《《陈夫人》日译台e5台湾小说 第二部》

 | | | 转寄

《陈夫人》第二部 亲子 第一章（更新版）

作者 庄司总一　着 杨东杰 指导 林俊育 台译 2016.10.23

人力车tī凤凰木并排ê道路teh跑走，陈清文坐tiàm车顶摇来摇去。

放射形道路之一ê chit条路，树木并排，ē-sái讲是久年来受污染ê南岛旧都ê肺脏，tùi都市ê咙喉流入去芳气。春天到夏天之间，hō͘ 人感觉爽快ê绿色中间有散散ê红点，chiah-ê艳丽ê凤凰木chit-má已经谢，乌ta有尺gōa长ê策lak落来树脚ê路面，看起来已经是冬天。总是，烧lō ê微风引诱附近ê仙丹、檨á树、莲雾等等ê树木，想beh赶紧tī春天醒起来。星辰满天ê恬静暗暝，街路ê目chiu皮mā已经kheh起来à，m̄-koh车辆犹原来往不断。

Tī车顶摇来摇去ê陈清文，tī hō͘ 人无爽快、无刺激koh hō͘ 人麻醉ê暗暝空气中，无一时á就起爱困，soah陷落去茫茫渺渺ê气氛。总是，tùi头前来ê人力车灯ê火影，hō͘ 伊ê头壳忽然清醒起来。

伊想讲事业到底beh tùi tó一方面开始chiah好？「你无法度亲像智慧kah财富两全ê所罗门王lah。」安子bat án-ne kā伊滚sńg笑过。实际上，清文已经开始teh起罐头工厂。对chit件tāi-chì，伊家己mā是有小khóa感觉好笑；做seng-lí等等是小弟景文á是类似ê人ê领域。

虽然是án-ne，景文chit-ê人....。
Hit暗，几位股东聚集，beh谈论kah chit pái事业相关ê tāi-chì。Tāi-chì是早to̍h决定好势，m̄-koh，股东之一ê景文忽然讲伊beh退股。

伊ê理由是讲最近日本内地景气无好，渐渐会波及台湾，所以对chit pái ê事业将来ê发展性，伊无把握。起初大家是tùi想beh协力来做ê希望kah热情出发。总是，事到如今，家己beh抽脚，大家mā是无办法。

景文投出ê chit粒石头并bē引起啥物波纹，m̄-koh，大家看伊beh逃走，就会感觉不安，mā想beh来改变决定。正面反对伊ê kan-taⁿ王肇基医生一人。王肇基是景文ê bó͘ ê小弟，tī街á teh开业，伊对in姊夫有抱恨tī-.leh。Hit当时王家面临破产ê时，景文lóng无kā伊关心，mā无tàu出半sián开业费，koh听讲in阿姊玉帘一直骂景文是一个无血无目屎ê人，tiāⁿ-tiāⁿ为chit项事流目屎。所以tī chit-ê关键时刻，伊久长以来ê郁卒就一时爆发。
「你讲因为景气bái，就beh退股，你kám kan-taⁿ会晓想beh thàn钱？我早to̍h知影你真冻霜。我掠准你对chit pái ê事业，已经有充分了解lín阿兄ê宗旨，想bē到你到chit-má chiah透露弱者ê声，án-ne，你起初ná会来加入投资neh？你真正hō͘ 人感觉真bē爽快！」

景文听tio̍h王肇基激烈ê语气，感觉真困惑。伊用手抓（jiàu）剃平头ê头壳，m̄-koh无抵抗，只是露出卑鄙无胆ê微笑，kā对方激动兴奋ê讲法泼冷水。
「M̄是lah，我对阿兄ê想法真了解，m̄-koh....」
「你只不过是用投机ê心情来参加，到中途渐渐了解阮真正ê理想kah目的，你认为bē-sái，就kha-chhng pōaⁿ-pōaⁿ leh，想beh làng-káng做你soan。你无啥路用lah，kan-taⁿ想beh thàn钱，若无thàn钱to̍h....。」
「Mài koh讲我ài thàn钱、thàn钱lah！M̄-koh，创业bē-sái无考虑利纯，若经济上无顺利，无论gōa大ê理想mā会变成水泡。讲实在话，肇基君，chit-má m̄是创业ê好时机，我早to̍h想beh向你kah阮阿兄提出忠告。」
「你免假有心lah！你对chit项事业ê想法，kah阮根本都无仝，án怎讲都无chhái工lah。」

清文真无奈teh听in两人ê对话。王肇基不时teh观察清文ê面色，想讲做阿兄ê对景文无信用ê行为应该tio̍h严格责备；大家mā认为清文chit时会受气来谴责in小弟，所以心头不安ê视线lóng集中tī清文ê面上。总是，清文并无责备小弟ê款式，最后kan-taⁿ án-ne讲一句话：
「对我ê宗旨kah今后ê方针感觉不安ê人，ē-sái退股，而且是jú早jú好。」

Chit句话m̄是kan-taⁿ对小弟景文讲ê niā-niā，mā是对因为景文退股，就信心动摇ê人讲ê。

清文心内感觉真奇怪，当初伊beh设立水果罐头制造事业，lóng有kā伊ê动机、抱负á是经营方针讲hō͘ 投资者知影，伊想讲大家lóng已经有相当ê理解kah共识。M̄-koh，chit-má看起来，大多数ê人iáu是认为小弟景文ê财力kah经营才能chiah是唯一可靠ê，in mā是kan-taⁿ想beh thàn钱；总讲一句，to̍h是kah景文仝党ê lah。

无论如何，景文chit-ê脚siàu是家己ê小弟，讲起来是一个hō͘ 人bē爽快ê人。以伊chit-má ê财产kah收入，投资两万三万kám是啥物冒险ê tāi-chì？To̍h准讲是kā chiah-ê钱hiat落去水沟á，chit-ê时chūn目chiu激kheh-kheh，恬恬mài讲beh退股，án-ne chiah是男子汉气慨，kám m̄是？讲起来，清文是chit-ê事业ê发起人，家己ê亲兄弟soah先beh逃走，kā好好ê计划破坏，tī外人ê面前做出chit种无体统ê tāi-chì，无顾虑大局teh án-ne做ê景文，实在是厚面皮koh无智慧。

清文tī股东会议中，心内非常愤慨，m̄-koh，tī众人面前不得不控制感情，想讲tńg去厝里chiah好好á kā伊教示；若无kā伊siàn嘴phóe，chit口气吞bē落去。总是，真不可思议，伊行到外口，坐起lih人力车顶ê时，冬（译注：原文是「春」）天暗时吐出柔软神秘ê丝，缠tiâu肉体，愤怒ê感情soah tī内面结茧。清文并m̄是有意beh制造宽大ê心胸，其实是伊已经陷落tī一种无气力ê虚无感。

Chit时亡父阿山ê灵魂hō͘ 一种kah-ná无所作为ê雾包围leh，忽然罩入清文ê心中，hō͘ 伊感觉真奇妙。

伊tī人力车顶仰望天空，tī hia有无限ê空间kah永远ê时间。总是，无限是啥物？咱活leh显然m̄是为tio̍h he；kah无限量ê来比，咱日常所思考kah所使用ê数量，一或一千，相差到底有gōa chē？Chit-ê世界是有定量ê，kah马戏团ê技艺仝款，咱以危险ê款式khiā tī限定ê球顶面，kan-taⁿ ǹg望mài tùi球ê顶面lak落来；头尾若顺利表演结束，就会得tio̍h观众ê pho̍k-á声。若kah天顶悠久无限ê星光比起来，地上teh爬ê人力车ê灯影是何等ê微细，ē-sái讲是短暂ê光芒niā-niā。M̄-koh，这to̍h是人生，人不得不tī chit内面生活。准讲水果罐头制造ê行动是笑诙ê舞蹈，该做ê tāi-chì mā tio̍h彻底来做。
「头家。」

人力车夫忽然teh kā伊叫，hō͘ 清文tùi眠梦中醒起来。
「头家是陈清文先生ho͘ⁿh？」
「你ná会知？」
「是án-ne lah，阿山老爷葬式ê时，我hông chhiàn去扛棺材，而且我ê小妹mā hō͘ 人卖去贵府做cha-bó͘-kán-á。」
「Chit-má kám iáu-teh做？」
「无lah，已经过身ah。Tī贵府做cha-bó͘-kán-á ê时，有kah主人生一个kiáⁿ。Hit时m̄知啥物原因，soah hō͘ 陈家赶出去。」

人力车夫无意中ê话，hō͘ 清文忽然起怀疑。伊是老父阿山kah cha-bó͘-kán-á所生ê kiáⁿ，hit-ê卑贱ê cha-bó͘-kán-á kā伊生落来了后，无gōa久就hō͘ 陈家赶出去。伊想讲若án-ne讲起来，chit-má所讲ê cha-bó͘-kán-á to̍h是家己ê老母loh？....应该无hiah-ni̍h bái ê tāi-chì，因为第一，照年代算起来，hit-ê怀疑bē成立。因为暗时看bē清楚，而且tùi背后来看，无法度正确判断hit-ê cha-po͘人ê年岁kah体型。总是，tùi伊讲话ê声kah形态，以及伊无啥有气力ê拖车款式来推断，伊确实m̄是真有威势ê少年人。总讲一句，清文想讲chit-ê人无老kah讲有一个小妹ē-tàng来生已经四十岁ê我。

Tùi chit点来讲，已经无疑问ê余地，m̄-koh，无论如何，清文感觉无问伊一kóa问题bē-sái，因为伊kah车夫之间并m̄是完全无关系；清文忽然陷落tī chit-ê单纯ê感情。总是，这m̄是社会性ê关系，是人类自然ê牵连；是kā贴tī kha脊phiaⁿ顶面ê铝板登记号码the̍h掉ê车夫，kah the̍h掉陈清文社会性记号ê家己之间，普通ê性命关系。
「请问你叫啥物名？」
「你是beh问阮小妹ê名？」
「M̄是，我是beh问你ê名。」
「我叫李万丁lah。」
「看起来你已经年岁bē细，请问贵庚？」
「讲实在，我m̄是拖人力车ê年岁à，因为已经四十八岁loh。」

李万丁讲话ê声听起来有小khóa pháiⁿ势ê款；其实，五十岁iáu teh做苦力ê mā是真chē。Tùi普通ê苦力来看，街里ê车夫算是相当高等koh收入chē。总是，李万丁hō͘ 人有小khóa怀疑，因为tú-chiah伊有讲伊做工人ê bó͘ 先死，留落来五个iau饿ê kiáⁿ，ē-sái讲伊ê家境非常惨淡，而且koh讲伊家己ê年岁已经大ah。台湾人ê车夫差不多全部lóng是thǹg赤脚，无论是石头á路，á是热kah beh熔去ê打马胶路顶面，in mā kah-ná有穿皮鞋ê款，脚底lóng无感觉，照常teh走。李万丁昨昏残残（chhân-chhân）买一双树乳底ê tha-bih (译注：足袋；日本式分趾鞋袜)。伊自觉体力衰退kah对劳动ê不安，tùi使用其他人lóng无teh用ê tha-bih hit瞬间开始，成做一种决定性ê起头。

行无几步路，伊就流汗phīⁿ-phēⁿ喘，kah人客讲话mā三声无奈；李万丁感觉真见笑，清文mā感觉会出来。
「Lín小妹受委屈，是啥物原因？是m̄是tī厝里hông苦毒？」
「无无无....」车夫气喘bē离，连讲话都无容易，后悔无应该讲chiah-ê话。伊真无简单koh讲落去：「Mài讲是hông phah，颠倒是受tio̍h好款待，kah主人生一个细姨á kiáⁿ。」
「对方是啥人？她是服侍啥人？」
「阿山老爷ê小弟lah。」
「是阿传，hit-ê阿叔已经死去à。」
「头家，你有去日本内地ê学校读册，久长无tī-.leh。总是，阮小妹并无啥物无幸福。她所生ê kiáⁿ真精光，有发展，无啥物特别ê无好。阮小妹是一个超过厚情ê cha-bó͘人，kiáⁿ死去mā无怨叹。总是，了后无gōa久，头壳就变怪怪。」
「Bih起来to̍h好ā。」
「无啥物thang好bih起来；精神变怪怪是因为kiáⁿ死去，她时时刻刻讲hit项事，m̄-koh并m̄-bat听她讲贵府ê pháiⁿ话，kan-taⁿ tiāⁿ-tiāⁿ都一口气吞bē落去。」

M̄知是气接bē落去，á是有啥物踌躇讲bē落去，李万丁停顿一时á chiah-koh讲：
「横直to̍h是起siáu，m̄知啥物原因，她不时都án-ne讲：Koh再出世mā是beh koh做sàn-chhiah人，是án怎leh？戆大呆，是án怎无beh出世做有钱人？Án-ne讲起来，她ê意思to̍h是：Chit世间有银牛kah水牛两种，是án怎会án-ne？chit-ê谜无人知。若是知影hit-ê原因，水牛chit-pêng会讲一kóa奇妙ê tāi-chì。」

清文忽然想讲beh针对chit项事讲几句á话；chit-ê车夫事实上kám完全照siáu cha-bó͘ ê话teh讲？这是m̄是伊家己借题发挥所编出来ê故事？无论如何，chit-ê银牛 (有钱人) kah水牛 (劳动者) ê对立关系，mā是清文本身永远无解ê谜题。

富有kah sàn-chhiah是创造主耶和华所定ê；hō͘ 伊发光ê是耶和华。
Chit句圣经节ē-sái当做chit-ê宿命论一时性ê说明kah解决；银牛可能想讲chit句话讲了真好，m̄-koh，水牛kan-taⁿ有chit句话kám会满足？拚命拖人力车ê人kah坐tī车顶ê人ê关系，就是讲已经到无适合劳动ê年龄，mā iáu-koh teh流汗phīⁿ-phēⁿ喘拖人力车ê cha-po͘人，kah hit-ê kah伊倒反，坐tī车顶ê cha-po͘人ê关系，chit款tāi-chì用头壳一想，就知是实际上无法度改变ê现实状态。结局，in两人之间kám ē-tàng互相hō͘ 人光，kám ē-tàng亲和kah融合？

这对今后beh创设ê事业，是m̄是tiāⁿ-tiāⁿ会出问题？Tio̍h如何来克服困难？真无简单！真无简单！清文本来想讲充满希望kah欢喜ê船，chit-má已经搁（khò）tio̍h暗礁（ta）。