《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第三章
作者 庄司总一 着 杨东杰 指导 林俊育 台译 2016.11.06
教会ê祈祷会九点左右结束，安子应该比清文khah早tńg到厝，taⁿ已经过十点ah, iáu无看tio̍h安子ê影。
清文看十一岁ê独生女清子天真困面了后，就行入去隔壁ê食茶间，靠tiàm火炉边等十分钟了后，安子iáu未tńg来，hō͘伊真bē爽快，伊感觉真奇怪。cha-bó͘嫺为伊泡ê茶已经beh冷去ah, 清文一口气kā伊lim完，就行出去外口。
清文知影安子有时会ùi后门入来，行出玄关就往hit-ê方向行去。虽然伊已经过了急teh等待bó͘ tńg来ê年龄，m̄-koh颠倒感觉kah-ná涌起chit种年轻ê气氛，用出去迎接做藉口，mā是不止趣味ê tāi-chì。
藉tio̍h星光行入后院向后门行去，忽然听tio̍h toh位有人teh讲话ê声。清文脚步停落来注意听，伊听出是用日语讲kah有高有低ê声。若是用日语谈话，一定是安子无m̄ tio̍h，清文就行向莲花池hit pêng去，家己mā m̄知什么原因，neh脚尾恬恬á teh行。....几年前―当in夫妇两人对年轻并无注意ê少年时代，连个性内向koh无性感ê安子，tùi青春ê呼吸中间，透露出一屑á kah-ná瘴气ê气氛。对三男瑞文kah-ná白色蔷薇ê浅淡爱情―chit-má准讲有时á提起，清文总是讲he是「可惜ê爱情」(Pity is love)，虽然是笑笑á讲，却是沉重koh罗嗦ê感觉。但是，he bat是伸手去摸就kah-ná凿tio̍h刺会流血hit种新奇ê现实。Tio̍h lah, 清文想起to̍h是chit-ê池过去约二十公尺ê柚á树脚，in bó͘ kah瑞文当teh欢喜谈论啥物ê时，偶然去hō͘伊tn̄g-tio̍h....。
但是chit-má neh脚尾teh行，m̄是出tī hit种ê侥疑或是嫉妒。只是因为是暗时，无论什么人都无想beh踏破chit-ê暗静。
清文来到池ê头前约十二公尺ê一丛龙眼树脚就停落来，看见安子kah玉帘kah-ná亲姊妹，相倚坐tī长椅顶面。清文心内感觉奇怪，忍bē-tiâu就禁气来注意听。Chit-ê时chūn，chit-ê所在，清文想bē出两人到底teh讲什么tāi-chì。但是，ùi in细声讲话ê内容传来到大脑，随时判断明白。清文tú-tio̍h chit款ê场面，实在进退两难。但续落来koh传来讲话声，
「Ah, 玉帘姊，今暗ê tāi-chì就当做咱两人之间ê秘密，若hō͘厝里ê人知影to̍h会惹起麻烦。....Koh来索á iáu挂tī树á顶，明á载若hō͘人发见就费气，若无紧来去the̍h落来....」
清文听tio̍h安子kā玉帘讲chiah-ê话，比来ê时koh khah neh脚尾行tńg去。
愤怒变成肉体ê感觉，清文折回行ê脚步有小khóa phiân来phiân去。伊soah不知不觉小步行向正屋去。
清文发见chit-má ê赶紧脚步，kah-ná直往景文房间ê机械行为，无真妥当。第一，时间已经hiah暗ah, 而且chit-má ê心情见tio̍h景文，一定会引起暴力。暴力行为并bē hō͘内心满足，mā无法度解决问题，只不过留落来人ê软弱kah女性ê感伤。....虽然是án-ne, 伊激动ê心情bē-tàng像一口气to̍h pûn-hoa蜡烛火hiah简单来消失。
为tio̍h tháu气，清文自然koh行向siōng细汉小弟瑞文ê房间。因为事实上瑞文有参加chit-pái ê事业计画，今暗ê协议会议应该来参加chiah-tio̍h，m̄知什么原因无讲就缺席。瑞文是一个无lám无neh ê cha-po͘人，可能是无意义ê lán-si无来参加，但若有bē-tàng参加ê理由，为何无先讲一声？
清文行过中庭，来到óa近头前厝ê瑞文房间。厝内传出吵闹ê人声kah chhi-chhi-chha̍h-chha̍h ê声，伊随知是teh phah麻雀。 清文无khok门就开门入去，行向耍kah真热ê麻雀桌á。Kah-ná搅一阵风台，瑞文gōng-gia̍h khiā起来，续落来koh一个cha-po͘人khiā起来，另外两个人bē赴khiā起来，可能是厚面皮照常坐teh，手弄半中站停落来ê麻雀子á，giâ头看lòng入来ê人。
「阿兄，真失礼，有朋友来lah....」
瑞文差不多是透明苍白ê面，瞬间变kah红kòng-kòng，但无一时á koh回复苍白。
――所以我有kā lín讲今暗bē-sái，lín tio̍h为我辩护，若无to̍h惨loh。
瑞文ê目光ǹg朋友ê面án-ne哀求。
「Án怎，你mā来摸一lìn如何？」
坐teh ê一个想beh phah圆场来讨清文ê欢喜，露出奸笑ê面，tú-beh khiā起来ê时，清文已经忍受bē-tiâu，无讲半句话，狠狠伸出手臂，kā排tī桌顶ê麻雀子扫落去土脚。
「Tńg去lín-tau, beh poa̍h-kiáu去别位poa̍h。」 Chia属陈家ê一部分，但绝对m̄是清文家己ê房间，一般常识来讲，这是非常无礼貌ê行为，颠倒可能会受对方用竹篾á赶出去。但是清文闯入来kah-ná一阵风台，人客惊kah kiōng-beh破胆，chhìn-chhìn-chhái-chhái phah招呼就离开。
清文讨厌所有ê poa̍h-kiáu，对麻雀等bē理解也bē宽容。台湾自早有牌á之类，但无麻雀chit款物，这是最近几年ùi日本传入来，变成大流行。Ài tòe人流行新物ê瑞文也开始沉迷麻雀，m̄是tī家己ê厝内就去别所在poa̍h，poa̍h kah透暝m̄知soah。清文早to̍h感觉真痛心，但瑞文已经中年ah, 不便kā伊严格指责。
但是今暗清文无讲几句，kui腹肚ê气bē消。这m̄但kan-ta针对瑞文小弟个人懒散生活，最近常常感觉tio̍h陈家全家庭发生ê矛盾引起伊ê反弹，chit-ê机会致使清文心内反感。
陈家已经分家伙，财产也分配好势，家长阿山也过往ê现今，旧ê家庭――准讲尾溜留落来真chē矛盾kah混乱，大家庭ê底tì iáu有一脉相传teh流无失去，所以讲一个以前bē摇动ê有机体家族，现今已经无koh存在。Ná亲像激烈ê生活力kah生湠，无久就形成无法度活动ê蜂siū，就会各自选择新ê蜂王来分房。陈家实际上mā是已经达到chit-ê时机，但是人类ê行为比昆虫khah bē晓安排。Taⁿ各自财产ê继承分好势ah, 一家ê主宰者mā失去ah, 当然应该分厝各自独立khiā起chiah-tio̍h。但家长阿山丧期了后，in iáu是tòa原来大家族ê厝，每工ê生活kah以往，本质上看bē出有改变ê款式。清文几pái提出分厝各自khiā起ê意见，但老母阿娇kah年老长辈lóng无beh采纳。Chit-ê陈家ê大眮体已经无头，脚手mā 已经li-li-lak-lak，但厝里ê人iáu是抱tio̍h爱惜ê念头。In所顾虑ê是社会ê体面问题，因为汉民族ê「兄弟阋墙御外侮」思想，iáu流tī in ê血管内。因此产生全体家族ê利益为主，个人利益为次ê观念。若是beh ài维持chit-ê传统思想，tio̍h ài保持原本合一ê密切家族关系，若无就无意义。Chit-má各自随意独立行动ê孤立感觉，只不过是一阵khiā作伙，无法度像以前án-ne有意义ê协同体。景文kā大bó͘逼kah去吊tāu自杀，四界chhit-thô ê瑞文koh娶chit-ê平埔族ê cha-bó͘-gín-á入门。清文想beh合作创业，结果是今暗发生ê情形，to̍h是腐败kah混乱，也是新时代ê原因，旧皮囊装新时代ê酒就beh破去ah。但是kā伊想起来，tāi先装入去新酒ê，m̄是别人，to̍h是kah日本人结婚ê清文家己。因此其实chit-má清文ē-sái离开大家族，自由自在去过家己ê生活，却颠倒teh关心陈家全体ê秩序kah幸福，就是出tī家己phah破家族制度ê大家庭ê柱á ê责任感。而且，本底个人绝对自由意志kah强烈自我意识ê西欧精神，因为年龄ê增加变khah圆滑。清文感觉家己ê思想已经hō͘新潮流冲到远远ê所在，结局iáu是沉tī旧家世ê历史kah传统内底，ná亲像teh看伊放出迟钝ê光芒。
食过ê柑á kah弓蕉四散kah kui桌顶，土豆皮落kah kui土脚，电火光下面全是薰烟，清文看tio̍h chiah-ê就忧头结面对瑞文讲。
「麻雀kah工作toh一个khah重要？」
「真失礼，tú-beh出门ê时，chit阵pháiⁿ朋友溢óa来，我讲今暗有tāi-chì，却硬hō͘-in....」
瑞文án-ne辩解，忽然起嗽soah讲bē落去。因为嗽kah真艰苦，加上嗽koh讲bē出话ê双重痛苦，伊无真勇壮ê身体，kah-ná phāiⁿ重担tī路里摇来摇去。
「实在有khah过份，bē-tàng出席tio̍h讲一句。而且你无beh来是真无好，m̄-thang学景文ê款式，今暗hō͘我感觉非常见笑。Oeh,瑞文....」
Khiā tī chit-ê忽然ê严肃场面，清文khiú-tiâu小弟ê肩胛头，beh hō͘ chit-ê猴死gín-á痛。瑞文ê心肝kah-ná毛tī火里烧kah起khiû。
但是清文并无出重手，kah-ná鹫鸟khiú伊肩胛头ê手，忽然有无慈悲ê感觉，ē-sái讲是小弟体弱引起chit-ê感受，一股奇妙ê强力温暖传过来，忽然想讲tio̍h放低声调。
「瑞文，你mā小khóa khah giám硬leh，lín kiáⁿ已经teh读中学ah，做老父ê kám-ē-sái án-ne无lám无ne teh过日子。我hō͘你参加chit-ê事业，以前kā你讲过，并m̄是kan-ta hō͘你thàn钱，是beh ài你真正用心做tāi-chì，所以hō͘你一份事业做，就是ǹg望你今后ē-tàng过一个振作ê生活。你tī田庄ê土地ê tāi-chì mā是án-ne，我kā你租来开垦农园，比放hō͘伊继续收成bái ê甘蔗园khah好，若是hiah单纯ê考虑，我会断然拒绝你ê加入。」
「实在真无应该，我并m̄是有心无考虑阿兄ê事业。....今暗我真糊涂，我知phah麻雀poa̍h-kiáu并m̄是好事，一遍koh一遍想beh改，朋友koh一招，便无法度拒绝。....我thài会hiah-ni̍h软弱leh！」
「以你ê年岁来讲，你bē kā家己ê软弱用感伤ê心情来想chiah-tio̍h。你应该koh khah认真phah拚，去得tio̍h生活ê意志kah力量chiah好。你无需要像景文hiah-ni̍h贪心thàn钱....但每pái看tio̍h明chit-ê gín-á，心内lóng会感觉m̄甘。」
清文teh无头无脑责备瑞文ê时，忽然真无自然放低声音，因为伊看tio̍h明ùi隔壁房间门篱探头出来看。家己ê老父hō͘人严格指责，对gín-á来讲真bē堪得，而且明是一个乖巧敏感ê gín-á。所以清文有顾虑chit点。....Koh再讲chit-ê 无tāi-chì ê长男，为tio̍h准备中学ê入学考试，hiah òaⁿ iáu teh读册，听tio̍h隔壁teh大细声就出来探头，做老父ê可怜相，清文就压制受气，就起gōng-gia̍h。
清文无欢喜行出瑞文ê房间来到中庭ê所在，无意中去tú-tio̍h ùi横接巷路出来ê景文。
郁卒ê时chūn去tú-tio̍h讨厌ê人，清文ê愤怒其实是针对景文，到taⁿ已经够额ah，火气有khah消。清文避开景文beh行离开，但m̄知什么原因，景文soah tòe伊jiok来。
「我去阿兄你ê khiā家，cha-bó͘嫺讲你tńg来koh出去，我自tú-chiah就一直teh chhōe你。」
伊ê话真奇怪，今暗会议伊想beh退股ê tāi-chì，不管伊gōa gâu讲话都无法度解说。所以照常里来讲，伊对阿兄敬而远之来逃避，清文是ē-tàng了解。想bē到伊会倒tńg来chhōe阿兄，可见伊是jōa-ni̍h厚面皮ê人，清文真无简单镇静落来ê激动又koh起磅。M̄-koh chit-chūn伊无beh koh讲起无欢喜ê tāi-chì，清文无chhap景文就离开，但m̄知什么原因，景文iáu是tòe-teh jiok过来。
「小等一下，今暗ê tāi-chì，阿兄误会我loh，我无hit-ê意思。王肇基hit kho͘乌白讲kah hiah无理，其实我ê本意m̄是针对你，我ê心情是....」
「讲啥物？」
清文脚步停落来，身躯转向景文。
「你ê本意是啥物？ē-tàng辩解就讲。」
清文用轻视ê口气讲，逼近小弟。
伊堂堂ê汉草kah-ná ē-tàng掩盖小粒籽ê小弟，但是景文退后一步，无像无胆ê瑞文án-ne倒kiu，暗时看起来白牙齿露出笑容。景文一向态度圆滑，一旦若beh坚持家己ê主张，就会用kah-ná kah布帘at手pâ ê方法。总讲一句，以今暗ê情形来讲，普通ê作法就是ngh-ngh-eh-eh露出卑怯ê笑容，头壳抓抓leh弯腰，显出一副无奈惊惶ê款式。但是今暗，伊he矮矮ê身躯准备beh接受一切ê打击，讲伊厚面皮，其实hō͘人感觉伊对家己ê话有beh坚持到底ê态度。
「今暗hō͘你无面子，真失礼。但是，我m̄是一个无人情味ê戆人。我故意采取hit种态度，其实完全为阿兄设想，我想beh kah你好好á谈一下，来我厝坐一下kám好？」
「已经够气ah, 我真知你腹肚内teh想啥，我无ài听家己无信任ê人讲话。」
「Mài讲kah siuⁿ过份，你无明白我是jōa-ni̍h á为你设想。来我厝坐一下，á是来lín-tau mā好....」
景文tòm头kā伊哀求，伊chit种平常m̄-bat有ê充满真实ê坚决哀求态度，清文感觉真不可思议，紧张ê火药味心情轻松落来，m̄-koh想讲kám会去hō͘伊骗去，心情koh再激烈起来。
「你实在hō͘人真讨厌，若有啥物话，tiàm chia讲to̍h好！」
「罐头工厂ê tāi-chì，请你停止chiah好！」
「啥物？」
「一定tio̍h停止进行，我kā你恳求！」
「你家己临时逃脱kám无够？你家己退股，我kah其他股东kám to̍h kah你同生死，hō͘你看扁去？不管你jōa-ni̍h有钱，我无法度原谅你chit款ê傲慢。钱算啥物？你为tio̍h钱，世界上任何重要ê事lóng ē-tàng牺牲，甚至ē-tàng hō͘ bó͘去死....」
讲到chia，清文赶紧停止，无论án怎都bē-sái讲出chit-ê秘密。想beh讲koh bē-sái讲，hō͘伊ê嘴齿感觉痒痒，一腹火koh再to̍h起来。
「你ná亲像真亲切teh kā我忠告，其实心内是惊我事业成功，而且你无愿意你ê财产hō͘我超过，你是án-ne teh想tio̍h无？」
清文án-ne teh讲，忽然感觉家己ê话真讨厌，soah惊一tiô。Án-ne kah gín-á冤家仝款pháiⁿ话相对，或是cha-bó͘人乌白相骂一样。准讲对方有án-ne ê想法，你对伊mā无可奈何，为什么tio̍h讲出hiah-ni̍h刻薄推测ê话leh？M̄是推测ê话，若去hō͘景文讲kah对对，伊用chit款kē路ê话回答ê本身，便是家己精神kē路所发出ê。Chit点清文家己无法度否认....。Tio̍h lah, 是清文家己嫉妒，认为对物欲淡薄，尤其是对金钱。但看tio̍h景文年年非常可观ê势面teh增加资产，清文讲心底无嫉妒kah反感，这是相当通俗ê事实，清文也不得不承认。....伊ùi家己ê心内挖出家己ê弱点，心内真懊恼。
景文真清楚chit种情形，因为伊kā人类ê精神khǹg-tī低水准顶面，像讲社会上有人谈论某某人jōa了不起，人格清白，景文听了bē有钦佩，mā无感觉可畏。伊认为he只不过是一个标签，阿兄清文chit点iáu算bē-bái，bē有chit款情形。景文tī社会上接触ê人，真chē是堂堂ê空壳。所以在景文看起来，人格ê高低，只不过是五十步kah一百步之差而已，无啥物了不起。无论in阿兄对伊bat有pháiⁿ ê批评或是卑视，伊lóng无感觉痛。问题m̄是tī标签，是在tī皮包内底ê内容。
「无论你án怎看待我ê心意lóng无要紧，总是希望你暂时停止，我无ài讲pháiⁿ听ê话....」
「Taⁿ好bē！你何必为我操心啥物？」
「当然tio̍h操心，假使你若失败，破产，beh án怎chiah好？」
「你chit-ê人，你teh担心chit款tāi-chì....」 清文不知不觉想beh进一步逼óa去ê时，本来会退后ê景文竟然勇敢过来面对，而且有一股改变清文主意ê热情。
「请你慎重考虑，这m̄是阿兄你一人ê问题，若无顺利，陈家全体lóng....」
景文án-ne讲了，想beh轻轻搭阿兄ê肩胛头ê时，因为景文极力劝解清文，清文忍无可忍，同时忽然明白景文坚持ê忠言背后ê含意。清文出力kā景文sak开，瘦koh薄板ê景文hiaⁿh起来，但因为身体轻，摇摇leh iáu保持身体平衡无跋倒，m̄-koh运气bái，撞tio̍h后壁ê棕榈栽盆，tī砖á路面liàn过去，重重phah tio̍h头壳。
清文走过去kā小弟抱起来，掠tiâu伊ê颔颈讲：
「我明白ah, 你是担心我事业失败了后，会来哀求你救济。好，做你放心，我死mā bē kā你讨饭食。」
