《《陈夫人》日译台e5台湾小说 第二部》

 | | | 转寄

《陈夫人》第二部 亲子 第五章

作者 庄司总一　着 杨东杰 指导 林俊育 台译 2016.12.04

第五章
Hit年ê三月中旬，安子接tio̍h老父中风跋倒ê通知，就chhōa清子匆匆pōng-pōng出发tńg去日本。

自从嫁来台湾，回乡chit pái是第二pái。第一pái是tī陈家ê大家长阿山往生第二年ê热天，她踏tio̍h离别十二年ê故乡土地。Hit时，清子已经teh读小学，所以是利用cha-bó͘-kiáⁿ ê暑假歇困ê时去。她去过日本一pái，chit pái m̄是专工chhōa她去认bat日本。虽然已经是学期尾，到春假iáu有二礼拜久，因此，对老母来讲并m̄是thang欢喜ê tāi-chì。所以，清文对cha-bó͘-kiáⁿ讲：「你一pái去会无啥物趣味，留落来kah阿爸做伙khah好。」

M̄-koh，清子讲：「虽然是án-ne，前pái去是热天，kah台湾仝款hiah-ni̍h热，真无聊。Chit-má是落雪ê时chūn，thang回乡看落雪。」清子一定beh kah老母去日本，nga̍uh-nga̍uh念m̄听话。

因为án-ne，kā老父无ài她做伙来ê cha-bó͘-kiáⁿ勉强chhóa来，安子顾虑tio̍h翁婿，就想讲tio̍h尽量早tńg来台湾。

安子选择老父反对ê婚姻，koh是嫁来遥远ê所在。为tio̍h一屑á有孝to̍h无ê报赏，起码mā tio̍h两工á是三工来亲近老父，安子抱tio̍h一丝á ê ǹg望赶tńg来，m̄-koh是中风，soah无法度达到她chit-ê ǹg望。Tńg到厝ê时，老父五十岚惣右卫门已经死五工ā。因为án-ne，做头七了后，帮忙处理后事，kā亲族一一拜候，to̍h想beh赶紧回台。Mā m̄知什么原因，真紧to̍h过了十工二十工。有人讲起既然tùi遥远ê台湾tńg来，想beh阻挡她回台，安子一开始to̍h警戒永远tòa落来。总是，cha-bó͘-kiáⁿ清子真意爱田庄，无hiah容易想beh回台。安子家己mā真少有机会踏tio̍h故乡ê土，回台ê日子就án-ne一日一日延落去。

Tī日本停留ê期间，翁婿清文有来几张phoe，m̄-nā单纯埋怨她长尻仓，ta̍k张phoe lóng是约十张便纸条ê长phoe，参杂报告她无tī-.teh中间陈家所发生想bē到ê tāi-chì，讲kóa家己ê心情，mā有讲出对将来ê计划kah理想。

第一张phoe
令尊蒙主恩召，昨昏我去电吊念，chit-má用phoe信tùi心底来致反悔之意。 你iáu是bē赴临终见面，我相信你一定感觉真可惜。中风若m̄是致命ê病，koh再我若m̄是无闲行bē开脚手，我mā当然tio̍h行一chōa。Tī惣右卫门先生往生chìn前，我无论如何to̍h想beh见伊一面。回想过去，记忆犹新，lín老父hiah-ni̍h反对咱ê结婚，我koh khah想beh kah伊koh见一pái面，来kah伊亲切讲话。我虽然怨恨轻视hit-ê无知koh拗蛮ê田庄亲人，he已经是过去ê tāi-chì，chit-má当然感觉真对不起。人已经往生ā，m̄是想讲án-ne讲讲leh to̍h soah-soah去ê无责任，mā绝对m̄是kan-taⁿⁿ对死ê感伤。「你想beh，这bē-sái得，bē-sái得，若是台湾人....」Lín老父án-ne狂话，用薰吹头敲花鲈ê边缘，bē振bē动ê顽强形像，chit-má iáu tī眼内显显kám m̄是？Kan-taⁿⁿ因为是台湾人....到chit种地步，我当时iáu少年，对hit种bē-tàng达成高价热情ê无合理，非常愤慨，我想he是令尊反对ê唯一理由。总是，准讲我是日本人，完全m̄-bat见面无相bat ê别国人，伊mā bē欢喜。令尊应该是希望你kah祖先代代做伙生活ê在地人结婚，为tio̍h hit-ê土地经营生活。无受tio̍h近代资本主义污染ê纯粹农民气质，朴素爱土地ê顽固灵魂，kah-ná乔木深深钉根tī土地。Phah破chit种坚固ê地壳，个人主义ê自由puh芽出来ê时，当然会引起摩擦kah争执。Án-ne讲起来，咱当时结婚chit件事，m̄是kan-taⁿⁿ是偏见，koh khah是结连siōng基本的ê思想的ê差异，这结局kám mā是诡辩？我m̄是用「食bē-tio̍h葡萄讲葡萄酸」kah诡辩teh对你讲chiah-ê tāi-chì，谅必你会充分了解chiah tio̍h。

你chit-má ê感受án怎？令尊享年七十岁ē-sái讲是天寿，你chit-má kah故乡ê缘份mā jú来jú薄。我bē-sái家己推论讲：你大概是因为距离kah时间ê关系，致使你不幸ê现实感变薄。Mài koh悲伤，投入怀念久久ê故乡怀抱，我想像你会轻轻松松过日，有甜koh恬静ê心情。清子ê情况án怎？台湾ê学生来到日本第一pái看tio̍h雪，非常珍惜，就kā雪用邮便小包寄去烧热ê本国，听讲有chit种真kah kah-ná是假ê传说。Tī清子ê小小心内，mā应该有纷纷落雪kah白siak-siak ê雪景ê惊喜chiah tio̍h。总是，chit-ê热带产ê小鸟，tī惊人ê风雪kah极冷ê天气之下，一定会寒kah sih-sih颤kám m̄是？Chit-ē gín-á tī出发ê时，当地台南已经是春天—mā是kah-ná热天ê春天已经来到....。檨á树受季节风一吹，白花四散；木棉树ê粉红色奇怪ê花，tī透明ê空气中吐出有毒ê气（khùi）....。

清子ê年龄已经有距离ê观念，我想她对气候kah水土ê变化iáu真困扰，若m̄是án-ne to̍h真幸运。总是，tio̍h请注意m̄-thang感冒。

第二张phoe
今á日报告你无tī-teh ê时所发生ê大tāi-chì。
阿阵失踪ê tāi-chì，三日前ê早起to̍h失踪，到taⁿ lóng无看tio̍h人影。厝内ê人teh传话，有人讲会忽然koh tńg来，有人讲bē koh tńg来。好佳哉，瑞文笑笑á sī。我讲：「准备搜查，你看án怎？因为大概知影离开ê方向。」瑞文讲：「搜查无路用lah，我一直想讲chit-ê tāi-chì一定会发生，实际上我mā有心理准备，离开颠倒心情khah轻松。」虽然是án-ne讲，伊iáu是显出寂寞ê苦笑。 伊前to̍h bat对我讲，hit-ê cha-bó͘人对健康无gōa好ê伊来讲，实在是一个重担，对方要求beh离开，ē-sái算是幸运。老母以下厝里ê人mā感觉hit-ê看bē顺眼ê人无去有khah好，独独in bó͘春鸾teh怨叹hit-ê逃亡，实在是一个奇怪ê cha-bó͘人。大bó͘ kah细姨成做好朋友，世间有真chē例，m̄-koh，亲像春鸾kah阿阵ê款式无chē。是愚蠢á是贤慧，无亲像春鸾hit款ê妥协性。Tùi根源来讲，因为确实是因为疼翁婿来妥协，无比情妇无tī-.teh koh khah欢喜ê tāi-chì。

M̄是kan-taⁿⁿ我一个人án-ne想。不而过，大昨日春鸾来我chia，真正悲伤koh怨叹，目屎流目屎滴讲，tio̍h kā阿阵chhōe tńg来，án-ne hō͘ 她逃走去，家己真对不住。因为她有够愚蠢，阮两人讲话bē对tâng，她就匀匀á讲出她ê苦情，我实在mā有受气，就严格表示意见讲：「Lín翁已经笑笑á处理，你chit种笑死人ê做法对lín翁来讲，是增加见笑而已。M̄-thang hiah-ni̍h-á意气用事....」 春鸾án-ne真实告白她ná会拒绝chit-ê事件，原来如此，我chiah了解真相。 实情是án-ne：五日前ê一个事件—有实际伤害ê事件—tī厝里发生。Tī景文所在ê美圆，阿阵射出空气枪ê枪籽phah-tio̍h hit-êcha-bó͘ gín-á ê正蕊目chiu。

Hit工，我出外tńg来，厝内绞起真大ê骚动，问了chiah知是án-ne：美圆tī厝后ê竹林teh拾集白鴒鸶lak落来ê翼，hit箍阿阵m̄知她tī hia，teh射tùi竹á顶面飞落来ê斑鸽，soah射tio̍h美圆。因为hit时春鸾tú好tī hia，她mā有无阻止射枪ê责任，koh khah害ê是，阿阵根本to̍h无beh听话。总共来讲，因为厝里两三个gín-á有空气枪，我bat警告：厝内使用空气枪真危险，绝对tio̍h禁止。不而过，chit pái ê事件实在真遗憾。这虽然是gín-á ê过错，应该是大人ê职责，当然引起厝里ê人大愤慨。

我chông去到厝后ê时，可怜ê美圆已经送去病院。Kui厝ê人对加害者阿阵用残酷ê目神kā她看，cha-bó͘人kā她chhoh骂，cha-po͘人kā她手phah脚踢，kah-ná teh kā她刣kah半死。无论如何，过失已经发生，我若无阻止in ê暴力，阿阵可能会死去。春鸾面色青sún-sún，一再讲：「M̄-thang责备阿阵，因为是我无好。」问她tāi-chì mā lóng无效。

五日后，阿阵已经无行踪。照瑞文讲ê，既然犯了hiah严重ê过失，她当然bē堪得koh再tiàm tī陈家，每一个人lóng认为he是她忽然逃走ê理由。 总是，大昨日春鸾ê告白，加害者m̄是阿阵，是春鸾家己本身。有小khóa侦探小说ê味，m̄-koh，事实上有koh khah人性ê奥妙。

Hit工，厝内做翁婿ê lóng无出外，阿阵偷偷á入去厝后想beh引诱春鸾试射空气枪。她看tio̍h竹林内ê斑鸽，就叫春鸾射一下看māi。春鸾就án-ne想beh滚笑看māi，瞄准扣钣机。Cha-bó͘ gín-á kah叫声同时tùi竹林liàn出来。Tāi-chì大条ā，春鸾瞬间目chiu前一片乌暗。总是，tī身边ê阿阵突然kā空气枪抢（chhiúⁿ）过来，赶紧讲几nā pái：「是我射ê，我做ê。Án-ne讲chiah好，知无？」就kā gāng去ê春鸾放下teh，往竹林chông去。然后kā美圆抱起来，大声hoah讲：「是我射ê，做错hiah大ê tāi-chì，请原谅我。」teh哭ê hoah声，四箍围lóng听会tio̍h。

Chit种自我牺牲ê精神，你感觉án怎？我一直感觉真伟大。M̄-koh，了后 koh kā它想倒tńg来，有bē了解ê所在。忽然想beh替正妻担罪，tī众人面前哭teh hoah讲是她家己所做ê行为，超过hit-ê无智识ê cha-bó͘人ê本能，极其戏剧化。你kám会感觉chit-ê义侠的ê精神真súi？Siōng起初她kā hō͘ 蛇咬tio̍h ê瑞文ê手腕用镰á刀phut断，koh kā毒血suh起来ê一心一意ê纯情kah行为，chit两种事情ê中间有小khóa无仝—换句话讲，kám有意识的ê概念？我虽然是án-ne想，hit种行为并m̄是普通人容易做会到ê。

「实际过程是án-ne，家己对不起阿阵，ná会无tī众人面前讲明家己ê过失？就án-ne hō͘ 阿阵走去，不得已chiah来自责。」 春鸾án-ne讲。「Hit种感受暂且ē-tàng了解，独独讲tio̍h koh kā阿阵chhōe tńg来，到底会变成án怎leh？阿阵原来kan-taⁿⁿ值得你所kah意ê cha-bó͘人，她为tio̍h瑞文kah你ê幸福来离开陈家。若是án-ne解说，你故意kā tāi-chì蒸发出来kám有贤明？应该隐藏tī心内假做m̄知，kā tāi-chì就án-ne埋葬起来。Án-ne做m̄是为tio̍h你家己本身，是为tio̍h瑞文kah你 hiah-ê kiáⁿ儿。你叫我保守chit-ê秘密，m̄-thang泄漏hō͘ 其他ê人，连阮翁瑞文mā bē-sái对伊讲明。」 我án-ne对春鸾诚恳解明。本来应该保守故事主角kah我两人中间ê秘密，顺续tī chia泄漏hō͘ 你知，有khah失态。哈哈。

第三张phoe
事业ê计画准备有渐渐teh进行，今á日有去实地检查瑞文ê土地，伊kah我以及一个名叫游德仁ê高等农林学校出身ê青年，三个人做伙去。 你mā知，hit所在是tùi XX车头落车，坐手推车行一里半，然后koh行路二里。所在真偏僻，有考虑运搬作物无方便，m̄-koh，目前tùi台南通到山里ê XX制糖公司ê道路当teh进行，预定无久to̍h会通车，若是án-ne，hiah-ê田地to̍h会得利。Koh再讲，种凤梨（ông-lâi）tio̍h经过将近二年chiah ē-tàng收成，所以暂时kah运搬ê不便无啥物关系。

瑞文无啥ài kah阮做伙去ê款式，是我强迫chhōa伊来。你mā知，伊tī chit所在附近hō͘ 蛇咬tio̍h，因为chit-ê灾难，结局对伊来讲，无幸福类似离奇古怪ê生活tùi hia开始，chit-má阿阵koh逃走去à，chit所在to̍h是hit-ê cha-bó͘人出世ê所在。因为有án-ne ê地缘关系，m̄-koh，瑞文无ài做伙来ê原因，我看出伊对家己重要财产ê田园无关心，这chiah是可怕ê tāi-chì。大概有teh想像，m̄-koh到位一下看，chit-ê不在地主ê马虎，比想像ê koh khah惨淡。专家ê游德仁所讲ê免讲，连我这外行人ê目chiumā看会出：甘蔗园过度贫弱，田岸杂草生kah满四界。分（pun）财产ê时，有掠tio̍h景文做孔ê pháiⁿ tāi-chì，因为án-ne无欢喜ê先入为主感受，伊对家己ê土地无迷恋；á是因为这本来是官地ê放领地，有真chē罗嗦ê问题，á是因为困难放租等等ê辩解，总是，mā辩解讲无kah chiah-ê困难奋斗ê意志kah无气力。伊mā因为加入我ê事业来工作，kah以前无仝款ê新生活ê喜乐，无比这koh khah好ê tāi-chì。

田园有十公顷，想beh做农场kah果子园，抱tio̍h有啥物成果ê梦。梦是真欢喜，m̄-koh，实行无hiah容易。今á日来到chit-ê土地一看，有koh khah痛苦ê感觉。嘴干想behlim水，无古井，mā无泉水。农夫kah工人lim溪水kah lah-sap ê窟á水，伤寒kah赤痢不断是当然ê tāi-chì。无啥讲有hō͘ 毒蛇咬tio̍h，m̄-koh hō͘ ma-la-li-a蠓（báng）钉tio̍h是时常ê tāi-chì。Tio̍h设法kā chia建立一个安全ê健康地，hō͘ 阮kah工人lóng ē-tàng安心工作。

其实需要chit种安全ê设施，只不过是为tio̍h kā人类精神正确koh súi ê融合ê一个方法。这是起初to̍h需要考虑ê最后问题：资本家kah劳动者、持有者kah无持有ê人彼此之间，是m̄是hō͘伊得tio̍h光明，这是相当困难ê tāi-chì，tio̍h先实际落去做看māi chiah会知。我chit-má tī心内画一个大理想ê图，m̄是模仿西洋学者所画ê理想社会Hoa-lán-jiû/ファランジュ/ phalanx（译注：世界大百科事典 第2版 - ファランジュ ê用语解説：Tùi社会主义ê中间产生ê，フーリエ着《四运动ê理论》(1808)，建设共同社会ファランジュ，解放女性，圣•西门/サン･シモン/Saint-Simon主义者kā一対ê男女形式社会的个人ê设计图。）Hoa-lán-jiû是全民ê物件，虽然包含人类、社会、自然ê意志，kám是想beh行向前所未有ê pháiⁿ状态。事物不断teh更新，即使hit-ê感觉导向pháiⁿ ê方向，hit-ê意志有khah好ê状态，一定是beh期待khah koân ê状态。因此，lóng bē-sái有根本的ê pháiⁿ想法，á是无健康ê思想。总是我想，思想hit-ê物件ê结局是幽灵，mā是形影niā-niā。人类ê性命—连接行动ê性命实体投落来ê影。像王茂堂hiah-ê人批判chit-má ê我，讲我是tùi思想逃亡，果然kám是án-ne？若是án-ne mā bē bái，因为ē-tàng tùi家己行动ê大地puh出新ê思想ê芽。

我做一个台湾智识分子，一直teh思考，mā有teh烦恼，回顾过去，反省到底有做kóa啥物tāi-chì，kah-ná只不过是kan-taⁿⁿ口出怨言，白白要求物件。M̄是kan-taⁿⁿ我一个人，台湾人lóng siuⁿ过头追求幸福。Kan-taⁿⁿ追求幸福是人类堕落，若是台湾人知影人生ê根本m̄是幸福是义务，一定会生出koh khah美好koh高尚ê精神。台湾完全欠缺chit款物件，因为kan-taⁿⁿ急teh追求，咱tio̍h koh khah积极来考虑付出。

Án-ne讲起来，日本人ê你kah台湾人ê我结婚to̍h会有意义。Kan-taⁿⁿ互相有疼koh有理解，m̄是án-ne to̍h来达到互相无够十全十美ê年龄。未来咱ê结婚ê型态tio̍h ài考虑包含特别ê课题，你kah我lóng tio̍h随时做啥物事业ê心理准备。无想tio̍h讲是凤梨罐头业，显出一点á奇妙ê情况。形状虽然奇妙，内底koh是纯粹芳芳ê果肉kah果汁。因为景文退股，无beh共同出资，结果tio̍h我个人经营。我对事业无经验，koh有个人ê缺点，合合做伙来想，这确实m̄是简单ê tāi-chì，到chia来tio̍h需要你ê好助力kah勇气。

虽然是án-ne，chit-má iáu未需要对你强调á是要求。因为我知tī你ê心内已经有共同做事业ê热情kah坚定ê信念。