妙子），她是出名ê作曲家郭子究先生ê牵手。她ê翁婿以音乐、作曲来出名，m̄-koh，伊是一个自学成才ê人，无上过正规学校。伊人真谦卑；伊bat对我讲：「我对不起妙子。我出世tī一个sàn-chhiah ê家庭，无法度读中学，妙子却是高等女学校毕业，m̄-koh她无弃嫌嫁hō͘ 我。」郭先生是花莲港长老教会ê长老。

黄彩鸾女士（千鹤子）。千鹤子女士chit-má是云林县ê议员，是一个照字面ê女强人；她行路ê pān kah讲话ê气口lóng有真吸引人ê所在。以下是阮做伙坐计程车ê时发生ê故事：她问司机tī选举中beh支持tó一个派系，民进党á是国民党？司机回答讲民进党ê时，她大欢喜，落车ê时，除了付计程车钱以外koh hō͘ 伊100元，拜托伊继续支持民进党。

吕相宜女士（千代子）。她四十岁ê时，她ê翁婿tī山球（golf）场因为心脏病发作，忽然往生。她无再婚，独自抚养kiáⁿ儿过她ê一生。她ê屘cha-bó͘ kiáⁿ来美国留学，tī chia结婚，夫妇lóng tī IBM工作，所以，千代子有几nā pái来New York看她ê cha-bó͘ kiáⁿ。 刘德音女士（德子）。她是tī淡水高女kah我争一、二名ê对手，m̄-koh阮并无嫉妒，颠倒彼此相疼，做伙学习；大学毕业了后，她mā tī琦玉县岩槻ê金子齿科病院kah我做伙学习，阮是互相照顾ê密友。我比她khah先结婚，tī我kah翁婿疏开去北海道，tī hia beh生产ê时，她无先kah我参详，to̍h停止工作，ka-kī一个tùi岩槻来到北海道ê夕张炭矿病院，来照顾我做月内。她无听金子齿科病院头家娘ê阻挡，执意讲：「若是我无去照顾tī hiah-nih寒冷ê北海道生产ê南海子，我真bē放心。」头家娘kah-ná无法度理解台湾人chit款ê友情。Tńg来台湾了后，德子tú-tio̍h蔡清満医师，而且kah伊结婚，生一男两女，过tio̍h健康ê家庭生活。德子是牧师ê cha-bó͘ kiáⁿ，信仰真好，是一位虔诚koh友善ê女医生，患者真疼惜她；她tī 1994年六月往生。

郑云女士（晴美）。她、德子kah我三人tī毕业典礼后ê隔tńg工，to̍h坐富士丸来chhōe日本ê好朋友。她ê阿兄来神户kā阮迎接，mā chhōa阮去看宝冢少女歌剧，hō͘ 阮实现少女ê梦。Tī学校开学chìn前，阮一直tòa tī in tī东京ê厝。晴美是台中县田中大富豪ê千金，tńg来到台湾了后，她成做基隆病院ê药剂师，tī hia kah一位妇产科医生结婚，生育一男二女，m̄-koh，in翁无phah算soah来往生，享年40岁。她bat几nā pái chhōa三个gín-á来台北阮tau chhit-thô，犹原真开朗。M̄-koh，有一工她却自杀离世；为啥物她beh放下幼儿neh？我感觉真奇怪。十三年前，她ê长女悧悧khà电话hō͘ 我，我kah阮翁去机场接她，chhōa她来阮tau tòa几工，阮翁chiah koh送她tńg去费城ê学校；了后，她有时ē来纽约拜访阮。

石芬陆女士(睦子)。阮ta̍k人lóng承认睦子是一个文学少女，她有真chē梦想kah诗情画意，嘴里tiāⁿ-tiāⁿ大声teh吟和歌（日本诗、俳句）。她kah我仝款去东京学习齿科，tī东京结婚，生一个cha-po͘ kiáⁿ。当我tùi日本tńg来ê时，阮tī台北车头相tú，hit当时，我kah她lóng手抱gín-á；he已经是五十年前ê tāi-chì à。她有四个gín-á，m̄-koh，不幸ê是tī一pái交通事故中，她失去她ê翁婿。她ê四个gín-á lóng有好成就。Tio̍h算是chit-má，当我tńg来到台湾ê时，她iáu是ē专工tùi台中来，继续teh加深阮ê友谊。

黄菊乡女士（乡子)。她是一个可爱ê细粒chí cha-bó͘ gín-á，她人瘦koh矮。她热爱音乐，比班里其他任何人lóng khah gâu弹钢琴，有她来伴奏ê合唱，lóng ē hō͘ 人bē记得时间ê流失。她ê温柔ê翁婿六十岁ê时，tī练习网球ê时，忽然跋倒soah往生。In ê两个cha-po͘ kiáⁿ tī西雅图留学，koh lóng tī hia结婚、定居。她mā tiāⁿ-tiāⁿ ē来西雅图，有时ē kā我khà电话。五、六年前，我kah翁婿去加拿大洛矶山脉游览，tńg来ê时经过西雅图，她ê cha-po͘ kiáⁿ温明丰先生来chhōa阮去参观水族馆。她是主耶稣ê忠实奴仆，chit-má iáu是台北市济南教会ê长老。她是一个非常致力tī传福音ê人，有一工teh kah阮做伙坐计程车前往士林ê时，她想beh向计程车司机传福音。M̄-koh，当司机对基督教有pháiⁿ评论ê时，阮感觉真狼狈，m̄-koh，她真大方讲：「马太福音5：11-12，耶稣讲：Lín若为tio̍h我ê缘故hō͘ 人侮辱、迫害、毁谤，就实在有福气。Tio̍h欢喜快乐，因为lín tī天顶有真大ê报赏。Lín古早ê先知mā是án-ne hō͘ 人迫害。」