《《陈夫人》日译台e5台湾小说 第二部》 |
 |
 |
|
 转寄 |
《陈夫人》第二部 亲子 第二章（更新版）
作者 庄司总一 着 杨东杰 指导 林俊育 台译 2016.10.30
安子tùi教会拜三ê祈祷会tńg来，比清文早半点钟到厝。
Hit暗，她se̍h tùi后壁门入来，她ê khiā家tī陈家大厝东pêng ê护龙（hō͘-lêng）接续落去ê所在，若tùi正门ê大通路入来，行到她ê khiā家ê距离有小khóa khah远；而且hit中间tio̍h tùi前埕通过厝ê gîm檐（chîⁿ），会经过其他人ê房间，自然to̍h会tú-tio̍h众人，tio̍h kah in讲话，mā有可能tú-tio̍h人teh冤家吵闹。所以，若是紧急ê时，á是操烦，心情无清爽ê时chūn，安子就习惯tùi khah近家己khiā家ê后门溜入来。
总是，kah tùi正门无仝，若se̍h tùi后门，tio̍h经过一段a-cha ê小路。陈家kôan墙ê外口，有tòa一kóa khah低层ê人，in hit片无清气ê khiā家连接tī陈家ê后门，看起来kah-ná皮癣ê款式。陈家chit-pêng ê围墙tī要点ê所在，有插一kóa麦á酒罐kah玻璃碎片，所以手iáu未去摸tio̍h，心肝头to̍h有去hō͘ 它割tio̍h流血ê感觉，每pái安子看tio̍h，to̍h bē爽快。陈家惊去hō͘ hiah-ê皮癣秽（òe）tio̍h，mā惊去hō͘ hiah-ê sàn-chhiah人侵犯抢夺，所以并无真正优美kah丰盛ê生活。因此án-ne，厝里ê主要人物绝对bē去使用后壁门，kan-taⁿ仆人kah cha-bó͘-kán-á tùi chia teh出入，而且天iáu未暗，后壁门就会锁起来，所以，每暗lóng会听tio̍h人phah门，á是kòng铁门环，teh叫「开门！开门！」ê声。
安子想讲门已经锁起来à，佳哉门闩(chhòaⁿ) iáu未闩起来。Tùi安子khiā家ê楼脚，灯火泄过树á缝，kan-taⁿ有一屑á光；无月娘ê暗时，内埕暗bong-bong。若是热人ê时，会听tio̍h cha-bó͘人teh大细声讲话，kah kah-ná teh哀伤亡国ê弦á声。总是，tī有感觉寒ê冬天，除了听tio̍h竹林内ê风声以外，四界恬chih-chih， lóng无啥物声。
安子tùi后壁门入来，行向有灯火ê khiā家。Chit时，面头前ê小门，有一个人影出现。安子tú行到杨桃树桠(oe) jia-cha̍h步道ê所在，所以她看会tio̍h对方，对方却无法度发觉她。Chit-tia̍p，日本式khiā家照出来ê微微á光线，hō͘ 安子ē-tàng看见人影；虽然看bē出是啥人，m̄-koh，知影一定是cha-bó͘人。Hit-ê cha-bó͘人向有灯火ê安子ê khiā家探头一下，就用kah-ná是缚脚cha-bó͘人ê行路姿势，碎步行向内埕入去。
「Chiah-ni̍h暗à，到底是啥人leh？」安子án-ne teh想。
安子有看见hit-ê cha-bó͘人确实一手the̍h小型ê竹椅á。陈家后埕有几欉大细ê果子树，tī夜空中伸展茂盛ê树枝。总是，chit-má m̄是出果子ê季节，tī chit-ê无人影ê暗时，她专工the̍h脚踏台beh来挽果子，he to̍h真奇怪。
安子已经入来门内，m̄-koh因为心内感觉奇怪，就koh倒tńg去hit-ê cha-bó͘人行ê方向，beh kā她看māi。Hia有一个十坪大ê矩型水池，顶面有浮睡莲，koh-khah过去ê内面有树木。安子khiā tī无水蛙teh哮ê水池á边，注目看暗bîn-bong ê所在。她无看tio̍h鲤鱼teh跳，mā无听tio̍h厝里ê人teh笑，á是红婴á暗时teh哮ê声，kan-taⁿ风微微á teh吹，真恬静。安子kah-ná teh期待啥物tāi-chì，恬恬khiā leh，向看无物件ê所在斟酌看，tī寂静ê状态中期待有啥物会出现，m̄-koh，只有大自然引起ê tín动，并无啥物意义tī-.leh。总是，chiah一目nih久，安子就听tio̍h有啥物声；m̄知是cha-po͘ á是cha-bó͘，一种teh哼ê低声连续不断，m̄-koh，她若一行óa去树á中间，哼声就停，koh再回复原来ê死静，tú-chiah ê人影mā消失无踪。安子无意识tio̍h家己行为ê特别意义，她就án-ne tńg去厝里mā ē-sái；事实上，她to̍h已经beh oa̍t tńg身ā。Hit时，她忽然发见tī一欉树á边，有一个长lòng-sòng，看起来kah-ná棍á ê人形，安子不知不觉叫出声来。她看tio̍h一个cha-bó͘人peh起lih脚踏椅，颔颈伸长，双手掠tiâu高高ê树枝，听tio̍h安子ê声chhoah一tiô，失神ê目chiu起乌暗眩ê款，cha-bó͘人踏无tio̍h叠脚椅，就án-ne摇摇leh倒落去土脚。
「Ah！玉帘姊。」
安子发出ê声音，kah-ná一下kā水瓶倒头栽，tùi细细ê瓶嘴kan-taⁿ流出一滴滴á水ê声。
「玉帘姊，玉帘姊！你ná会做chit款戆tāi-chì leh？你....」
安子尽力kā倒tī土脚ê cha-bó͘人身躯抱起来，m̄-koh，失神ê玉帘lóng无回答。安子kā她ê上半身抱起lih脚头u顶，出力摇她ê头，频频叫玉帘ê名。
Kám讲死去ah！？
安子tú注意tio̍h taⁿ害ā lah，tú-chiah发见tio̍h人影，随时to̍h jiok过来，kan-taⁿ过一屑á时间niā-niā，kám讲她已经吊tāu成功，死去à？当她陷落时间错觉ê时，kah-ná一阵山风teh扰乱安子的心胸。Tī微微ê星光之下，玉帘ê面ná亲像幽灵hiah-ni̍h苍白。原本kah-ná龙眼籽ê乌金目chiu仁，hō͘ 长长ê目chiu毛盖tiâu-.leh，隐藏tī小khóa naih-o ê目chiu内；看起来骄傲款式ê翘鼻á，taⁿ kah-ná吐bē出傲慢薰烟ê大理石烟筒管；半开ê嘴唇ná亲像死去ê贝壳，mā kah-ná白痴仝款。玉帘到底是死去ā，á是teh困？假使无明á载，就是讲无时间ê概念，án-ne，死kah困之间就差无到一mi-lih(milimeter，厘)。总是，有时间tī-.leh，时间tùi thán-chhiò ê cha-bó͘人身躯，传来到安子贴tī她身躯ê手。安子无koh摇玉帘kah-ná石头ê头壳，她直接用手摸她ê胸坎á，她ê乳房kah-ná静静ê大海teh呼吸。
「我....iáu活leh o͘h？」
玉帘phah开目chiu喘一下大气。实际上已经是自杀未遂ê结局；她kah-ná感觉颔颈iáu束tiâu-.leh，用手摸她家己ê颔颈。
「是án怎我iáu活leh leh？」
她半信半疑，koh问一遍，chiah忽然发觉家己iáu活leh。就án-ne，对活命ê否定kah反抗，m̄是，应该是无意识对活命ê肯定kah接纳，hō͘ 她真正起狂大欢喜；玉帘án-ne大声hoah了，就仓仓pōng-pōng peh起来。
「M̄好hiah大声hoah lah！你kám m̄惊hō͘人知影你做chit款戆tāi-chì？拜托leh，小镇静一下。你ná会做出hiah-ni̍h惊人ê tāi-chì leh？」
安子拚命抱tiâu玉帘，用手掩tiâu她想beh koh嚷ê嘴。玉帘chit时喘气真紧，嘴koh去hō͘人掩leh，艰苦kah挡bē-tiâu，真无简单chiah kā安子ê手póe开了后，已经全身无力。「安子嫂....」玉帘án-ne讲了，就接bē落去。安子teh等风涌ê水面平静落来，她beh hō͘ 玉帘ê心充分歇困，就渐渐放松抱tiâu玉帘ê手。经过一段沉默ê时间，安子开始teh想讲到底两人siáng tio̍h先开嘴khah好ê时，玉帘已经tāi先phah破沉默。
「你看我án-ne是m̄是真见笑？」
玉帘iáu是显出抗议ê口气，m̄-koh暗淡无力ê声音已经露出她内心ê失败kah绝望ê感觉。
安子问她为啥物会有chit款恐怖ê想法，玉帘kan-taⁿ讲活了真无面子，无想beh活落去；她m̄肯讲出寻死路ê真正理由。
「你若知影理由，会kā我笑，koh宣扬出去，以前我对待你....」
玉帘讲bē落去，mā是m̄敢讲落去。安子hō͘ 翁婿清文tùi远远ê日本内地娶tńg来陈家ê时，厝里ê人真chē无表示欢迎，尤其是玉帘出tī女性本能ê嫉妒kah敌意，不时对新来ê阿嫂阻碍á是欺负。Chit-má换一个位置来看，她是一个败北者。个性好强ê玉帘平时绝对无法度忍受chit款情形。总是，她kah景文之间长期来无幸福ê婚姻生活，chit-má已经kā她ê斗争力完全消磨掉ā。总是，她siuⁿ过kā对过去家己行为ê m̄-tio̍h看做是罪恶，所以陷落因果报应ê迷思观念，soah感觉自责kah惊惶。
「我并无恨阿嫂，我所恨ê kan-taⁿ是景文，请你mài kā我责备。」
「Mài讲hiah-ê，我m̄是hit款人。你若无相信人，就无法度相信家己。」
「请你原谅。」
「玉帘姊，我真了解你不幸ê婚姻，m̄-koh，何必tio̍h án-ne想bē开leh？」
「阿嫂是好人，我就坦白kā你讲，m̄-koh....」
「我bē kā别人讲。」
「我chit-má koh大腹肚ah。」
「Án-ne ná会想bē开leh？」
「我无想ài chit-ê gín-á，kan-taⁿ想tio̍h gín-á出世了后就惊，因为ta̍k工会烦恼bē完....」
安子揽tiâu玉帘，kā她安慰，慢慢á行向厝里。总是，玉帘chit出tī意料之外ê告白，hō͘ 安子惊一tiô，soah kā脚步停落来。Kám会是婚外怀孕？Kám会án-ne？玉帘看起来真性感，美貌koh妖娇，m̄-koh，实际上并bē chhìn-chhái乌白来，ē-sái讲是坚持清白；准讲比一般人khah多情，她ê性格mā m̄是会随便po̍ah感情ê人。若是玉帘真正陷落差错，安子感觉真可惜。
「到底是怀孕siáng ê gín-á leh？」安子当beh án-ne问ê时，玉帘讲：
「我几nā年前to̍h咒chōa无beh生景文ê kiáⁿ，taⁿ soah....」
玉帘开始án-ne讲ê时，安子内心感觉家己tú-chiah ê猜测实在是真pháiⁿ势，同时mā松一口气。她kā玉帘揽khah ân，koh再向前行去。
两人行到池á边ê椅条坐落来。池á内暗bîn-bong，湿tâm ê睡莲叶反射出幽幽ê星光；鲤鱼撇（phiat）水ê声音连续两三下，扰乱了kah-ná tī薄绢顶面teh眠梦ê静静空气。了后，有房间传出婴á暗时啼哭ê声，ná亲像冬夜远远听会tio̍h ê海水声，听起来真稀微。然后，乌白报时ê鸡公mā teh啼，虽然时都iáu未到。总是，chit-má所有ê物lóng为tio̍h chit两个cha-bó͘人开始teh起动；死去koh进入墓穴ê性命，已经kah-ná拉撒路koh活起来(译注：约翰福音11:1~16 ê koh活故事) à。
「真佳哉有hō͘ 我发见，若无to̍h....」
安子深深感谢chit-ê偶然ê发现，án-ne teh讲。玉帘听了，随时kui身躯phak落去安子ê脚腿哭出来。Chit-ê不幸cha-bó͘人ê灵魂虽然无幸福感，m̄-koh，tī安子脚腿顶面起伏ê肉体却呼吸tio̍h幸福；活leh总是tio̍h感谢。安子tùi玉帘啼哭流出ê目屎，鼻tio̍h kah-ná芳油ê气味，就án-ne放teh chhut-chāi她哭，然后问她讲：
「生lín翁ê kiáⁿ，是án怎会hiah-ni̍h苦恼neh？」
这是一个无聊ê问题。M̄-koh，hiah-ni̍h不和ê夫妻之间，hit-ê受翁婿凌辱ê bó͘ ê心情，安子实在无法度想像。
「若是án-ne，为啥物无ài离婚？生翁婿ê kiáⁿ若是hiah-ni̍h苦恼，ná会无ài结束chit-ê婚姻？你m̄是伊ê bó͘，细姨阿龙chiah是伊ê bó͘，kám有hiah-ni̍h大ê差别？竟然会hō͘ 你到beh chhōe死路ê地步，为何无ài一刀两断leh？」
安子想讲若讲kóa无实际ê话根本to̍h无路用，mā无法度表达她深深ê感情kah真诚ê热情，所以她就讲出冷酷ê话。
玉帘ê激情已经退潮，溢起来胸前ê啼哭余波mā停止，她就tùi安子ê脚腿gia̍h头起来，讲：
「离婚kah chhōe死，tó一项khah痛苦？这无啥好决定。总是，chhōe死ē-sái，却bē-sái离婚。你mā有可爱ê清子，设使你ê gín-á kah老母离别，老母离开gín-á，你想看māi，he有gōa悲惨leh？」
玉帘用暗淡ê声音án-ne抗议。实际上，tú-chiah安子hiah-ê话，若是冷静ê时，只不过是一篇理论niā-niā，安子讲bē出嘴。第二夫人阿龙已经生三个kiáⁿ，m̄-koh，陈家直系ê孙，就是景文ê长男景仁kah cha-bó͘-kiáⁿ美圆ê重要性已经bē变；若是离婚，玉帘bē-tàng chhōa chit两个kiáⁿ离开陈家。她已经hō͘ chit-ê坚固ê传统kah世俗缚死死，tī chit-ê中产阶级社会，离婚是相当困难ê tāi-chì。总是，假使本人有相当ê勇气kah决心来离婚，续落来ê障碍beh án怎去面对？对玉帘来讲，hit-ê kah-ná拳头拇ê缚脚，kám有法度回复原来ê平底脚盘？若需要靠劳动来生活，有啥物职业可能会适合她leh？而且她ê后头厝王家有困难借钱ê情况，她是无法度做一个闲sian-sian ê cha-bó͘人；koh再讲，她已经是超过盛年ê岁数，mā chhōe无对象thang再婚。
「Kám无好好á来和好ê办法？」
安子绝望án-ne讲，显然是无啥物ǹg望ā。
人teh讲，夫妻bē和to̍h kah-ná kah蝎á tòa做伙ê灾难；m̄-koh，世间上mā有一世人bē合(ha̍h)ê夫妻继续teh tòa做伙。总是，玉帘ê心情无hiah容易对夫妇不和有免疫性。景文可能是一个ài钱koh冷淡ê人，tú亲像做bó͘ ê惯势翁婿ê放荡一样，玉帘对景文ê性格mā ē-sái免hiah-ni̍h计较；而且景文并m̄是放荡成性，伊mā有踏实koh勤勉等等ê优点。M̄-koh，针对chit-ê性格上ê优点kah缺点，景文内心深处ê心灵，玉帘lóng无法度去亲近kah接触。这m̄是景文性格好pháiⁿ ê问题，却是性格siuⁿ过显明，可能是án-ne chiah会hō͘ 玉帘无法度突破hit-ê障碍，来接触伊真实ê灵魂。既然夫妻做伙生活，一年三百六十五工mā m̄是kan-taⁿ互相怨恨，chē少mā是有婚姻ê乐园。M̄-koh，这kan-taⁿ是一暗ê安宁休息，m̄是真正ê乐园，只不过是一场眠梦niā-niā。若是夫妻无精神上ê亲和，总讲一句，性就无啥物意义tī-.leh，kan-taⁿ留落来悔恨kah侮辱感niā-niā。已经七八年无koh生kiáⁿ，mā决心无beh koh生，却忽然发现有娠ê玉帘to̍h是chit种心情。玉帘怨恨丈夫，m̄-koh对家己koh-khah受气；tio̍h生家己已经决心无beh加生ê kiáⁿ，chit种违背家己意志ê tāi-chì，实在是真oh原谅ê耻辱。这完全是出tī家己ê问题，家己无责备翁婿á是怨恨ê权利。Chit时，她chiah觉悟家己ê m̄-tio̍h，知影她无法度要求任何人，mā bē-sái有啥物怨言。
「人到底为啥物目的来活neh？」
玉帘再三问家己chit-ê问题，结局kā chit-ê m̄知答案ê问题the̍h来问安子。
安子mā无法度随时回答她；这m̄是食茶饼ê时teh谈论ê哲学议题，mā m̄是lóng无危险ê讲台说教，这是针对实际上面临生死选择ê深刻问题，绝对bē-sái chhìn-chhái回答。
人是m̄是有活leh ê价值？任何人都无法度hiah容易来回答chit-ê疑问。大体上讲起来，会想起chit-ê问题ê人。伊ê精神就是无健康。咱人本来to̍h是活leh ê，若是beh对活leh有啥物价值贴标签，tio̍h ài tī无限ê时间kah空间内面受创造ê性命，有向前延伸ê意志。Chit-ê受赏赐ê性命tio̍h ài加上啥物leh？就是ài加上求神ê心，mā ē-sái讲是爱心。
「不幸ê时chūn，á是破病ê时chūn，lóng会想beh chhōe求thang óa靠ê人，kám m̄是？这就是心内开始想beh óa靠啥物、chhōe求啥物ê时chūn。倒péng来讲，幸福á是欢喜ê时chūn，mā是tio̍h ài有仝款ê心情。Kan-taⁿ家己单独体验无够额，传hō͘ 翁婿kah kiáⁿ儿mā是无够额；无论啥人都有chit种心情，kám m̄是？」
「我听了虽然无真了解，m̄-koh，阿嫂是m̄是讲tio̍h ài有信仰上ê神？」
「Eh，kan-taⁿ全心致意家庭á是夫妇，我认为m̄是充分ê生活方式。以你ê情形来讲，你既然无kah意景文，这是无可奈何ê tāi-chì。我想，你不如kā心肝khǹg tī其他方面，像讲khǹg tiám kiáⁿ儿ê身上，á是koh-khah全心投入广阔ê人生。总是，你kan-taⁿ恬恬bē-sái得，tio̍h ài有行动；有所作为chiah是重要ê，这是我kah清文久长生活中所体会tio̍h ê心得。一个人若是kan-taⁿ思考kah用嘴讲，我想he无啥意义。」
安子并无提起宗教，mā无用说教ê方法，koh khah无叫她tio̍h去教会。Tio̍h用啥物来hō͘ 家己活落去，chit点玉帘chit-má已经真清楚à。
