《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第四章
作者 庄司总一 着 杨东杰 指导 林俊育 台译 2016.11.13
瑞文ê chhit-thô同伴溢来厝里phah麻雀，in bó͘春鸾捧茶饼出来了后，koh kah平常仝款hō͘人放tiàm壁角。因为无聊，想讲看做什么tāi-chì来消磨时间，就行入去瑞文ê细姨阵ê房间，招伊来i「葫芦笨」ê poa̍h-kiáu。但是，阿阵kah平常无仝，心情郁卒，精神振作bē起来。
「你平常siōng爱i葫芦笨....无ài to̍h mài i。但是，你今暗thài会无元气leh？....你若生一个á gín-á to̍h好。」
春鸾不可思议án-ne问阿阵。In翁瑞文娶阿阵入陈家ê门，到taⁿ已经满四年ah。丈夫ê细姨无生kiáⁿ，对大bó͘来讲是真好ê tāi-chì，但春鸾并无kā阿阵看做是丈夫ê细姨nā-tiāⁿ。
起初chit-ê姑娘tú入来厝里ê时，因为siuⁿ过意外，春鸾mā gōng-gia̍h kah哭出来。几年前，当景文娶身分低koh无姿色ê杨氏龙来做细姨ê时，陈家ê人非常gōng-gia̍h，以玉帘为中心引起种种ê摩擦，á瑞文ê情形有超过无不及。因为暴露in两人tī田庄ê痴情关系，无法度藉口kan-ta kā阿阵当做cha-bó͘嫺来看待。而且她m̄是纯粹ê台湾人是大问题，加上一个难题是她mā姓陈，仝姓ê婚姻tī台湾是根深柢固ê禁忌。另外一方面，大兄清文kah安子对道德ê观点极力反对。脆弱ê瑞文遭遇全面ê反对，伊一个人抵挡bē-tiâu。结局尽力支持丈夫，hō͘伊ē-tàng达tio̍h愿望ê却是in bó͘春鸾，hō͘人感觉真意外。In bó͘认为可以，ē-sái讲是希望án-ne，厝里ê人无办法只好默认。
春鸾屈服ê看破态度，kah狷介任性ê玉帘tú好相反，两人lóng成做hō͘人讨厌kah耻笑ê对象。但是，讲起来mā是无办法，春鸾m̄是「爱」ê君王却是奴隶，伊爱丈夫却kā丈夫所爱ê夺走，chhun落来ê iáu有啥物？她感觉真疑问。
但是，过了一段日子了后，春鸾渐渐感觉――原谅瑞文kah阿阵ê关系，并m̄是完全为tio̍h丈夫设想，mā是出tī对chit-ê姑娘来考虑。M̄知什么原因，春鸾kah意chit-ê名叫阿阵ê cha-bó͘-gín-á。虽然kah意有种种无仝ê情形，她讲bē出kah意ê程度kah理由hit款奇妙ê吸引力。
「你tī田庄kah瑞文熟悉，算起来也有六七年loh。....为什么iáu未生kiáⁿ？」
「Ngh....」
阿阵感觉真无聊to̍h摇摇头，桌á顶面ê电火照光in两人对坐ê六仙桌，房间内ê四角落光线光线暗淡。阿阵穿开叉ê上海式流行长衫旗袍，因为室内光线无真光，深蓝色ê绒质长衫，看起来色致发乌。她hit-ê粗骨ê手带双股ê金手环，黄玉ê耳钩摇leh摇leh真kó͘-chui。她ê耳á细细，形状无súi，看会出她ê朴素卑微身世，但整体ê容姿看起来算是非常脱俗，chit-má已经是富豪人ê第二夫人，也无什么thang见笑ê所在。但是，阿阵对已经习惯ê旗袍高领，tú-chiah就感觉gāi-gio̍h摇颔颈，真合躯ê长衫hō͘伊感觉拘束，心情kah-ná无真爽快ê款。春鸾是想讲伊已经有娠chiah án-ne问伊，阿阵回答讲m̄是。
「Ngh, 阿阵ah, 你身体bē-bái，thài会无boeh生kiáⁿ？」
「我mā m̄知什么原因，bē生lah，我mā真ài有kó͘-chui ê gín-á。」
「去妈祖宫拜注生娘娘求子看bāi，若bē-sái chiah来kā人分kiáⁿ。」
「春鸾ê kiáⁿ分我一个kám好？」
「分你ē-sái....。但你kah-ná无想boeh ài有kiáⁿ。」
「真寂寞neh。....春鸾，你有boeh pok薰无？」
「无，你pok to̍h好。」
阿阵ùi原住民独木舟型ê薰盒抽出一支薰来点to̍h，kah-ná boeh kā心内ê忧愁吐出来，尖嘴连续吐出一两嘴薰。她hit两蕊茶色ê大目睭投向壁顶，壁顶挂竹雕刻字句ê对联下面，有一幅白朗峰(Mont Blanc, 阿尔卑斯山ê最高峰)风景图，是瑞文最近ùi古物店买tńg来挂ê。「你看án怎？真súi ho͘ⁿh！比新高山kah次高山khah高。」瑞文指hit-ê hō͘万年积雪盖tiâu kah-ná剃头刀削过ê连绵雪白山峰án-ne讲。伊原本无想boeh hō͘ 阿阵看山景，免得引起她ê回忆，但最近她露出无精彩ê心情，对山kah田园大自然ê乡愁，所以瑞文chiah挂chit幅风景图来安慰她。
陈氏阿阵并无幸福。人对环境有适应能力，tùi习惯上来讲，习惯文明生活比习惯野蛮未开化khah容易，习惯富裕生活比习惯贫穷khah容易，但chit-ê定则并无适用阿阵ê身上。她ê老母阿笑随时习惯文明ê气氛，真愉快teh享受。M̄-koh tī chia所讲ê习惯，并m̄是指精神上ê文化，是指tòa高尚ê人家会感觉快乐，ē-tàng食chheⁿ-chhau，就是指chit种物资生活ê向上。可能是因为阿笑siuⁿ过度，暖衣饱食ê剧烈生活变化，她kah cha-bó͘-kiáⁿ同时来到陈家无够一年，留落来田庄人无见过世面ê笑话，to̍h因为身躯浮肿来突然死亡。
In cha-bó͘-kiáⁿ阿阵to̍h完全无仝，她用一定ê物资，有时极少ê物就知足，自然界生物朴素ê习惯，她bē hiah容易消失。奢华ê衫裤是瑞文硬叫伊穿ê，koh讲她是田庄人，想讲她会大量贪食，其实餐桌顶面无论jōa chheⁿ-chhau，她绝对bē食siuⁿ饱。买金手表hō͘伊ê时，她非常珍惜，但he只不过是kah-ná gín-á有玩具hit种ê欢喜。她随时会晓读时针kah分针，但无用头脑来计算时间。「Chiah九点o͘h, iáu早。」瑞文án-ne讲，但是九点对阿阵来讲，只不过是一个记号nā-tiāⁿ。Iáu早á是siuⁿ òaⁿ，chit款tāi-chì她用肉体去感觉日头ê位置就有够额。但是tī陈家，头脑中无时钟bē-sái得，冬天另外一回事，若是春天kah夏天to̍h无分日夜。Kui暝lóng有人tī房间起床，mā有人tī半暝食饭，听会tio̍h笑声kah讲话chhi-chhi-chhu̍h-chhu̍h ê声，弦á kah月琴ê声。阿阵ài早困早起床，对伊来讲，看bē-tio̍h日头，地热冷去，续落来一工ê疲劳――筋肉无teh振动ê时，习惯无意识感觉血流慢落来，肉体变迟钝，就是teh命令她去困来休息。她kan-ta渴望陈家所无ê日头kah土，kah-ná hō͘人关tī牢狱hiah-ni̍h渴望日头kah土。
有一pái发生下面ê事件。
过往ê阿传阿叔有一个叫做秀通ê kiáⁿ，chit-ê少年人真ài耍phah鸟枪，每工早起时lóng出去phah鸟á。但是hit工挂tī壁顶ê枪phah无去，伊kui厝内问透透，一个一个问hiah-ê有脚手无清气嫌疑cha-bó͘嫺kah仆人，lóng无结果。Iáu teh chhōe ê时chūn，阿阵忽然ùi后门tńg来，是她无讲一声to̍h借用hit支枪，她腰里吊约二十只山斑鸽(pan-kah)kah白头壳á。
「你chit箍hō͘人惊一tiô，贼á原来to̍h是你，cheng-siⁿ！透早to̍h hō͘人bū-sà-sà，你tang时偷走入来我ê房间？」
秀通火to̍h大受气，kā阿阵tu还伊ê枪一手夺过来，枪口向阿阵ê腹肚lu去。
「我一枪kā你phah死，用你ê肠á来灌ian肠饲狗！」
阿阵ê腹肚hō͘枪口tu teh, 身躯退后，她掠准真正会开枪。因为秀通bat两三pái向她求爱hō͘她拒绝，这是求之不得ê报复机会，所以想boeh大大kā她heⁿh惊。阿阵真戆直，感觉jú来jú趣味。对精神发动kah行为表现之间无真正距离ê阿阵来讲，假使她是hit-e5cha-po͘人，若是伊表现出来ê激怒真正ùi内心烧起来，她大概会从án-ne开枪。
「Án怎，你有服无？以后你若koh án-ne做，一定kā你phah死！」 阿阵真正受tio̍h heⁿh惊，显露出对死ê恐怖kah紧张。少年人因此满足报复消气ê爽快，bâ-bûn笑起来，tú-boeh kā枪收起来ê时，拚boeh设法脱离chit-ê恐怖ê阿阵，趁chit-ê机会拔开枪口冲过去，狠狠咬伊ê手腕。
陈家ê人看tio̍h阿阵chit-pái意外ê狂暴了后，对她ê耻笑kah欺负to̍h有khah节制。其实冲过去咬人，这是阿阵来到陈家ê第一pái，koh再这kah一kóa cha-bó͘人见若冤家to̍h互相giú头毛或是哭闹比起来，阿阵ē-sái讲加真镇静斯文。
Chit-ê kah-ná豹母ê cha-bó͘人，kám ē-tàng tī都市ê上流家庭生活？当初瑞文mā真担心，但娶入来了后颠倒无必要hiah担心。她ná亲像hō͘人移徙无仝土地ê花，失去原来ê色芳。Tī阿里山连绵山脉ê所在，tī曾文溪流过广阔ê甘蔗园kah田园，hit时她连家己ê价值kah存在ê理由lóng m̄知。但来到hō͘墙围所围kah-ná监狱ê陈家了后，她自然就了解家己本身。
「你ná亲像啥物动物leh。」
瑞文常常真无奈何án-ne问，无论经过jōa久，阿阵有bē-tàng hō͘人理解ê所在。阿阵本身mā m̄知是án怎家己hō͘人讲做kah-ná是动物，kah tī田庄ê时比较起来，伊已经加真温纯古意ah。
「你非常不可思议，看tio̍h你to̍h会起惊。」
「有啥物好惊？我á无giâ镰le̍k-á，mā无giâ枪。」
「我m̄是指这lah，阿阵，你对我ê bó͘-kiáⁿ到底抱啥物心情？」
「是án怎leh？....我lóng真合意每一个人。阿明看tio̍h我to̍h用咬牙切齿ê目神看我，但伊生kah真像你，一副kó͘-chui ê面，一定是一个乖gín-á。春鸾是一个好人，kah她作伙lim茶讲话，感觉她kah-ná真寂寞ê款。」
「To̍h是leh, 你chit-má讲阿明kah春鸾是好人。Án-ne社会上人teh讲，chit-ê是好人，hit-ê是pháiⁿ人，你kám知是什么原因？」
「He我m̄知。」
「你to̍h是m̄知leh, án-ne你对阮bó͘，你有感觉做啥物pháiⁿ tāi-chì无？Kám一屑á都无感觉？」
「你讲pháiⁿ tāi-chì....？」
「你看，你lóng bē明白。」
「你是讲什么人做pháiⁿ tāi-chì？」
「所讲ê pháiⁿ tāi-chì――to̍h是指讲白贼、hō͘人痛苦，夺人所爱ê物，to̍h是chiah-ê tāi-chì。」
「我会记得m̄-bat tùi春鸾夺取什么物件，mā无讲白贼，mā无hō͘伊痛苦ah。」
「若是你家己一个án-ne想，便无问题，但是对方若无án-ne想，会án怎？」
「Kám有啥物无好？因为你暗时mā m̄是lóng来我ê房间。」
阿阵无感觉tio̍h啥物矛盾或是疑惑，kah-ná真当然án-ne讲。瑞文chhoah一tiô，从án-ne看破，无想boeh koh kā伊教化、提高她ê雅气。她无自我意识，mā无反省ê能力，瑞文想讲她kám会是白痴。性欲发起来ê时，以外ê tāi-chì全部ùi她ê意识中排除，全心一意koh纯洁，ná亲像滚滚涌出来ê泉水hiah-ni̍h清洁，无法度hō͘伊污秽。想讲用手lā hō͘伊变浊，无一时á to̍h koh hō͘涌出来ê泉水澄清。瑞文hō͘ chit种涌出来ê力量kah大胆完全压倒，tiāⁿ-tiāⁿ chhoah teh等m̄知如何是好。瑞文是一个气派小气ê人，若讲伊想boeh做啥物tāi-chì，kan-ta ē-sái讲伊是天生ài梦想，而且身体虚弱，siuⁿ过强烈朴素ê性刺激，hō͘伊bē堪得。伊快乐lim酒lóng tio̍h thàu水，无法度承受侮辱、不安、痛苦参杂ê tāi-chì。
「你kah-ná鹿á leh，惊死死ê lám鹿á，随时hō͘ 豹kah熊食去，hō͘枪phah死，ná亲像探头探尾落来溪谷lim水ê花鹿。....Kan-ta关心别人ê tāi-chì, 老母án怎loh, 阿兄án怎loh....惊死无胆，真讨厌。....今暗我真欢喜，黄昏ê时并m̄是án-ne, he ê chìn前mā无án-ne, 今暗to̍h是án-ne, án-ne kám m̄好？Mài 烦恼kah面青sún-sún，像日头án-ne khah有元气leh，自早以来to̍h是日头kah月娘结成夫妻....」
阿阵对瑞文hit种半熟卵ê情热真无奈，因为她无法度了解文化人ê自我意识，想讲瑞文án-ne煮bē熟可能是病弱ê关系，美中不足伊m̄是Na-pa-la-mah英雄hit款ê壮男。
阿阵tiāⁿ-tiāⁿ讲「征伐日头」ê故事：古早古早，天顶有两个日头，日夜无停一直teh照地球，热kah会烫人，河水干去，草木lian去，人mā嘴干kah真艰苦。有一个聪敏koh有胆量ê青年叫做Na-ba-la-mah，已经五六点钟用弓箭射无鸟ah, 就远征去射chit-ê日头。Chit-ê Na-ba-la-mah出全身ê力，su-ut一下射出，瞄准无对，箭头soah深深射入去日头ê身躯，血流ná the落雨。因此，两个中间hit-ê被射落来ê日头ê死骸就án-ne随变成冷冷ê月娘。
阿阵沿路讲chit-ê神话，to̍h闪避伊bē-tàng kā日头流血滴滴ê绝顶光景完全表现出来，就无客气khiā起来，做出模仿Na-ba-la-mah giú弓ê动作。总是，tùi伊细汉to̍h死去ê老父所听tio̍h番á ê传说kah口头传述，有koh khah惊人ê故事。像讲「恋慕鹿á ê cha-bó͘ gín-á」、「鲛鱼有利齿」....「cha-bó͘人ê故事」、「蛇性ê淫乱故事」....等等。M̄-koh，阿阵kan-taⁿ kā chiah-ê传说当做笑话kah低俗ê闺房， tī嘴里无讲出来。有tang时á 感觉好笑，会家己讲讲来笑笑leh，ná亲像gín-á对不可思议ê传说，koh惊koh ài听，hō͘ 面增加光彩而已。起初，阿阵ê chit种行踏，tī瑞文ê眼内有讨厌kah见笑ê感觉，m̄-koh，小khóa惯势了后，to̍h无感觉gāi-gio̍h，soah变成kah-ná gín-á天真无邪koh自由ê清气感觉。
总是，hit-ê阿阵mā年久月深了后，渐渐有改变。
台湾ê眠床大部分有安装镜，阿阵ê眠床mā tī头顶安装一面镜，镜面显出她ê面容，嘴phé发光，热情ê目神光iàⁿ-iàⁿ。Tú开始她家己无注意tio̍h，镜是镜，kan-taⁿ显出家己ê面容。总是，无jōa久了后，她开始渐渐注意tio̍h hit面镜。镜内面m̄-nā有家己，mā有瑞文ê影像；无久koh有春鸾kah gín-á，koh感觉会显出陈家全体ê影像。
阿阵就án-ne开始意识tio̍h家己所看tio̍h ê物件中间，kah以前有参杂变化。He是旧年一个热天ê炎热暗暝，瑞文beh招她去看戏来到她ê房间，阿阵tú tī屏风前拭身躯，两人想beh tī屏风隔开来交换三言两语ê时，in kiáⁿ阿明无出声入来房间。
「Haⁿh, 阿爸有tāi-chì oh？」
老父真困扰，随时tùi屏风出来。阿明穿落霜ê时穿ê洋服，kah-ná铜像khiā tī门口，身躯勉强khiā在，目神有koh样。因为是tī老父ê情妇ê房间，想讲一定有cha-bó͘人tī-.teh，假做kah-ná无看tio̍h，目睭巡视房间ê四箍围。
「Oeh, 阿明，你为甚么来chia？明年to̍h beh读高中ā，无认真读册bē-sái得oh。」
瑞文真无奈teh隐藏家己ê失错，强强用做老父ê威严，beh kā阿明赶出房间。M̄-koh，阿明无振动，大人ê虚假势面kah困境ê弱点等等，hō͘ 纯洁koh真实kah-ná尖锥ê少年人ê目睭看破。瑞文想讲kah gín-á先做伙离开房间是siōng巧ê办法，佳哉阿阵bih tī眠床前ê手工真幼ê屏风后面，人看bē-tio̍h。Tú-tio̍h chit款pháiⁿ剃头ê情景，就án-ne bih tī hia，hō͘ 人看做无tī房间内。想讲连无法度分别数量ê阿阵mā会运用hit-ê智慧，m̄-koh阿阵忽然tùi屏风ê顶面露面，kah-ná teh唱情歌讲：「Mài讲可怜ê话，请chhōa伊做伙来去看戏」，lóng无管人ê感受án怎。 M̄-nā án-ne, 她露出原形，tùi屏风ê后面出现，讲：「紧准备，阮等你。阿明mā ài看戏，kám m̄是？今暗ê戏出叫做....，诸葛亮ê勇敢故事。」
阿阵一直微微á笑，面紧向镜，穿起水色ê对领ê衫。Kah-ná慢sô-sô koh bē晓分别，父kiáⁿ同时感觉受tio̍h侮辱，面对hit-ê非常无关心ê背影，kah-ná teh睨仇敌hit种敌意来看。
阿阵简单穿插了后to̍h直直两三步来到伊ê面前，m̄-koh两人互相交换无平常ê目神，无意中脚步停落来。尤其是阿明ê面kah-ná强风饱帆膨tu-tu，目睭因为见笑kah受气，火to̍h起来。
「你tńg去，kā我出去！」
阿明án-ne大声hoah。因为非常突然，阿阵bē-tàng了解发生啥物tāi-chì。总是，chit-ê gín-á一定是有甚么原因beh对家己做出hiah-ni̍h剧烈ê挑战。三人ê胸坎随时引起莫名其妙ê压迫感，到底是甚么tāi-chì kah理由，斗争ê感觉临到肉体ê时，天真发出理性kah宽容ê本性，突然出现tī阿阵ê严肃ê目神中。Án-ne bē-sái得，瑞文有危险ê直觉，beh入去内面ê时，koh khah bái ê tāi-chì发生，阿明tùi洋服ê袋á the̍h-chhut发光ê物件。
「Tńg去lín田庄！Tùi阮tau出去！若m̄出去，我to̍h beh用这kā你刺杀！」
阿阵跳退后，掠tiâu桌á角。动物若是tú-tio̍h受危害ê时，非常恐怖kah受气—防御kah回避，koh khah bái ê场合tio̍h随时ē-tàng猛然挑战ê敏捷，kui身躯充满hit种感觉。
阿明khiā在在，kā小刀gia̍h tiâu teh。Chit-ê少年人左思右想想bē开，m̄知如何进退khiā teh。M̄-koh，对手án怎讲mā是gín-á，kā伊温柔安抚绝对m̄是困难ê tāi-chì。总是，阿阵m̄知chit-ê简单ê tāi-chì。
「想beh刣我，你chit-ê畜牲，我kám有做啥物pháiⁿ tāi-chì？」
「Kám无做pháiⁿ tāi-chì？Hō͘我ê老母无幸福，hō͘ 阮hiah-ni̍h艰苦....。戆大呆，pháiⁿ番á，紧tńg去山里！Tńg去！若m̄ tńg去....」
阿明目屎kâm teh，chit-má kui身躯lóng beh哮出来。....人lóng teh讲老父是不修边幅ê阿舍kiáⁿ，老母是无自尊心ê薄命人。阿明无beh án-ne想，无论如何，伊无beh án-ne相信。因此，chit-ê加出来ê cha-bó͘人若存在，to̍h无法度辩解。Lóng是chit-ê cha-bó͘人ê缘故，chit-ê垃圾鬼ê lo̍k-kô͘-moâi-á土若汲出去，家己ê家庭to̍h会清气liu-liu，阿明一直án-ne teh想。为tio̍h老父，为tio̍h老母，mā为tio̍h in chiah-ê gín-á，无kā chit-ê cha-bó͘人tùi厝里赶出去bē-sái。家己chit种热phut-phut ê心情，想讲一定会hō͘ 对方心动，án-ne ê英雄情绪kah若bē通to̍h beh kā她刣死ê想法，kah强暴ê情绪kap做伙，少年人未完成ê肉体充满兴奋。Kui腹肚lóng是强烈ê责备kah怀恨ê言语，kah-ná厚云聚集做伙，随时液化变成哀伤ê哭声，kui身躯ê力量脆弱分裂，脚手kah嘴唇软siô-siô kah phi̍h-phi̍h chhoah。就án-ne，gia̍h起小刀koh再逼óa去ê时，动物的快速ê手当然一下to̍h hō͘阿阵压落去。
阿明kah-ná水坝崩去哮出来，受掠tiâu ê手骨kah-ná鱼á teh跳，阿阵扭转伊ê手，就án-ne phah放hē teh，gín-á ê颔颈to̍h bē振bē动。
「Chhòng啥hoàiⁿ？Ba-ka-iá-ló͘! 马鹿野郎！」
瑞文kah两个相phah ê人仝款兴奋chông óa去，对阿阵ê嘴phé连续搧五六下。
阿阵惊kah gāng去就放手，气势受折，无koh抵抗，变kah乖乖乖。
瑞文án-ne处理，m̄是临机应变，kan-taⁿ想beh防止危险，只不过是兴奋起来ê行为。总是，tùi结果来讲，感觉he是一种ê灵机应变，kah-ná马戏团中，对付原始的狂暴性动物，驯兽者挥动鞭索大声hoah-hiu，tī人类ê睿智面前hō͘ 野兽顺服。
Chit-ê tāi-chì发生了后，tī日头光照射阿阵ê心野内面，忧郁ê黄昏荫影罩落来。
Hit暗，阿阵仆tī眠床the哭，以前m̄-bat kah-ná kā纸湿澹án-ne kā她ê神魂湿澹。小麦色ê嘴phé生出红斑，hō͘ 瑞文ê手掌phah ê痛疼虽然真疼，并无án-ne ê感受，无受气，mā无感觉可惜，至少kah她以前ê经验过ê悲哀无仝。
「Kám是家己有做m̄-tio̍h？」
「是lah，你teh做pháiⁿ tāi-chì。」
「为甚么？」
「Kám m̄是án-ne？你kám有án-ne teh想？」
M̄知tùi tó位传来chiah-ê悲歌，从到taⁿ m̄知mā m̄-bat经验过ê新奇悲歌，因此，阿阵本身mā暗中tòe teh和chit-ê悲歌来唱。仆tī眠床teh哭，目睭ǹg挂tī枕头顶面ê镜teh看。镜内反映出怀念ê广阔野原，对面有紫色ê山尖kah延续不断充满活命ê树林。总是，hiah-ê lóng是以前ê感受，kah chit-má有无仝ê情趣。不管tang时、tùi tó位来，lóng bē-tàng进入pêng-an ê心境，杂错kah bē-tàng kah以前仝款ê情景，目睭无法度清气，四界lóng是「禁止进入」、「禁止捕捉小鸟」、「禁止折断树枝」ê khiā牌。
Chit丛是pháiⁿ树，hit丛是好树。—罪ê意识kah深入地下暗中teh流ê活命ê根明显露出，失去水气，已经bak-tio̍h干燥ê lah-sap土。
阿阵就án-ne绝灭去。
「今暗非常寂寞，真想ài有gín-á。春鸾，请你m̄-thang kā我放sak！」
「Mài讲hiah-ê五四三，真奇怪，无sêng阿阵ê款....」
「你ná会对我hiah-ni̍h亲切？我bē了解。」
「因为我ài阿阵。」
「Ná会án-ne....。你kám是teh滚sńg笑？旧年ê热天，阿明剧烈对抗我ê时，讲是因为伊ê老母无幸福....。」
「Gín-á m̄-bat tāi-chì lah，我并无无幸福。你看，自从你来到阮tau，瑞文颠倒变khah温柔，mā比以前khah tiâu-ti̍t，lóng对我讲真实话。....我有一屑á疼to̍h好，无ài虚假ê疼。
「受tio̍h真chē疼siōng好，我感觉非常对不起春鸾，真pháiⁿ势。」
「一屑á pháiⁿ势to̍h无。....你ná会变kah hiah-ni̍h kiu-kiu，咱kám m̄是已经成做互相坦白ê好朋友ā？」
阿阵teh看挂tī壁顶ê Mong-bu-láng（Montblanc, 欧洲Alps/阿尔卑斯山ê siōng高峰）图片，感觉chit-má to̍h想beh逃走出去hit-ê所在。
「你kám iáu想behtng2去田庄？」
「Ē-tàng当然siōng好，m̄-koh，chit-má已经bē-tàng。」
「是ah，chit-má koh khah bē-tàng，无法度ā lah。」
春鸾老实kā她否定，因为想讲阿阵无tī chia mā无带来啥物差别。玉帘讲她愚蠢kah无自尊心来看她bē起，安子骂她旧头脑，m̄-koh，春鸾无讲kah半句话。M̄是讲无beh讲啥物，家己想beh有结构正确ê巧想法。像家己chit种容貌无起色koh无才情ê cha-bó͘人，bē-sái独占cha-po͘人，宁可kā he想做是僭权。一般cha-po͘人绝对bē满足一个cha-bó͘人，lóng是尽量忍受tiâu teh，chit项tāi-chì tī世间中lóng仝款。春鸾想讲：违背chit种世间ê风俗kah人类ê本性无啥路用。因此，龙当做细姨入门ê时，玉帘痛苦kah乱chhau-chhau koh烦恼。若是我，kā第二夫人入门当做好事来看待，春鸾证实chit-ê美事。He mā是极其自然ê感受，m̄是特别ê努力á是虚假ê表现。丈夫娶入来ê情妇若是pháiⁿ cha-bó͘，完全无合家己ê意to̍h另外一回事，若m̄是án-ne，就ē-tàng充分和好。阿阵无智识，ta̍k项礼仪lóng m̄知，以大bó͘ ê优越身分来ûn-ûn-á kā她教导，春鸾有满足感。另外一方面，春鸾感觉chit-ê cha-bó͘ gín-á有chit种奇妙ê新鲜活力，ē-tàng hō͘ 家己萎缩ê弱小心灵加添新ê活命。两人tī无意识中互相添补空虚ê部分，就án-ne建立两人中间ê奇妙亲密关系。
「阿阵已经成做家内bē-tàng缺席ê人物，tio̍h觉悟chit点chiah是。」
「会án怎leh，瑞文可能会无ài我。」
「乌白讲，无论如何lóng需要你。瑞文chit-ê人是ài滚sńg笑koh心软ê人，因此，我家己tio̍h坚强....。」
「虽然是án-ne，瑞文最近对我lóng无teh关心，已经对我厌倦，讨厌我。」
「无hit-ê tāi-chì，因为伊ê身躯无tú好。」
「M̄知甚么原因，kám自早to̍h án-ne？」
「自我嫁来to̍h m̄是真勇健，m̄-koh无像chit-má hiah bái，hit时伊有真奇怪ê嗽....」
「Kám是肺病？」
「M̄是，医生讲可能是hō͘ 蛇咬tio̍h soah引起身体ê故障。总是，假使肺pháiⁿ去....」
瑞文tī曾文溪河边hō͘ 毒蛇咬tio̍h，hit时阿阵应急处理，孔嘴用镰刀割伤，koh用嘴吸收毒液。伊虽然救tio̍h一命，以后身体就渐渐变bái，关节tiāⁿ-tiāⁿ会痛疼，寒天容易感冒，koh无hiah简单好，像流行感冒án-ne发高烧，失去食欲，所有ê关节lóng kah-ná神经痛。有时chūn因为黄疸症，清清ê目睭变kah黄浊黄浊。有时mā会引起腰子炎，súi-súi ê面浮肿起来。医生讲这是毒蛇咬tio̍h ê后遗症。
春鸾kah阿阵当the谈论烦恼瑞文ê健康ê时，伊行入内房间。
无笑意ê视线投向in两人了后，瑞文停tī入口ê所在点薰，然后行去到桌á边，伊无随时坐落来，双手挂tī空椅á ê靠背，khiā tiàm hia。双目teh看两位夫人，伊ê面色比以往koh khah苍白。
「Ah, phah麻雀已经soah à，今暝有khah早结束neh。」
因为in翁有受气ê款，春鸾小心án-ne讲。面对án-ne，瑞文想beh讲啥，吐出ê薰烟chhèng入去目睭，半pêng面kah-ná颜面神经痛án-ne kiù筋。
「Koh输ā ho͘ⁿh。」
阿阵用轻浮ê口气án-ne嘲笑讲。春鸾捏一把汗续teh讲：
「输赢ê tāi-chì无thang讲，若是输to̍h真可惜。」
「Chit-ê家kám thang放hō͘它败落去？hit-ê麻雀有啥物趣味leh？每暗每暗，面色苍白，讲话沉重....
「面色真正真bái，你kám身躯有tó位无tú好？暗时深更ê薰草有毒。」
「免为我ê tāi-chì烦恼lah，无hiah严重....」
针对in bó͘真正为伊ê身体teh操烦，瑞文却用恶毒koh无情ê话回答。
「M̄-thang放hòng-hòng，siōng无mā tio̍h斟酌阿明ê tāi-chì，koh无久to̍h beh中学ê入学考试ā。」
瑞文对chit种严格ê责备真愤慨，chit-má全部对in bó͘ 拚出来。 「我phah麻雀半暝tńg来，he是男子汉ê形象，无法度。照顾gín-á kám m̄是做老母ê义务？你差不多lóng注意hiah-ê芝麻小事，真伤脑筋neh。你bē放心，我就听你ê话，今暗无beh去phah麻雀。请你体谅做翁婿ê心情，hō͘ 我有体面，mài kah-ná the赶人客，做一个有才情koh有智慧ê cha-bó͘人。」
瑞文kā家己ê tāi-chì暂时放hē-teh，kā in bó͘ chha̍p-chha̍p念责备。春鸾头lê-lê，无回半句话，想讲家己mā有真chē缺点，m̄-koh，án-ne teh责备ê瑞文无koh再hiah-ni̍h无检点。伊对chit-ê tāi-chì真清楚，为tio̍h准备考试tī隔壁房间teh读册ê长男，hí-lí-hôa-lah teh chhit-thô ê老父，kám有责备in bó͘ ê权利？针对充分了解家己理屈koh bē-tàng吐出苦衷ê翁婿ê感受ê可怜事(tāi)，春鸾tāi-seng khiā起来。
「春鸾无做pháiⁿ tāi-chì，是因为我无理kā她关tiàm厝内....」 阿阵想beh替春鸾án-ne辩护讲。
「Kā我恬去！你m̄-bat tāi-chì。」
瑞文用冷酷koh严格ê话气kā阿阵压落去，然后kā剧烈ê视线对阿阵ê面睨一下，随时koh oat tńg来向春鸾chit pêng，无koh再想beh向阿阵hit pêng看去。平常时剧烈反抗ê阿阵，chit-má kah春鸾仝款，无koh再反抗，视线落tī桌á顶面。....Tāi-chì是夫妇kah亲子ê问题。
阿阵tú-tio̍h「禁止进入」ê khiā牌，惊一下soah gāng去。 三人一时恬静落来，天井ê仙尪á叫两三声。若是kan-taⁿ春鸾tī chia iáu ē-sái，连平常时活跳跳ê阿阵mā无话koh无抵抗，瑞文忍受bē-tiâu。横霸ê主人iáu讲会过，m̄-koh，实在是笑诙ê悲哀cha-po͘人，沉默ê时间比较的khah bē-tàng忍受。
「Oeh, ná会m̄讲话？」
匆匆pōng-pōng想tio̍h án-ne讲，mā koh嗽出来。弯身koh用手掩嘴，东倒西歪phiân去椅á坐落来。春鸾走óa去，kā伊ê 尻脊骿loah-loah leh，无koh嗽à，就用手摸伊ê头额。
「Ah，你有发烧。」
阿阵óa来边á，想beh为瑞文做甚么，家己m̄知tio̍h án-ne做chiah好，节拍笨chhiâng，想beh kā手伸去摸伊ê尻脊骿ê时，
「好à，án-ne好à。」
春鸾硬kā她阻挡，kah-ná摸tio̍h会有有大tāi-chì。然后就讲： 「真艰苦ho͘ⁿh，紧入去房间内ê眠床歇困。」
讲soah就kā无力peh起来ê翁婿扶入去房间。
阿阵掠两人出去ê门ê方向一直看，一时失神soah gāng去。总是，出tī hit种空虚ê感受，忽然焰火to̍h起来，随时jiok óa去，阿阵想beh kā两人giú开。M̄是án-ne nā-tiāⁿ，koh khah可怕ê tāi-chì是，瞬间想beh kā春鸾刣死，阿阵从来m̄-bat像chit-má án-ne hiah恨春鸾。M̄-koh，to̍h起来ê火柱随时变弱，tī砂地变成死灰沉落去。然后，kah-ná tī砂顶面hông phah hoa去所chhun落来ê柴片，kan-taⁿ是受弃sak tī hia无味无素ê家己形影。
春鸾并无啥物意识来án-ne做，只是考虑翁婿ê身体，是以一个大bó͘ ê绝对权利kah自由来做。总是，阿阵tio̍h清楚家己ê地位kah角色，她ê感受kah-ná是奴隶hit款ê悲惨kah pháiⁿ看。
她kah-ná有啥物重要ê物件脱离肉体后ê无依óa，tī房间内颠来颠去。无一时á，她gia̍h起吊tī眠床头ê空气枪，一个人开嘴大声hoah，寂寞大笑，向壁顶ê挂像piàng一下发射出去。
